1. Кыӵе осконзы вань соослэн, кинъёс бадӟым сьӧлык лэсьтӥзы?

 КЫЛЕМ статьяын вераськиз, мар карыны косӥз апостол Павел, куке Коринф кенешысь одӥг агай бадӟым сьӧлык лэсьтӥз. Со пиосмурт ӧз ӧпкельы бере, сое кенешлэсь палэнтыны кулэ вал. Но кызьы возьматэ та статьялы валтӥсь кылбур, Инмар сыӵе адямилы юрттыны быгатэ ӧпкельыны (Рим. 2:4). Кызьы со кутэ тӧроосты та ужын?

2, 3. Мар кароно, ми тодӥмы ке, агай яке сузэр бадӟым сьӧлык лэсьтӥз шуыса, но малы?

² Тӧроос ӧз тодэ ке, кин ке но сьӧлыказ шуыса, соос солы юрттыны уз быгатэ. Мар милемлы кароно, ми тодӥмы ке, агай яке сузэр секыт сьӧлык лэсьтӥз шуыса? Милемлы солэсь мылкыдзэ ӝутоно тӧроослы вазиськыны но юрттэт курыны (Ис. 1:18; Ап. уж. 20:28; 1 Пётр 5:2).

³ Нош мар кароно, агайлэн яке сузэрлэн тӧроосын вераськемез уг поты ке? Соку милемлы асьмелы тӧроосын вераськоно, соос сьӧлыкам муртлы мед юрттозы шуыса. Христиан мурт сьӧлыкамысь ӧз дугды ке, со Иеговаен кусыпъёссэ эшшо но лябӟытоз. Со сяна, кенешлэн ӟеч нимыз саптаськоз. Ми Иеговаез но агаймес яке  сузэрмес яратӥськомы бере, кыӵе гинэ секыт медам луы, тӧроосын вераськыны тыршомы (Пс. 26:14).

КЫЗЬЫ ТӦРООС ЮРТТО СООСЛЫ, КИНЪЁС БАДӞЫМ СЬӦЛЫК ЛЭСЬТӤЗЫ

4. Мар карыны тыршо тӧроос, куке пумиськыло бадӟым сьӧлык лэсьтэм муртэн?

⁴ Агай яке сузэр секыт сьӧлык лэсьтӥз ке, тӧроослэн кенешсы кылдытоз комитет a, кудаз куинь тӧроос пырозы. Со агайёслы зӥбыт-востэмесь луоно. Тӧроос тыршозы лэсьтыны ваньзэ, мае быгато, сьӧлыкам муртлы ӧпкельыны юрттон понна. Озьы ке но соос валало, воштӥськыны кужмысь косыны уг быгато шуыса (К. Зак. 30:19). Вань сьӧлыкам муртъёс, Давид кадь, уз ӧпкеле (2 Экс. 12:13). Куд-огъёсыз Иеговалэсь уз кылзӥське (Ул.-выл. 4:6—8). Мае тодазы возёно агайёслы, куке соос сьӧлыкам муртэн пумиськыло?

5. Мае тодазы возё тӧроос, сьӧлыкам муртэн пумиськылыкузы? (2 Тимофейлы 2:24—26). (Озьы ик учке суредэз.)

⁵ Тӧроос валало, сьӧлыкамез бере но адями Иеговалэн дуно ыжез луэ шуыса (Лука 15:4, 6). Соин ик, адямиен пумиськылыкузы, тӧроос асьсэды чурыт уг возё. Соос валало, юанъёс сётъяны но югдурез валаны гинэ тырмыт ӧвӧл шуыса. Соос возьмато сыӵе сямъёсты, кудъёсыз сярысь вераське 2 Тимофейлы 2:24—26 (лыдӟе). Тӧроос асьсэды лякыт, небыт возё но сьӧлыкам муртлэсь сюлэмзэ вырӟытыны тыршо.

6. Мар каро тӧроос сьӧлыкам муртэн пумиськемзылэсь азьло? (Римъёслы 2:4).

⁶ Тӧроос Иегова сямен малпаськыны тыршо. Сьӧлыкам муртъёсын тӧроос Иегова сямен асьсэды возьыны тыршо. Инмар сярысь Павел гожтӥз: «Инмарлэн ӟечлыкез тонэ ӧпкельыса сьӧлыкъёслэсь куштӥськонэ нуэ». (Лыдӟе Римъёслы 2:4.) Тӧроос — со возьмасьёс. Соослы Христослэн кивалтэтэзлэсь кылзӥськоно но солэсь адӟем кароно (Ис. 11:3, 4; Матф. 18:18—20). Сьӧлыкам муртэн пумиськемзылэсь азьло соос Иеговаез куро, со адямилы юрттыны мед быгатозы шуыса. Тӧроос Библиез но публикациосмес эскеро но Иеговалэсь визьлык куро. Соос валаны тыршо, малы адями озьы малпаське но малы озьы ассэ возе (Мад. 20:5).

7, 8. Кызьы тӧроос, Иегова сямен, чиданзэс возьматыны быгато, сьӧлыкам муртэн пумиськылыкузы?

 ⁷ Тӧроос, Иегова сямен, чидасесь луыны тыршо. Соос тодазы возё, кызьы ассэ возиз Иегова вашкала дыръя сьӧлыкасьёсын. Кылсярысь, Инмар чидан сямзэ возьматӥз Каинлы. Иегова солы вераз, мар луоз, со сьӧлыказ ке, озьы ик кызьы со бакель каремын луоз, со кылзӥськиз ке (Ул.-выл. 4:6, 7). Давид доры Иегова Нафан пророкез ыстылӥз. Со эксэйлы мадён вераз но ӧпкельыны юрттӥз (2 Экс. 12:1—7). Озьы ик Инмар кылзӥськисьтэм израиль калык доры выльысь но выльысь пророкъёссэ ыстылӥз (Иер. 7:24, 25). Адямиослы юрттон понна, Иегова соослэсь ӧпкелемзэс уг возьма вал. Со ачиз нырысетӥ вамыш лэсьтэ вал но ӧпкельыны мылкыдзэс ӝутэ вал.

⁸ Иеговалэсь адӟем карыса, тӧроос тыршо чидаса юрттыны соослы, кинъёс бадӟым сьӧлык лэсьтӥзы (2 Тим. 4:2). Соин ик, сьӧлыкам муртлэн шонер сюрес вылэ султыны мылкыдыз мед ӝутскоз шуыса, тӧролы лякыт но чидась луоно. Тӧро керӟегъяськиз ке, со сьӧлыкам муртлы ӧпкельыны люкетоз.

9, 10. Кызьы тӧроос юртто адямилы малпаськыны со сярысь, малы со Иеговалэсь палэнскиз но сьӧлыказ?

⁹ Тӧроос валаны тыршо, малы адями сьӧлыказ. Малы агайлэн яке сузэрлэн Иеговаен кусыпъёсыз лябӟизы? Оло нош, со ялан Библиез эскеремысь, тодытэмысь яке вань сюлмысьтыз вӧсяськемысь дугдӥз? Оло нош, со шонертэм мылпотонъёсызлы сётскиз? Кинэн но кызьы со шутэтске? Кызьы сыӵе быръён солэн малпаськон амалэз но мылпотонъёсыз вылын шӧдӥськиз? Вала-а со, аслаз ужъёсыныз инмысь Атайзэ, Иеговаез, вӧсь кариз шуыса?

¹⁰ Умой малпам юанъёс сётъяса, тӧроос юртто сьӧлыкам муртлы малпаськыны со сярысь, малы со Иеговалэсь палэнскиз но сьӧлыказ (Мад. 20:5). Соку тӧроослы лякытэн вераськоно но мултэссэ тодыны тыршоно ӧвӧл. Озьы ик тӧроос вераны быгато, кызьы Нафан пророк Давидлы ӧпкельыны юрттӥз. Та пример сьӧлыкам муртлы валаны юрттоз, вылды, макем урод уж со лэсьтӥз. Оло нош, тӧроосын нырысетӥзэ вераськыкуз ик, сьӧлыкам мурт лэсьтэм ужез сярысь жаляны кутскоз. Оло нош, ӧпкелёз но.

11. Кызьы юрттӥз Иисус сьӧлыкам муртъёслы?

¹¹ Тӧроос тыршо Иисуслэсь адӟем карыны. Улӟем Иисус Тарс карысь Савллэсь юаз: «Савл, Савл! Малы тон Монэ улляськод?» Озьы Иисус Савллы валаны юрттӥз, со ассэ шонертэм возе шуыса (Ап. уж. 9:3—6). Нош «Иезавель нимо кышномурт» сярысь Иисус шуиз: «Мон солы дыр сётӥ... ӧпкельыса сьӧлыкъёсызлэсь куштӥськыны» (Усьт. 2:20, 21).

12, 13. Мар карыны быгато тӧроос, сьӧлыкам мурт, соосын нырысетӥзэ пумиськыкуз, уг ӧпкельы ке? (Озьы ик учке суредъёсты.)

¹² Иисуслэсь адӟем карыса, тӧроос уз дыртэ малпаны, сьӧлыкам мурт ноку уз ӧпкельы шуыса. Куд-огъёсыз, тӧроосын нырысетӥзэ пумиськыкузы ик ини, ӧпкелё. Нош кинлы ке но тросгес дыр кулэ. Соин ик тӧроос соин кӧня ке пол пумиськылозы. Оло нош, тӧроосын нырысетӥзэ пумиськемез бере сьӧлыкам мурт соослэн кылъёссы вылын малпаськыны кутскоз,  Иегова азьын зӥбыт-востэм кариськоз но куроз сое простить карыны (Пс. 31:5; 37:19). Соку, тӧроосын мукет дыръя пумиськыкуз, солэн мукет мылкыдыз луоз ини, вылды.

¹³ Сьӧлыкам муртлы ӧпкельыны юрттыкузы, тӧроос асьсэды небыт возё. Соос вӧсясько, Иегова тыршемзэс бакель мед кароз шуыса, но оско, агай яке сузэр сьӧлыксэ валалоз но ӧпкелёз шуыса (2 Тим. 2:25, 26).

14. Кинэ данъяно, куке сьӧлыкам мурт ӧпкеле? Валэктэ.

¹⁴ Куке сьӧлыкам мурт ӧпкеле, со котькинлы бадӟым шумпотон вае! (Лука 15:7, 10). Кинэ со понна данъяно? Тӧроосты-а? Тодады вае, мар гожтӥз Павел сьӧлыкам адямиос сярысь: «Инмар соослы но ӧпкельыса сьӧлыкъёслэсь куштӥськыны... дыр... сётоз ай» (2 Тим. 2:25). Озьыен, сьӧлыкам адямиослы воштӥськыны юрттэ Иегова. Собере Павел вера, кыӵе емыш вае сыӵе ӧпкелён: со юрттэ сьӧлыкам муртъёслы зэмлыкез умойгес тодыны, сьӧлыксэс валаны но Шайтанлэн сьӧлтэтэзлэсь палэнскыны (2 Тим. 2:26).

15. Кызьы юртто тӧроос сьӧлыкам муртлы ӧпкелемез бере?

¹⁵ Сьӧлыкам мурт ӧпкелем бере но тӧроослэн комитетсы юрттоз солы шонер сюрес вылтӥ мыныны но Шайтанлэн сьӧлтэтэзлэсь палэнскыны (Евр. 12:12, 13). Тӧроос нокинлы уг верало, мар кариз сьӧлыкам мурт. Но куддыръя кенешлы мае ке но верано луэ.

«ВАНЬ КАЛЫК АЗЬЫН ШАРАЕ ПОТТЫ»

16. Кин сярысь вераз Павел, «вань калык» шуыса? (1 Тимофейлы 5:20).

¹⁶ Лыдӟе 1 Тимофейлы 5:20. Павел та кылъёсты вераз мукет тӧролы, Тимофейлы. Со вераз, мар кароно сьӧлыкасьёсын. Вераз-а Павел, лэсьтэм сьӧлык сярысь быдэс кенешлы верано шуыса? Со одно ик озьы ӧвӧл. «Вань калык» шуыса, Павел вераз, вылды, соос  сярысь, кинъёс лэсьтэм сьӧлык сярысь тодо вал ини. Кылсярысь, соос адӟизы, кызьы сьӧлык лэсьтэмын вал, яке сьӧлыкам мурт ачиз соослы со сярысь вераз. Тӧроос сыӵе адямиослы гинэ вераны кулэ вал, юан эскеремын но адями кылкутытэмын шуыса.

17. Куке кенешысь тросэз бадӟым сьӧлык сярысь тодо ини яке тодозы на, кыӵе ялон лэсьтэмын луоз но малы?

¹⁷ Куд-ог учыръёсы кенешысь тросэз лэсьтэм сьӧлык сярысь тодо ини яке тодозы на. Соку «вань калык» луоз быдэс кенеш. Соин ик тӧро ялоз, агайлы яке сузэрлы порицание сётэмын шуыса. Малы лэсьтӥське сыӵе ялон? Павел валэктэ: «Мукетъёсызлэн но кышканзы мед кылдоз шуыса», яке мукетъёсыз но сьӧлык медаз лэсьтэ шуыса.

18. Мар каро тӧроос, бадӟым сьӧлык лэсьтӥз ке пылатӥськем агай яке сузэр, кудӥзлы 18 арес ӧвӧл на? (Озьы ик учке суредэз.)

¹⁸ Нош мар кароно, бадӟым сьӧлык лэсьтӥз ке пылатӥськем агай яке сузэр, кудӥзлы 18 арес ӧвӧл на? Тӧроослэн кенешсы куроз кык тӧроез пумиськыны со нылпиен но Адӟись-Ивортӥсьёс луись анай-атаеныз b. Тӧроос валаны тыршозы, мар каро атай но анай, нылпизылы ӧпкельыны юрттон понна. Нылпи анай-атаезлэсь кылзӥське ке но тупатскыны тырше ке, кык тӧроос ужпум кутозы, вылды, тӧроослэн комитетсылы нылпиен но анай-атаеныз пумиськоно ӧвӧл шуыса. Малы ке шуоно тӧроос тодо, нылпиосты  яратыса дышетыны Иегова анай-атайёсты косӥз шуыса (К. Зак. 6:6, 7; Мад. 6:20; 22:6; Еф. 6:2—4). Дырын-дырын тӧроос анай-атайлэсь юалозы, юртто-а соос нылпизылы но кылзӥське-а со соослэсь. Нош мар кароно, со уг кылзӥськы ке но сьӧлыкамысь уг дугды ке? Соку тӧроослэн комитетсы нылпиен но солэн анай-атаеныз пумиськоз.

ИЕГОВА «ӞЕЧ СЮЛЭМО, ВАНЬЗЭ ГАЖАСЬ-ЖАЛЯСЬ»

19. Кызьы тӧроос Иеговалэсь адӟем каро, куке пумиськыло соин, кин секыт сьӧлык лэсьтӥз?

¹⁹ Тӧроос, кудъёсыз комитетъёсын ужало-тыршо, валало, кенеш понна Иегова азьын кыл куто шуыса. Соин ик соос кенешез утё соослэсь, кинъёс Инмарлэн законъёсызъя уг уло (1 Кор. 5:7). Озьы ик соос тыршо лэсьтыны ваньзэ, мае быгато, сьӧлыкам муртлы ӧпкельыны юрттон понна. Тӧроос оско, сыӵе адями воштӥськоз шуыса. Озьы соос адӟем каро Иеговалэсь, кудӥз «ӟеч сюлэмо, ваньзэ гажась-жалясь» (Иак. 5:11). Ӵапак озьы ассэ возиз арлыдо апостол Иоанн агайёсыныз но сузэръёсыныз. Со гожтӥз: «Яратоно нылпиосы! Медад сьӧлыкалэ шуыса, тае мон тӥледлы гожтӥсько. Кин ке сьӧлыказ ке но, соку асьмелэн Атай азьын Дурбасьтӥсьмы, Шонер Улӥсь Иисус Христосмы, вань» (1 Иоанн 2:1).

20. Мае ми эскеромы та журналысь берпуметӥ статьяын?

²⁰ Жаляса верано луэ, куддыръя сьӧлыкам мурт уг ӧпкельы. Соку сое кенешлэсь палэнтоно. Мар каро тӧроос сыӵе учыръёсын? Со сярысь вераськоз та журналысь берпуметӥ статьяын.