ЭСКЕРОН ПОННА 32-ТӤ СТАТЬЯ
44-ТӤ КЫРӞАН Куректӥсь муртлэн вӧсяськонэз
Иеговалэн потэ, ваньзы мед ӧпкелёзы шуыса
«Нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса... [Иегова] асьмеды кема чидаса возьма» (2 ПЁТР 3:9).
МИ ТОДОМЫ
Мар со сыӵе ӧпкелён, малы со кулэ но кызьы Иегова адямиослы ӧпкельыны юрттэ.
1. Кытысь адӟиськоз, адями ӧпкеле шуыса?
КУКЕ ми мае ке шонертэм лэсьтӥмы, ӧпкельыны кулэ. Библия верамъя, куке адями ӧпкеле, со лэсьтэм ужез сярысь жаля, ассэ шонертэм воземысь дугдэ но янгышъёссэ выльысь лэсьтытэк улыны тырше (Матф. 3:8; Ап. уж. 3:19; 2 Пётр 3:9).
2. Малы ваньмылы тодыны кулэ, мар со сыӵе ӧпкелён? (Неемия 8:9—11).
2 Котькуд адямилы тодыны кулэ, мар со сыӵе ӧпкелён, малы ке шуоно ми ваньмы котькуд нунал сьӧлыкаськомы. Ми Адамлэн но Евалэн нылпиоссы бере, милемлы ваньмылы сьӧлык но кулон выжиз (Рим. 3:23; 5:12). Юн осконэн адямиос но, кылсярысь, апостол Павел, сьӧлыкен нюръяськизы (Рим. 7:21—24). Возьматэ-а со, сьӧлыкъёсынымы сэрен ми шумпотыса улыны ноку ум быгатэ шуыса? Уг, уг возьматы. Иегова — гажась-жалясь Инмар. Солэн потэ, ми шудоесь мед луомы шуыса. Тодамы ваёмы еврейёсты, кудъёсыз Неемия улон вакытэ улӥзы. (Лыдӟе Неемиялэсь 8:9—11.) Иеговалэн уг поты вал, соос азьвыл лэсьтэм сьӧлыкъёссы понна ӝожомыса мед улозы шуыса. Иеговалэн потэ вал, соос шумпотыса солы мед йыбыртъялозы шуыса. Иегова тодэ бере, ӧпкелён шумпотон вае шуыса, со милемлы валэктэ, мар со сыӵе ӧпкелён. Ми сьӧлыкъёсмы понна ӧпкелимы ке, юн оскыны быгатомы, гажась-жалясь Инмармы милемыз простить кароз шуыса.
3. Мае ми эскеромы та статьяын?
3 Та статьяысь ми тросгес тодомы ӧпкелён сярысь. Нырысь ми эскеромы, мар вераз Иегова ӧпкелён сярысь израиль калыклы. Собере тодомы, кызьы Иегова сьӧлыкасьёслы юрттӥз ӧпкельыны. Со сяна, ми вераськомы со сярысь, мар вераз ӧпкелён сярысь Иисус аслаз дышетскисьёсызлы.
МАР ВЕРАЗ ИЕГОВА ӦПКЕЛЁН СЯРЫСЬ ИЗРАИЛЬ КАЛЫКЛЫ
4. Мар вераз Иегова ӧпкелён сярысь израиль калыклы?
4 Израиль калыкез кылдытэмез бере Иегова соин тупанкыл кутӥз. Израиль калыкысь адямиос Инмарлэн законъёсызъя улысалзы ке, со соосты утьысал но бакель карысал. Иегова калыкезлы шуиз: «Туннэ тыныд быдэсъяса улыны сётэм курон-косон тон понна валантэм луэ уд шуы, тыныд кыдёкын ӧвӧл со» (К. Зак. 30:11, 16). Но израиль калык Инмарлэсь ӧй ке кылзӥськысал, кылсярысь, мукет инмаръёслы йыбыртъясал ке, со соосты бакель каремысь дугдысал. Соку соос курадӟыса улысалзы. Но со уг возьматы вал, Инмар аслэсьтыз калыксэ палэнтэ вал шуыса. Сыӵе учырын но соос быгато вал Иегова доры берытскыны но солэсь кылзӥськыны (К. Зак. 30:1—3, 17—20). Мукет сямен вераса, соос быгато вал ӧпкельыны. Соку Иегова нош ик калыкез доры матэ кариськысал но сое бакель карысал.
5. Кызьы Иегова возьматӥз, калыксэ номырлы ярантэм адямиосын ӧз лыдъя шуыса? (4 Эксэйлыкъёслэн 17:13, 14).
5 Иеговалэн калыкез трос пол солы пумит ӝутскылӥз. Израиль калык зэмос луисьтэм инмаръёслы но йыбыртъяз, мукет бадӟым сьӧлыкъёсты но лэсьтылӥз. Соин ик соос курадӟыса улӥзы. Озьы ке но Иегова аслэсьтыз калыксэ номырлы ярантэм адямиосын ӧз лыдъя. Инмар выльысь но выльысь соос доры пророкъёссэ ыстылӥз, соос мед ӧпкелёзы но со доры мед берытскозы шуыса. (Лыдӟе 4 Эксэйлыкъёслэсь 17:13, 14.)
6. Кызьы Иегова пророкъёсыз пыр калыксэ дышетӥз, ӧпкельыны туж кулэ шуыса? (Озьы ик учке суредэз.)
6 Иегова калыкез доры пророкъёссэ ӵем ыстылӥз, сое тупатон понна но веран понна, мар луоз со кылзӥськытэк улӥз ке. Кылсярысь, Иеремия гожтӥз: «Израиль ныл, осконлэсь куштӥськись, берытскы,— шуэ Кузё-Инмар. — Аслэсьтым йыркурме тӥ вылэ Мон уг кисьты, уго Мон — гажась-жалясь,— шуэ Кузё-Инмар,— пумтэм дауръёс ӵоже йыркуръяськыса уг улы. Танӥськытэк вера аслэсьтыд янгыштэ: тон уго Инмаредлэсь Кузё-Инмарлэсь палэнскид» (Иер. 3:12, 13). Иоиль пыр Инмар вераз: «Чылкыт сюлмыныды Мон пала берытске» (Иоиль 2:12, 13). Исаия пыр Иегова шуиз: «Мисьтӥське, чылкытатӥське. Мынам син азям урод ужъёс лэсьтэмысь дугдэ, уродэз-лекез бордысьтыды палэнтэ» (Ис. 1:16—19). Нош Иезекиилез Инмар косӥз гожтыны таӵе кылъёсты: «Законлы пумит улӥсьлэсь кулонзэ Мон витисько шат? — шуэ Инмар Кузё-Инмар,— со сюрес вылысьтыз мед берытскоз но улэп мед луоз — сое уг-а витиськы?» Озьы ик Инмар вераз: «Нокинлэсь но кулонзэ Мон уг возьмаськы ук... Инмар пала берыктӥське но кема улэлэ ук!» (Иез. 18:23, 32). Иегова туж шумпотэ, куке адямиос ӧпкелё, малы ке шуоно солэн потэ, соос пырак мед улозы шуыса. Адӟиське, сьӧлыкасьёслы юрттон понна, Инмар соослэсь ӧпкелемзэс уг возьма. Эскеромы на эшшо куд-ог примеръёсты, кудъёсыз тае возьмато.
Иегова ӵем ыстылӥз пророкъёссэ аслаз калыкез доры, сое тупатон но ӧпкельыны юрттон понна. (Учке 6-тӥ но 7-тӥ абзацъёсты.)
7. Малы Иеговалэн аслэсьтыз калыксэ дышетэмез потэ вал Осия пророклэн но солэн Гомер кышноезлэн примерзы вылын?
7 Висъялэ саклыктэс, малы Иеговалэн аслэсьтыз калыксэ дышетэмез потэ вал Осия пророклэн но солэн Гомер кышноезлэн примерзы вылын. Гомер мукет пиосмуртъёсын азыса-калгыса улыны кутскиз. Быгатэ на-а вал со азыса-калгыса улэмысь дугдыны? Иегова, кудӥз адямилэсь сюлэмзэ адӟе, Осиялы шуиз: «Нош ик яраты кышнодэ, кудӥз азыса-калгыса улэ но кудзэ мукет пиосмурт яратэ. Яраты сое, кызьы Иегова аслэсьтыз калыксэ яратэ, со мукет инмаръёслы йыбыртъя... ке но» (Ос. 3:1, ВД; Мад. 16:2). Осиялэн кышноез азыса-калгыса улэ на вал. Озьы ке но Иегова пророксэ косӥз сое простить карыны но берен бордаз басьтыны a. Ӵапак озьы ик Иегова но ваменэс калыкезлэсь ӧз палэнскы. Израиль калык туж бадӟым сьӧлыкъёсты лэсьтӥз ке но, Инмар сое азьло сямен ик яратэ вал. Иегова калыкез доры пророкъёссэ ыстылӥз, со мед ӧпкелёз но мед воштӥськоз шуыса. Та учыр возьматэ, Иегова сюлэмъёсты эскере но секыт сьӧлык лэсьтӥсьёслы ӧпкельыны юрттэ шуыса (Мад. 17:3). Ойдолэ эскеромы, кызьы со сое лэсьтэ.
КЫЗЬЫ ИЕГОВА СЬӦЛЫКАСЬЁСЛЫ ЮРТТЭ ӦПКЕЛЬЫНЫ
8. Мар кариз Иегова, Каинлы ӧпкельыны юрттон понна? (Улон-вылон 4:3—7). (Озьы ик учке суредэз.)
8 Каин Адамлэн но Евалэн нырысетӥез пизы вал. Соослэсь Каинлы сьӧлыко луон выжиз. Каин шонертэм мылпотонъёссэ ӧз куты, соин ик урод ужъёс лэсьтӥз (1 Иоанн 3:12). Соин сэрен, вылды, Иегова «Каин шоры, солэн салам-кузьымез шоры яратыса ӧз учкы». Тупатскем интые, «Каин туж юн ӝоже усиз, йырзэ ошиз». Нош мар кариз Иегова? Со Каинэн вераськиз. (Лыдӟе Улон-вылонэз 4:3—7.) Иегова лякытэн соин вераськиз но шуиз, ӟеч ужъёс лэсьтӥз ке, со бакель каремын луоз шуыса. Озьы ик Иегова Каинлы вераз, кытчы вуттэ сьӧлык. Но жаляса верано луэ, Каин ӧз кылзӥськы. Со ӧз лэзьы Иеговалы солы юрттыны ӧпкельыны. Малпаз-а собере Иегова, ӧпкельыны нокинлы уз юрттыны ини шуыса? Ӧз, со озьы ӧз малпа.
Иегова лякытэн вераськиз Каинэн но солы шуиз, ӟеч ужъёс лэсьтӥз ке, со бакель каремын луоз шуыса. Озьы ик Инмар шуиз, мар луоз, со сьӧлыказ ке. (Учке 8-тӥ абзацез.)
9. Кызьы Иегова Давидлы ӧпкельыны юрттӥз?
9 Иегова туж яратэ вал Давид эксэез. Инмар сое аслаз сюлмызлы кельшись пиосмуртэн нимаз (Ап. уж. 13:22). Но Давид туж бадӟым сьӧлыкъёсты лэсьтӥз: со азон-калгон сьӧлыке пыриз но адямиез вииз. Моисейлэн законэзъя Давидэз виыны кулэ вал (Лев. 20:10; Лыд. 35:31). Но Иеговалэн солы юрттэмез потэ вал ӧпкельыны b. Давид уг ӧпкельы на вал ке но, Инмар со доры Нафан пророкез ыстӥз. Давид сьӧлыкамзэ мед валалоз шуыса, Нафан солы мадён вераз. Давид валаз, макем вӧсь со кариз Иеговаез, но ӧпкелиз (2 Экс. 12:1—14). Аслаз шӧдонъёсыз сярысь со псаломын гожъяз (Пс. 50:1, 2). Та псалом трос сьӧлыкасьёсты буйгатӥз но ӧпкельыны мылкыдзэс ӝутӥз. Ми туж шумпотӥськомы, Иегова Давидэз яратэ вал но солы ӧпкельыны юрттӥз шуыса.
10. Кыӵе шӧдонъёсты тӥляд кылдо, куке тӥ малпаськиськоды со сярысь, кызьы Иегова сьӧлыко адямиослы чиданзэ возьматэ но соосты простить каре?
10 Иегова котькыӵе сьӧлыкез адӟемпотостэм каре (Пс. 5:5, 6). Но Инмар тодэ, ми ваньмы сьӧлыкоесь шуыса. Соин ик со яратыса юрттэ милемлы сьӧлыкен нюръяськыны. Иегова кема дыр ӵоже сьӧлыкаса улӥсьёслы но юрттыны тырше ӧпкельыны но соин эшъяськыны. Та милемыз туж буйгатэ! Куке ми малпаськиськомы со сярысь, кызьы Иегова милемлы чиданзэ возьматэ но милемыз простить каре, милям эшшо но зол потэ солы оскымон ужаммы-тыршеммы, нош сьӧлыкаськомы ке, ӝоггес ӧпкелеммы. Нош али ойдолэ эскеромы, мар вераз ӧпкелён сярысь аслаз дышетскисьёсызлы Иисус.
МАР ВЕРАЗ ӦПКЕЛЁН СЯРЫСЬ ИИСУС АСЛАЗ ДЫШЕТСКИСЬЁСЫЗЛЫ
11, 12. Кыӵе мадён вераз Иисус, возьматон понна, Атаез простить карыны яратэ шуыса? (Учке суредэз.)
11 Асьме вакытысь I дауре музъем вылэ Мессия лыктӥз. Кызьы вераськиз ини кылем статьяын, Иегова уж сётӥз Иоанн Пылатӥсьлы но Иисус Христослы адямиосты дышетыны, ӧпкельыны туж кулэ шуыса (Матф. 3:1, 2; 4:17).
12 Инмын улыкуз, Иисус трос пол адӟиз, луоз, кызьы Атаез ӧпкелисьёслы гажан-жалянзэ возьматэ но простить каре. Нош музъем вылын улыкуз, Иисус со сярысь адямиослы вералляз. Тужгес но умой со адӟиське мадёнысь пи сярысь, кудӥз «ышыса улӥз, но сюриз». Одӥг пиосмуртлэн пиез кӧня ке дыр ӵоже азыса-калгыса улӥз. Берлогес со валаз, шонертэм улэ шуыса, но дораз берытскиз. Кызьы сое атаез пумитаз? Иисус шуиз: «Кыдёкысен ик сое атаез адӟем, солы со жаль потэм, бызьыса мынэм но чырты бордаз ӟыгыртӥськыса чупам сое». Со пиосмуртлэн пиез уг ик малпа вал ини, атаез сое простить кароз шуыса. Соин ик со атайзэ куриз сое медоосыз радэ пыртыны. Но атаез сое «мынам... пие» шуыса нимаз но берен семьяяз басьтӥз. Пиез сярысь атаез шуиз: «[Со] ышыса улӥз, но сюриз» (Лука 15:11—32). Та мадён милемыз туж буйгатэ но возьматэ, макем гажась-жалясь инмысь Атаймы, Иегова!
Иисуслэн мадёнысьтыз атай бызьыса пумита но ӟыгыртыны малпа пизэ, кудӥз «ышыса улӥз, но сюриз». (Учке 11-тӥ но 12-тӥ абзацъёсты.)
13, 14. Мае валаз Пётр ӧпкелён сярысь но малы со дышетӥз мукетъёссэ? (Озьы ик учке суредъёсты.)
13 Иисус апостол Пётрлы валаны юрттӥз, макем кулэ ӧпкельыны но простить карыны. Пётр ӵем янгышаз ке но, Иисус дась вал сое простить карыны. Кылсярысь, Пётр куинь пол Иисуслэсь куштӥськиз но собере туж куректӥз (Матф. 26:34, 35, 69—75). Но улӟемез бере Иисус Пётрлы возьматскиз, куке со огназ вал (Лука 24:33, 34; 1 Кор. 15:3—5). Соку Иисус Пётрез оскытӥз, сое простить каре но яратэ шуыса.
14 Пётр ас вылаз шӧдӥз, мар со сыӵе ӧпкелён но простить карон. Соин со быгатэ вал талы мукетъёссэ но дышетыны. Витьтонэтӥ нунал бере кӧня ке дыр ортчыса, Пётр еврейёс азьын речь вераз но соослы валэктӥз, соос Мессияез виизы шуыса. Озьы ке но со соослы лякытэн вераз: «Тӥляд сьӧлыкъёсты мед ӵушиськозы шуыса, ӧпкельыса сьӧлыкъёстылэсь куштӥське но Кузё-Инмар пала берытске. Кузё-Инмар ӟеч вапумъёс мед сётоз» (Ап. уж. 3:14, 15, 17, 19, 20а). Та кылъёсты вераса, Пётр возьматӥз: ӧпкелён сьӧлыкась муртлэсь мылкыдзэ ӝутэ воштӥськыны, яке шонертэм малпанъёссэ но ужъёссэ кельтыны но Инмарез шумпоттыса улыны. Озьы ик Пётр вераз, Иегова соослэсь сьӧлыкъёссэс ӵушоз шуыса, соослэн пытьызы но уз кыльы ни. Нош трос аръёс ортчыса, Пётр христианъёслы гожтӥз: «Нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса, Со асьмеды кема чидаса возьма» (2 Пётр 3:9). Та кылъёс туж буйгато христианъёсты, кудъёсыз секыт сьӧлык лэсьтӥзы!
Иисус ӧпкелись апостолэз простить кариз но оскытӥз, сое яратэ шуыса. (Учке 13-тӥ но 14-тӥ абзацъёсты.)
15, 16. а) Кызьы апостол Павел тодӥз, мар со сыӵе простить карон? (1 Тимофейлы 1:12—15). б) Мае ми эскеромы вуоно статьяын?
15 Тарс карысь Савл трос урод ужъёс лэсьтӥз. Со лек уйылӥз-улляз Христослэсь дышетскисьёссэ. Тросэз христианъёс малпазы, вылды, со ноку уз воштӥськы но уз ӧпкельы шуыса. Но улӟем Иисус мукет сямен малпаськиз. Со но солэн Атаез Савллэсь умой сямъёссэ адӟизы. Иисус Савл сярысь вераз: «Со... Мынам быръем сосудэ» (Ап. уж. 9:15). Савллы ӧпкельыны юрттон понна, Иисус паймымон уж лэсьтӥз (Ап. уж. 7:58—8:3; 9:1—9, 17—20). Иисуслэн дышетскисез луыса, Савл, кудӥз берлогес апостол Павел шуыса тодмо луиз, ӵем вералляз, Иеговалы но Иисуслы тау каре шуыса, солы ӟечлыксэс но гажан-жалянзэс возьматэмзы понна. (Лыдӟе 1 Тимофейлы 1:12—15.) Апостол Павел агайёслы но сузэръёслы вераз: «Инмарлэн ӟечлыкез тонэ ӧпкельыса сьӧлыкъёслэсь куштӥськонэ нуэ» (Рим. 2:4).
16 Огпол Павел кылӥз, Коринфысь кенешын одӥг агайлэн азыса-калгыса улэмез шоры чиньы пыр учко шуыса. Мар кариз Павел? Со кенешлы курон-косонъёс сётӥз, кудъёсысьтыз троссэ тодыны луэ Иегова сярысь. Куке Инмар кылкутытэ, со сое яратыса лэсьтэ, нош куке адями ӧпкеле, Инмар солы гажан-жалянзэ возьматэ. Милемлы но гажан-жалянмес возьматоно. Вуоно статьяысь ми пыр-почгес тодомы, мар луиз Коринфысь кенешын.
33-ТӤ КЫРӞАН Ужъёстэ Инмар кие сёт
a Туннэ кинлэн ке кузпалыз азон-калгон сьӧлыке пыриз ке, Инмар уг куры соин ӵош азьланяз но улыны. Иегова яратыса сюлмаське соос сярысь, кинъёслэн кузпалъёссы сыӵе сьӧлыке пыризы. Иисус Христос валэктӥз, соос люкиськыны быгато шуыса (Матф. 5:32; 19:9).
