1. Мар кароно, бызёно сюресмылэн пумаз вуон понна но пырак улонэз басьтон понна? (Еврейёслы 12:1).

 БИБЛИЯ христиан улонэз бызёнэн ӵошатэ. Соос, кинъёс бызёно сюрессылэн пумаз вуозы, пырак улон басьтозы (2 Тим. 4:7, 8). Бызёно сюреслэн пумыз туж матын ини, соин ик быземысь дугдоно ӧвӧл. Апостол Павел, кудӥз сюрессэ ортчыны быгатӥз, вераз, мар милемлы юрттоз пумозяз бызьыны. Со шуиз: «Ваелэ сэрпалтоме вылысьтымы ёртӥсь зӥбетэз... чиданмес поныса, ортчоме асьмелы сётэм удыстӥ». (Лыдӟе Еврейёслы 12:1.)

2. Мар кароно, «вылысьтымы ёртӥсь зӥбетэз» сэрпалтон понна?

² Мае возьмато Павеллэн та кылъёсыз: «Ваелэ сэрпалтоме вылысьтымы ёртӥсь зӥбетэз»? Павеллэн верамезъя, милемлы сэрпалтоно вылысьтымы мултэс зӥбетэз, кудӥз милемлы бызьыны люкетэ но кужыммес быдтэ. Номыр шоры учкытэк, пумозяз вуон понна, ӝоггес валаны тыршоно, мар милемлы люкетэ, но сое сэрпалтоно. Со дыре ик сэрпалтоно ӧвӧл сое, мае нуыны кулэ. Озьы ӧм лэсьтэ ке, милемыз бызёно сюрес вылысь палэнтозы (2 Тим. 2:5). Мае милемлы нуыны кулэ?

3. а) Галатъёслы 6:5 лыдэ басьтыса, мае ми нуыны кулэ? б) Мае ми эскеромы та статьяын но кыӵе со пайда ваёз?

³ Лыдӟе Галатъёслы 6:5. Павел гожтӥз, «котькудӥз адями аслаз улонысьтыз секытлыкъёсты ачиз нуыны кулэ» шуыса. Татын вераське Инмар азьын быдэстоно ужъёсмы сярысь, кудъёссэ ми интые нокин уз лэсьты. Та статьяын ми эскеромы, мар пыре секытлыкъёс, яке зӥбет, пӧлы  но кызьы ми соосты нуыны быгатӥськомы. Озьы ик валаны тыршомы, мае милемлы сэрпалтыны кулэ. Ми зӥбетмес нуиськомы ке, нош мултэссэ сэрпалтӥськомы ке, соку бызёно сюресмылэн пумаз вуыны быгатомы.

4. Малы ми быгатӥськомы быдэстыны Инмарлы ужаны-тыршыны кылсётонмес? (Озьы ик учке суредэз.)

⁴ Иеговалы ужаны-тыршыны кылсётонмы. Куке ми улонмес Иеговалы сӥзимы, ми кылмес сётӥмы пырак дауръёс ӵоже солы ужаны-тыршыны но солэсь эриксэ быдэсъяны. Со капчи ӧвӧл ке но, ми быгатӥськомы сётэм кылмес быдэстыны. Малы ке шуоно ми кылдытэмын Инмарлэсь эриксэ быдэсъяны (Усьт. 4:11). Иегова милемыз аслыз укшатыса кылдытӥз, озьы ик сое тодыны но солы йыбыртъяны мылкыд сюлмамы понӥз. Соин ик ми быгатӥськомы солы матэ кариськыны но шумпотыса солэсь эриксэ быдэсъяны (Пс. 39:9). Со сяна, Инмарлэсь но солэн Пиезлэсь кылзӥськыса, ми юнматскиськомы (Матф. 11:28—30).

5. Мар тӥледлы юрттоз Иеговалы сётэм кылдэс быдэстыны? (1 Иоанн 5:3).

 ⁵ Мар юрттоз та зӥбетэз нуыны? Нырысетӥез, азьланяз но тырше Иеговаез эшшо но золгес яратыны. Со понна малпаське, мае со тӥледлы кузьмаз ини но мае со тӥледлы кузьмалоз на. Инмарез яратонды юнмамъя тӥледлы солэсь кылзӥськыны капчигес луоз. (Лыдӟе 1 Иоаннлэсь 5:3.) Кыкетӥез, Иисуслэсь адӟем каре. Мар солы юрттӥз Инмарлэсь эриксэ быдэсъяны? Со Иеговалэсь юрттэт куриз но вуоно бакель каронъёсыз сярысь малпаськиз (Евр. 5:7; 12:2). Иисус сямен, Иеговалэсь кужым куре но ноку эн вунэтэ, кызьы со тӥледыз бакель кароз,— со пырак улон сётоз. Инмарез золгес яратыса но Пиезлэсь адӟем карыса, тӥ быгатоды Иеговалы сётэм кылдэс быдэстыны.

6. Малы семьяын быдэстоно ужъёсты палэнтыны уг яра? (Озьы ик учке суредэз.)

⁶ Семьяын быдэстоно ужъёсмы. Христианъёслы кулэ Иеговаез но Иисусэз, ӵыжы-выжыоссы сярысь, золгес яратыны (Матф. 10:37). Но со уг возьматы, Инмарез но Христосэз шумпоттыны тыршыса, ми семьямылы саклыкмес ум висъяське шуыса. Семьяямы быдэстоно ужъёсмес ӧм палэнтэ ке, соку Инмарлы но Христослы ярамон луомы (1 Тим. 5:4, 8). Озьы ми шудогес луомы. Иегова тодэ, мар кароно, семья шудо мед луоз шуыса: кузпалъёслы ог-огзэс яратоно но гажано, анай-атайёслы нылпиоссэс яратоно но дышетоно, нош нылпиослы анай-атайзылэсь кылзӥськоно (Еф. 5:33; 6:1, 4).

7. Мар тӥледлы юрттоз семьяяды лэсьтоно ужъёсты быдэстыны?

⁷ Мар юрттоз та зӥбетэз нуыны? Картъёс, кышноос но нылпиос, Библиысь визь-кенешъёсты уже кутэ. Эн оскиське шӧдонъёстылы, калык сям-йылолъёслы яке семья удысэз эскерисьёслы (Мад. 24:3, 4). Пыр-поч эскере публикациосты, кудъёссэ поттэ милям организацимы. Отын вань пайдаё визь-кенешъёс со сярысь, кызьы Библиысь возетъёсты улонэ пыртоно. Кылсярысь, куд-ог публикациосын вераське шуг-секытъёс сярысь, кудъёсыныз пумиськыло кузпалъёс, анай-атайёс но быдэ вуымтэ нылпиос b. Библиысь возетъёсты уже кутэ, семьяды соосъя уг улы ке но. Та семьядылы пайда ваёз, нош Иегова тӥледыз бакель кароз (1 Пётр 3:1, 2).

8. Кыӵе бервылъёсы вуттыны быгато лэсьтэм ужъёсмы?

⁸ Лэсьтэм ужъёс понна кылкутон. Иегова милемлы бырйыны луонлык кузьмаз. Иеговалэн потэ, ми умой ужъёс мед лэсьтомы но шумпотыса мед уломы шуыса. Со дыре ик со милемыз уг утьы урод ужъёсты лэсьтонлэсь но соослэн бервылъёссылэсь (Гал. 6:7, 8). Соин ик милемлы пумиськоно луэ малпатэк верам кылъёсмылэн яке дыртыса лэсьтэм ужъёсмылэн бервылъёсынызы. Сыӵе учыре милемыз возьытлыкмы но йырйыны быгатэ. Но ми валаськомы ке, лэсьтэм ужъёсмы понна кыл кутӥськомы шуыса, ми сьӧлыкъёсмес ум ватэ, янгышъёсмес тупатомы но азьланяз соосты ум лэсьтэ. Соку ми бызёно сюрес вылысь ум коже.

9. Мар карыны луэ, тӥ янгышады ке? (Озьы ик учке суредэз.)

⁹ Мар юрттоз та зӥбетэз нуыны? Тӥ урод уж лэсьтӥды ке, мар тӥ карыны быгатӥськоды? Валалэ, ортчемзэ тупатыны  уг луы ини шуыса. Оло нош, тӥ асьтэды шонере поттыны тыршиськоды. Оло нош, асьтэды яке кинэ ке мукетсэ янгыше уськытӥськоды. Талы кужымдэс эн быдтэ. Со интые, янгыштэс валалэ но лэсьтэ ваньзэ, мае али карыны быгатӥськоды. Лэсьтэм ужды понна тӥ асьтэды янгыше уськытӥськоды ке, зӥбыт-востэмен Иеговалы вӧсяське но куре сое тӥледыз простить карыны (Пс. 24:11; 50:5, 6). Озьы ик куре тӥледыз простить карыны сое, кинэ тӥ вӧсь кариды. Кулэ ке, тӧроослы юрттэт курыса вазиське (Иак. 5:14, 15). Асьтэлэн янгышъёсты вылын дышетске но азьланяз соослэсь палэнскыны тырше. Соку тӥ оскыны быгатоды, Иегова тӥледыз гажалоз-жалялоз но тӥледлы юрттоз шуыса (Пс. 102:8—13).

10. Малы быдэсмонтэм малпанъёс — со секыт зӥбет? (Галатъёслы 6:4).

¹⁰ Быдэсмонтэм малпанъёс. Асьмеды мукетъёсыныз ӵошатыса яке асьмелэсь укыр троссэ возьмаса, ми лябӟыны быгатомы. (Лыдӟе Галатъёслы 6:4.) Мукетъёсызлэн азинсконъёссы сярысь ялан малпаськыса, ми вожъяськыны но мукетъёсыныз ӵошатскыны кутскомы, вылды (Гал. 5:26). Ми тыршимы ке лэсьтыны сое, мае мукетъёсыз лэсьто, но лыдэ ӧм басьтэ ке, быгатонлыкъёсмы но югдуръёсмы пӧртэмесь шуыса, ми асьмелы изъян ваёмы. «Кема дыр ӵоже быдэсмисьтэм оскиськон» сюлэмез вӧсь каре. Нош макем вӧсь каре оскиськон, кудӥз ноку уз быдэсмы! (Мад. 13:12). Соин сэрен ми катьтэммомы но калленгес бызьыны кутскомы, вылды (Мад. 24:10).

11. Мар юрттоз быдэсмонтэм малпанъёсты палэнтыны?

¹¹ Кызьы сэрпалтоно та зӥбетэз? Иеговалэн куремезлэсь тросгес асьтэлэсь эн возьмалэ. Со ноку уг куры тӥлесьтыд сое, марды тӥляд ӧвӧл (2 Кор. 8:12). Юн оске: Иегова тӥледыз мукетъёсыныз уг ӵошаты (Матф. 25:20—23). Солы туж дуно тӥляд ужан-тыршонды, тӥляд оскымон луэмды но тӥляд юн луэмды. Зӥбыт-востэм луэ но валалэ, тазалыкты, арлыдды яке югдуръёсты сэрен азьвыл мында лэсьтыны уд быгатӥське ини шуыса. Арлыдды бадӟым ке но тазалыкты лябӟиз ке, Верзеллий сямен, дась луэ куд-ог ужъёсты кельтыны (2 Экс. 19:35, 36). Моисей сямен, адямиослэсь юрттэмзэс эн палэнтэ но, луэ ке, куд-ог ужъёстэс мукетъёсызлы сётэ (Пот. 18:21, 22). Зӥбыт-востэмесь луиды ке, соку асьтэлэсь луонтэмзэ уд возьмалэ но бызьыкуды уд лябӟе.

12. Кыл кутӥськомы-а ми мукет адямиослэн шонертэм ужъёссы понна? Валэктэ.

¹² Мукет адямиослэн шонертэм ужъёссы понна астэ янгыше уськытон. Ми ум быгатӥське мукет адямиос понна ужпум кутыны. Озьы ик куддыръя ми ум быгатӥське соосты шонертэм ужъёссылэн бервылъёссылэсь утьыны. Кылсярысь, кинлэн ке пиез яке нылыз ужпум кутэ Иеговаез кельтыны. Та анай-атайлэсь сюлэмзэс туж вӧсь каре. Но соос асьсэды янгыше уськытӥзы ке, ас вылазы туж секыт зӥбет басьтозы. Нош Иеговалэн уг поты, соос таин сэрен мед катьтэммозы шуыса (Рим. 14:12).

13. Мар кароно анай-атайлы, нылпизы шонертэм ужпум кутӥз ке?

¹³ Кызьы сэрпалтоно та зӥбетэз? Иегова ваньмылы бырйыны луонлык кузьмаз. Соин ик котькуд адями ачиз ужпум кутыны  быгатэ, кылсярысь, Инмарлы ужано-тыршоно-а, ӧвӧл-а. Вань анай-атайёс тырбыдэстэмесь. Иегова тодэ, тӥ ваньзэ шонер лэсьтыны уд быгатэ шуыса. Солэн потэ, тӥ мед лэсьтоды ваньзэ, мае быгатӥськоды. Нылпидылэн быръёнэз понна тӥ кыл уд кутӥське. Со ачиз со понна кыл кутэ (Мад. 20:11). Оло нош, тӥ сюлмаськиськоды асьтэлэн янгышъёсты сэрен. Соку Иеговалы асьтэлэн шӧдонъёсты сярысь вералэ но куре сое тӥледыз простить карыны. Инмар тодэ, ортчемзэ тӥ тупатыны уд быгатӥське ини шуыса. Со уг возьма, тӥ нылпидэс лэсьтэм ужъёсызлэн бервылъёссылэсь утёды шуыса. Эн вунэтэ: нылпиды Иегова доры берытскиз ке, Инмар туж шумпотоз (Лука 15:18—20).

14. Малы астэ мултэс янгыше уськытон — со зӥбет, кудзэ сэрпалтыны кулэ?

¹⁴ Астэ мултэс янгыше уськытон. Валамон, сьӧлыкаммы бере ми асьмеды янгыше уськытӥськомы. Но Иеговалэн уг поты, ми асьмеды мултэс янгыше мед уськытомы шуыса. Со зӥбет, кудзэ сэрпалтыны кулэ. Нош кызьы валано, ми асьмеды мултэс курадӟытӥськомы шуыса? Ми сьӧлыкмес ӧм ватэ ке, ӧпкелимы ке но азьланяз солэсь палэнскыны тыршимы ке, ми юн оскыны быгатомы, Иегова милемыз простить кариз шуыса (Ап. уж. 3:19, 20а). Инмарлэн уг поты, та вамышъёсты лэсьтэммы бере ми асьмеды мед курадӟытомы на шуыса. Со тодэ: озьы лэсьтыса, ми сюлэммес туж вӧсь каромы (Пс. 30:11). Мултэс куректыса улӥмы ке, ми бызёно сюрес вылысь кожомы, вылды (2 Кор. 2:7).

15. Мар кароно, асьмеды мултэс янгыше медам уськытэ шуыса? (1 Иоанн 3:19, 20). (Озьы ик учке суредэз.)

¹⁵ Кызьы сэрпалтоно та зӥбетэз? Тӥ асьтэды мултэс янгыше уськытӥськоды ке, тодады возе, Иегова дорын «сьӧлыкез куштон инты» шуыса (Пс. 129:4). Соослы, кинъёс вань сюлмысьтызы ӧпкелё, Инмар кылзэ сётэ: «Мон... азьланяз сьӧлыкъёссэс  но тодам уг ни вайы» (Иер. 31:34). Та возьматэ: Иегова азьвыл лэсьтэм сьӧлыкъёсмес тодамы уз вайыты ни. Соин ик, тӥ сьӧлыкъёстылэн бервылъёссылэсь курадӟиськоды ке, со уг возьматы, Инмар тӥледыз простить ӧз кары шуыса. Али янгышъёсты сэрен кенешын куд-ог ужъёсты лэсьтыны уд ке быгатӥське, асьтэды янгыше эн уськытэ. Иегова сьӧлыкъёсты сярысь уг малпа ни. Тӥ но эн малпалэ. (Лыдӟе 1 Иоанн 3:19, 20.)

16. Мар кароно, бызёно сюрес вылысь медам коже шуыса?

¹⁶ Милемлы бызёно озьы, ми кузьым басьтыны мед быгатомы шуыса (1 Кор. 9:24). Мар кароно со понна? Нуоно зӥбетэз, кудӥзтэк бызьыны уг луы, но сэрпалтоно ваньзэ, мар люкетэ. Та статьяын ми эскеримы куд-ог учыръёсты гинэ. Но вань мукетъёсыз но. Кылсярысь, Иисус вераз: «Мултэс сиыса, вина юыса, та улонлэн сюлмаськонъёсынызы сэрен сюлэмъёсты секыт медаз улы» (Лука 21:34). Та но Библиысь мукет кылбуръёс валаны юртто, мае тупатыны кулэ, бызёно сюрес вылысь медам коже шуыса.

17. Малы милям оскеммы луэ, бызёно сюресмылэн пумаз вуомы шуыса?

¹⁷ Ми оскыны быгатӥськомы, бызёно сюреслэн пумаз вуомы шуыса, малы ке шуоно Иегова милемлы кужым сётоз (Ис. 40:29—31). Соин ик быземысь эн дугдэ! Адӟем каре апостол Павеллэсь, кудӥз, вань кужымзэ поныса, бызиз, кузьым басьтон понна (Флп. 3:13, 14). Тӥ интые бызьыны нокин уг быгаты. Но Иеговалэн юрттэменыз тӥляд ваньмыз пӧрмоз. Со тӥледлы юрттоз зӥбеттэс нуыны но кулэтэмзэ сэрпалтыны (Пс. 67:20). Иеговалэн юрттэменыз тӥ быгатоды бызёно сюреслэн пумаз вуыны но вормон басьтыны!