• «Мыным потэ вал, картэ мукет кышномуртэн юмша шуыса».

• «Мыным потэ вал, мон чебер ӧвӧл шуыса, асме ултӥям но номырлы ярантэм кышномуртэн шӧдӥ».

• «Та сярысь мон нокинлы ӧй вералля. Куректонме пушкам вози».

• «Мон малпай, Иегова монэ уг яраты шуыса».

Та кылъёс возьмато, карт порнографиез учке ке, кышноезлы туж вӧсь луэ шуыса. Та сямыз сярысь со кема дыр ӵоже ватыса возе ке, кышноезлы солы оскыны секыт ини. Одӥг сузэр вераз: «Мон аслэсьтым картме чик но уг тодӥськы вылэм. Мае эшшо со мынэсьтым ватыса возе на меда?»

Та статья гожтэмын кышномуртъёслы, кудъёсызлэн картъёссы порнографиез учко a. Татын эскерисько Библиысь малпанъёс, кудъёсыз быгатозы соосты буйгатыны но оскытыны, Иегова соосты яратэ шуыса. Озьы ик та малпанъёс юрттозы каньыл сюлмын улыны но Иеговаен матысь кусыпъёс возьыны b.

Валамон, карттылэсь котькуд вамышсэ чакланы тӥ уд быгатӥське. Но сюлэм куректондэс капчиятон понна но ӧжытгес сюлмаськон понна, тӥляд мар ке но каремды луэ. Тани куд-ог визь-кенешъёс.

Асьтэды янгыше эн уськытэ. Оло нош, тӥ асьтэды янгышен лыдъяськоды, картты порнографиез учке шуыса. Алисалы c потэ вал, картэз сое чебер кышномуртэн уг лыдъя шуыса. Солэн йыраз ялан бергаз таӵе малпан: «Малы со мукет кышномуртъёс шоры учке?» Оло нош, тӥ асьтэды янгыше уськытӥськоды асьтэлэн шӧдонъёсты понна но малпаськоды, озьы югдурдэс эшшо но уродгес кариськоды шуыса. Даниэ́лла вера: «Мыным секыт вал асме киям кутыны. Мон малпай, ачим ик кусыпъёсмес сӧрисько шуыса».

Тӥляд но сыӵе ик шӧдонъёсты кылдо ке, эн вунэтэ: Иегова уг малпа, карттылэн ужъёсыз понна тӥ кыл кутӥськоды шуыса. Иаковлэн 1:14 гожтэмын:  «Котькин но, аслаз кырсь малпанъёсызлы сётӥськыса, мылкыдзэ отчы понэ ке, соин со ассэ визь сынаськон улэ сётэ» (Рим. 14:12; Флп. 2:12). Иегова тӥледыз янгыше уг уськыты. Инмар дунъя солы оскымон луэмдэс (2 Пар. 16:9).

Картты порнографиез учке ке, со уг возьматы, тӥ чебер кышномурт ӧвӧл шуыса. Со озьы ӧвӧл. Та удысэз эскерисьёслэн верамзыя, порнография шонертэм мылпотонъёсты пуромытэ, кудъёссэ быдэстыны одӥг кышномурт но уг быгаты.

Тырше мултэс сюлмаськытэк улыны. Кэ́тринлэн верамезъя, картэз порнографиез учке шуыса малпан солэн йырысьтыз уг поты вал. Нош Фра́нсес вера: «Куке мон уг тодӥськы, кытын али мынам картэ, мон сюлмаськыны кутскисько. Мынам ялан со понна сюлмы шуг». Куд-ог сузэръёс асьсэды умойтэм шӧдо, куке соос вын-агайёс но сузэр-апайёс пӧлын, кудъёсыз картсылэн сямыз сярысь тодо. Нош мукет сузэръёс асьсэды огназы кылемын шуыса шӧдо, малы ке шуоно малпало, югдурзэс нокин уг вала шуыса.

Таӵе шӧдонъёс валамон. Но та сярысь гинэ сюлмаськыса улӥды ке, эшшо но золгес сюлмаськоды. Тырше Иеговаен кусыпъёстылы саклыктэс висъяны. Та тӥледлы кужым сётоз (Пс. 61:3; Еф. 6:10).

Малпаське кышномуртъёс сярысь, кудъёсыз сярысь Библиын гожтэмын. Секыт дыръя соос Иеговалы вӧсяськизы но, со соосты буйгатылӥз. Инмар шуг-секытъёссэс котьку ик ӧз быдтылы ке но, со котьку но юрттӥз соослы каньыл сюлмын улыны. Тодамы ваёмы Аннаез. Секыт дыръя со Иеговалы кема вӧсяськиз. Со ӧз тоды ке но, кызьы шуг-секытэз сэрттэмын-пертчемын луоз, вӧсяськемез бере со сюлмаськыса ӧз улы ини (1 Экс. 1:10, 12, 18; 2 Кор. 1:3, 4).

Тӧроослэсь юрттэт куре. Соос «тӧллэсь утиськон маке кадь... жобаськись куазьлэсь утись шобырет кадь» луыны быгато (Ис. 32:2). Оло нош, соос ӵектозы тӥледлы вераськыны сузэрен, кудӥзлы тӥ быгатоды сюлэмдэс усьтыны но кудӥз тӥледыз юнматоз (Мад. 17:17).

Быгатоды-а тӥ карттылы юрттыны порнографиез учкыны сямызлэсь куштӥськыны? Оло нош, быгатоды но. Кызьы возьматэ Библия, шуг-секытэз сэрттыны-пертчыны яке кескич тушмонэн  нюръяськыны, «оген.... сярысь, кык ӵошен... умойгес» (Екк. 4:9—12). Эскеронъёс возьмато: картъёс быгато урод сямзылэсь куштӥськыны но кышноосынызы кусыпъёссэс тупатыны, ӵем дыръя соку гинэ, куке соос ӵош тыршо.

Тросэз герӟаськемын соин, потэ-а карттылэн урод сямызлэсь куштӥськемез но дась-а со тыршыны. Юрттэт курыса, со Иеговалы но тӧроослы вазиськылӥз-а? (2 Кор. 4:7; Иак. 5:14, 15). Малпаз-а со, мар карыны, визь-сынаськонлэсь палэнскон понна? Кылсярысь, малпаз-а со, ку но кызьы электрон тӥрлыксэ кутыны, но тырше-а со палэнскыны учыръёслэсь, куке урод сямыз выльысь потыны быгатэ? (Мад. 27:12). Дась-а со тӥлесьтыд юрттэттэс басьтыны но пӧяськытэк ваньзэ тӥледлы вераны? Дась ке, соку тӥ карттылы юрттыны быгатоды, вылды.

Мар тӥ карыны быгатӥськоды? Эскеромы Фели́сиялэсь учырзэ. Со бызиз И́танлы, кудӥз пичи дыръяз ик порнографиез учкыны кутскиз. Фелисия картсэ валаны тырше но котьку дась соин вераськыны. Соин ик, куке картэзлэн порнографиез учкыны мылкыдыз ӝутске, солы та сярысь кышноеныз вераськыны секыт ӧвӧл. Тани мар вера Итан: «Мон кышноеным номыре ватытэк вераськисько. Со яратыса юрттэ мыным визь-сынаськонъёслэсь палэнскыны, кылсярысь, валаны, ку но кызьы интернетэз уже кутоно. Озьы ик со ялан юа мынэсьтым, мар мынам пӧрме ини». Валамон, Итанлэн урод сямыз Фелисияез туж вӧсь каре. Фелисия вера: «Мон вожпотонме ӧй куты ке, со картэлы уз юртты. Солэн шуг-секытъёсыз сярысь вераськеммы бере солы монэ но валаны капчигес».

Таӵе вераськонъёс картлы юрттозы урод сямызлэсь куштӥськыны. Соос кышноезлы но пайда ваёзы. Малы ке шуоно, куке карт ватытэк вера аслаз тырмымтэосыз сярысь, озьы ик со сярысь, кытын но мар со каре нунал куспын, кышноезлы капчигес луоз солы оскыны.

Дась-а тӥ та амалэз уже кутыны? Дась ке, карттылы ӵектэ та статьяез ӵош лыдӟыны но эскерыны. Солы ас азяз ужпум пуктоно порнографиез учкемлэсь куштӥськыны но тӥледын кусыпъёссэ тупатыны. Та сярысь вераськыны кутскыкуды, вожзэ поттэм интые, солы валаны тыршоно, макем тӥледлы вӧсь луэ. Нош тӥляд ужпумды — карттылы юрттыны но оскыны, со урод сямызлэсь куштӥськыны быгатоз шуыса. Тӥледлы кыкнадылы но валаны тыршоно, малы порнографиез учкон сям кылдэ но кызьы соин нюръяськоно d.

 Оло нош, тӥ кышкаськоды, вераськыкуды асьтэды кияды кутыны уд быгатэ шуыса. Соку, шуг-секытты сярысь вераськыкуды, ӧте тӧроез, кудӥзлы кыкты ик оскиськоды. Малпано ӧвӧл, картты урод сямызлэсь куштӥськемез бере ик тӥ солы оскоды шуыса. Солы выльысь оскон понна трос дыр кулэ луоз вылды. Но киостэс эн лэзе. Висъялэ саклыктэс солы, мар карттылэн пӧрме ини. Чидалэ но оске, тӥ нош ик шудо луоды шуыса (Екк. 7:8; 1 Кор. 13:4).

Картты нош ик порнографиез учкыны кутскиз ке, возьматэ-а та, со ӧз ӧпкельы но солэн номыр уз пӧрмы ини шуыса? Котьку ик уг. Но солэн та сямыз туж мур пыӵамын ке, солы таин быдэс улонэз ӵоже нюръяськоно луоз, вылды. Трос аръёс ортчыса но, та сямыз выльысь потыны быгатэ. Озьы медам луы шуыса, солы аслыз эшшо но чурытэсь куронъёс пуктоно луоз, вылды. Соку но, куке со малпаз, урод сямзэ вормиз шуыса, солы та куронъёсъя улоно луоз (Мад. 28:14; Матф. 5:29; 1 Кор. 10:12). Карттылы дышетсконо выль сямен малпаськыны но адӟонтэм карыны лек ужъёсты — порнографиез, озьы ик мукет кырсь сямъёсты, кылсярысь, мастурбациез (Еф. 4:23; Пс. 96:10; Рим. 12:9). Дась-а со тазьы нюръяськыны? Дась ке, соку со быгатоз урод сямзэ вормыны e.

Нош мар кароно карттылэн урод сямызлэсь куштӥськемез туж ик уг поты ке? Куддыръя тӥ ӝоже усёды, тӥляд вожды потоз но карттылы осконды быроз, вылды. Соку Иеговалэсь буйгатскон утчалэ. Сюлмаськонъёстэс со кие сётэ. Та юрттоз тӥледлы каньыл сюлмын улыны (1 Пётр 5:7). Иеговалы матэ кариське, солэсь Кылзэ эскерыса но солы вӧсяськыса. Юн оске, со но тӥледлы матэгес кариськоз шуыса. Кызьы гожтэмын Исаиялэн 57:15, Инмар «чигиськыса-ӧпкельыса, зӥбыт-востэм духен улӥсьёс бордын» улэ но соослы кужым сётэ. Христиан сямъёсты будэтэ но Иеговалы самой умойзэ сётэ. Тӧроослэсь юрттэт куре. Азьланяз но оске, куке но карттылэн воштӥськемез потоз шуыса (2 Пётр 3:9; Рим. 2:4).