1. Малы Вавилонын улӥсьёс Данииллы саклыксэс висъязы?

 ЕГИТ дыръяз Даниилэз вордскем карысьтыз кыдёкысь вавилон пленэ нуизы. Адямиос соку солы саклыксэс висъязы. Ваньзы адӟизы, Даниил «чик шектэм мугоро, чебер тусбуё» но сӥё-дано семьяысь потэмын шуыса. Соин ик Вавилонын улӥсьёс сое дасяны кутскизы эксэй юртын ужаны (Дан. 1:3, 4, 6; 1 Экс. 16:7).

2. Кызьы Иегова учкиз Даниил шоры? (Иезекииль 14:14).

² Иегова Даниилэз чебер тусбуез яке сӥё-дано луэмез понна ӧз яраты. Со сое яратӥз, малы ке шуоно Даниил вань сюлмысьтыз тыршиз Инмарез шумпоттыны. Малпалэ гинэ: Даниил 20 ареслэсь ӧжыт гинэ бадӟымгес вал. Озьы ке но Иегова сое одӥг радэ пуктӥз Ной но Иов ужась-тыршисьёсыныз, кудъёсыз трос дасо аръёс ӵоже оскымон ужазы-тыршизы (Ул.-выл. 5:32; 6:9, 10; Иов 42:16, 17; лыдӟе Иезекиильлэсь 14:14). Даниил кема улӥз но пӧртэм учыръёсын пумиськылӥз. Иегова сое вань улонэз ӵоже яратӥз (Дан. 10:11, 19).

3. Мае ми эскеромы та статьяын?

³ Та статьяын ми саклыкмес висъяломы Данииллэн кык сямъёсызлы, кудъёсызлы луыса Иегова понна со туж дуно вал. Нырысь ми вакчияк котькудзэ нимаз эскеромы но адӟомы, кызьы Даниил соосты возьматъяз. Собере ми учкомы, мар юрттӥз солы та сямъёсты будэтыны. Озьы ик вераськомы, кызьы Данииллэсь адӟем кареммы луэ. Та статья нырысь ик егитъёслы сӥземын ке но, ми ваньмы Данииллэсь тросэзлы дышетскыны быгатӥськомы.

4. Кызьы Даниил кышкасьтэм луэмзэ возьматӥз?

⁴ Кышкасьтэм адямиос но куддыръя кышкало. Но соос  кышканлы уг лэзё соослы люкетыны асьсэды шонер возьыны. Даниил туж кышкасьтэм егит пиосмурт вал. Кылсярысь, тае возьмато улонысьтыз кык учыръёс. Одӥгез луиз, вылды, вавилон калык Иерусалимез куашкатэм бере ог кык ар ортчыса. Вавилонысь Навуходоносор эксэй уйвӧтаз туж бадӟым сульдэр адӟиз. Вань визьнодчиосызлы, озьы ик Данииллы но, со вераз, соос уйвӧтсэ ӧз вералэ ке но сое ӧз валэктэ ке, соос виемын луозы шуыса (Дан. 2:3—5). Данииллы ӝегатскыны уг яра вал, малы ке шуоно трос адямиос кулыны быгатысалзы. Соин ик «Даниил пыриз но эксэйлэсь сюлмысьтыз куриз, солы дыр мед сётоз, нош со эксэйлэн уйвӧтэзлэсь пуштроссэ валэктоз шуыса куриз» (Дан. 2:16). Та понна кышкасьтэм сям но оскон кулэ вал. Малы ке шуоно нокытын уг вераськы, азьвыл Даниил уйвӧтъёсты валэктылӥз ини шуыса. Даниил куриз аслэсьтыз эшъёссэ, кудъёссэ Вавилонын Седрах, Мисах но Авденаго шуыса нимазы, «соос Инмысь Инмарлэсь гажан-жалянзэ мед курозы, та лушкемлыкез Со соослы мед усьтоз шуыса мед курозы» (Дан. 2:18). Иегова вӧсяськонъёссылы ответ сётӥз. Инмарлэн юрттэменыз Даниил Навуходоносорлэсь уйвӧтсэ валэктӥз. Талы луыса Даниил но солэн эшъёсыз улэп кылизы.

5. Кыӵе эшшо учырын Данииллы кышкасьтэм луоно вал?

⁵ Кӧня ке дыр ортчыса, Данииллы нош ик кышкасьтэм луоно вал. Навуходоносор адӟиз эшшо одӥг уйвӧтэз, кудӥз сое кышкатӥз. Таяз со туж бадӟым писпуэз адӟиз. Даниил та уйвӧтэз эксэйлы кышкатэк валэктӥз. Даниил Навуходоносорлэсь ӧз ваты, со кӧня ке дырлы йырвизьзэ ыштоз но кивалтыны уз быгаты шуыса (Дан. 4:22). Данииллэсь кылъёссэ кылыса, эксэй малпаны быгатэ вал, Даниил — солэн тушмонэз но сое казнить кароно шуыса. Даниил кышканлы ӧз сётскы но уйвӧтэз валэктӥз.

6. Мар юрттӥз Данииллы кышкасьтэм луыны?

⁶ Мар юрттӥз Данииллы вань улытозяз кышкасьтэм луыны? Пичи дырысеныз ик анаез но атаез солы умой адӟем карон возьматӥзы. Ми оскиськомы, соос кылзӥськизы курон-косонъёслэсь, кудъёссэ Иегова Израильысь анай-атайёслы сётӥз, но пизэс Инмарлэн законэзлы дышетӥзы шуыса  (К. Зак. 6:6—9). Даниил тодӥз Дас курон-косонъёсты, озьы ик мукет законъёсты но. Кылсярысь, со тодӥз, мае израиль калыклы сиыны яра вал, нош мае — уг яра вал (Лев. 11:4—8; Дан. 1:8, 11—13) b. Озьы ик Даниил умой тодӥз Инмарлэн калыкезлэсь историзэ но адӟиз, кытчы вуттӥз Иеговалэсь кылзӥськымтэзы (Дан. 9:10, 11). Кузь улонэз ӵоже Даниил трос пол ас вылаз шӧдӥз Иеговалэсь но кужмо кылчинъёсызлэсь юрттэмзэс. Та сое оскытӥз, Иегова сое ноку уз кельты шуыса (Дан. 2:19—24; 10:12, 18, 19).

7. Мар эшшо юрттӥз Данииллы кышкасьтэм луыны? (Озьы ик учке суредэз.)

⁷ Даниил Инмарлэн пророкъёсызлэсь книгаоссэс эскериз, кылсярысь, Иеремиялэсь азьпалзэ ивортонзэ. Та юрттӥз солы валаны, вавилон пленын кема улэмзы ӝоген йылпумъяськоз шуыса (Дан. 9:2). Библиысь азьпалзэ ивортонъёслэн быдэсмемзы Данииллэсь Иеговалы осконзэ юнматӥз. Нош куке адями Инмарлы юн оске, со туж кышкасьтэм луыны быгатэ. (Ӵошатэ Римъёслы 8:31, 32, 37—39.) Но самой валтӥсез, Даниил инмысь Атаезлы ӵем вӧсяськиз (Дан. 6:10). Со Иеговалы аслаз сьӧлыкъёсыз но шӧдонъёсыз сярысь вералляз. Озьы ик со Инмарлэсь юрттэтсэ куриз (Дан. 9:4, 5, 19). Даниил ми кадь ик адями вал. Озьыен со кышкасьтэм луыса ӧз вордӥськы. Со кышкасьтэм луиз, Священной Гожтэмез эскерыса, Иеговалы вӧсяськыса но солы оскыса.

8. Мар кароно, кышкасьтэмесь луон понна?

⁸ Мар милемлы кароно, кышкасьтэмесь луон понна? Анаймы но атаймы милесьтым мылкыдмес ӝутыны быгато кышкасьтэмесь луыны. Но соослэн кышкасьтэм луэмзы милемлы уз выжы. Кыӵе ке быгатонлыклы дышетскем сямен, кышкасьтэм луыны но дышетсконо. Одӥгез амал, кызьы малы ке вылезлы дышетскыны улэ,— дышетӥсь шоры сак учконо но солэсь адӟем кароно. Нош кышкасьтэм луон понна, учконо, кызьы мукетъёсыз та сямез возьмато, но асьмеды соос кадь возёно. Малы ми дышетскиськомы Данииллэсь? Милемлы но Инмарлэсь Кылзэ умой тодоно. Иеговаен кусыпъёсмес юнматоно, номыре ватытэк но ӵем вӧсяськыса. Озьы ик Иеговалы осконо, со милемлы котьку юрттоз шуыса. Соку, осконмы эскериськыку, ми кышкасьтэмесь луомы.

9. Малы милемлы кышкасьтэмесь луыны кулэ?

⁹ Милемлы туж кулэ кышкасьтэмесь луыны. Эскеромы Германиысь Бен агайлэсь учырзэ. Со дышетскиз школаын, кудаз ваньзы эволюцилы оскизы. Озьы ик соос малпазы, кылдытон, кудӥз сярысь Библиын вераське,— со выжыкыл гинэ шуыса. Одӥг пол Бен быдэс классэз азьын валэктыны быгатӥз, малы со оске, улон кылдытэмын вал шуыса. Со кышкатэк аслаз осконэз сярысь вераз. Кыӵе пайда со вайиз? Бен вера: «Дышетӥсе монэ сак кылзӥз. Вераме бере со мынэсьтым материалме копировать кариз но классысьтым вань дышетскисьёслы сётъяз». Нош кызьы асьсэды возизы Бенлэн ӵош дышетскисьёсыз? Со азьланьтэ: «Тросэз монэ сак кылзӥзы но берло веразы, кышкасьтэм луэме соосты паймытӥз шуыса». Бенлэн учырез возьматэ, кышкасьтэм адямиосты ӵем дыръя гажало шуыса. Кышкасьтэм луэммы адямиослы юрттыны быгатэ Иеговаен тодматскыны. Соин ик  милям трос мугъёсмы вань та сямез будэтыны.

10. Мар со сыӵе оскымон луон?

¹⁰ Еврей кыл, кудӥз Библиын «оскымон луон» яке «оскымон яратон» шуыса берыктӥське, возьматэ шуныт, юн кусыпъёсты. Удмурт Библиын та кыл «гажан-жалян» шуыса берыктӥське. Сыӵе яратонэз Инмар аслаз эшъёсызлы возьматэ. Озьы ик сыӵе яратонэз ужась-тыршисьёсыз ог-огзылы возьмато (2 Экс. 9:6, 7). Дыр ортчыса, оскымон луонмы юнгес луыны быгатэ. Та умой адӟиське Данииллэн учырысьтыз.

11. Кызьы эскериськиз Данииллэн Иеговалы оскымон луэмез, куке со арлыдо вал ини? (Учке вылбамысь суредэз.)

¹¹ Данииллэн Иеговалы оскымон луэмез быдэс улонэз ӵоже эскериськиз. Но самой бадӟымез шуг-секыт кылдӥз, куке Данииллы 90 ареслэсь тросгес вал ини. Соку Вавилон мидян но перс калыкъёсын киултэмын вал. Отын Дарий эксэй кивалтӥз. Эксэй юртысь кузёйыръёс ӧз яратэ Даниилэз но ӧз гажалэ Инмарез, кудӥзлы со йыбыртъяз. Даниилэз виён понна, соослэн кескич малпанзы кылдӥз. Соос эксэез куризы гожтыны косон, кудӥз возьматысал, кинлы Даниил оскымон луоз: аслаз Инмарезлы яке эксэйлы. Арлыдо пророклы 30 нунал ӵоже Иеговалы вӧсяськыны уг яра вал. Озьы со эксэйлы оскымон луэмзэ возьматысал но улэп кыльысал. Даниил та косонлэсь ӧз кылзӥськы. Соин ик сое левъёсын гуэ куштӥзы. Но Иегова Даниилэз солы оскымон луэмез понна бакель кариз но левъёслы ӧз лэзьы солы изъян вайыны (Дан. 6:12—15, 20—22). Мар милемлы кароно, Даниил сямен, Иеговалы оскымон луон понна?

12. Мар кариз Даниил, Иеговалы оскымон луон понна?

¹² Кызьы вераськиз ини, Иеговалы оскымон луон понна, милемлы сое юн яратыны кулэ. Даниил Иеговаез туж яратӥз. Соин ик инмысь Атаеныз кусыпъёссэ сӧрыны солэн малпанэз но ӧз кылды. Даниил Иеговаез юн яратӥз, малы ке шуоно солэн сямъёсыз но ужъёсыз сярысь малпаськиз, вылды (Дан. 9:4). Озьы ик Даниил тау карыса малпаськиз ваньмыз умоез сярысь, мае Иегова лэсьтӥз солы но аслаз калыкезлы (Дан. 2:20—23; 9:15, 16).

13. а) Кызьы егит агайёслэн но сузэръёслэн Иеговалы оскымон луонзы эскериськыны быгатэ? Вералэ пример. (Озьы ик учке суредэз.) б) Мар вераны луоз, тӥлесьтыд юазы ке, кызьы Иеговалэн Адӟись-Ивортӥсьёсыз гомосексуалистъёс шоры учко? (Учке jw.org сайтысь «Истинная праведность принесёт мир» видеоез.)

 ¹³ Даниил улон нуналъёсы сямен, туннэ но егит агайёсмы но сузэръёсмы котырын вань адямиос, кудъёсыз Иеговаез но солэсь курон-косонъёссэ нокӧня но уг гажало. Сыӵе адямиос Инмарез яратӥсьёсты ултӥяны но быгато. Куд-огъёсыз агайёсмес но сузэръёсмес кышкато, соос Инмарлэсь куронъёссэ мед тӥялозы шуыса. Кылсярысь, тани мар луиз Австралиысь Грейм агаен, куке со бадӟым классъёсын дышетскиз. Дышетӥсьсы дышетскисьёслэсь юаз, кызьы соос асьсэды возьысалзы, эшсы верасал ке, со гомосексуалист шуыса. Дышетӥсьсы куриз эшенызы соглаш луисьёсты класслэн одӥг палаз султыны, нош эшенызы соглаш луисьтэмъёсты — мукет палаз. Грейм тодаз вае: «Быдэс классмы соглаш кариськиз. Мон но эшшо одӥг Адӟись-Ивортӥсь гинэ мукет сямен малпамы». Югдур, кудӥз собере кылдӥз, Греймлэсь Иеговалы оскымон луэмзэ эскериз. Со вера: «Урок пумозь дышетскисьёс но дышетӥсьмы милемыз мыскыл каризы но ултӥязы. Мон тырши асме киям кутыны но осконме утьыны. Но соослэн кылзэмзы нокӧня но ӧз поты». Кызьы та Грейм вылын шӧдӥськиз? Со азьланьтэ: «Валамон, мыным ӧз кельшы, куке монэ ултӥязы. Но мон шумпотӥ, Иеговалы оскымон кыли но осконме ути шуыса».

14. Мар ми карыны быгатӥськомы, Иеговалы оскымон луон понна?

¹⁴ Даниил сямен, ми но быгатомы Иеговалы оскымонэсь луыны, инмысь Атаймес эшшо но золгес яратыны тыршимы ке. Ми Инмарез эшшо но золгес яратомы, солэсь сямъёссэ эскерыса. Соосты адӟыны луэ, кылдытэмъёсыз сярысь малпаськыса (Рим. 1:20). Милемлы юрттозы статьяос но видео, кудъёссэ шедьтыны луэ «Кызьы со кылдӥз?» рубрикаысь. Соос милемлы юрттозы Иеговаез эшшо но золгес яратыны но гажаны. Озьы ик умой луоз тодамы вайыны сое, мар гожтэмын «Улон кылдытэмын-а вал?» но «Улонлэн кылдэмез. Вить юанъёс, кудъёсызлы валэктонъёс шедьтоно» брошюраосын (ӟуч). Тани мар вера та брошюраос сярысь Даниысь Э́стер нимо егит сузэр: «Со, мар гожтэмын та брошюраосын, туж паймымон! Соос тыныд уг верало, малы оскыны кулэ. Отын люкамын информация, кудӥз юрттэ тыныд аслыд шонер йылпумъян лэсьтыны». Бен агай, кудӥз сярысь вераськиз ини, шуэ: «Та брошюраос осконме туж юнматӥзы. Мон юн оскыны кутски, улонэз Инмар кылдытӥз шуыса». Та брошюраосты эскерыса, тӥ соглаш луоды, дыр, кылъёсын, кудъёсыз гожтэмын Усьтӥськонын 4:11: «Тон, Кузё-Инмаре, данлыкез, сӥ-данэз, кужымез басьтыны ярась, уго Тон ваньзэ кылдытӥд» c.

15. Мар тӥледлы юрттоз Иеговаен кусыпъёстэс юнматыны?

¹⁵ Вань эшшо одӥг амал, кудӥз Иеговаез яратонмес юнматоз. Со понна Пиезлэсь улонзэ пыр-поч эскероно. Ӵапак озьы ик лэсьтӥз Германиысь егит Сами́ра. Со вера: «Мон Иеговаез умойгес тодӥ, Иисус сярысь лыдӟыса». Пичи дыръяз Самиралы секыт вал валаны, Иеговалэн шӧдонъёсыз вань шуыса. Нош Иисуслэсь шӧдонъёссэ валаны солы секыт ӧй вал. Самира ватса: «Мыным Иисус кельше вал, малы ке шуоно со ассэ лякыт возиз но нылпиосты яратӥз».  Иисус сярысь тросгес тодыса, солэн Иеговаен кусыпъёсыз юнгес луизы. Малы? Со валэктэ: «Дыр ортчыса, мон валай, Иисус котьку но ассэ Атаез сямен возе шуыса. Соос ог-огзылы туж кельшо. Иисусэз умойгес тодыса, адямиос Иеговаез умойгес тодыны быгатӥзы. Мон валай: та одӥгез муг, малы Иегова аслэсьтыз Пизэ музъем вылэ ыстӥз» (Иоанн 14:9). Тӥляд но Иеговаен кусыпъёстэс юнматэмды потэ ке, дыр висъялэ но Иисус сярысь тросгес тодыны тырше. Та юрттоз тӥледлы Иеговаез эшшо но золгес яратыны но солы оскымон луыны.

16. Малы милемлы кулэ оскымонэсь луыны? (Потон 34:6; Михей 7:20).

¹⁶ Ми мукетъёсызлы оскымонэсь луимы ке, соку милям оскымон эшъёсмы луозы, вылды, кудъёсыз милемыз ноку уз кельтэ (Руфь 1:14—17). Со сяна, Иеговалы оскымон адямиос каньыл сюлмын уло. Малы? Малы ке шуоно Иегова оскымон соослы, кинъёс солы оскымон луо. (Лыдӟе Потонэз 34:6; Михейлэсь 7:20.) Малпалэ гинэ: котькинлэсь кужмо Кылдытӥсь кылзэ сётэ милемыз котьку но яратыны! Иегова самой матысь эшмы луиз ке, соку номыр но нокин милемыз солэсь уз люкы: тушмонъёс но, шуг-секытъёс но, кулон но (Дан. 12:13; Лука 20:37, 38; Рим. 8:38, 39). Соин ик туж кулэ Данииллэсь адӟем карыны но Иеговалы оскымон луыны!

17, 18. Мае ми эскеромы вуоно статьяын?

¹⁷ Та статьяын ми эскеримы Данииллэсь кык сямъёссэ, кудъёссэ милемлы но будэтыны кулэ. Но та пророклэсь ми мукетэзлы но дышетскыны быгатӥськомы. Кылсярысь, Иегова Данииллы возьматӥз кӧня ке адӟонъёсты но уйвӧтъёсты. Озьы ик Иегова Данииллы азьпалзэ ивортонъёсты валэктыны юрттӥз. Соос пӧлысь тросэз быдэсмизы ини. Мукетъёсаз вераське вуоно югдуръёс сярысь, кудъёсыз музъем вылысь котькуд адямиен герӟаськемын.

¹⁸ Вуоно статьяын ми эскеромы кык азьпалзэ ивортонъёсты, кудъёссэ Даниил гожтӥз. Кӧня гинэ арес милемлы медам луы, милемлы соосты валаны кулэ. Со милемлы юрттоз али ик ини визьмо ужпумъёс кутыны. Озьы ик та азьпалзэ ивортонъёс милемлы юрттозы кышкасьтэмесь но Иеговалы оскымонэсь луыны. Соку ми вуоно югдуръёслы дась луомы.