1. Мар милемлы юрттоз Библиысь азьпалзэ ивортонъёсты шумпотыса эскерыны?

 «МЫНЫМ туж кельше эскерыны Библиысь азьпалзэ ивортонъёсты»,— вера Бен нимо егит агай. Вань-а тӥляд но таӵе ик шӧдонъёсты? Яке азьпалзэ ивортонъёсты эскерыны тӥледлы кышкытгес? Оло нош, соос сярысь кылыса гинэ, тӥледлы мӧзмыт луэ ини? Куке тӥ тросгес тододы со сярысь, малы Иегова Библие азьпалзэ ивортонъёсты пыртӥз, тӥ мукет сямен малпаськыны кутскоды, вылды.

2. Мае ми эскеромы та статьяын?

² Та статьяын нырысь ми вераськомы со сярысь, малы кулэ эскерыны Библиысь азьпалзэ ивортонъёсты но кызьы сое лэсьтоно. Собере эскеромы Данииллэн книгаысьтыз кык азьпалзэ ивортонъёсты но адӟомы, кыӵе пайда соос милемлы вайыны быгато.

3. Мар милемлы кароно, Библиысь азьпалзэ ивортонъёсты валан понна?

³ Библиысь азьпалзэ ивортонъёсты валан понна, милемлы юрттэт кулэ. Эскеромы тае пример вылын. Пуктэ син азяды, тӥ тодмотэм интые вуиды шуыса. Но тӥ огнады ӧвӧл — тӥледын эшты, кудӥз та интыез туж умой тодэ. Со тодэ, кытын тӥ али но кытчы нуэ котькуд сюрес. Иеговаез сыӵе эшен ӵошатыны луэ. Со тодэ, историлэн кыӵе вакытаз ми улӥськомы но мар милемыз азьланяз возьма. Озьыен, Библиысь азьпалзэ ивортонъёсты валан понна, милемлы зӥбыт-востэмесь луоно но Иеговалэсь юрттэт куроно (Дан. 2:28; 2 Пётр 1:19, 20).

4. Малы Иегова аслаз Кылаз азьпалзэ ивортонъёсты пыртӥз? (Иеремия 29:11). (Озьы ик учке суредэз.)

⁴ Умой анай-атайёс нылпиоссылы шуд гинэ сӥзё. Иегова ӵапак сыӵе Атай. (Лыдӟе Иеремиялэсь 29:11.) Но адямиосын ӵошатыса, Инмар пыр-поч вераны быгатэ, мар азьланяз луоз.  Куд-ог пиосмуртъёслэсь со мылкыдзэс ӝутӥз, азьпалзэ ивортонъёсты гожтыны. Солы луыса ми тодыны быгатӥськомы кулэ луись югдуръёс сярысь, кудъёсыз азьланяз луозы (Ис. 46:10). Озьыен, Библиысь азьпалзэ ивортонъёс — со инмысь Атаймылэн кузьымъёсыз, кудӥз милемыз туж яратэ. Но малы оскыны луэ, Библиысь азьпалзэ ивортонъёс одно ик быдэсмозы шуыса?

5. Малы дышетэ Макслэн учырез егит агайёсты но сузэръёсты?

⁵ Школаын егит агайёсмы но сузэръёсмы котырын ӵем дыръя сыӵе адямиос, кудъёсыз Библиез уг гажало. Соослэн кылъёссы но ужъёссы егит Адӟись-Ивортӥсьёслэсь осконзэс лябӟытыны быгато. Тани мар луиз Макс агаен. Со тодаз вае: «Куке мон быдэ вуэмын ӧй вал на, мон малпаськыны кутски: зэм-а анай-атаелэн шонер осконзы, озьы ик зэм-а Библиын Инмарлэн кылъёсыз гожтэмын?» Кызьы асьсэды возизы солэн анай-атаез? Макс вера: «Соос сюлмаськизы ке но, соос вожзэс ӧз поттэ». Макслэн вань юанъёсызлы анаез но атаез Библиысь валэктонъёс сётъязы. Со сяна, со ачиз но мар ке но кариз. Макс валэктэ: «Мон ачим эскери Библиысь азьпалзэ ивортонъёсты но басьтэм тодон-валанъёсы сярысь кенешысь эшъёсыным вераськи». Кыӵе пайда со вайиз? Макс вера: «Мынам осконэ юнмаз, Библия — со Инмарлэн книгаез шуыса!»

6. Мар тӥледлы кароно, тӥляд оскондэс лябӟытӥсь малпанъёсты кылдӥзы ке, но малы?

⁶ Макслэн сямен, тӥляд но осконды лябӟиз ке, Библиын зэмлык гожтэмын шуыса, асьтэды янгыше эн уськытэ. Но таин мар ке но карыны кулэ. Кылсярысь, сыномыса дуно арбери бырыны быгатэ. Ӵапак озьы ик осконэз лябӟытӥсь малпанъёс сэрен оскон «сыномыны» быгатэ. Валан понна, осконды «сыномыны» ӧз кутскы-а шуыса, юалэ асьтэлэсь: «Оскисько-а мон солы, мар гожтэмын Библиын азьпал улон сярысь?» Тӥ юн мылкыдын «оскисько» шуыса вераны уд ке быгатӥське, тӥледлы кулэ эскерыны Библиысь азьпалзэ ивортонъёсты, кудъёсыз быдэсмизы ини. Кызьы сое лэсьтыны луэ?

7. Кызьы Данииллэсь адӟем карыны луэ, азьпалзэ ивортонъёсты эскерыку? (Даниил 12:10). (Озьы ик учке суредэз.)

⁷ Даниил умой адӟем карон возьматӥз, кызьы азьпалзэ ивортонъёсты эскероно. Со шонер мылкыдын эскериз. Солэн зэмлыкез тодэмез потэ вал. Озьы ик Даниил зӥбыт-востэм вал но валаз: Иегова валан сётэ соослы гинэ, кинъёс сое тодо но солэн курон-косонъёсызъя уло (Дан. 2:27, 28; лыдӟе Данииллэсь 12:10). Котьку но Иеговалэсь юрттэтсэ курыса, Даниил зӥбыт-востэм луэмзэ возьматӥз (Дан. 2:18). Со сяна, Даниил тыршыса эскериз Библилэсь со люкетъёссэ, кудъёсыз соку гожтэмын вал ини (Иер. 25:11, 12; Дан. 9:2). Кызьы тӥ Данииллэсь адӟем карыны быгатӥськоды?

8. Малы куд-огъёсыз Библиысь азьпалзэ ивортонъёслы уг оско но малы милемлы сыӵе мылкыдлэсь палэнскыны кулэ?

⁸ Шонер мылкыдын эскере. Малы тӥ эскериськоды Библиысь азьпалзэ ивортонъёсты? Тӥляд зэмлыкез шедьтэмды потэ-а? Озьы  ке, Иегова тӥледлы одно ик юрттоз (Иоанн 4:23, 24; 14:16, 17). Нош кыӵе мылкыдлэсь палэнскыны кулэ? Куд-огъёсыз азьпалзэ ивортонъёсты эскеро, Библия Инмарлэсь ӧвӧл шуыса возьматон понна. Соослэн малпамзыя, соку соос быгатозы Библиысь визь-кенешъёслэсь кылзӥськытэк улыны но асьсэос бырйыны, мар ӟечез, нош мар уродэз луэ. Но эскерыкумы милям шонер мылкыдмы луыны кулэ. Со сяна, Библиысь азьпалзэ ивортонъёсты валан понна, одӥг сям кулэ.

9. Кыӵе сям кулэ, Библиысь азьпалзэ ивортонъёсты валан понна? Валэктэ.

⁹ Зӥбыт-востэмесь луэ. Иегова зӥбыт-востэм адямиослы юрттыны кылзэ сётэ (Иак. 4:6). Соин ик милемлы солэсь юрттэтсэ куроно. Соку гинэ ми быгатомы Библиысь азьпалзэ ивортонъёсты валаны. Озьы ик валано: милемлы кулэ оскиськымон ляльчилэн юрттэтэз, кудӥз дырыз дыръя духовной сиён сётэ (Лука 12:42). Иегова — радлыклэн Инмарез. Соин ик аслаз Кылысьтыз зэмлыкъёсты со та ляльчи пыр гинэ валэктэ (1 Кор. 14:33; Еф. 4:4—6).

10. Малы тӥледыз дышетэ Эстерлэн учырез?

¹⁰ Тыршыса эскере. Нырысь быръе азьпалзэ ивортонэз, кудӥз тӥледлы тунсыко потэ, но сое эскере. Озьы ик лэсьтӥз Э́стер сузэр. Солэн валамез потэ вал азьпалзэ ивортонъёсты, кудъёсаз вераськиз Мессиялэн лыктонэз сярысь. Со вера: «15 арес дыръям мынам валаме потэ вал, малы оскыны луэ, та азьпалзэ ивортонъёс Иисуслэн вордскемезлэсь азьло гожтэмын вал шуыса». Сылало зарезьысь свитокъёс сярысь лыдӟыса, Эстерлэн осконэз юнмаз. Со валэктэ: «Со свитокъёс пӧлысь куд-огъёсыз гожтэмын вал Христос музъем вылэ лыктытозь. Озьыен, азьпалзэ ивортонъёс, кудъёсыз отын гожтэмын, Инмарлэсь». Эстер вера: «Куддыръя, валан понна, одӥг мае ке ик мыным трос пол лыдӟоно луылӥз». Но Эстер нокӧня но уг жаля, сомында кужым понӥз шуыса. Библиысь кӧня ке азьпалзэ ивортонъёсты тыршыса эскеремез бере со таӵе йылпумъян лэсьтӥз: «Мон валай, Библилы быдэсак оскыны луэ шуыса!»

11. Малы оскыны кулэ, Библиын зэмлык гожтэмын шуыса?

¹¹ Куке ми адӟиськомы, Библиысь куд-ог азьпалзэ ивортонъёс быдэсмизы ини шуыса, ми эшшо но золгес оскиськомы Иеговалы но солэн кивалтэтэзлы. Со сяна, кыӵе гинэ шуг-секытъёсын ми медам пумиське, азьпалзэ ивортонъёс милемлы юртто вуоноез шоры юн мылкыдын учкыны. Ойдолэ вакчияк эскеромы Данииллэн книгаысьтыз кык азьпалзэ ивортонъёсты, кудъёсыз асьме нуналъёсы быдэсмо. Соосты валаса, ми визьмо ужпумъёс кутыны быгатомы.

12. Мае возьмато пыдъёс, кудъёсызлэн «оглюкетэз горшок лэсьтон сюйлэсь, оглюкетэз кортлэсь вал»? (Даниил 2:41—43).

¹² Лыдӟе Данииллэсь 2:41—43. Навуходоносор вӧтаса адӟиз туж бадӟым сульдэрез, кудӥзлэн пыдъёсыз «оглюкетэз горшок лэсьтон сюйлэсь, оглюкетэз кортлэсь вал». Та азьпалзэ ивортонэз ӵошатоно ке Данииллэн книгаысьтыз но Усьтӥськон книгаысь мукет азьпалзэ  ивортонъёсын, валаны луэ, пыдъёс возьмато Англо-Американской дунневыл державаез, кудӥз али та дуннеын самой кужмо луэ. Та дунневыл держава сярысь Даниил вераз, солэн «оглюкетэз юн луоз, нош мукетыз шальтрамын луоз» шуыса. Малы солэн оглюкетэз шальтрамын луоз? Малы ке шуоно огшоры адямиос, кудъёсыз горшок лэсьтон сюен ӵошатӥсько, та дунневыл державалы люкето вань кужымзэ поныса кивалтыны b.

13. Кыӵе кулэ луись зэмлыкъёсты ми шедьтыны быгатомы, сульдэр сярысь азьпалзэ ивортонэз валамы ке?

¹³ Сульдэр сярысь, тужгес но солэн пыдъёсыз сярысь, Данииллэн верамез куд-ог кулэ луись зэмлыкъёсты усьтэ. Нырысетӥез, Англо-Американской дунневыл державалэн туж бадӟым кужымез вань. Со сое кӧня ке пол возьматъяз ини. Кылсярысь, Великобритания но Огазеяськем Штатъёс вал шаеръёс пӧлын, кудъёсыз кыказ ик дунневыл ожъёсын вормон басьтӥзы. Но та дунневыл державалэсь кужымзэ лябӟыто солэн кивалтэмез улсын ик улӥсьёс. Соос кивалтэтлы пумит ӝутскыло но ог-огенызы нюръясько. Таӵе югдур луоз азьланяз но. Кыкетӥез, ӵапак та дунневыл держава кивалтоз, куке Инмарлэн Эксэйлыкез адямиослэсь вань кивалтэтъёссэс быдтоз. Мукет калыкъёс Англо-Американской дунневыл державалэсь интызэ басьтыны тыршозы ке но, соослэн номыр уз пӧрмы. Ми тазьы шуыны быгатӥськомы, малы ке шуоно «из», кудӥз Инмарлэсь Эксэйлыксэ возьматэ, шуккиськоз пыдъёс борды, кудъёсыз Великобританилэсь но Огазеяськем Штатъёслэсь огазеяськонзэс возьмато (Дан. 2:34, 35, 44, 45).

14. Кызьы горшок лэсьтон сюйлэсь но кортлэсь пыдъёс сярысь азьпалзэ ивортонэз валан юрттэ визьмо ужпумъёс кутыны?

¹⁴ Оскиськоды-а тӥ, горшок лэсьтон сюйлэсь но кортлэсь пыдъёс сярысь Даниилэн азьпалзэ ивортонэз быдэсме шуыса? Оскиськоды ке, со кутэм ужпумъёсты вылын шӧдӥськоз. Та дуннеын, кудӥз ӝоген быдтэмын луоз, тӥ узырлык но ваньбур люкаса уд улэ (Лука 12:16—21; 1 Иоанн 2:15—17). Озьы ик та азьпалзэ ивортонэз валан юрттоз тӥледлы адӟыны, тодытон но дышетскисьёсты дасян уж туннэ самой валтӥсез шуыса (Матф. 6:33; 28:18—20). Та азьпалзэ ивортонэз эскеремды бере юалэ асьтэлэсь: «Оскисько-а мон, Инмарлэн Эксэйлыкез адямиослэсь вань кивалтэтъёссэс ӝоген быдтоз шуыса? Адӟиське-а та кутэм ужпумъёсысьтым?»

15. Кинэ туннэ возьматэ «уйпал эксэй», нош кинэ — «лымшор эксэй»? (Даниил 11:40).

¹⁵ Лыдӟе Данииллэсь 11:40. Данииллэн книгаысьтыз 11-тӥ люкетын вераське кык эксэйёс сярысь, яке кивалтэтъёс сярысь, кудъёсыз ог-огенызы ожмасько но дуннеын валтӥсь инты басьтыны тыршо. Та азьпалзэ ивортонэз мукет азьпалзэ ивортонъёсын ӵошатон валаны юрттэ: «уйпал эксэй» — со Россия но со пала кариськись шаеръёс, нош «лымшор эксэй» — со Англо-Американской дунневыл держава c.

16. Кыӵе шуг-секытъёсын пумиськыло соос, кинъёс «уйпал эксэйлэн» кивалтэмез улсын уло?

¹⁶ «Уйпал эксэй» уйылэ-улля Инмарлэсь ужась-тыршисьёссэ, кудъёсыз солэн кивалтэмез улсын уло. Инмарлы оскемзы понна куд-ог Адӟись-Ивортӥсьёсты жугыло но пытсэтъёсы пуктыло. Но «уйпал эксэй» вын-агайёсмес кышкатыны уг быгаты. Со интые, соослэн осконзы эшшо но юнгес луэ. Малы? Малы ке шуоно соос адӟо, кызьы Данииллэн азьпалзэ  ивортонэз пыр-поч быдэсме (Дан. 11:41) d. Та сярысь тодамы возимы ке, ми быгатомы юн осконэн улыны но Иеговалы оскымон кыльыны.

17. Кыӵе шуг-секытъёсын пумиськыло Инмарлэн ужась-тыршисьёсыз, кудъёсыз «лымшор эксэйлэн» кивалтэмез улсын уло?

¹⁷ Азьвыл Иеговалэсь калыксэ «лымшор эксэй» но уйылӥз-улляз. Кылсярысь, XX даурлэн шорозяз трос вын-агайёсмес нейтралитет воземзы понна пытсэтъёсы пуктылӥзы, нош куд-ог Адӟись-Ивортӥсьёслэсь нылпиоссэс школаосысь поттылӥзы. Но берло дасо аръёс ӵоже Иеговалэн ужась-тыршисьёсыз, кудъёсыз «лымшор эксэйлэн» кивалтэмез улсын уло, мукет шуг-секытъёсын пумиськыло. Соосты соку ик уд адӟы. Кылсярысь, быръёнъёс азьын кампаниос дыръя христиан муртлэн мылкыдыз ӝутскыны быгатэ кыӵе ке партия яке кивалтӥсь пала кариськыны. Валамон, христиан мурт быръёнъёсы уз пыриськы. Но со аслаз визьмаз но сюлмаз кин ке пала кариськыны быгатэ. Соин ик туж кулэ, ужъёсмы,  малпанъёсмы но шӧдонъёсмы мед возьматозы, ми политика удысын нокин пала ум кариськиське шуыса! (Иоанн 15:18, 19; 18:36).

18. Кызьы милемлы асьмеды возёно, уйпал но лымшор эксэйёслэсь ожмаськемзэс адӟыса? (Озьы ик учке суредэз.)

¹⁸ Соос, кинъёс Библиысь азьпалзэ ивортонъёслы уг оско, уйпал но лымшор эксэйёслэсь ожмаськемзэс адӟыса, туж сюлмаськыны быгато (Дан. 11:40). Кыкезлэн ик та эксэйёслэн трос ядерной ожтӥрлыксы вань, кудӥныз быдэс музъемез быдтыны луэ. Но ми тодӥськомы, Иегова музъемез быдтыны уз лэзьы шуыса (Ис. 45:18). Соин ик «уйпал эксэйлэн» но «лымшор эксэйлэн» ожмаськемзы милемыз уг кышкаты, нош осконмес юнматэ. Малы ке шуоно со возьматэ, та дуннелэн пумыз матын ини шуыса.

19. Мае валаны кулэ Библиысь азьпалзэ ивортонъёс пумысен?

¹⁹ Ми ум тодӥське, кызьы быдэсмозы Библиысь куд-ог азьпалзэ ивортонъёс. Даниил пророк но ӧз вала ваньзэ ик, мае гожъяз (Дан. 12:8, 9). Ми кыӵе ке азьпалзэ ивортонэз пумозяз ум ке валаське, со уг возьматы, со уз быдэсмы шуыса. Ми юн оскиськомы: ас дыраз Иегова усьтоз милемлы ваньзэ, мае милемлы тодыны кулэ. Со котьку но озьы лэсьтэ (Ам. 3:7).

20. Библиысь кыӵе азьпалзэ ивортонъёс ӝоген быдэсмозы но мар кароно милемлы азьланяз но?

²⁰ Кыӵе ке но дыре адямиос «тупаса улон, кышкатэк улон» шуыса ялозы (1 Фес. 5:3). Собере дунне вылысь кивалтӥсьёс зэмос луисьтэм религия вылэ урдскозы но сое быдтозы (Усьт. 17:16, 17). Та бӧрсьы соос Инмарлэн калыкез вылэ урдскозы (Иез. 38:18, 19). Нош собере Армагеддон ож кутскоз (Усьт. 16:14, 16). Ми юн оскыны быгатӥськомы, со дырозь туж ӧжыт дыр кылемын ини шуыса. Нош али ойдолэ Библиысь азьпалзэ ивортонъёсты валаны тыршомы но мукетъёсызлы юрттомы соосты валаны. Озьы ми инмысь Атаймылы тау кареммес возьматомы.