1. Кыӵе мылкыдыз вань Иеговалэн котькуд адями пумысен?

 ИЕГОВА адямиосты бырйыны эрикен кылдытӥз. Котькуд нунал, ужпумъёс кутыкумы, ми со кузьымез уже кутӥськомы. Улонмес Иеговалы сӥзьыса но солэн семьяез пӧлы пырыса, ми самой кулэ луись ужпум кутӥськомы. Иеговалэн потэ, вань адямиос сыӵе быръён мед лэсьтозы шуыса. Малы? Малы ке шуоно со адямиосты яратэ но соослы самой умойзэ гинэ сӥзе. Инмарлэн потэ, адямиос соин мед эшъяськозы но пырак мед улозы шуыса (К. Зак. 30:19, 20; Гал. 6:7, 8).

2. Кызьы Иегова учке соос шоры, кинъёс бадӟым сьӧлык лэсьтӥзы но ӧз ӧпкеле на? (1 Иоанн 2:1).

² Озьы ке но Иегова нокинэ кужмысь уг косы аслыз ужаны-тыршыны. Со котькуд адямилы лэзе аслыз быръён лэсьтыны. Нош мар кароно, куке пылатӥськем христиан мурт Инмарлэсь законзэ тӥя но бадӟым сьӧлык лэсьтэ? Со уг ӧпкельы ке, сое кенешлэсь палэнтоно (1 Кор. 5:13). Соку но Иегова туж возьма, сьӧлыкам мурт со доры берытскоз шуыса. Ӧпкелисьёсты простить  карыны мед быгатоз шуыса, Иегова адямиос понна аслэсьтыз Пизэ сётӥз. (Лыдӟе 1 Иоаннлэсь 2:1.) Яратӥсь Инмармы сьӧлыкасьёсты ӧте ӧпкельыны (Зах. 1:3; Рим. 2:4; Иак. 4:8).

3. Мае ми эскеромы та статьяын?

³ Иеговалэн потэ, сьӧлык шоры но сьӧлыкасьёс шоры ми со сямен мед учкомы шуыса. Ойдолэ эскеромы, кызьы ми солэсь адӟем карыны быгатӥськомы. Та статьяез лыдӟыкуды, висъялэ саклыктэс: 1) мар кариз Коринфысь кенеш агаен, кудӥз бадӟым сьӧлык лэсьтӥз; 2) мар карыны косӥз Павел, куке со адями ӧпкелиз, но 3) кызьы Иегова учке христианъёс шоры, кудъёсыз бадӟым сьӧлык лэсьтӥзы.

МАР КАРИЗ КОРИНФЫСЬ КЕНЕШ АГАЕН, КУДӤЗ БАДӞЫМ СЬӦЛЫК ЛЭСЬТӤЗ

4. Кыӵе югдур кылдӥз Коринфысь кенешын нырысетӥ даурын? (1 Коринфъёслы 5:1, 2).

⁴ Лыдӟе 1 Коринфъёслы 5:1, 2. Пӧртэм шаеръёстӥ куинетӥзэ ветлыкуз, Павел умойтэм иворъёс кылӥз Коринфысь егит кенеш сярысь. Одӥг агай атаезлэн кышноеныз азыса-калгыса улӥз. Со туж юрӟым уж вал, «кыӵезэ язычникъёс пӧлысь но уд кылы»! Нош агайёс но сузэръёс со агайлэн сьӧлыкез шоры чиньы пыр учко вал. Со сяна, асьсэды озьы воземенызы соос данъясько вал. Малы ке шуоно куд-огъёсыз малпало вал, вылды, озьы соос, Инмар кадь, гажась-жалясь луэмзэс возьмато шуыса. Нош Иегова ужась-тыршисьёсызлэн сьӧлыкъёссы шоры синзэ уг ворса. Со пиосмуртлэн юрӟым ужез кенешлэсь ӟеч нимзэ сапта вал. Со сяна, агайёс но сузэръёс быгато вал солэсь адӟем карыны. Мар карыны косӥз кенешез Павел?

5. Мар карыны косӥз Павел кенешез но мае со возьматэ вал? (1 Коринфъёслы 5:13). (Озьы ик учке суредэз.)

⁵ Лыдӟе 1 Коринфъёслы 5:13. Святой духлэн валтэмез улсын Павел гожтӥз: «Уродэз-лекез пӧлысьтыды уллялэ». Озьыен, ӧпкелисьтэм муртэ кенешлэсь палэнтыны кулэ вал. Кызьы асьсэды возёно вал агайёслы но сузэръёслы сыӵе адямиен? Павел вераз, соин кусып воземысь дугдоно шуыса. Мае со возьматэ вал? Агайёслы но сузэръёслы сыӵе «муртэн огазьын сиськыны но уг яра» вал (1 Кор. 5:11). Кинэн ке ӵош сиськыкумы, ӵем дыръя ми шып ум пукиське, ми  вераськиськомы. Озьыен, Павел вераз, агайёслы но сузэръёслы сыӵе адямиен дырзэс ортчытъяно ӧвӧл шуыса. Со кенешез утьысал (1 Кор. 5:5—7). Со сяна, агайёс но сузэръёс ӧпкелисьтэм адямиен кусып ӧй возьысалзы ке, соос солы валаны юрттысалзы, макем вӧсь со кариз Иеговаез, солы возьыт луысал но со ӧпкельысал.

6. Мар кариз кенеш но сьӧлыкам мурт, Павеллэсь гожтэтсэ басьтыса?

⁶ Павеллэн тодэмез потэ вал, луоз, мар кариз кенеш, солэсь гожтэтсэ басьтыса. Тит умой иворъёс вайиз. Кенеш Павеллэн  курон-косонъёсызлэсь кылзӥськиз (2 Кор. 7:6, 7). Со сяна, со курон-косонъёсты сётэм бере кӧня ке толэзь ортчыса гинэ, сьӧлыкам мурт ӧпкелиз! Со мылкыдзэ но ужъёссэ воштӥз но нош ик Иеговалэн шонерлыко эсэпъёсызъя улыны кутскиз (2 Кор. 7:8—11). Мар карыны косӥз Павел кенешез табере?

КЫЗЬЫ УЧКОНО ВАЛ КЕНЕШЛЫ ӦПКЕЛИСЬ МУРТ ШОРЫ

7. Мар кариз сьӧлыкам мурт, куке сое кенешлэсь палэнтӥзы? (2 Коринфъёслы 2:5—8).

⁷ Лыдӟе 2 Коринфъёслы 2:5—8. Павеллэн верамезъя, сыӵе «адями понна тырмыт ини трос муртъёслэн сое вӧсь каронзы». Мукет сямен вераса, кылкутытон аслэсьтыз ужпумзэ быдэстӥз — сьӧлыкам муртлэсь ӧпкельыны мылкыдзэ ӝутӥз (Евр. 12:11).

8. Мар карыны ӧтиз Павел кенешез ӧпкелись муртэн?

⁸ Агай ӧпкелиз бере, Павел тӧроослы шуиз, соос агайлы кенеше берытскыны мед лэзёзы шуыса. Озьы ик со соослы шуиз ӧпкелись адямилэсь «сьӧлыксэ куштыны но сое буйгатыны». Со сяна, Павел кенешез ӧтиз: «Солы асьтэлэсь яратондэс возьматэ!» Соин ик агайёслы но сузэръёслы кылъёсынызы но ужъёсынызы возьматоно вал, соос ӧпкелись муртэ вань сюлмысьтызы простить каризы но сое ярато шуыса. Соку со валасал, солэн берытскемезлы шумпото шуыса.

9. Малы куд-огъёсызлы секыт вал, вылды, ӧпкелись агаез простить карыны?

⁹ Ваньзы-а кенешын шумпотӥзы ӧпкелись агайлэн берытскемезлы? Библия со сярысь номыр уг вера ке но, ваньзы шумпотэмын ӧй вал, дыр. Малы ке шуоно со быдэс кенешлы изъян вайиз, нош куд-ог христианъёсты тужгес но вӧсь кариз. Агайёс но сузэръёс туж тыршо вал азон-калгон сьӧлыклэсь палэнскыса улыны. Нош куке агайлы, кудӥз азыса-калгыса улӥз, лэземын вал кенеше берытскыны, куд-огъёсызлы со шонертэм потӥз. (Ӵошатэ Лукалэсь 15:28—30.) Малы кенешысь ваньмызлы берытскем агайлы яратонзэс возьматоно вал?

10, 11. Мар луысал, тӧроос ӧпкелись агаез простить ӧй карысалзы ке?

¹⁰ Мар луысал, тӧроос ӧпкелись агайлы кенеше берытскыны ӧй лэзьысалзы ке яке берытскемез бере агайёс но сузэръёс сое простить ӧй карысалзы ке? Со укыр зол куректысал. Озьы ик со кизэ лэзьысал но Иеговаен кусыпъёссэ тупатыны тыршемысь дугдысал.

¹¹ Со сяна, агайёс но сузэръёс ӧпкелись агаез простить ӧй карысалзы ке, соослэн асьсэлэн Иеговаен кусыпъёссы сӧриськысалзы. Малы? Малы ке шуоно, гажась-жалясь Инмармылэсь адӟем карем интые, соос лек Шайтанлэсь адӟем карысалзы. Соос пыр Шайтан ӧпкелись агаез Иеговалы ужамысь-тыршемысь дугдытыны быгатысал (2 Кор. 2:10, 11; Еф. 4:27).

12. Кызьы кенеш Иеговалэсь адӟем карыны быгатэ вал?

¹² Кызьы Коринфысь кенеш Иеговалэсь адӟем карыны быгатэ вал? Ӧпкелисьёсты простить карыса. Учке, мар вераське Библиын Иегова сярысь. Давид вӧсяськиз: «Тон ӟечлыко, туж гажась, жалясь луиськод» (Пс. 85:5). Михей гожтӥз: «Кин Тон кадь законлы пумит улонъёсты куштӥсь Инмар... йыружъёс лэсьтэмзы понна сьӧлыкъёс гожъясьтэм?»  (Мих. 7:18). Нош Исаия шуиз: «Сьӧлыклэсь кышкасьтэм шонертэм сюрессэ мед кельтоз, законлы пумит улӥсь аслэсьтыз малпанъёссэ мед воштоз, Кузё-Инмар пала мед берыктӥськоз — Со жалялоз сое, милям Инмармы пала мед кариськоз — Со уго туж гажась-жалясь» (Ис. 55:7).

13. Малы шонер вал ӧпкелись пиосмуртэ берен кенеше пыртыны? (Учке  «Ку сьӧлыкам пиосмуртэ Коринфысь кенеше берен пыртӥзы?» рамкаез.)

¹³ Коринфысь кенешлы ӧпкелись агаез простить кароно но солы яратонзэ возьматоно вал. Озьы агайёс но сузэръёс Иеговалэсь адӟем карысалзы. Павеллэсь курон-косонъёссэ быдэстыса, соос возьматысалзы, соос «котьма ласянь но... кылзӥськисесь» шуыса (2 Кор. 2:9). Кенешлэсь палэнтэм бере кӧня ке толэзь гинэ ортчиз ке но, пиосмурт ӧпкелиз. Соин ик тӧроослы ӝегатскытэк сое берен кенеше пыртоно вал.

АДӞЕМ КАРЕ ИЕГОВАЛЭСЬ ШОНЕРЛЫКО НО ГАЖАСЬ-ЖАЛЯСЬ ЛУЭМЗЭ

14, 15. Малы милемыз дышетэ Коринфын луэм учыр? (2 Пётр 3:9). (Озьы ик учке суредэз.)

¹⁴ Коринфын луэм учыр «гожтэмын асьмемыз визьман-дышетон понна» (Рим. 15:4). Со валэктэ, кызьы Иегова гажась-жалясь луэмзэ возьматэ. Куд-огъёсызлэн малпамзыя, Иегова гажась-жалясь бере,  кызьы гинэ адями ассэ медам возьы, со сое простить кароз. Но со озьы ӧвӧл. Иеговалэн шонерлыко курон-косонъёсыз вань: куке адями бадӟым сьӧлык лэсьтэ но уг ӧпкельы, Инмар солы кенеше кыльыны уг лэзьы (Иуда 4). Озьы Иегова быдэс кенешез уте но солы гажан-жалянзэ возьматэ (Мад. 13:21; 1 Кор. 15:33).

¹⁵ Со дыре ик Иеговалэн уг поты, кин ке но мед быроз шуыса. Солэн котькинэ утемез потэ. Иегова гажа-жаля соосты, кинъёслэн малпаськон амалзэс, ужъёссэс но соин кусыпъёссэс тупатэмзы потэ (Иез. 33:11; лыдӟе 2 Пётрлэсь 3:9). Тӥни малы, куке Коринфысь пиосмурт ӧпкелиз но сьӧлыкамысь дугдӥз, Иегова Павел пыр кенешез косӥз сое простить карыны но берен бордазы басьтыны.

16. Мае тӥ тодӥды Иегова сярысь, Коринфын луэм учырез эскерыса?

¹⁶ Коринфын луэм учыр яркыт возьматэ, Иегова яратӥсь но шонерлыко шуыса (Пс. 32:5). Ми туж тау кариськомы Иеговалы милемыз гажамез-жалямез понна, малы ке шуоно ми ваньмы сьӧлыкоесь но милемлы туж кулэ, со милемыз простить мед кароз шуыса. Озьы ик ми тау шуиськомы Иеговалы ми понна Пизэ сётэмез понна, кудӥзлы луыса со милемыз простить карыны быгатэ. Ми туж шумпотӥськомы, Иегова ужась-тыршисьёссэ яратэ но соослы самой умойзэ гинэ сӥзе шуыса!

17. Мае ми эскеромы вуоно статьяосын?

¹⁷ Кызьы туннэ тӧроос быгато Иеговалэсь адӟем карыны, куке юртто ӧпкельыны бадӟым сьӧлык лэсьтэм адямилы? Кызьы асьмеды возёно, куке тӧроос ужпум куто адямиез кенешлэсь палэнтыны яке сое берен кенеше пыртыны? Та юанъёсты ми вуоно статьяосын эскеромы.