Ровоамлэн атаез вал Соломон, кудӥз 40 ар Израилен кивалтӥз (3 Экс. 11:42). Асьме вакытлэсь азьло 997-тӥ арын Соломон кулӥз. Ровоам Иерусалимысь Сӥхем каре мынӥз, кытын сое эксэе пуктыны кулэ вал (2 Пар. 10:1). Кызьы тӥ малпаськоды, сюлмаськиз-а со, солы эксэй луоно шуыса? Уго ваньзы тодо вал, макем визьмо вал Соломон, но Ровоамлы атаез кадь луыны тыршоно вал. Ӝоген Ровоамлы возьматоно вал, быгатэ-а со секыт юанъёсты сэрттыны-пертчыны.

Ровоам шуг-секытэн пумиськиз. Со доры израиль пиос лыктӥзы но асьсэлэсь сюлмаськемзэс веразы: «Тынад атаед ми вылэ секыт зӥбет понӥз; нош тон атаедлэсь лек ужзэ капчияты, ми вылэ понэм секыт зӥбетсэ но, соку ми тыныд ужаса-тыршыса уломы» (2 Пар. 10:3, 4).

Ровоамлы секыт быръён лэсьтоно вал. Со калыклэсь куронзэ быдэстӥз ке, солы, солэн семьяезлы но эксэй корказ улӥсьёслы куштӥськоно луоз, вылды, майбыр улонлэсь, кудӥзлы соос дышемын, но огшоры калыклэсь зӥбетсэ капчиятоно. Нош со калыкез ӧз кылзы ке, калык бугыръяськыны кутскоз. Мар солы кароно? Нырысь Ровоам кенешиз тӧроосын, кудъёсыз Соломонлэн визь-нод сётӥсьёсыз вал. Собере со кенешиз асэныз ӵош будэм егит пиосын. Ровоам егит пиослэсь визь-кенешсэс кылзӥз но ужпум кутӥз, калыклэсь зӥбетсэ уз капчияты шуыса. Со вераз калыклы: «Мынам атае тӥ вылэ секыт зӥбет понӥз, нош мон сое бадӟымато; атае тӥледыз сюлоен вӧсь карылӥз, нош мон тӥледыз скорпионъёсын a жуго» (2 Пар. 10:6—14).

Малы со милемыз дышетэ? Умой луысал кылзыны, мар верало арлыдоос, кудъёсыз трос аръёс ӵоже ини Иеговалы оскымон ужало-тыршо. Соос быгато валаны, кытчы вуттоз соиз яке таиз кутэм  ужпум, но милемлы умой визь-кенеш сётыны (Иов 12:12).

Ровоам ужпум кутэм бере калык бугыръяськон ӝутӥз. Соку эксэй, сое зӥбон понна, ожгарчиосты люказ. Иегова кылдэм югдурез ас кияз басьтӥз. Со Самей пророк пыр вераз: «Эн ветлэ, агай-вынъёсыныды, израиль пиосын, ожмаськыны эн кутске; ваньды дорады бертэ, уго та Мон дорысь вал» (3 Экс. 12:21—24) b.

Малпалэ ай, макем Ровоамлэн мылкыдыз куашказ, куке кылӥз, бугыръяськисьёсын ожмаськыны солы уг яра шуыса! Мар со сярысь малпалозы адямиос? Кемалась ӧвӧл со кышкатӥз соосты, «скорпионъёсын» жугоз шуыса, нош али солы верам кылъёсызлэсь куштӥськоно! (Ӵошатэ 2 Паралипоменонэз 13:7.) Озьы ке но, эксэй но солэн ожгарчиосыз «кылзӥськизы но Кузё-Инмарлэн верам кылъёсызъя котькудӥз аслаз дораз кошкиз».

Малы со милемыз дышетэ? Инмарлэсь кылзӥськоно, со понна кин ке но милемыз серекъя ке но. Ми солэсь кылзӥськиськомы ке, со милемыз бакель кароз (К. Зак. 28:2).

Кыӵе емыш вайиз Ровоамлэн сыӵе ужпум кутэмез? Солэн киулаз кык выжыос кылизы — Иуда но Вениамин. Со выль городъёс пуктыны кутскиз но вужъёссэ «зол-зол юнматӥз» (2 Пар. 11:5—12). Нош тужгес но кулэез — кӧня ке дыр ӵоже Ровоам Иеговалэн законъёсызъя улӥз. Иеровоам кивалтыку, дас израиль выжыослэн Израиль шуыса нимаськись эксэйлыксы сульдэръёслы-идолъёслы йыбыртъян пӧлы выйиз. Нош тросэз отын улӥсьёс, «Ровоамез санэ поныса», Иерусалиме лыктӥзы, азьланяз но зэмос Инмарлы йыбыртъян вылысь (2 Пар. 11:16, 17). Озьыен, Инмарлэсь кылзӥськеменыз, Ровоамлэн эксэйлыкез юнмаз.

Эксэйлыкез юнмам бере Ровоам Иеговалэсь ӧз кылзӥськы ни но зэмос луисьтэм инмаръёслы йыбыртъяны кутскиз. Нош малы? Со анаезлэсь кылзӥськиз, луоз, кудӥз аммон выжыысь вал (3 Экс. 14:21). Кызьы гинэ медам луы, но калык Ровоамлэн пытьытӥз мынӥз. Соин ик Иегова Египетлэн Сусаким эксэезлы Иудеяысь трос городъёсты киултыны лэзиз, Ровоам со городъёсты юнматӥз вал ке но (3 Экс. 14:22—24; 2 Пар. 12:1—4).

Югдур эшшо но секытгес луиз, куке Сусаким Иерусалим доры вуиз, кытысен Ровоам кивалтэ вал. Соку эксэй но кивалтӥсьёс доры Самей пророк лыктӥз но Инмарлэсь иворзэ вераз: «Тӥ Монэ кельтӥды, со понна ик Мон но тӥледыз Сусаким кие кельто». Мар кариз Ровоам, сое кылыса? Со янгышсэ валаз. Библиын верамын: «Израильлэн кивалтӥсьёсыз, эксэй но зӥбломизы, соос шуизы: „Шонерлыко Кузё-Инмар!“» Соин ик Иегова Ровоамез жаляз но Иерусалимез куашкатэмлэсь утиз (2 Пар. 12:5—7, 12).

Со бере Ровоам азьланьтӥз лымшор эксэйлыкен кивалтыны. Кулон азяз со аслаз пиосызлы трос кузьымъёс кузьмаз, нокудзы но соос пӧлысь соослэн Авия агай-вынзылы пумит медаз бугыръяське шуыса, кудӥз эксэй луыны кулэ вал (2 Пар. 11:21—23). Озьы со визьлыксэ возьматӥз, кудӥз солы азьло уг тырмы вал.

Ровоамлэн куд-ог ужъёсыз умоесь ке но вал, Инмарлы ярамон луыны со ӧз быгаты. Солэн кивалтэмез сярысь Библия огъяса вера: «Со лек ужъёс лэсьтыса улӥз». Малы? Малы ке шуоно со «аслэсьтыз сюлэмзэ ӧз поны Кузё-Инмарез утчан пала» (2 Пар. 12:14).

Малы дышетэ милемыз Ровоамлэн примерез? Куддыръя со Инмарлэсь кылзӥське но Инмарлэн калыкезлы умой ужъёс лэсьтэ вал. Но солэн Иеговаен матысь кусыпъёсыз ӧй вал. Озьы ик, солэн юн мылкыдыз но ӧй вал Инмарез улонэныз шумпоттыны. Соин ик со кутскиз зэмос луисьтэм инмаръёслы йыбыртъяны но Инмарлы ярасьтэм ужъёс лэсьтыны. Тӥ малпаськоды, оло: «Малы Ровоам Иеговалэсь кылзӥське вал? Со зэмзэ ик сьӧлыкъёсыз понна ӧпкеле но Инмарлы ярамон улыны тырше вал-а яке со мукетъёсызлэсь кылзӥське вал-а?» (2 Лет. 11:3, 4; 12:6). Кызьы гинэ  медам луы, Ровоам выльысь но выльысь азьлоез борды кутскылӥз. Макем со песятаезлэсь, Давид эксэйлэсь, пӧр тэм вал! Зэм, Давид но янгыша вал, но со Иеговаез яратӥз, солы оскымон ужаз-тыршиз но лэсьтэм сьӧлыкъёсыз понна сюлмысь ӧпкелиз (3 Экс. 14:8; Пс. 50:3, 19; 62:2).

Зэм, Ровоамлэн улонысьтыз ми тросэзлы дышетскыны быгатӥськомы. Туж умой, куке адямиос семьязы сярысь сюлмасько но мукетъёсызлы юртто. Но милям Инмарлы ярамон луэммы потэ ке, милемлы нырысь ик солы вань сюлмысьтымы ужано-тыршоно но соин кусыпъёсмес юнматоно.

Со понна Иеговаез ӟырдыт яратоно. Озьы ик, кызьы тылскем мед ӝуалоз шуыса, отчы пу тыроно, Инмарез яратонмы медаз кысы шуыса, солэсь Кылзэ ялан дышетоно, со вылын малпаськоно но дугдытэк вӧсяськоно (Пс. 1:2; Рим. 12:12). Нош Иеговаез яратӥмы ке, соку яратонмы милесьтым мылкыдмес ӝутоз сое улонэнымы шумпоттыны, но, кулэ луиз ке, сьӧлыкъёсмы понна сюлмысь ӧпкельыны. Соку ми Ровоам кадь ум луэ но ноку но Иеговалэн сюрес вылысьтыз ум коже (Иуда 20, 21).