ЭСКЕРОН ПОННА 31-ТӤ СТАТЬЯ
12-ТӤ КЫРӞАН Быдӟым Инмар Иегова
Мар кариз Иегова, адямиосты сьӧлыклэсь но кулонлэсь мозмытон понна
«Инмар сокем дуннеез яратӥз, Аслэсьтыз одӥг вордӥськем Пизэ сётӥз» (ИОАНН 3:16).
МИ ТОДОМЫ
Кызьы Иегова милемлы юрттэ сьӧлыкен нюръяськыны но мар со кариз, милемыз сьӧлыклэсь мозмытон понна но милемлы пырак улон кузьман понна.
1, 2. а) Мар со сыӵе сьӧлык но кызьы ми сое вормыны быгатӥськомы? (Озьы ик учке «Валэктонэз».) б) Мае ми эскеромы та статьяын но та журналысь мукет статьяосын? (Озьы ик учке та журналысь «Дуно лыдӟисьмы!» статьяез.)
ПОТЭ-А тынад тодэмед, макем зол тонэ яратэ Иегова? Тон сое тодод, эскерид ке, мае Иегова лэсьтӥз ини, тонэ сьӧлыклэсь но кулонлэсь мозмытон понна. Сьӧлык a — лек тушмон. Ми пӧлысь нокин но ачиз сое вормыны уг быгаты. Ми котькуд нунал сьӧлыкаськомы но сьӧлыко луэменымы кулӥськомы (Рим. 5:12). Озьы ке но вань умой ивор. Иегова милемлы кылзэ сётэ, со милемыз сьӧлыклэсь но кулонлэсь одно ик мозмытоз шуыса!
2 Иегова юрттэ адямиослы сьӧлыкен нюръяськыны ог 6000 ар ӵоже ини. Малы? Малы ке шуоно Иегова адямиосты яратэ соосты кылдытэмез дырысен ик. Со туж трос лэсьтӥз ини, соослы сьӧлыкен нюръяськыны юрттон понна. Иегова тодэ: сьӧлык кулонэ вуттэ. Но солэн уг поты, ми мед куломы шуыса. Инмарлэн потэ, ми пырак мед уломы шуыса (Рим. 6:23). Иеговалэн потэ, тон но пырак мед улод шуыса. Та статьяын ми эскеромы куинь юанъёсты: 1) Вуоноезлы кыӵе оскон сётӥз Иегова сьӧлыко адямиослы? 2) Кызьы вашкала дыръя улӥсь адямиос Иеговаез шумпоттыны быгато вал? 3) Мар кариз Иисус, адямиосты сьӧлыклэсь но кулонлэсь мозмытон понна?
ВУОНОЕЗЛЫ КЫӴЕ ОСКОН СЁТӤЗ ИЕГОВА СЬӦЛЫКО АДЯМИОСЛЫ?
3. Кызьы Адам но Ева сьӧлыказы?
3 Куке Иегова нырысетӥ пиосмуртэз но кышномуртэз кылдытӥз, солэн потэ вал, соос шудоесь мед луозы шуыса. Инмар соослы чебер улон инты кузьмаз, соосты кузпалъяз но тунсыко уж сётӥз — быдэс музъемез нылпиосынызы тырмытыны но сое райлы пӧрмытыны. Иегова соослы одӥг гинэ курон-косон сётӥз но азьло ик вераз, соос ӧз ке кылзӥське, кулозы шуыса. Ми тодӥськомы, мар берло луиз. Лек кылчин, кудӥз Инмарез но, адямиосты но ӧз яраты, Адамлэсь но Евалэсь мылкыдзэс ӝутӥз асьсэды шонертэм возьыны. Яратӥсь Атайзылэсь кылзӥськем интые, кудӥз соослы ваньзэ умойзэ сётӥз, соос Шайтанлэсь кылзӥськизы но сьӧлыказы. Со дырысен Адам но Ева пересьмыны кутскизы но кулӥзы. Луиз ӵапак озьы, кызьы Иегова азьло ик вераз вал (Ул.-выл. 1:28, 29; 2:8, 9, 16—18; 3:1—6, 17—19, 24; 5:5).
4. Малы Иегова сьӧлыкез адӟемпотостэм каре? (Римъёслы 8:20, 21).
4 Та учыр Библие гожтэмын, милемлы валэктон понна, малы Иегова сьӧлыкез сокем адӟемпотостэм каре — сьӧлык инмысь Атаенымы кусыпъёсмес лябӟытэ но кулонэ вуттэ. Нош Шайтан сьӧлыкез яратэ. Со адӟемпотостэм каре Инмарез но адямиосты. Соин ик со Адамлэсь но Евалэсь мылкыдзэс ӝутӥз асьсэды шонертэм возьыны. Туннэ но Шайтан адямиослэсь мылкыдзэс ӝутэ асьсэды озьы возьыны. Куке Адам но Ева сьӧлыказы, Шайтан малпаз, вылды, вормисе потӥз шуыса. Но со ӧз ик малпа, макем зол яратэ Иегова адямиосты. Адамлэн но Евалэн нылпиоссы пумысен Инмар малпанзэ ӧз вошты но соку ик соослы вуоноезлы оскон сётӥз. (Лыдӟе Римъёслы 8:20, 21.) Иегова тодэ вал, Адамлэн но Евалэн куд-ог нылпиоссы сое яратозы но солэсь кылзӥськозы шуыса. Соин ик Иегова, адямиослэн Атайзы но Кылдытӥсьсы, луонлык сётӥз асэныз эшъяськыны но сьӧлыклэсь но кулонлэсь мозмытскыны. Мар кариз со понна Иегова?
5. Ку сьӧлыко адямиослэн вуоноезлы осконзы кылдӥз? Валэктэ (Улон-вылон 3:15).
5 Лыдӟе Улон-вылонэз 3:15. Адамлэн но Евалэн сьӧлыкамзы бере ик Иегова ялӥз, Шайтанэз быдтоз шуыса. Инмар вераз, «кидыс-выжы» потоз шуыса, кудӥз Шайтанлэсь йырзэ сузмытоз но лек ужъёсызлэсь бервылъёссэ тупатоз (1 Иоанн 3:8). Но нырысь Шайтан кидысэз-выжыез кулэ вал леканы, яке виыны. Иегова тодэ вал, соин сэрен солы чидантэм вӧсь луоз шуыса. Озьы ке но, адямиосты сьӧлыклэсь но кулонлэсь мозмытон понна, со дась вал сое лэсьтыны.
КЫЗЬЫ ВАШКАЛА ДЫРЪЯ УЛӤСЬ АДЯМИОС ИЕГОВАЕЗ ШУМПОТТЫНЫ БЫГАТО ВАЛ?
6. Мар каризы Авель, Ной но Иеговалэн мукет оскымон ужась-тыршисьёсыз, соин эшъяськон понна?
6 Собере, кӧня ке дауръёс ӵоже, Иегова пичиен-пичиен валэктылӥз, кызьы сьӧлыко адямиос со доры матэгес кариськыны быгато. Нырысетӥез, кин Адамлэн но Евалэн сьӧлыкамзы бере Иеговалы оскиз, вал Авель, Адамлэн но Евалэн кыкетӥез пизы. Авель Иеговаез яратэ вал, солэн сое шумпоттэмез но соин эшъяськемез потэ вал. Авель пудо возьма вал бере, со аслаз уллёысьтыз кӧня ке ыжпиосты Иеговалы курбонлы вайиз. Кельшиз-а со Иеговалы? Кельшиз. «Кузё-Инмар Авель шоры яратыса учкиз, солэсь саламзэ-кузьымзэ кабыл басьтӥз» (Ул.-выл. 4:4). Берлогес мукет адямиос но, кудъёсыз Иеговаез яратӥзы но солы оскизы, солы курбонъёс вайылӥзы. Кылсярысь, одӥгез сыӵе адями вал Ной (Ул.-выл. 8:20, 21). Соослэн но курбонъёссы Иеговалы кельшо вал. Озьы Иегова возьматӥз, сьӧлыко адямиос сое шумпоттыны но соин эшъяськыны быгато шуыса b.
7. Мае возьматэ вал Авраамлэн пизэ курбонлы вайыны дась луэмез?
7 Берлогес Иегова куриз Авраамез, кудӥзлэн туж юн осконэз вал, Исаак пизэ курбонлы вайыны. Малпалэ гинэ, макем вӧсь соку луиз Авраамлэн сюлмыз. Озьы ке но со соглаш луиз со ужез быдэстыны. Куке Авраам кизэ ӝутӥз вал ини пизэ вандыны, Инмар сое дугдытӥз. Авраамлэн пизэ курбонлы вайыны дась луэмез возьматэ вал, мае Иегова азьланяз лэсьтоз — со яратоно Пизэ курбонлы ваёз. Адӟиське, Иегова адямиосты туж зол яратэ шуыса (Ул.-выл. 22:1—18).
8. Мае возьмато вал курбонъёс, кудъёссэ Моисейлэн законэзъя вайылоно вал? (Левит 4:27—29; 17:11).
8 Кӧня ке дауръёс ортчыса, Иегова израиль калыклы закон сётӥз. Со законъя, Инмарлэсь калыксэ сьӧлыкъёсызлэсь мозмытон понна, пудо-животъёсты курбонлы ваёно вал. (Лыдӟе Левитэз 4:27—29; 17:11.) Со курбонъёс возьмато вал, азьланяз эшшо но бадӟым курбон ваемын луоз шуыса, кудӥз вань адямиосты сьӧлыкъёссылэсь быдэсак мозмытоз. Святой духлэн валтэмез улсын пророкъёс валэктылӥзы, кидыс-выжы — со Инмарлэн яратоно Пиез шуыса, кудӥз курадӟоз но кулоз. Су курбонлы ваем ыжпи кадь виемын луоз (Ис. 53:1—12). Малпа гинэ: адямиосты, озьы ик тонэ но, сьӧлыклэсь но кулонлэсь мозмытон понна, Иегова аслэсьтыз яратоно Пизэ ӧз жаля!
МАР КАРИЗ ИИСУС, АДЯМИОСТЫ МОЗМЫТОН ПОННА?
9. Мар вераз Иоанн Пылатӥсь Иисус сярысь? (Еврейёслы 9:22; 10:1—4, 12).
9 Асьме вакытысь I даурын Иоанн Пылатӥсь, Назаретысь Иисусэз адӟыса, шуиз: «Тани Инмарлэн Ыжпиез, Со Ас вылаз дуннелэсь сьӧлыксэ басьтэ» (Иоанн 1:29). Та кылъёс возьматӥзы, Иисус — азьло ик верам кидыс-выжы шуыса, кудӥз аслэсьтыз улонзэ сётыны кулэ вал. Табере адямиослэн осконзы, соос сьӧлыкъёссылэсь быдэсак мозмытэмын луозы шуыса, эшшо но юн луиз. (Лыдӟе Еврейёслы 9:22; 10:1—4, 12.)
10. Кызьы Иисус возьматӥз, сьӧлыкоосты ӧпкельыны ӧтиз шуыса?
10 Иисус тодэ вал, адямиослэн курадӟонъёссы сьӧлык бордысь пото шуыса. Соин ик Иисус туж тырше вал юрттыны адямиослы, кудъёсыз сьӧлыкъёссы сэрен курадӟыса улӥзы, но соосты ӧте вал аслаз дышетскисьёсыз луыны. Огпол Иисус шуиз: «Висисьтэмъёслы эмъясь кулэ ӧвӧл, висисьёслы кулэ. [...] Мон шонер улӥсьёсты ӧтьыны ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ» (Матф. 9:12, 13). Иисус ачиз но аслаз кылъёсызъя улӥз. Куке одӥг кышномурт солэсь пыдъёссэ аслаз синкылиосыныз гылтӥз, Иисус солы ӟеч кылъёс вераз но сьӧлыкъёссэ простить кариз (Лука 7:37—50). Озьы ик Иисус кулэ луись зэмлыкъёсты усьтӥз колодча дорын Самарияысь кышномуртлы, Иисус тодэ вал ке но, со азыса-калгыса улэ шуыса (Иоанн 4:7, 17—19, 25, 26). Со сяна, Инмар Иисуслы кужым сётӥз быдтыны сьӧлыклэсь самой кышкыт бервылзэ — кулонэз. Иеговалэн юрттэменыз Иисус быгатэ вал адямиосты улӟытъяны — пиосмуртъёсты но кышномуртъёсты, нылпиосты но бадӟым муртъёсты (Матф. 11:5).
11. Малы сьӧлыко адямиос Иисус вӧзын асьсэды умой шӧдо вал?
11 Туж сьӧлыко адямиос но Иисус вӧзын асьсэды умой шӧдӥзы. Иисус соосты валаны но гажаны-жаляны тырше вал. Соин ик соос Иисус доры лыктыны уг кышкало вал (Лука 15:1, 2). Иисус соосты осконзы понна ушъя но соосын ассэ лякыт возе вал (Лука 19:1—10). Иисус туж умой возьматӥз, макем гажась-жалясь солэн Атаез (Иоанн 14:9). Иисуслэн кылъёсысьтыз но ужъёсысьтыз адӟиськиз, солэн Атаез адямиосты яратэ но соослы сьӧлыкъёссылэсь мозмытскыны юрттыны тырше шуыса. Иисуслэн гажась-жалясь луэмез адямиослэсь мылкыдзэс ӝутэ вал воштӥськыны но со сьӧры мыныны (Лука 5:27, 28).
12. Мар вераз Иисус аслаз кулонэз сярысь?
12 Иисус тодэ вал, мар сое азьланяз возьма. Аслаз дышетскисьёсызлы со кӧня ке пол вераз, сое юбо борды кортӵогаса казнить карозы шуыса (Матф. 17:22; 20:18, 19). Со тодэ вал, солэн курбонэз адямиосты сьӧлыкъёссылэсь мозмытоз шуыса. Озьы ик Иисус вераз, кулэмез бере пӧртэм адямиос солэн дышетскисьёсыз луозы шуыса (Иоанн 12:32). Озьы соос Иеговаез шумпоттозы но «сьӧлыклэн ляльчиез луонлэсь» мозмытскыны быгатозы (Рим. 6:14, 18, 22; Иоанн 8:32). Соин ик Иисус дась луыса но кышкатэк аслэсьтыз улонзэ адямиос понна сётӥз (Иоанн 10:17, 18).
13. Кызьы кулӥз Иисус но мае со вера Иегова сярысь? (Озьы ик учке суредэз.)
13 Иисусэз вузаз одӥгез матысь эшез. Собере Иисусэз кутӥзы, ултӥязы но янгыше уськытӥзы со понна, мае со ӧз лэсьты. Берлогес сое курадӟытӥзы но казнить каризы. Ожгарчиос Иисусэз казнить карон интые нуизы но киоссэ но пыдъёссэ юбо борды кортӵогазы. Иисус туж курадӟиз ке но, ваньзэ чидаз. Нош Иегова эшшо но зол курадӟиз. Солэн мертантэм бадӟым кужымез вань бере, со быгатэ вал Пизэ курадӟонъёслэсь мозмытыны. Но Иегова озьы ӧз лэсьты, малы ке шуоно со милемыз туж яратэ. Иисус вераз: «Инмар сокем дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса» (Иоанн 3:16).
Куке Иисусэз казнить каризы, Иеговалы чидантэм вӧсь вал. Озьы ке но со дась вал сое чиданы, милемыз сьӧлыклэсь но кулонлэсь мозмытон понна. (Учке 13-тӥ абзацез.)
14. Мае тодыны луэ, Иисуслэн курбонэз сярысь малпаськыса?
14 Иисуслэн курбонэз котьмалэсь умой возьматэ, Иегова Адамлэсь но Евалэсь нылпиоссэс яратэ шуыса. Со возьматэ, макем юн яратэ Иегова тонэ. Инмарлы чидантэм вӧсь вал ке но, со сётӥз самой дунозэ, маиз солэн вал, аслэсьтыз яратоно Пизэ, тонэ сьӧлыклэсь но кулонлэсь мозмытон понна (1 Иоанн 4:9, 10). Солэн котькудмылы юрттэмез потэ сьӧлыкен нюръяськыны но сое вормыны!
15. Мар милемлы кароно, Иисуслэн мозмытӥсь курбонэз милемыз сьӧлыкъёсмылэсь мед мозмытоз шуыса?
15 Иеговалэн кузьымез — яратоно Пиезлэн мозмытӥсь курбонэз — милемыз сьӧлыкъёсмылэсь мозмытыны быгатэ. Но Инмар милемыз простить мед кароз шуыса, милемлы асьмелы но мар ке но кароно. Иоанн Пылатӥсь но Иисус Христос со сярысь тазьы шуизы: «Ӧпкельыса сьӧлыкъёстылэсь куштӥське, уго Ин Эксэйлык матэ вуиз» (Матф. 3:1, 2; 4:17). Озьыен, милям потэ ке сьӧлыкен нюръяськеммы но Инмысь Атаймылы матэгес кариськеммы, милемлы ӧпкелёно. Мар возьматоз, ми ӧпкелиськомы шуыса? Кызьы со милемлы юрттоз Иеговаез шумпоттыны, ми сьӧлыкоесь на ке но? Та юанъёслы валэктонъёс вуоно статьяын сётэмын луозы.
18-КЫРӞАН Дун сётон понна тау кариськомы
a ВАЛЭКТОН. Куддыръя Библиын «сьӧлык» кыл возьматэ ужъёсмес: куке ми лэсьтӥськомы сое, мае Иегова шонертэмен лыдъя, яке ум лэсьтӥське сое, мае со шонерен лыдъя. Озьы ик «сьӧлык» кыл возьматыны быгатэ сьӧлыко луэммес, кудӥз милемлы Адамлэсь выжиз. Сьӧлыко луэменымы ваньмы ми кулӥськомы.
b Иеговалы кельшо вал со оскымон ужась-тыршисьёсызлэн курбонъёссы, малы ке шуоно со тодэ вал, азьланяз Иисус Христос адямиос понна аслэсьтыз улонзэ сётоз но соосты сьӧлыклэсь но кулонлэсь мозмытоз шуыса (Рим. 3:25).
