1. Кыӵе тодон-валан тӥ басьтӥды Кылдытӥсьмы сярысь?

 ТӤ ИЕГОВАЛЭН Адӟись-Ивортӥсьёсызлэн семьяязы будӥды ке, соку пичи дырысеныды ик Инмар сярысь тодыны кутскиды, дыр. Анай-атайды веразы тӥледлы, Иегова быдэс дуннеез кылдытӥз шуыса, озьы ик со сярысь, кыӵе солэн ӟеч сямъёсыз вань но кыӵе солэн паймымон малпанэз вань адямиос пумысен (Ул.-выл. 1:1; Ап. уж. 17:24—27).

2. Мар малпало соос сярысь, кинъёс Кылдытӥсьлы оско?

² Нош тросэз Инмарез Кылдытӥсен уг лыдъяло. Озьы ик соос уг оско, со вань шуыса. Соослэн малпамзыя, улон ас понназ кылдӥз, собере вань улэп макеос эволюцилы луыса пӧрмизы. Тазьы малпаны быгато дышетскем адямиос но. Соос вераны быгато, Библия наукалы пумит мынэ шуыса но дышетскымтэ но пӧяськонлы капчиен сётскись адямиос гинэ кылдытонлы оско шуыса.

3. Малы туж кулэ аслыд оскыны, Кылдытӥсь вань шуыса?

³ Быгатоз-а кыӵе ке тодмо адямиослэн малпанзы милесьтым кылдытонлы осконмес лябӟытыны? Со герӟаськемын соин, малы ми оскиськомы, Иегова Кылдытӥсь луэ шуыса. Ми оскиськомы соин, малы ке шуоно озьы милемлы мукетъёсыз веразы, яке ми асьмеос дыр висъямы, та оскытонъёсты эскерон понна? (1 Кор. 3:12—15). Кӧня гинэ аръёс ӵоже ми Иеговалы медам ужалэ-тырше, милемлы ваньмылы осконмес юнматыны кулэ. Озьы лэсьтӥмы ке, нокыӵе «ӧрекчи дышетонъёс» но, «адямиослэн мадён-веранэнызы герӟаськем дышетонъёс» но Библилы осконмес лябӟытыны уз быгатэ (Кол. 2:8; Евр. 11:6). Соин ик та статьяын ми эскеромы: 1) малы тросэз уг оско, Кылдытӥсь вань шуыса, 2) мар юрттоз милемлы  асьмелэсь осконмес юнматыны, Иегова Кылдытӥсь луэ шуыса, но 3) кызьы ми та зэмлыклы осконмес юнматыны быгатӥськомы.

4. Еврейёслы 11:1 гожтэмъя, мар со сыӵе зэмос оскон?

⁴ Куд-ог адямиос малпало: оскон возьматэ малы ке оскемез, талы оскытонъёс ӧвӧл ке но. Нош Библия верамъя, сыӵе осконэз зэмос шуыны уг луы. (Лыдӟе Еврейёслы 11:1.) Инмарлэн Кылыз валэктэ, осконлэн юн инъетэз вань шуыса. Кылсярысь, ми Иеговаез, Иисусэз но Инмысь Эксэйлыкез ум адӟиське ке но, милям вань юн оскытыса веранъёсмы, соос зэмзэ ик вань шуыса (Евр. 11:3). Иеговалэн одӥгез Адӟись-Ивортӥсез, кудӥз биохимик луэ, та малпанэз тазьы вераз: «Милям осконмы сукыр ӧвӧл, со наукалы пумит уг луы».

5. Малы тросэз адямиос оско, улон ас понназ кылдӥз шуыса?

⁵ Кылдэ юан: Кылдытӥсь вань шуыса оскытыса веранъёс вань бере, соку малы тросэз адямиос солы уг оско? Малы ке шуоно тросэз адямиос ноку но ӧз эскере та оскытыса веранъёсты. Роберт нимо Иеговалэн Адӟись-Ивортӥсез вера: «Милемлы школаын ноку но ӧз вералэ кылдытон сярысь. Соин ик мон малпай, ваньмыз та пӧяса верамын шуыса. Но 22 арес дыръям, куке мон Иеговалэсь Адӟись-Ивортӥсьёссэ пумитай, мон тодӥ, Библиын оскыны мугъёс вань, ваньзэ Инмар кылдытӥз шуыса» b. (Учке « Анай-атайёслы вазиськон» рамкаез).

6. Малы тросэз уг оско, Кылдытӥсь вань шуыса?

⁶ Куд-огъёсыз уг оско, Кылдытӥсь вань шуыса, малы ке шуоно соос сое ӧз адӟылэ. Озьы ке но куд-огъёсыз оско мукет адскисьтэм  макеослы. Кылсярысь, гравитацилы, малы ке шуоно солы оскыны мугъёс вань. Оскон, кудӥз сярысь Библиын вераське, пыкиське со вылэ, мар зэмзэ ик вань, сое адӟыны уг луы ке но (Евр. 11:1). Тросэзлэн та сярысь малпаськемзы уг поты, малы ке шуоно талы дыр но кужым кулэ. Нош адями, кудӥз та юанэн герӟаськем оскытыса веранъёсты уг эскеры, малпаны быгатэ, Инмар ӧвӧл шуыса.

7. Луоз-а вераны, вань дышетскем адямиос уг оско, Кылдытӥсь вань шуыса? Валэктэ.

⁷ Оскытыса веранъёсты эскерыса, куд-ог тодосчиос валазы, быдэс дуннеез Инмар кылдытӥз шуыса c. Роберт агай кадь ик, кудӥз сярысь вераськиз ини, нырысь соос Кылдытӥсьлы ӧз оске, дыр, малы ке шуоно соослэн дышетӥсьёссы та сярысь ӧз вераллялэ. Озьы  ке но тросэз тодосчиос Иеговаез тодӥзы но сое яратӥзы. Милемлы но, кыӵе гинэ дышетскеммы медаз луы, Инмарлы осконмес асьмелы будэтыны кулэ. Ми понна сое нокин но уз лэсьты.

8, 9. а) Мае ми али эскеромы? б) Кыӵе пайда вае котырысь дуннеез эскерон?

⁸ Мар юрттоз тӥледлы Кылдытӥсьлы оскондэс будэтыны? Ойдолэ эскеромы ньыль визь-кенешъёсты.

⁹ Эскере котырысь дуннеез. Тӥ быгатоды Кылдытӥсьлы оскондэс юнматыны, пудо-животъёсты, будосъёсты но кизилиё инбамез эскерыса (Пс. 18:2; Ис. 40:26). Макем тросгес дыр висъялоды сыӵе эскеронлы, сокем юнгес луоз тӥляд осконды, Иегова быдэс дуннеез кылдытӥз шуыса. Иеговалэн Адӟись-Ивортӥсьёсыз поттӥзы трос статьяосты, кудъёсаз вераське Иеговалэн паймымон кылдытэмъёсыз сярысь. Тӥледлы соосты валаны секыт ке но, тырше соосты лыдӟыны. Озьы ик берло аръёсы улосысь конгрессъёсын возьматэмын вал Инмарлэн кылдытэмъёсыз сярысь чебересь видеороликъёс. Табере та роликъёсты шедьтыны луэ jw.org сайтысь. Тырше соосты эшшо учкыны.

10. Вералэ пример, кудӥз возьматэ, Кылдытӥсь вань шуыса (Римъёслы 1:20).

¹⁰ Котырысь дуннеез эскерыкуды, саклыктэс висъялэ солы, мае верало кылдытэмъёс Инмар сярысь. (Лыдӟе Римъёслы 1:20.) Кылсярысь, шунды сётэ шунытэз но югытэз. Озьы ик со бордысь пото умойтэм сиос, кудъёсыз адямиослы кышкыт луыны быгато. Соин ик музъем котырын вань озоновой слой, кудӥз сое урод сиослэсь уте. Макем золгес шунды бордысь пото урод сиос, сокем тросгес луэ музъем котырын озонэз. Ас понназ потӥз-а со, мар музъемез уте? Яке кин ке но яратыса адямиос сярысь сюлмаськиз?

11. Кытысь шедьтыны луоз кылдытэмъёс сярысь оскытыса веранъёсты? (Учке « Мар юрттоз Кылдытӥсьлы осконмес юнматыны?» рамкаез.)

¹¹ Кылдытэмъёс сярысь оскытыса веранъёсты тросгес шедьтон понна, уже кутэ «Возьмаськон Башнялэн публикациосызлэсь индекссэ» (ӟуч) яке утчалэ сое jw.org сайтысь. Нырысь эскерыны луоз «Кызьы со кылдӥз?» рубрикаысь статьяосты но видеороликъёсты. Соос вакчиесь, озьы ик отын тунсыко малпанъёс верамын пудо-животъёс сярысь но Инмарлэн мукет кылдытэмъёсыз сярысь. Со сяна, отын вераське, кызьы тодосчиос, мае ке лэсьтон понна, кылдытэмъёслэсь адӟем каро.

12. Малы саклыкез висъяны кулэ, Библиез эскерыку?

¹² Эскере Библиез. Биохимик, кудӥзлэн кылъёсыз азьлогес верамын вал ини, Кылдытӥсьлы нырысь ӧз оскы, нош дыр ортчыса, оскыны кутскиз, Инмар вань шуыса. Со вера: «Наука удысысь эскеронъёслы луыса гинэ мынам осконэ ӧз юнма, нош озьы ик Библиез пыр-поч эскерыса». Библиысь дышетонъёсты тӥ умой тодӥськоды, луоз, нош Кылдытӥсьлы осконэз юнматон понна, кулэ азьланяз но Инмарлэсь Кылзэ эскерыны (Иис. Н. 1:8; Пс. 118:97). Кылсярысь, эскерыкуды висъялэ саклыктэс, макем герӟаськемын ог-огенызы Библиысь малпанъёс, озьы ик макем пыр-поч верамын югдуръёс сярысь, кудъёсыз азьло луизы, но кызьы быдэсмизы отысь азьпалзэ ивортонъёс. Сыӵе эскеронлы луыса тӥ юнгес оскоды: милемыз кылдытӥз яратӥсь но визьмо Кылдытӥсь, озьы ик Библия солэн святой духезлэн кивалтэмез улсын гожтэмын вал d (2 Тим. 3:14; 2 Пётр 1:21).

13. Вералэ пример, макем пайдаё луо Библиысь визь-кенешъёс.

 ¹³ Библиез эскерыкуды, озьы ик саклыктэс висъялэ отысь пайдаё визь-кенешъёслы. Кылсярысь, кӧня ке сюрс аръёс талэсь азьло отын верамын вал, коньдонэз яратон адямиез быронэ нуэ но со «трос секытэсь адӟонъёс адӟоно» луэ шуыса (1 Тим. 6:9, 10; Мад. 28:20; Матф. 6:24). Тупа-а та алон асьме нуналъёслы? Тани мар вераське «Эпидемия нарциссизма» книгаын: «Ваньбур люканы тыршись адямиос ӧжытгес шудо луо но ӵемгес депрессиен курадӟо. Соос но, кинъёслэн потэ гинэ, трос коньдонзы мед луоз шуыса, курадӟо психикаен герӟаськем висёнъёсын. Со сяна, соос ӵемгес ӝожтӥсько мугор висёнъёссылы». Соин ик Библия алэ милемыз коньдонэз яратонлэсь. Озьы ик малпаське Библиысь мукет возетъёс сярысь, кудъёсыз тӥлесьтыд улондэс умоятӥзы. Та юрттоз тӥледлы визьмо но яратӥсь Кылдытӥсьмылы золгес оскиськыны (Иак. 1:5). Солэн визь-кенешъёсыз ноку но уг вужмо но милемлы шумпотон гинэ ваё (Ис. 48:17, 18).

14. Мае ми тодӥськомы Иегова сярысь Библиез эскеронлы луыса?

¹⁴ Умойгес тодэ Иеговаез (Иоанн 17:3). Библиез эскерыкуды, ӵапак таӵе луыны кулэ тӥляд ужпумды. Соку тӥ адӟоды: Иеговалэн сямъёсыз сыӵеесь ик луо, кудъёссэ ми адӟиськомы, котырысь дуннеез эскерыкумы. Библия туж яркыт возьматэ, кыӵе Инмар луэ Иегова, но ми валаськомы: со — зэмос Инмар, нош малпамын ӧвӧл (Пот. 34:6, 7; Пс. 144:8, 9). Макем умойгес тодомы Иеговаез, сокем юнгес луоз милям осконмы, золгес будоз сое яратонмы, нош кусыпъёсмы эшшо но матэгес луозы.

15. Кыӵе пайда вае милемлы, куке ми мукетъёсызлы Инмар сярысь вераськомы?

¹⁵ Вералэ мукетъёсызлы Инмар сярысь. Озьы тӥ асьтэлэсь оскондэс юнматоды. Нош мар кароно, куке ужан-тыршон дыръя адями вера, Кылдытӥсьлы уг оскы шуыса, нош тӥ уд тодӥське, мар солы вераны? Учке, мар вераське та пумысен милям публикациосамы но Библиысь кыӵе кылбуръёс отын гожтэмын. Мукет дыръя адями доры лыктӥды ке, тӥ солы та сярысь вераны быгатоды (1 Пётр 3:15). Эшшо юрттэт курыны луоз быгатӥсь вын-агайёслэсь но сузэр-апайёслэсь. Адями тӥляд веранэныды соглаш ӧз луы ке но, сыӵе эскеронлы луыса тӥляд осконды эшшо но юнгес луоз. Соку тӥлесьтыд оскондэс уз лябӟытэ соос но, кинъёс адӟисько визьмоесь но дышетскемын шуыса, нош асьсэос Кылдытӥсьлы уг оско.

16. Мар луыны быгатэ, ми осконмес ӧм юнматэ ке?

¹⁶ Кӧня гинэ аръёс ми Иеговалы медам ужалэ-тырше, ваньмылы милемлы азьланяз но осконмес юн возёно. Малы? Малы ке шуоно ми сак ӧм луэ ке, милям осконмы лябӟыны быгатоз. Кызьы ми верамы вал ини, оскон пыкиське со вылэ, мар зэмзэ ик вань, сое адӟыны уг луы ке но. Нош сое, мае адямиос адӟыны уг быгато, ӵем дыръя вунэто. Соин ик апостол Павел ляб осконэз «канжаськытӥсь сьӧлык» шуыса нимаз (Евр. 12:1). Мар кароно, солэсь палэнскон понна? (2 Фес. 1:3).

17. Мар юрттоз милемлы осконмес юн возьыны?

¹⁷ Нырысетӥез, юн мылкыдын но ӵем вӧсяське Иеговалы, солэсь святой духсэ курыса. Малы? Малы ке шуоно оскон святой духлэн емышез пӧлы пыре (Гал. 5:22, 23). Озьыен, святой духлэн юрттэмезтэк ми ум быгатэ Кылдытӥсьмылы оскыны но, осконмес юнматыны но. Нош ми Иеговалэсь куриськомы ке святой духсэ, со одно ик сое милемлы сётоз (Лука 11:13). Ми Иеговалы вераны но быгатӥськомы: «Милесьтым осконмес будэты» (Лука 17:5).

18. Иеговалэн кыӵе кузьымез сярысь вераське Псалтирьын 1:2, 3?

 ¹⁸ Кыкетӥез, ялан эскере Библиез. (Лыдӟе Псалтирез 1:2, 3.) Куке нырысетӥ псалом гожтэмын вал, Израильын эксэйёслэн но священникъёслэн гинэ Инмарлэн Законэзлэн быдэс копиез вал. Нош мукетъёсыз — пиосмуртъёс, кышномуртъёс, пиналъёс но сьӧрлось лыктэмъёс — сизьым арлы одӥг пол Законэз лыдӟемзэс кылзыны быгатӥзы (К. Зак. 31:10—12). Иисус улон нуналъёсы Священной Гожтэмен свитокъёссы озьы ик кӧня ке адямиослэн гинэ вал. Со сяна, соосты шедьтыны луэ вал сӥнагогаосысь. Туннэ чылкак мукет югдур. Быдэс дуннеысь тросэзлэн адямиослэн лыдӟемзы луэ быдэс Библиез яке солэсь люкетъёссэ. Трос дауръёс ӵоже адямиослэн Библизы ӧй вал, нош милям вань. Кызьы ми Иеговаез тау карыны быгатӥськомы Библия понна?

19. Мар кароно, осконмы медаз лябӟы шуыса?

¹⁹ Ми Иеговалы Библия понна тау кареммес возьматомы, сое ялан лыдӟимы ке. Кулэ юри дыр висъяны, Библиез лыдӟон понна но сое ас поннад эскерон понна, малы ке шуоно дыр ас понназ уз кылды. Озьы лэсьтӥмы ке, милям осконмы уз лябӟы.

20. Мар карыны милям юн мылкыдмы вань?

²⁰ Мар гинэ ми сярысь медаз малпалэ соос, кинъёсты та дуннеын «визьмоос, нодоос» шуыса лыдъяло, милям осконмы инъяське Инмарлэн Кылыз вылэ (Матф. 11:25, 26). Та священной книгаез эскеронлы луыса ми тодӥмы, малы та дуннеын югдур уродгес но уродгес луэ но мар карыны малпа Иегова вуонояз. Соин ик ойдолэ юнматомы асьмелэсь осконмес но юрттомы эшшо но тросгес адямиослы валаны, Кылдытӥсь вань шуыса (1 Тим. 2:3, 4). Соку ми ас синъёсынымы адӟомы со дырез, куке музъем вылысь вань адямиос Иеговаез данъялозы кылъёсын, кудъёсыз гожтэмын Усьтӥськонын 4:11: «Тон, Кузё-Инмаре, данлыкез... басьтыны ярась, уго Тон ваньзэ кылдытӥд».