1, 2. а) Кызьы Иегова учке соос шоры, кинъёс валаса вылысь сьӧлыкало но уг ӧпкелё? б) Мае возьма Иегова сьӧлыкам муртъёслэсь?

 ИЕГОВА сьӧлыкез адӟемпотостэм каре (Пс. 5:5—7). Инмарлэн потэ, ми солэн шонерлыко эсэпъёсызъя мед уломы шуыса, кудъёсыз Библиын гожтэмын. Иегова уг возьма, сьӧлыко адямиос янгышатэк улозы шуыса (Пс. 129:3, 4). Но малпано ӧвӧл, Инмар сьӧлыкъёс шоры синзэ ворсалоз шуыса (Иуда 4, ВД). Библия верамъя, Инмар сьӧлыклэсь кышкасьтэмъёсты Армагеддон ожын быдтоз (2 Пётр 3:7; Усьт. 16:16).

² Но Иеговалэн уг поты, кин ке но мед быроз шуыса. Кызьы вераськиз ини та журналысь кылем статьяосын, Библия валамон вера, Инмарлэн потэ, «ваньмыз ӧпкельыса сьӧлыкъёсызлэсь мед куштӥськоз шуыса» (2 Пётр 3:9). Инмарлэсь адӟем карыса, тӧроос сьӧлыкам муртъёслы чидаса юртто ӧпкельыны но Иегова доры берытскыны. Но ваньмыз уг ӧпкелё (Ис. 6:9). Куд-огъёсыз сьӧлыкамысь уг дугдо, тӧроос соослы трос пол юрттыны тыршизы ке но. Мар кароно тӧроослы сыӵе учырын?

 «УРОДЭЗ-ЛЕКЕЗ ПӦЛЫСЬТЫДЫ УЛЛЯЛЭ»

3. а) Библия верамъя, мар кароно ӧпкелисьтэм муртэн? б) Малы вераны луэ, куке адямиез кенешлэсь палэнто, со ачиз сыӵе быръён лэсьтэ шуыса?

³ Сьӧлыкам мурт уг ӧпкельы ке, тӧроос лэсьто озьы, кызьы гожтэмын 1 Коринфъёслы 5:13, но сыӵе адямиез кенешлэсь палэнто. Но вераны луэ, сыӵе быръён ачиз сьӧлыкам мурт лэсьтэ шуыса. Со ара сое, мае ачиз кизиз (Гал. 6:7). Малы ке шуоно тӧроос трос пол тыршизы солы юрттыны, нош со соослэсь юрттэтсэс палэнтӥз (4 Экс. 17:12—15). Аслаз ужъёсыныз со возьматӥз, солэн Иеговалэсь кылзӥськемез но солэн законъёсызъя улэмез уг поты шуыса (К. Зак. 30:19, 20).

4. Малы лэсьто ялон, куке ӧпкелисьтэм муртэ кенешлэсь палэнто?

⁴ Куке ӧпкелисьтэм муртэ кенешлэсь палэнто, ялон лэсьтӥське, агайёс но сузэръёс мед тодозы шуыса, со Иеговалэн Адӟись-Ивортӥсез ӧвӧл ни шуыса a. Сое уг верало, адямиез ултӥян понна. Сыӵе ялон лэсьтӥське, кенеш, Библия верамъя, сыӵе адямиен кусып медаз возьы, соин огазьын медаз но сиськы шуыса (1 Кор. 5:9—11). Малы Иегова сыӵе курон-косон сётӥз? Апостол Павел гожтӥз: «Пичи гинэ шӧм быдэс шумес нянез чырсатэ» (1 Кор. 5:6). Ӧпкелисьтэм мурт кенеше кыльысал ке, соку мукет агайёслэн но сузэръёслэн Иеговалэн законъёсызъя улыны мылкыдзы лябӟысал (Мад. 13:21; 1 Кор. 15:33).

5. Кызьы учконо адями шоры, кудӥз кенешлэсь палэнтэмын вал, но малы?

⁵ Кызьы учконо агай шоры b, кудӥз кенешлэсь палэнтэмын вал? Валамон, ми соин дырмес ум ортчытъялэ. Но малпано ӧвӧл, ышем ыж уллёе берытскыны уг быгаты шуыса. Милемлы тодамы возёно, со адями аслэсьтыз улонзэ Иеговалы сӥзиз шуыса. Но али со сӥзиськыкуз сётэм кылызъя уг улы, соин ик кышкыт югдуре сюремын (Иез. 18:31). Нош Иегова адямиосты гажаны-жаляны дась на бере, ми оскиськомы, со адями берытскоз шуыса. Кызьы тӧроос юртто сьӧлыкам муртлы, кудӥз кенешлэсь палэнтэмын вал?

КЫЗЬЫ ЮРТТО ТӦРООС

6. Мар карозы тӧроос, адямилы кенеше берытскыны юрттон понна?

⁶ Адями кенешлэсь палэнтэмын вал ке, возьматэ-а со, ваньзы солэсь куштӥськизы но табере Инмар доры берытскыны солы нокин уз юрттыны ни шуыса? Уг, уг возьматы. Тӧроослэн комитетсы ӧпкелисьтэм адямилы вералоз, сое кенешлэсь палэнтӥзы шуыса, но валэктоз, мар солы кароно, кенеше берытскон понна. Трос учыръёсын тӧроос сыӵе адямилы ӵектозы, кӧня ке толэзь ортчыса, соин пумиськыны но тодыны, мылкыдыз ӧз воштӥськы-а шуыса. Адями пумиськыны соглаш ке, соин пумиськозы но лякытэн мылкыдзэ ӝутозы ӧпкельыны но берытскыны. Соку но адямилэн мылкыдыз но ужъёсыз воштӥськемын ӧз луэ ке, тӧроос азьланяз но тыршозы дырын-дырын соин пумиськылыны, ӧпкельыны мылкыдзэ ӝутон понна.

7. Кызьы тӧроос, Инмар сямен, тыршо гажан-жалянзэс возьматыны соослы, кинъёс кенешлэсь палэнтэмын вал? (Иеремия 3:12).

⁷ Тӧроос тыршо адӟем карыны Иеговалэсь, кудӥз гажан-жалянзэ возьматэ  соослы, кинъёс кенешлэсь палэнтэмын вал. Кылсярысь, вашкала дыръя Инмар уг возьма вал, ку шонер сюрес вылысь кожем калык сьӧлыкамзэ валалоз но со доры берытскоз. Инмар ачиз нырысетӥ вамыш лэсьтэ вал. Израиль калык уг ӧпкельы на вал ке но, Инмар со доры аслэсьтыз пророкъёссэ ыстылӥз. Озьы ик та журналысь кыкетӥ статьяын вераськиз Осия пророк сярысь. Солэн кышноез азыса-калгыса улэ на вал ке но, Иегова Осияез косӥз кышнозэ простить карыны но берен сое ас бордаз басьтыны (Ос. 3:1, ВД). Озьы Инмар калыкезлы возьматӥз, со туж гажась-жалясь шуыса (Мал. 3:7). Иеговалэсь адӟем карыса, тӧроослэн но туж потэ, сьӧлыкам мурт мед берытскоз шуыса, но соос солы берытскыны уг люкето. (Лыдӟе Иеремиялэсь 3:12.)

8. Кызьы Иисуслэн йыромем пи сярысь мадёнэз валаны юрттэ, мае шӧдэ Иегова, куке адями солэсь палэнске? (Лука 15:7).

⁸ Тодады вае Иисуслэсь мадёнзэ пи сярысь, кудӥз «ышыса улӥз, но сюриз». Со сярысь вераськиз та журналысь кыкетӥ статьяын. Пизэ кыдёкысен адӟыса, атаез солэн пумитаз «бызьыса мынэм но чырты бордаз ӟыгыртӥськыса чупам сое» (Луки 15:20). Атай ӧз возьма, ку пиез со доры лыктоз но куроз сое простить карыны. Со ачиз пиезлэн пумитаз бызьыса мынӥз, малы ке шуоно сое яратӥз. Та мадён возьматэ, мае шӧдэ Иегова, куке адями солэсь палэнске. Тӧроос Инмарлэсь адӟем каро. Соослэн потэ, котькуд ышем ыж мед берытскоз шуыса (Лука 15:22—24, 32). Куке сьӧлыкам мурт берытске, инмын но, музъем вылын но ваньзы шумпото — Иегова, Иисус, кылчинъёс но быдэс кенеш шумпото! (Лыдӟе Лукалэсь 15:7.)

9. Мар вера Иегова сьӧлыкам муртъёслы?

⁹ Кызьы ми тодӥмы, куке адями сьӧлыка но уг ӧпкельы, Иегова солы кенеше кыльыны уг лэзьы. Но со уг возьматы, Инмар солэсь палэнске но юрттыны уг тыршы ни шуыса. Иеговалэн потэ, сыӵе адямиос со доры мед берытскозы шуыса. Тани мар вераз Иегова аслаз шӧдонъёсыз сярысь: «Соосты Мон бордысь усёнзылэсь эмъяло, Аслам ӟеч эрикеным соосты ярато; уго вожпотонэ... кошкиз» (Ос. 14:5). Макем кужмо кылъёс! Соин ик тӧроос тыршо адӟыны адямилэсь пичи ке но воштӥськемзэ, кудӥзъя валаны луэ, адями ӧпкельыны кутскиз шуыса. Нош сьӧлыкам муртэ та кылъёс оскыто, Иегова сое яратэ но возьма шуыса.

10, 11. Кызьы тӧроос тыршо юрттыны соослы, кинъёс кемалась ини кенешлэсь палэнтэмын вал?

¹⁰ Нош мар кароно, адямиез кенешлэсь палэнтэм бере трос ар ортчиз ке ини? Оло нош, со сьӧлыкамысь но дугдӥз ини яке уг но тоды ини, кыӵе сьӧлык лэсьтӥз. Кӧня гинэ дыр медам ортчы, тӧроос тыршо котькуд ышем адямиез шедьтыны но соин пумиськыны. Пумиськыкузы соос ӵектозы ӵош вӧсяськыны, вань сюлмысьтызы сое ӧтёзы ӧпкельыны но кенеше берытскыны. Адямилэн, кудӥз туж кема кенеше ӧз ветлы, Иеговаен кусыпъёсыз лябӟемын. Соин ик, солэн берытскемез потэ ке, тӧроос солы ӵектозы Библиез дышетыны, со кенеше берен пыртэмын ӧвӧл на ке но. Адями соглаш кариськиз ке, тӧроос быръёзы агаез яке сузэрез, кудӥз соин Библиез дышетоз.

¹¹ Иегова адямиосты туж яратэ. Солэсь адӟем карыса, тӧроос тыршо шедьтыны котькинэ, кин Иеговалэсь палэнскиз, но соосты оскыто, берытскыны луэ на шуыса.  Адями ӧпкеле ке но сьӧлыкамысь дугдэ ке, со соку ик быгатэ нош ик Иеговалэн Адӟись-Ивортӥсез луыны (2 Кор. 2:6—8).

12. а) Кыӵе учыръёсы тӧроослы тужгес но сак луоно? б) Малы малпано ӧвӧл, куд-ог сьӧлыкъёсын сэрен Иегова адямилы гажан-жалянзэ ноку уз возьматы шуыса? (Озьы ик учке сноскаез.)

¹² Куд-ог учыръёсы, куке тӧроос малпало, быгатэ-а адями нош ик Иеговалэн Адӟись-Ивортӥсез луыны, соослы тужгес но чакласьконо. Кылсярысь, адями ассэ нылпиосын лек возе вал ке, зэмос йыбырттонлэсь палэнскемын вал ке яке кескич амалэн кузпалэныз люкиськиз ке, тӧроослы валаны тыршоно, зэм ик-а со ӧпкеле (Мал. 2:14; 2 Тим. 3:6). Тӧроослы кенешысь агайёсты но сузэръёсты утёно. Со дыре ик, соослы тодазы возёно, кыӵе  гинэ сьӧлык адями медам лэсьты, Иегова дась сое берен ас бордаз басьтыны, со вань сюлмысьтыз ӧпкелиз ке но сьӧлыкамысь дугдӥз ке. Адями ассэ лек яке кескич возе вал ке, тӧроос солэсь учырзэ тужгес но сак эскерозы. Но малпано ӧвӧл, сыӵе адямилы Иегова гажан-жалянзэ ноку уз возьматы шуыса (1 Пётр 2:10) c.

КЫЗЬЫ ЮРТТЫНЫ БЫГАТЭ КЕНЕШ

13. Кызьы ми асьмеды возиськомы соосын, кинъёслы порицание сётэмын вал, но соосын, кинъёс кенешлэсь палэнтэмын вал?

¹³ Кызьы вераськиз ини кылем статьяын, куддыръя кенешын ялон лэсьтӥське, адямилы порицание сётэмын шуыса. Ми сыӵе адямиен кусып воземысь ум дугдӥське, малы ке шуоно со ӧпкелиз но сьӧлыкамысь дугдӥз (1 Тим. 5:20). Со азьвыл сямен ик Иеговалэн ужась-тыршисез луэ но солы туж кулэ агайёслэн но сузэръёслэн юрттэтсы (Евр. 10:24, 25). Но куке кинэ ке кенешлэсь палэнто, ми сыӵе адямиен кусып ум возиське, соин ӵош ум но сиськиське (1 Кор. 5:11).

14. Кызьы христиан мурт, Библияя дышетэм возьытлыкез вылэ пыкиськыса, ассэ возёз соин, кин кенешлэсь палэнтэмын вал? (Озьы ик учке суредэз.)

¹⁴ Возьматэ-а 1 Коринфъёслы 5:11, ми ум быгатӥське шуыса ӟечбуръяськыны яке пумиськонэ ӧтьыны сое, кин кенешлэсь палэнтэмын вал? Уг, уг возьматы. Ми сыӵе адямиен дырмес ум ортчытъялэ. Но христиан мурт, Библияя дышетэм возьытлыкез вылэ пыкиськыса, ужпум кутыны быгатэ сыӵе адямиез — кылсярысь, ӵыжы-выжызэ яке матысь эшсэ — кенешлэн пумиськоназ ӧтьыны. Нош кызьы асьмеды возёно, со пумиськонэ лыктӥз ке? Азьвыл ми соин ӧм ӟечбуръяськысалмы. Но табере котькуд агай яке сузэр ачиз ужпум кутэ, дышетэм возьытлыксэ лыдэ басьтыса. Куд-огъёсыз ужпум кутыны быгато сыӵе адямиен ӟечбуръяськыны яке солы кӧня ке ӟеч кылъёс вераны. Но ми соин кема ум вераське яке кызьы ке мукет сямен дырмес ум ортчытъялэ.

15. Кинъёс сярысь вераське 2 Иоаннлэсь 9—11? (Озьы ик учке  «Иоанн но Павел одӥг пумо сьӧлык сярысь веразы-а?» рамкаез.)

 ¹⁵ Куд-огъёсызлэн таӵе юанзы кылдыны быгатэ: «Уг вера-а Библия, сыӵе муртэн ӟечбуръяськыса, христиан мурт „солэн урод ужъёсаз пыриське“ шуыса?» (Лыдӟе 2 Иоаннлэсь 9—11.) Иоаннлэсь кыкетӥ гожтэтсэ пыр-почгес эскерыса, валаны луэ, 9-тӥ кылбурысен 11-тӥ кылбурозь вераське шуыса зэмос йыбырттонлэсь палэнскемъёс сярысь но соос сярысь, кинъёс мукетъёсызлэсь мылкыдзэс ӝуто лэсьтыны сое, мае Библия уродэн лыдъя (Усьт. 2:20). Соин ик адями вӧлмытэ ке дышетонъёсты, кудъёсыз Библилы пумит мыно, тӧроос соин уз пумиськылэ. Ми оскиськомы, сыӵе адями ӧпкелёз шуыса. Но со дырозь ми соин ум ӟечбуръяське но пумиськонъёсамы ум ӧте.

ИЕГОВА СЯМЕН, ТЫРШИСЬКОМЫ ГАЖАСЬ-ЖАЛЯСЬ ЛУЫНЫ

16, 17. а) Мар карыны ӧте Иегова сьӧлыкасьёсты? (Иезекииль 18:32). б) Кыӵе уже пырисько тӧроос Иеговаен ӵош?

¹⁶ Мае ми тодӥмы, та вить статьяосты эскерыса? Иеговалэн уг поты, кин ке но мед быроз шуыса. (Лыдӟе Иезекиильлэсь 18:32.) Солэн потэ, сьӧлыкасьёс соин кусыпъёссэс мед тупатозы шуыса (2 Кор. 5:20). Тӥни малы дауръёс ӵоже Иегова котьку но ӧтиз аслэсьтыз ужась-тыршисьёссэ, кудъёсыз солэсь палэнскизы, ӧпкельыны но со доры берытскыны. Тӧроослы бадӟым дан сётэмын Иеговаен ӵош ужаны — юрттыны соослы, кинъёс сьӧлыказы, ӧпкельыны (Рим. 2:4; 1 Кор. 3:9).

¹⁷ Пуктэ син азяды, макем шумпото Иегова, Иисус но кылчинъёс, куке сьӧлыкасьёс ӧпкелё! Куке ышем ыж кенеше берытске, Иеговалэн сюлмыз шумпотонэн пачылме. Инмысь Атаймылэн гажан-жалянэз но ӟечлыкез сярысь малпаськыса, ми сое эшшо но зол яратӥськомы (Лука 1:78).