1. Малы тӥледлы кельшо чидась адямиос?

 ВАНЬМЫЛЫ милемлы кельшо чидась адямиос. Ми гажаськомы соосты, кинъёс мае ке кема возьмано луо ке но, асьсэды киязы куто. Ми дунъяськомы соосты, кинъёс милесьтым янгышъёсмес чидало. Со сяна, ми тау кариськомы агайлы яке сузэрлы, кудӥз милемын Библиез дышетӥз. Ми Библиысь дышетонъёсты соку ик ӧм валалэ яке уже ӧм кутэ ке но, соос милесьтым ӧз куштӥське. Но эшшо но тау ми кариськомы Иегова Инмарлы, кудӥз милемлы бадӟым чиданзэ возьматэ! (Рим. 2:4).

2. Кыӵе учыръёсы чиданэз возьматыны секыт луэ?

² Милемлы кельше, куке мукетъёсыз милемлы чиданзэс возьмато. Но милемлы асьмелы та сямез котьку ик возьматыны капчи ӧвӧл. Кылсярысь, секыт луэ асьмеды киямы кутыны, куке, кытчы ке дыртыкумы, пробкаын сылӥськомы. Яке ми пурӟыны быгатӥськомы, куке мукетъёсызлэн ужъёссы милемыз йыркуръяськыто. Нош куддыръя малпан кылдыны быгатэ, Иеговаен сӥзем выль дунеез ми ноку ум адӟе шуыса. Потэ-а тӥляд эшшо но чидасесь луэмды? Та статьяын ми вераськомы чидан сярысь но со сярысь, малы со туж кулэ. Озьы ик ми тодомы, мар кароно, эшшо но чидасесь луон понна.

3. Кызьы ассэ возе чидась адями, куке солэсь вожзэ поттыны тыршо?

³ Ойдолэ эскеромы ньыль амалъёсты, кызьы ми чиданмес  возьматыны быгатӥськомы. Нырысетӥез, чидась адями вожзэ уг потты. Со ассэ кияз кутэ но пунэмзэ уг берыкты, соку но, куке солэсь вожзэ поттыны тыршо яке солэн аслаз сюлмаськонъёсыз вань. Та пумысен умой адӟем карон возьматэ Иегова. Со уг дырты вожзэ поттыны. Ачиз сярысь Иегова вераз, со «адямиез яратӥсь, гажась-жалясь, кема чидась, туж гажась-жалясь, зэмлыко Инмар» шуыса (Пот. 34:6). Кыл, кудӥз татын берыктэмын «кема чидась» шуыса, Библилэн куд-ог берыктэмъёсаз берыктэмын «вожзэ поттыны уг дырты» шуыса.

4. Кызьы ассэ возе чидась адями, куке солы мае ке возьмано луэ?

⁴ Кыкетӥез, чидась адями возьманы быгатэ. Мае ке малпамезлэсь кемагес возьмано луэ ке но, сыӵе адями каньыл сюлмын улыны тырше (Матф. 18:26, 27). Луо трос учыръёс, куке возьманы кулэ. Кылсярысь, куке милемлы мае ке верало, кыл куспы пырытэк сак кылзыны кулэ (Иов 36:2). Озьы ик чидан кулэ, куке ми адямилы, кудӥныз Библиез дышетӥськомы, юрттӥськомы кыӵе ке дышетонэз валаны яке урод сямзэ вормыны.

5. Кызьы эшшо тодманы луэ на чидась адямиез?

⁵ Куинетӥез, чидась адями дыртыса номыре уг лэсьты. Валамон, луо сыӵе учыръёс, куке мае ке ӝог лэсьтыны кулэ. Но куке чидась адямилы кулэ луись уж сёто, со малпаськытэк но дыртыса сое уг лэсьты. Со дыр висъя ваньзэ радъян понна, озьы ик тырмыт дыр висъя та ужез умой быдэстон понна.

6. Кызьы ассэ возе чидась адями шуг-секытъёс дыръя?

⁶ Ньылетӥез, чидась адями шуг-секытъёсты ӝожтӥськытэк чида. Та пумысен чидан туж кельше юн луонлы. Номыр шонертэмез ӧвӧл, сюлмаськонъёсмы сярысь ми  матысь эшмылы верамы ке. Но чидась адями тырше тодаз возьыны ваньзэ умойзэ, маиз солэн вань, озьы ик со тырше ваньзэ шумпотыса чиданы (Кол. 1:11). Ми христианъёс бере, милемлы кулэ чиданмес возьматыны вань та ньыль амалъёсты уже кутыса. Малы? Ойдолэ эскеромы куд-ог мугъёсты.

7. Малы чидан туж кулэ, Иаковлэсь 5:7, 8 лыдэ басьтоно ке? (Озьы ик учке суредэз.)

⁷ Чидан туж герӟаськемын утиськонэнымы. Вашкала дыръя Инмарлы оскымон адямиос чидаса возьмазы, ку со аслэсьтыз кылсётонъёссэ быдэстоз. Милемлы но озьы ик кароно (Евр. 6:11, 12). Библия христианъёслэсь мылкыдзэс ӝутэ музъемен ужасьлэсь адӟем карыны. (Лыдӟе Иаковлэсь 5:7, 8.) Со бусызэ кизе, со вылэ ву киська. Но со пыр-поч уг тоды, ку кизем кидысъёсыз удалозы. Соин ик со чидаса возьма но юн оске, емышъёсты бичалоз шуыса. Милям но ужъёсмы туж трос — ми Иисус Христослэсь ужзэ быдэсъяськомы, «кӧняетӥ часын... [со] лыктоз» ум тодӥське ке но (Матф. 24:42). Ми чидаса возьмаськомы но юн оскиськомы, пуктэм дыре Иегова сётэм кылзэ быдэстоз шуыса. Чиданмы ӧжыт луиз ке, возьманы милемлы секыт луоз но ми Иеговалэсь палэнскыны кутскомы. Озьы ик ми кутскомы вырыны сыӵе ужъёсын, кудъёсыз, ми малпамъя, али ик милемыз шудо карозы. Но ми чидасесь луимы ке, соку пумозяз юн луомы но утиськомы (Мих. 7:7; Матф. 24:13).

8. Кызьы чидан милемлы юрттэ мукетъёсыныз умой кусыпъёс возьыны? (Колоссыослы 3:12, 13).

⁸ Чидась адямилы капчигес мукетъёсыныз умой кусыпъёс возьыны. Чидан юрттэ милемлы сак кылзыны, куке милемлы мае ке верало (Иак. 1:19). Озьы ик та сям юрттэ милемлы тупаса улыны но малпаськыса ответ сётыны. Ми чидасесь луимы ке, соку секыт дыръя лек кылъёсты ум вералэ. Озьы ик милемыз вӧсь каризы ке, ми ум пурӟе. Ми пунэмзэ ум берыктӥське. Со интые, ми уже кутӥськомы Библиысь таӵе визь-кенешез: «Ог-огдэс чидаса улэ... ог-огдылы простить каре». (Лыдӟе Колоссыослы 3:12, 13.)

9. Кызьы чидан юрттэ милемлы шонер ужпум кутыны? (Мадёнъёс 21:5).

⁹ Ми чидасесь ке, соку кутэм ужпумъёсмы умойгес луозы. Ми дыртыса яке малпаськытэк ужпумъёс ум кутэ. Ми ваньзэ лыдэ басьтыны тыршомы но шонер ужпум кутомы. (Лыдӟе Мадёнъёсты 21:5.) Шуом, ми уж утчаськомы. Оло нош, ми дась соглаш кариськыны нырысетӥ шедьтэм ужлы, соин сэрен кенешлэсь пумиськонъёссэ кельтылоно яке ӧжытгес тодытоно луиз ке но. Но ми чидасесь ке, ми ваньзэ лыдэ басьтомы. Кылсярысь, кытын со интыяськемын, кӧня ужано луоз, кызьы со шӧдӥськоз семьямы но Инмарен кусыпъёсмы вылын. Ми чидасесь ке, малпаськытэк кутэм ужпумъёсмы понна берло ум жалялэ.

10. Мар юрттоз христиан муртлы чидась луыны, озьы ик азьланяз но та сямез возьматыны?

¹⁰ Вӧсяське чидан сярысь. Чидан — со святой духлэн емышез (Гал. 5:22, 23). Соин ик асьме кужыменымы гинэ та сямез ми будэтыны ум быгатэ. Кыӵе ке учыре милемлы чидан уг тырмы ке, ми Атаймылэсь святой духсэ куриськомы (Лука 11:9, 13). Озьы ик ми Иеговалэсь юрттэт куриськомы ваньмыз шоры солэн синмыныз учкыны. Вӧсяськеммы бере котькуд нунал тыршоно чидасесь луыны. Макем тросгес ми  чидан сярысь вӧсяськиськомы но та сямез уж вылын возьматыны тыршиськомы, сокем мургес со сюлмамы пыӵа но милемлы сое возьматыны капчигес луэ.

11, 12. Кызьы Иегова чиданзэ возьматэ?

¹¹ Малпаське Библиысь примеръёс вылын. Библиын вераське трос адямиос сярысь, кудъёсыз чиданзэс возьматылӥзы. Соос сярысь малпаськон милемыз тросэзлы дышетыны быгатэ. Но нырысь ми вераськомы со сярысь, кин котькинлэсь умой чиданзэ возьматэ,— Иегова сярысь.

¹² Едем садын Шайтан Иеговалэсь нимзэ саптаз но сое янгыше уськытӥз, со адямиосты уг яраты но соосын ассэ шонертэм возе шуыса. Иегова Шайтанэз соку ик ӧз быдты. Со интые, со чиданзэ возьматӥз но ассэ кияз кутӥз. Инмар валаз: солэн кивалтэтэз самой умой шуыса возьматон понна, дыр кулэ. Кӧня ке сюрс аръёс ӵоже ини Инмар чида, кызьы Шайтан солэсь святой нимзэ сантэма. Со сяна, Иегова чида, малы ке шуоно солэн потэ, тросгес адямиос пырак улыны мед быгатозы шуыса (2 Пётр 3:9, 15). Талы луыса кӧня ке миллион адямиос соин эшъяськыны быгатӥзы ини. Ми валаськомы ке, малы Иегова чида, милемлы капчигес луоз возьманы, ку со вань уродзэ быдтоз.

13. Малы вераны луоз, Иисус Атаезлэсь чиданзэ быдэсак адӟем каре шуыса? (Озьы ик учке суредэз.)

¹³ Иисус Атаезлэсь чиданзэ быдэсак адӟем каре. Музъем вылын ужакуз-тыршыкуз, солы чиданзэ возьматыны котьку ик капчи ӧй вал, дыр, тужгес но, куке со вераськиз законэз тодӥсьёсын но фарисейёсын (Иоанн 8:25—27). Озьы ке но, Атаез сямен, Иисус вожзэ поттыны ӧз дырты. Куке  сое ултӥязы, со пунэмзэ ӧз берыктылы но адямиосын ӧз споръяськы (1 Пётр 2:23). Со ӝожтӥськытэк шуг-секытъёсты чидаз. Соин ик Библия ӧте милемыз: «Малпалэ ай Со сярысь, Кин сьӧлыкоослэсь сомында курадӟон-сантэманэз чидано луиз» (Евр. 12:2, 3). Иеговалэн юрттэменыз ми но котькыӵе шуг-секытэз чидаломы.

14. Малы милемыз дышетэ Авраамлэн чиданэз? (Еврейёслы 6:15). (Озьы ик учке суредэз.)

¹⁴ Оло нош, ми туж кема возьмаськомы ини та дуннелэсь пумзэ но сюлмаськиськомы, ас синмынымы сое ум адӟе шуыса. Мар юрттоз милемлы чидаса возьманы? Авраамлэн примерез. 75 арес дыръяз, куке солэн нылпиосыз ӧй вал на, Иегова солы кылзэ сётӥз: «Тон бордысь Мон быдӟым калык потто» (Ул.-выл. 12:1—4). Адӟиз-а Авраам, кызьы быдэсмизы та кылъёс? Туж ик ӧз. Евфрат шур вамен потэмез бере 25 ар ортчыса гинэ, солэн Исаак пиез вордӥськиз. Со туж паймымон вал. Эшшо 60 ар ортчыса, солэн Исав и Иаков внукъёсыз вордӥськизы. (Лыдӟе Еврейёслы 6:15.) Но Авраам ӧз адӟы, кызьы солэн выжыез быдӟым калык луиз но Сӥзем музъемез басьтӥз. Та шоры учкытэк, солэн кулытозяз ик Иеговаен матысь кусыпъёсыз вал (Иак. 2:23). Нош куке Авраам улӟоз, со тодоз, солэн осконэзлы но чиданэзлы луыса музъем вылысь вань калыкъёс бакель каремын вал шуыса (Ул.-выл. 22:18). Со туж шумпотоз! Малы та милемыз дышетэ? Оло нош, ми соку ик ум адӟе, кызьы Иеговалэн куд-ог кылсётонъёсыз быдэсмозы. Но милям, Авраамлэн кадь ик, чиданмы вань ке, ми юн оскыны быгатӥськомы, Иегова милемыз али ик ини бакель кароз шуыса.  Нош выль дуннеын милемыз эшшо но бадӟымесь бакель каронъёс возьмало (Марк 10:29, 30).

15. Кыӵе адямиос сярысь малпаськыны луэ ас поннамы Библиез эскерон дыръя?

¹⁵ Библиын вераське на трос мукет адямиос сярысь, кудъёсыз чиданзэс возьматылӥзы (Иак. 5:10). Умой луысал соосын матэгес тодматскыны b. Кылсярысь, вераськомы Давид сярысь. Иегова сое бырйиз Израильын эксэй луыны, куке со быдэ вуэмын ӧй вал на. Эксэй луытозяз, Давидлы трос аръёс возьмано луиз. Симеон но Анна трос дасо аръёс ӵоже Мессиялэсь лыктэмзэ возьмазы но Иеговалы оскымон ужазы-тыршизы (Лука 2:25, 36—38). Инмарлэн оскымон ужась-тыршисьёсыз сярысь малпаськыкуды, юалэ асьтэлэсь: «Мар юрттӥз та адямилы чидась луыны? Кыӵе пайда та солы вайиз? Кызьы мон солэсь адӟем карыны быгатӥсько?» Озьы ик тӥ тросэзлы дышетскыны быгатӥськоды соослэсь, кинъёс чиданзэс ӧз возьматэ (1 Экс. 13:8—14). Юалэ асьтэлэсь: «Мар люкетӥз солы чидась луыны? Кытчы со вуттӥз?»

16. Кыӵе пайда вае чидан?

¹⁶ Малпаське, кыӵе пайда вае чидан. Чидась адями ӵем дыръя шудо луэ но каньыл сюлмын улэ. Озьыен, чидан юрттэ милемлы умой мылкыдын улыны но тазалыкмес утьыны. Ми чидасесь ке, соку мукетъёсыныз кусыпъёсмы умоесь луозы. Кенешмы эшшо но юн улоз. Куке кин ке но милесьтым вожмес поттыны тырше, нош ми асьмеды киямы кутӥськомы, соку югдур эшшо но урод уз луы (Пс. 36:8; Мад. 14:29). Но самой валтӥсез: чиданмес возьматыса, ми эшшо но золгес инмысь Атаймылы кельшиськомы но соин кусыпъёсмес юнматӥськомы.

17. Кыӵе ужпум ас азямы пуктыны кулэ?

¹⁷ Чидан — туж чебер сям, кудӥз котькинлы пайда вайыны быгатэ. Чиданэз будэтыны капчи ӧвӧл ке но, Иеговалэн юрттэменыз ми быгатомы сое умойгес но умойгес возьматыны. Нош выль дуннеез чидаса возьматозямы, ми юн оскыны быгатӥськомы, «Иеговалэн синмыз Солэсь кышкасьёс, Солэн гажан-жалянэзлы оскиськисьёс вылын улэ» шуыса (Пс. 32:18). Ойдолэ чидась луонлэсь дӥськутсэ дӥсяломы но ноку сое ум кылелэ!