1, 2. а) Мар сярысь вӧсяськиз Иисус кулон азяз ӝытэ апостолъёсыныз ӵош? б) Малы Иисус огкылысь улонлы нимысьтыз саклык висъяз?

 АПОСТОЛЪЁСЫНЫЗ берпуметӥзэ ӝытсэ сиськыкуз, Иисусэз сюлмаськытӥз соослэн огкылысь улыны быгатымтэзы. Соосын ӵош вӧсяськыса, со куриз, дышетскисьёсыз куспын, ачиз но солэн Атаез куспын кадь ик, огкылысь улон мед луоз шуыса. (Лыдӟе Иоаннлэсь 17:20, 21.) Христослэн дышетскисьёсыз огкылысь улысалзы ке, со возьматысал адямиослы, Иисусэз музъем вылэ Иегова ыстӥз, со солэсь эриксэ мед быдэстоз шуыса. Христослэсь зэмос дышетскисьёссэ яратэмзыя тодманы кулэ вал, но яратон юрттыны кулэ вал соослы огкылысь улыны (Иоанн 13:34, 35).

² Соин ик валамон, малы Иисус солы нимысьтыз саклык висъяз. Со шӧдӥз, апостолъёслы тупаса но огкылысь улыны дышетсконо на шуыса. Со адӟиськиз Иисуслэн кулон азяз ӝытэ но. Азьло кадь ик «соос пӧлысь кудзэс бадӟымез шуыса лыдъян пумысен соос куспын ченгешон но вал» (Лука 22:24—27; Марк 9:33, 34). Нош мукетаз учыре Иаков  но Иоанн куризы Иисусэз, со соосты Инмарлэн Эксэйлыказ ас вӧзаз мед пуктоз шуыса (Марк 10:35—40).

3. Мар Христослэн дышетскисьёсыз куспын тупаса улонэз сӧрыны быгатэ вал? Кыӵе юанъёсты ми эскеромы?

³ Дано инты басьтыны тыршон сяна, Христослэн дышетскисьёсыз куспын тупаса улонэз мукет мугъёс но сӧрыны быгато вал. Шаерын адямиос туж тушмонъяськыса но ог-огзы сярысь азьло ик уродзэ малпаса улӥзы. Христослэн дышетскисьёсызлы сыӵе мылкыдын нюръяськоно вал. Та статьяын ми таӵе юанъёсты эскеромы: кызьы Иисус ассэ возиз, куке адямиослэн азьвыл ик кылдэм урод малпанъёсынызы пумиськылӥз? Кызьы со юрттӥз дышетскисьёсызлы адямиосты улӥе-вылӥе карытэк но ог-огенызы тупаса улыны? Но кызьы солэн дышетонъёсыз юрттозы милемлы Инмарлэн калыказ огкылысь улыны?

4. Вералэ пример, кызьы Иисус сярысь азьло ик урод малпазы.

⁴ Тросэзлэн адямиослэн Иисус сярысь азьвыл ик урод малпанъёссы кылдэмын вал. Кылсярысь, куке Филипп вераз Нафанаиллы, Мессияез шедьтӥз шуыса, соиз шуиз: «Назаретысь мар ке но ӟечез луыны быгатоз-а?» (Иоанн 1:46). Нафанаил тодӥз, луоз, Михейлэн книгаяз 5:2 гожтэм азьпалзэ ивортонэз но малпаз, Назарет туж пичи кар шуыса но отысь Мессия лыктыны уг быгаты шуыса. Дано иудейёс Иисусэз адӟемпотостэм каро вал, малы ке шуоно со Галилеяысь вал, нош Галилеяысь муртъёсты ӧз яратэ (Иоанн 7:52). Куд-огъёсыз, Иисусэз ултӥяны тыршыса, сое Самария мурт шуыса нимазы (Иоанн 8:48). Иудейёс но Самарияысь муртъёс пӧртэм калыкъёс вал, но соос Инмарлы пӧртэм сямен йыбыртъязы. Иудеяын но Галилеяын улӥсьёс Самарияысь муртъёсты чик ӧз гажалэ но соосын нокыӵе кусып ӧз возе (Иоанн 4:9).

5. Адямиослэн кыӵе азьвыл ик кылдэм урод малпанъёсынызы пумиськылӥзы Христослэн дышетскисьёсыз?

⁵ Иудеяысь дано муртъёс Иисуслэсь дышетскисьёссэ но яратымтэзэс уг вато вал. Фарисейёс соосты каргам муртъёс шуылӥзы (Иоанн 7:47—49). Соослэн малпамзыя, соос, кинъёс ӧз дышетске раввинъёсты дышетӥсь школаын но соослэсь сям-йылолъёссэс ӧз чаклалэ, адӟемпотостэм но номырлы ярасьтэм адямиос вал (Ап. уж. 4:13). Иисус но солэн дышетскисьёсыз сярысь адямиос азьло ик уродзэ малпало вал, малы ке шуоно со вакытысь адямиос туж данъяськизы асьсэ осконэнызы, адямиос пӧлын кыӵе инты басьтэменызы но кыӵе калыкысь луэменызы. Огкылысь улон понна, Христослэн дышетскисьёсызлы, кудъёсызлы озьы ик пыӵа вал со вакытысь адямиослэн мылкыдзы, выль сямен малпаськыны дышетсконо вал.

6. Вералэ, кызьы тӥ вылын шӧдӥсько адямиослэн азьвыл ик кылдэм урод малпанъёссы.

⁶ Туннэ но тросэз адямиос мукетъёсыз сярысь азьло ик уродзэ малпало. Куддыръя ми шӧдӥськомы, ми шоры азьло ик уродзэ малпаса учко шуыса, нош куддыръя асьмеос но мукетъёсыз шоры озьы учкиськомы. Тани мар вера одӥг сузэр, кудӥз Австралиын пионер луыса ужа-тырше: «Мон котьку малпасько вал, макем ултӥяло тӧдьы куо адямиос Австралиын улӥсь выжы калыкез. Озьы котьку вал — азьло но, али но. Мон ачим но ултӥянэн пумиськылӥ. Соин  сэрен тӧдьы куо адямиосты мон юнгес но юнгес адӟемпотостэм карыны кутски». Нош Канадаысь одӥг вын-агай вера, мукет кылын вераськись адямиосты уг яраты вал шуыса. Со вера: «Мон малпасько вал, француз кылын вераськись адямиос мукет адямиослэсь трослы умойгес шуыса. Соин ик мон туж ӧй яраты англи кылын вераськисьёсты».

7. Кызьы Иисус ассэ возиз, куке адямиослэн азьвыл ик кылдэм урод малпанъёсынызы пумиськылӥз?

⁷ Туннэ адямиослэн кин ке сярысь азьло ик урод малпанъёссы туж юнэсь но мур сюлмазы пыӵамын. Озьы вал Иисус музъем вылын улыку но. Кызьы со соосты вормиз? Нырысь ик, со ӧз лэзьы, сыӵе малпанъёс солы мед пыӵалозы шуыса. Со котьку котькин шоры одӥг кадь учкиз. Иисус ӟеч иворез вераз узыръёсызлы но, куанеръёсызлы но, фарисейёслы но, Самарияын улӥсьёслы но, выт бичасьёслы но, сьӧлыкоосызлы гинэ но. Кыкетӥез, Иисус аслаз примереныз дышетӥз дышетскисьёссэ мукет адямиос сярысь азьло ик уродзэ малпатэк улыны но оскыны соослы.

8. Кыӵе кулэ луись возет вылэ пыкиське милям огъя улонмы? Валэктэ.

⁸ Иисус дышетскисьёсызлы возьматӥз, кыӵе возет вылэ пыкиське милям огъя христиан улонмы. Со вераз: «Тӥ ваньды — агай-вынъёс». (Лыдӟе Матфейлэсь 23:8, 9.) Зэм, ваньмы ми агай-вынъёс, малы ке шуоно ми ваньмы Адам выжыысь потэмын (Ап. уж. 17:26). Иисус валэктӥз, солэн дышетскисьёсыз озьы ик вын-агайёс но сузэр-апайёс луо шуыса, малы ке шуоно Иеговаез инмысь Атаенызы лыдъяло (Матф. 12:50). Со сяна, соос одӥг бадӟым духовной семья луизы, кудъёссэ огазея оскон но яратон. Соин ик асьсэлэн гожтэтъёсазы апостолъёс христианъёсты ӵемысь агай-вынъёс шуыса нимазы (Рим. 1:13; 2 Пётр 1:10; 1 Иоанн 3:13) a.

9, 10. а) Малы иудейёслэн мугзы ӧй вал данъяськыны соин, кыӵе выжыысь соос потэмын? б) Кызьы Иисус возьматӥз, вань адямиос шоры одӥг кадь учконо шуыса? (Учке статья кутсконысь нырысетӥ суредэз.)

⁹ Иисус дышетскисьёсызлы валэктӥз, соос ог-огзы шоры вын-агайёс но сузэр-апайёс кадь учкыны кулэ шуыса. Озьы со возьматӥз, макем кулэ зӥбыт-востэм луыны. (Лыдӟе Матфейлэсь 23:11, 12.) Кызьы верамын вал ини, куддыръя вылтӥяськон сям апостолъёслы ог-огенызы тупаны люкетэ вал. Со сяна, тросэз иудейёс Авраам выжыысь потэменызы данъяськизы. Но Иоанн Пылатӥсь вераз: «Инмар та изъёсты Авраамлы нылпи карыны быгатоз» (Лука 3:8).

¹⁰ Иисус дышетӥз, адями кыӵе калыкысь луэменыз данъяськыны кулэ ӧвӧл шуыса. Сое таӵе учырысь адӟыны луэ. Одӥг пол книга тодӥсь юаз солэсь: «Кин бен мынам матысе?» Солы ответ сётыса, Иисус Самария мурт сярысь мадён вераз, кудӥз таласьёсын жугем муртлы юрттӥз. Шудтэм учыре сюрем адямиез адӟыса, иудейёс палэнтӥ ортчылӥзы, нош Самарияысь мурт сое жаляз. Мадёнзэ вераса, Иисус книга тодӥсьлэсь мылкыдзэ ӝутӥз ӟеч сямо Самария пиосмуртлэсь адӟем карыны (Лука 10:25—37). Иисус возьматӥз, Самария  мурт иудейёсты дышетыны быгатэ вал шуыса матысьсэс зэмзэ ик яратыны.

11. Малы Христослэн дышетскисьёсызлы мукет калыкысь адямиосты гажано вал? Кызьы Иисус юрттӥз соослы сое валаны?

¹¹ Инме ӝутскемезлэсь азьло Иисус дышетскисьёссэ «быдэс Иудеяын но, Самарияын но, быдэс музъемлэн пумысеныз пумозяз ик» ӟеч иворез вераны косӥз (Ап. уж. 1:8). Солэсь сётэм ужзэ соос быдэстыны быгатысалзы, вылтӥяськон сямзэс вормыса но мукет калыкысь адямиосты гажаса гинэ. Мукет калыкысь адямиослэсь умой сямъёссэс вераса, Иисус азьло ик дышетскисьёссэ со ужлы дасяз. Кылсярысь, одӥг пол Иисус Римысь сю солдатэн кивалтӥсез ушъяз, солэн осконэз туж юн шуыса (Матф. 8:5—10). Нош аслаз вордскем Назарет карын дыръяз со вераз, Иегова еврей луисьтэм адямиосты гажа-жаля шуыса, кылсярысь, Финикияысь Сарепта карысь палкышноез но Сирияысь Нееманэз (Лука 4:25—27). Озьы ик, Иисус Самарияысь кышномуртлы ӟеч иворез вераз. Со сяна, со палъёсын улӥсь адямиослэсь тунсыкъяськемзэс адӟыса, со отын кык нунал улӥз (Иоанн 4:21—24, 40).

12, 13. а) Кызьы апостолъёс учкизы Иисуслэн Самария кышномуртлы ӟеч иворез верамез шоры? (Учке статья кутсконысь кыкетӥ суредэз.) б) Кытысь адӟиське, Иаков но Иоанн Иисуслэсь дышетэмзэ ӧз валалэ шуыса?

¹² Апостолъёслы мукет калыкысь адямиосты гажаны капчи ӧй вал. Кылсярысь, Иисуслэсь Самария кышномуртэн вераськемзэ адӟыса, соос туж паймизы (Иоанн 4:9, 27). Иудей религиозной кивалтӥсьёс адямиос азьын кышномуртэн номыр понна но ӧй вераськысалзы, эшшо ке Самарияысь кышномуртэн, кудӥзлэн нимыз саптамын вал. Апостолъёс Иисуслы сиськыны ӵектӥзы. Но Иисуслэн соослы верам кылъёсысьтыз адӟиськиз, со Самарияысь кышномуртэн вераськонэ йырыныз валче выем но кӧт сюман сярысь ик вунэтэм шуыса. Солэн ваньмызлы ӟеч иворез верамез потэ вал, Самария кышномуртлы но, малы ке шуоно со Атаезлэн эрикез вал. Нош Инмарлэсь эриксэ быдэсъян солы сиён выллем вал (Иоанн 4:31—34).

¹³ Иаков но Иоанн Иисуслэсь дышетэмзэ ӧз валалэ. Самария музъемтӥ ортчыкузы, Иисуслэн дышетскисьёсыз одӥг гуртысь кӧлон инты утчазы, но отын улӥсьёс соосты ас доразы пыртыны пумит луизы. Соку Иаков но Иоанн туж вожзэс поттӥзы но ӵектӥзы, инмысь тыл мед васькоз но со гуртэз мед быдтоз шуыса. Со понна Иисус алӥз соосты (Лука 9:51—56). Иаковлэн но Иоаннлэн сокем вожзы ӧй потысал, вылды, со Галилея музъемын, соослэн вордскем музъемазы, луысал ке. Кызьы адӟиське, соос со палъёсысь адямиосты гажаны уг быгато вал. Кӧня ке дыр ортчыса, Иоанн Самарияысь калыклы ӟеч иворез вераз. Сое тросэз кылзӥзы. Солы туж возьыт вал, дыр, азьвыл пӧсекъяса верам кылъёсыз понна (Ап. уж. 8:14, 25).

14. Кызьы сэрттэмын-пертчемын вал пӧртэм кылын вераськись христианъёс куспын кылдэм шуг-секыт?

¹⁴ Ӝоген, асьме вакытысь 33-тӥ арын Витьтонэтӥ Нунал бере, югдур кылдӥз, куке куд-ог христианъёслэсь правооссэс ӧз чаклалэ. Ёрмыса улӥсь палкышноослы сиён сётъякузы, грек кылын вераськись палкышноосты палэнтӥ ортчылӥзы (Ап. уж. 6:1). Сыӵе югдур кылдӥз, луоз, пӧртэм кылын вераськеменызы сэрен. Та шуг-секытэз апостолъёс  туж ӝог сэрттӥзы-пертчизы. Соос бырйизы сизьым быгатӥсь вын-агайёсты но соосты сиён сётъяны куризы. Вань со вын-агайёслэн грек нимъёссы вал. Соосты юри бырйизы, луоз, ӝоже уськытэм палкышноослы юрттэтэз басьтыны капчигес мед луоз шуыса.

15. Кызьы Пётр котькинэ гажаны дышетскиз? (Учке статья кутсконысь куинетӥ суредэз.)

¹⁵ Асьме вакытысь 36-тӥ арын христианъёс пӧртэм калыкысь адямиослы ӟеч иворез вераны кутскизы. Азьвыл апостол Пётр иудейёсын гинэ вераське вал. Нош со бере, куке Инмар возьматӥз, христианъёс вань адямиосты гажаны кулэ шуыса, Пётр Римысь сю солдатэн кивалтӥсь Корнилийлы ӟеч иворез вераны мынӥз. (Лыдӟе Апостолъёслэсь ужъёссэс 10:28, 34, 35.) Бератаз Пётр шумпотыса вераськылӥз мукет калыкъёсысь христианъёсын но сиськылӥз соосын ӵош. Но кӧня ке аръёс ортчыса, Антиохияе вуэмез бере, со еврей луисьтэм муртъёсын сиськемысь дугдӥз (Гал. 2:11—14). Павел сое адӟиз но Пётрез тупатӥз. Кызьы адӟиське, Пётр аслэсьтыз янгышсэ валаз. Аслаз нырысетӥ гожтэтаз, кудзэ со Пичи Азиысь христианъёслы гожтӥз, кудъёсыз пӧлын кызьы еврейёс, озьы ик мукет калыкысь адямиос но вал, Пётр гожтӥз, котькинэ яратыны кулэ шуыса (1 Пётр 1:1; 2:17).

16. Мар верало вал нырысетӥ даурысь христианъёс сярысь?

¹⁶ Озьыен, Иисуслэн примерезлы луыса, апостолъёс «вань адямиосты» яратыны дышетскизы (1 Тим. 4:10; Иоанн 12:32). Соос асьсэлэсь учконъёссэс воштыны быгатӥзы, солы дыр кулэ луиз ке но. Ваньмызлы адӟиське вал, христианъёс ог-огзэс ярато шуыса. Кыкетӥ даурын улӥсь Тертуллиан нимо гожъяськись одӥгаз ужаз гожтӥз, мар со дыръёсы верало вал христианъёс сярысь: «Соос ярато ог-огзэс... ог-огзы понна соос кулыны но дась». Зэм, нырысетӥ даурысь христианъёс «выль адями луонэн» дӥсяськизы но котькин  шоры Иегова сямен учкыны кутскизы (Кол. 3:10, 11).

17. Мар кароно, адямиос сярысь азьвыл ик уродзэ малпатэк улыны дышетскон понна? Вералэ примеръёс.

¹⁷ Милемлы но дыр кулэ луоз, вылды, дышетскыны адямиос сярысь азьвыл ик уродзэ малпатэк улыны. Тани мар вера Франциысь сузэр сыӵе малпанъёсын нюръяськемез сярысь: «Иегова дышетэ монэ яратыны, мукетъёсызлы юрттыны, ваньмыз шоры умоен учкыны. Но мыным дышетсконо на адямиос сярысь азьвыл ик уродзэ малпатэк улыны, нош со котьку капчи ӧвӧл. Мон ялан со сярысь вӧсяськисько». Нош тани мар вера мукетыз сузэр, кудӥз Испаниын улэ: «Куддыръя мыным нюръяськоно луэ, куд-ог калыкысь адямиос сярысь уродзэ медам малпа шуыса. Ӵемысь мон урод малпанъёсме вормисько, но мон валасько, мыным азьланяз но соосты быдтыны тыршоно шуыса. Мон туж тау карисько Иеговалы мынам таӵе тупаса улӥсь семьяе вань шуыса!» Котькудмылы таӵе юанлы пӧяськытэк валэктон сётоно: кулэ-а мыным, та сузэръёслы выллем, адямиос сярысь азьло ик кылдӥсь урод малпанъёсын нюръяськыны?

18, 19. а) Малы милемлы котькин шоры умоен учконо? б) Кызьы ми быгатомы котькин шоры умоен учкыны?

¹⁸ Милемлы вунэтоно ӧвӧл, куке но ми ваньмы «дунне вылын Инмарлы осконэз тодытэк» улӥмы шуыса (Еф. 2:12). Но Иегова асьмемыз «яратонлэн герӟетъёсыныз-кусыпъёсыныз» ас дораз вайиз (Ос. 11:4; Иоанн 6:44). Нош Христос шумпотыса милемыз пумитаз. Солы луыса ми Инмарлэн семьяяз пырыны быгатӥмы. (Лыдӟе Иоаннлэсь 6:37.) Зэм, Иисус милемлы, тырбыдэстэм адямиослы, туж бадӟым яратонзэ возьматӥз, соин ик милемлы малпаны но кулэ ӧвӧл, мукет калыкысь адямиос милесьтым уродгес луо шуыса.

¹⁹ Веранэз ӧвӧл, та дуннелэн пумыз матэктэмъя адямиос ӵемгес но ӵемгес ог-огенызы тупатэк улозы, ог-огзэс ултӥялозы но адӟемпотостэм карозы (Гал. 5:19—21; 2 Тим. 3:13). Нош Иеговалэн ужась-тыршисьёсыз тыршо «вылӥысь васькись визьлыкез» басьтыны, кудӥз шонерлыко луэ но тупаса улонэз яратэ (Иак. 3:17, 18). Ми шумпотыса эшъяськиськомы мукет шаеръёсысь адямиосын, соослэсь калык сямъёссэс гажаськомы, оло нош, соослэсь кылзэс но дышетӥськомы. Солы луыса Инмарлэн калыкез пӧлын тупаса улон «шур кадь» луэ, нош шонерлык — «зарезь тулкымъёс кадь» (Ис. 48:17, 18).

20. Мар луэ, куке визьёсамы но сюлэмъёсамы яратон пыӵа?

²⁰ Кызьы Библиез дышетон юрттӥз Австралиысь сузэрлы, кудӥз сярысь вылӥынгес верамын вал? Со вера: «Табере мынам выль визьмы но выль сюлэмы. Азьвыл адӟемпотостэм карон сямы но мукетъёсыз сярысь азьло ик урод малпанъёсы чик ӧз кыле ни». Нош Канадаысь вын-агай вера: «Мон валай: пӧртэм калыкысь адямиос ог-огзэс адӟемпотостэм каро, малы ке шуоно соос ог-огзэс уг тодо. Нош адямиослэн сямъёссы герӟаськемын ӧвӧл соин, кытын соос вордӥськизы». Со вын-агай кышно басьтӥз англи кылын вераськись сузэрез. Со выллем воштӥськонъёс возьмато, христиан яратон вормыны быгатэ шуыса мукетъёсыз сярысь азьвыл ик кылдэм котькыӵе урод малпанъёсты. Яратон милемыз туж юн огазея (Кол. 3:14).