1, 2. а) Кызьы валано та дуннеын кусыпъёс пумен уродгес но уродгес луо шуыса верамез? б) Мае ми эскеромы та статьяын?

 «ПИЧИ дырысеным ик мон шонерлыктэм ужъёсты гинэ адӟи,— тодаз вае Европаысь сузэр.— Соин ик мон соглаш ӧй вал шаерысьтымы политикаен но пыри соос пӧлы, кинъёс политика удысын бадӟым воштӥськонъёс ортчытыны малпало вал. Со сяна, мон трос аръёс ӵоже террористэн улӥ». Африкаысь одӥг вын-агай но азьвыл кужмысь каронэз умойтэмен ӧз лыдъя. Со вера: «Мон оскисько вал, мынам калыке мукет калыкъёслэсь умойгес шуыса, но политической партие пыриськи. Милемыз дышетӥзы шибодыосын виылыны мукет партиысь муртъёсты, озьы ик, асьме калыкысь муртъёсты но, кудъёсыз мукет партия пӧлы пыризы». Нош Европаысь мукетыз сузэр вераз: «Мукет калыкысь но мукет осконысь адямиосты мон ултӥясько но адӟемпотостэм карисько вал».

² Туннэ трос адямиос озьы малпаськыны кутско. Эрик понна нюръяськисьёс ӵемгес но ӵемгес асьсэды мукетъёсыныз лек возё, политика пумысен адямиос нюръяськыса уло но трос шаеръёсын мукет шаерысь лыктэмъёсты ултӥяло. Библиын азьло ик верамын вал,  берпуметӥ нуналъёсы адямиос «йыркурзэс вунэтӥсьтэмесь» луозы шуыса (2 Тим. 3:1, 3). Со зэмзэ но озьы. Кызьы христианъёслы огкылысь улоно дуннеын, кудаз кусыпъёс пумен уродгес но уродгес луо? Ойдолэ малпаськомы Иисуслэн примерез вылын, кудӥз улӥз политика ласянь бугыръяськись шаерын. Ми эскеромы куинь юанъёсты: малы Иисус нимазъяськыса улыны тыршисьёс пала ӧз пыры? Кызьы со возьматӥз, Инмарлэн ужась-тыршисьёсыз политика удысын нокин пала кариськытэк улыны кулэ шуыса? Но кызьы Иисус валэктӥз, кужмысь каронэз шонере поттыны уг луы шуыса?

3, 4. а) Кыӵе мылкыдзы вал иудейёслэн, Иисус музъем вылын улыку? б) Кызьы со мылкыд Иисуслэн дышетскисьёсыз вылын шӧдӥськиз?

³ Нырысетӥ даурын тросэзлэн иудейёслэн, кудъёсызлы Иисус ӟеч иворез вераз, туж потэ вал Рим ки улысь мозмытскемзы. Калыклэсь сыӵе мылкыдзэ пуромытӥзы на зелотъёс — лек националистъёс. Тросэз соос пӧлысь Галилеяысь Иуда пала пыро вал, кудӥз адямиосты пӧяса ассэ Мессия шуэ вал. Со сьӧры трос адямиос мынӥзы. Иудей тодосчи Иосиф Флавий верамъя, Иуда возьытэ уськытӥз иудейёсты, соос римъёслы выт тырыны соглаш карисько шуыса. Соин Рим ожгарчиос Иудаез виизы (Ап. уж. 5:37). Асьсэлэсь малпанъёссэс быдэстон понна, куд-ог зелотъёс кужмысь каронлэсь но ӧз палэнскылэ.

⁴ Нош мукетъёсыз иудейёс Мессиялэсь лыктэмзэ возьмазы. Соос оско вал, со соослэн кивалтӥсьсы луоз, Израильлэсь азьвыл данзэ берыктоз но сое Рим ки улысь мозмытоз шуыса (Лука 2:38; 3:15). Тросэз оско вал, Мессия Израиль эксэйлыкез выльысь ӝутоз но, пӧртэм музъемъёсы пазьгиськем трос миллион иудейёс вордӥськем музъемазы берытскыны быгатозы шуыса. Одӥг пол Иоанн Пылатӥсь юаз Иисуслэсь: «Тон-а Со, Кудӥз лыктыны кулэ, яке милемлы мукетсэ-а витёно?» (Матф. 11:2, 3). Иоаннлэн тодэмез потӥз, луоз, Иисус бере кин ке но мукетыз лыктоз на-а шуыса, кин иудейёсты курадӟонъёслэсь мозмытоз. Кык дышетскисьёслэн но, кудъёсыз, Еммаусэ мыныкузы, улӟем Иисусэз пумитазы, Мессия пумысен быдэсмымтэ малпанъёссы вал. (Лыдӟе Лукалэсь 24:21.) Кӧня ке дыр ортчыса, апостолъёс юазы Иисуслэсь: «Кузё-Инмармы, оло, та вакытэ ик-а ни Тон Израиль эксэйлыкез ӝутӥськод?» (Ап. уж. 1:6).

5. а) Малы Галилеяын улӥсьёс Иисусэз эксэй карыны туртто вал? б) Кызьы Иисус соослэсь шонертэм малпанъёссэс тупатӥз?

⁵ Паймымон ӧвӧл, Мессия сярысь со выллем малпанъёс вӧлмемен, Галилеяын улӥсьёс Иисусэз эксэй карыны малпазы шуыса. Соос малпало вал, вылды, солэсь умой кивалтӥсь уд шедьты ни шуыса, малы ке шуоно со туж быгатыса вераське, висисьёсты бурмытъя но сютэмъёсты сюдэ вал. 5 000 пиосмуртъёсты сюдэмез бере Иисус валаз, мар сярысь соос малпасько. Библиын верамын: «Лыктыса шуак кутыны но эксэй карыны турттэмзэс тодэм бераз Иисус нош ик огназ гурезе кошкиз» (Иоанн 6:10—15). Мукетаз нуналэ адямиослэн  шонертэм мылкыдзы ӧжыт сӥяз, вылды. Соку Иисус Галилей зарезь дуре люкаськем калыклы валэктӥз, со адямиослы Инмарлы матэ кариськыны юрттыны лыктӥз шуыса. Со вераз: «Сисьмыса быроно сиён сярысь эн сюлмаське, быронтэм улонлэн сиёнэз сярысь сюлмаське» (Иоанн 6:25—27).

6. Кызьы Иисус возьматӥз, музъем вылын кивалтӥсь луыны уг малпа шуыса? (Учке статья кутсконысь нырысетӥ суредэз.)

⁶ Кулонэз азьын Иисус валаз: куд-ог дышетскисьёсыз возьмало, со музъем вылын эксэйлык кылдытоз шуыса, кудӥзлэн шоркарез Иерусалим луоз. Соослэн малпанъёссы шонертэмесь шуыса возьматон понна, Иисус минаос сярысь мадён вераз, кудаз «вылӥ, дано выжыысь кыӵе ке но адями», яке Иисус, кемалы кыдёкысь шаере мыныны кулэ вал (Лука 19:11—13, 15). Со сяна, Понтий Пилатэн вераськыкуз, Иисус валамон вераз, со политикае уг пыриськы шуыса. Пилат юаз Иисуслэсь: «Тон иудейёслэн Эксэйзы-а?» (Иоанн 18:33). Со кышказ, луоз, Иисусэн сэрен политика удысын бугыръяськон ӝутскоз шуыса. Иисус вераз: «Мынам Эксэйлыке та дуннелэсь ӧвӧл» (Иоанн 18:36). Иисус политикае ӧз пыриськы, малы ке шуоно солэн Эксэйлыкез инмын луыны кулэ вал. Со вераз Пилатлы, музъем вылэ «зэмлык сярысь шара ивортыны» лыктӥз шуыса. (Лыдӟе Иоаннлэсь 18:37.)

7. Малы куддыръя кинлы ке но секыт луэ, сюлмаз гинэ но, эрик понна нюръяськисьёс пала кариськытэк улыны?

⁷ Иисус сямен умой валаськомы ке, кыӵе уж сётӥз милемлы Инмар, сюлмамы гинэ но ми эрик понна нюръяськись политической партиос пала ум кариське. Куддыръя со капчи ӧвӧл. Одӥг ёросэз чаклась вераз: «Асьме палан адямиос, улонэз воштон понна, тросгес но тросгес политикае пыриськыны  кутско. Котыр националистъёслэн мылкыдзы шӧдӥське, но, тросэз малпамъя, умой улон вайыны быгатэ эрико луон гинэ. Шумпотоно, вын-агайёс огкылысь уло шуыса. Соос вань кужымзэс Эксэйлык сярысь ӟеч иворез веранлы сёто. Соос тодо, Инмар гинэ шонерлыкез но мукет шуг-секытъёсты быдтыны быгатэ шуыса».

8. Вералэ, кыӵе секыт зӥбетсы вал иудейёслэн нырысетӥ даурын.

⁸ Шонерлыктэм ужъёсын сэрен, адямиос ӵемысь политика удысын споръяськонъёс ӝуто. Ӵапак сыӵе югдур кылдэмын вал, Иисус музъем вылын улыку. Со вакытэ адямиосты туж сюлмаськытэ вал выт тырон сярысь юан. Озьы, Галилеяысь Иуда, кудӥз сярысь азьлогес верамын вал, бугыръяськон ӝутӥз. Со бугыръяськонлы муг луиз калыкез ӵотаса-лыдъяса гожъян, кудзэ ортчытӥзы Римысь кивалтӥсьёс. Соослэн тодэмзы потӥз, калык пӧяськытэк выт тыре шуыса. Рим котырысь гуртъёсын улӥсьёслы (соос пӧлын вал соосыз но, кинъёслы Иисус ӟеч иворез вераз) трос пӧртэм вытъёс тыроно вал, кылсярысь, музъемлы но коркалы. Нош пӧяськись выт бичасьёс со выт тыронъёсты уката ик секыт карылӥзы. Куд-огъёсыз соос пӧлысь выт бичась луон понна правозэс коньдонэн басьяллязы, нош собере, выт бичаса, асьсэлы трос коньдон поттылӥзы. Закхей, кудӥз Иерихонын выт бичасьёслэн йырзы вал, адямиослэсь коньдонзэс капыръяса, трос ваньбур люказ (Лука 19:2, 8). Со гинэ озьы ӧз лэсьты.

9, 10. а) Кызьы Иисуслэн тушмонъёсыз сое политика удысысь споръяськонэ кыскыны туртто вал? б) Кыӵе пример со асьмелы возьматӥз? (Учке статья кутсконысь кыкетӥ суредэз.)

⁹ Одӥг пол Иисуслэн тушмонъёсыз тыршизы сое выт тырон юан пумысен споръяськонэ кыскыны. Соос юазы солэсь, кулэ-а одӥг динарий выт тырыны, кудзэ бичало вал Рим котырысь гуртъёсын котькуд улӥсьлэсь. (Лыдӟе Матфейлэсь 22:16—18.) Иудейёс та вытэз тужгес но адӟемпотостэм каризы, малы ке шуоно со тодазы вайытэ вал, соос Римлэн киулаз уло шуыса. Выт тырон сярысь юанэз ӝутӥзы Иродлэн адямиосыз. Иисус верасал ке, выт тыроно ӧвӧл шуыса, сое янгыше уськытысалзы, со бугыръяськон ӝутыны малпа шуыса. Нош со верасал ке, тыроно шуыса, соку солэн дышетскисьёсыз со шоры умойтэмен учкысалзы.

¹⁰ Иисус сое валаз, соин ик со соглаш луэмзэ но, пумит луэмзэ но ӧз вера. Со вераз: «Кесарьлэсьсэ кесарьлы сётэлэ, нош Инмарлэсьсэ — Инмарлы» (Матф. 22:21). Иисус тодэ вал, выт бичасьёс пӧяськыны дышемын шуыса. Но солэн ӧз поты, самой кулэзэ кельтыса, мукетызлы саклык висъямез. Нырысь ик со саклыксэ висъяз Инмарлэн Эксэйлыкезлы, кудӥз вань шуг-секытъёсты быдтыны быгатоз. Озьы со дышетскисьёсызлы пример возьматӥз, политика удысын нокин пала кариськытэк улоно шуыса, со удысын кин ке но шонер, нош кин ке но шонертэм кадь потэ ке но. Христианъёс нырысь ик Инмарлэсь Эксэйлыксэ но солэсь шонерлыксэ утчало. Соос уг малпасько со сярысь, мар политика удысын шонер, нош мар шонертэм (Матф. 6:33).

11. Кыӵе самой умой амал шонерлыктэм ужъёсын нюръяськыны?

 ¹¹ Зэмлыкез тодэмзылэсь азьло тросэз Иеговалэн Адӟись-Ивортӥсьёсыз политикае пырисько вал. Нош собере соос политика удысын нокин пала кариськытэк улыны кутскизы. Тани мар вера Великобританиысь сузэр: «Университетын мон дышетӥ сое, кыӵе инты басьтэ адями улонын, адямиослэн обществоязы, но малпаськыны кутски, улонын бадӟым воштӥськонъёс ортчытоно но кин ке но со воштӥськонъёсты ортчытыны кулэ шуыса. Мынам сьӧд куо адямиослэн правозы понна нюръяськеме потэ вал, малы ке шуоно ми трос шонерлыктэм ужъёсты чидамы. Политика удысысь споръяськонъёсын мон ӵем дыръя вормисе потылӥ, озьы ке но мынам сюлмы ӧз буйга. Мон уг валаськы вал, мукет калыкысь адямиосты ултӥян мур сюлмысь потэ но сое отысь быдтоно шуыса. Библиез дышетыса, мон валай: нырысь ик мыным аслым воштӥськоно. Воштӥськыны мыным юрттӥз тӧдьы куо сузэр. Али мон пионер луыса жестовой кылын вераськись кенешын ужасько-тыршисько но пӧртэм адямиослы ӟеч иворез верасько».

12. Кыӵе шӧм сярысь Иисус дышетскисьёсызлы вераз?

¹² Иисус музъем вылын улыку, религиозной кивалтӥсьёс ӵемысь политикае пырисько вал. Одӥг книгаын верамын, «пӧртэм религиозной сектаос, кудъёсаз иудейёс пыриськизы, туала кылын вераса, политической партиос вал» шуыса (Daily Life in Palestine at the Time of Christ). Соин ик Иисус дышетскисьёсызлы вераз: «Чаклаське, утиське фарисейёслэн шӧмзылэсь, Иродлэн шӧмызлэсь» (Марк 8:15). Ирод сярысь веракуз, со вераз, луоз, Иродлэн адямиосызлэн политической партизы сярысь. Фарисейёс сярысь ке верано, соос иудейёслы эрик сётон понна вал. Кызьы адӟиське Матфейлэсь Ӟеч иворысь, дышетскисьёсыныз вераськыкуз, Иисус саддукейёс сярысь но вераз. Соослы ваньмыз кельше вал, малы ке шуоно, Римлэн киулаз улыса, тросэзлэн кивалтыны правозы вал. Иисус валамон вераз дышетскисьёсызлы со куинь группалэн дышетонъёсызлэсь, яке «шӧмзылэсь», палэнын возиськоно шуыса (Матф. 16:6, 12). Вераны кулэ, сое Иисус вераз ӝоген со бере, куке сое эксэй карыны туртто вал.

13, 14. а) Вералэ, кызьы религилэн но политикалэн сураськемзы кужмысь каронэ но шонерлыктэм ужъёсы вуттэ. б) Малы ноку но нокинэ кужмысь кароно ӧвӧл, ми шонерлыктэм ужъёсын пумиськиськомы ке но? (Учке статья кутсконысь куинетӥ суредэз.)

¹³ Религия политикаен ке сураське, со ӵемысь кужмысь каронэ вуттэ. Сыӵе учыръёсы Иисус дышетскисьёссэ нокин пала кариськытэк улыны дышетӥз. Одӥг ласянь со валэктэ, малы бадӟымъёсыз священникъёс но фарисейёс Иисусэз виыны малпазы. Соос кышкало вал, адямиос Иисуслэсь кылзӥськозы но со сьӧры мынозы шуыса, соку соос асьсэлэсь религия но политика удысын кивалтэтсэс ыштозы. Соос малпаськизы: «Сое озьы гинэ кельтӥмы ке, ваньмыз Солы оскыны кутскозы,— соку Рим адямиос лыктозы но интымес но, калыкмес но  киултозы» (Иоанн 11:48). Соин ик быдӟым священник Каиафа Иисусэз виыны кариськиз но ас палаз адямиосты кыскиз (Иоанн 11:49—53; 18:14).

¹⁴ Уйин Каиафа ожгарчиосты Иисусэз кырмыны ыстӥз. Иисус солэсь кырсь малпанзэ тодэ вал. Соин ик, куке со берпуметӥзэ апостолъёсыныз ӝытсэ сиськиз, куриз соосты мечъёссэс сьӧразы басьтыны. Соосты дышетон понна, кык меч тырмыт вал (Лука 22:36—38). Берлогес со уе, куке Иисуслэн тушмонъёсыз сое кырмыны лыктӥзы, Пётр туж вожзэ поттӥз но, мечсэ кутыса, одӥгез тушмон вылэ урдскиз (Иоанн 18:10). Но Иисус Пётрлы шуиз: «Мечтэ аслаз интыяз пон, ваньмыз меч кутэмъёс мечлэсь бырозы уго» (Матф. 26:52, 53). Та учыр Иисуслэн дышетскисьёсызлы тодазы вайытӥз кылъёсты, кудъёссэ со вӧсяськыкуз вераз: соос таизлэн дуннелэн адямиосыз луыны кулэ ӧвӧл. (Лыдӟе Иоаннлэсь 17:16.) Инмарлэн гинэ правоез вань шонерлыктэм ужъёсын нюръяськыны.

15, 16. а) Кызьы Инмарлэн Кылыз юрттэ христианъёслы политической споръяськонъёсы пыриськытэк улыны? б) Кыӵе пӧртэмлыксэс адӟе Иегова аслаз калыкезлэсь но та дуннелэсь?

¹⁵ Европаысь сузэр но, кудӥз сярысь верамын вал ини, валаз сое. Со вера: «Кужмысь каронэн шонерлыко улон вайыны уг луы. Тросэз, кинъёс сыӵе сюресэз бырйизы, улонзэс ыштӥзы. Мукетъёсыз туж лек луизы. Макем мон шумпотӥ Библиысь тодыны, Инмарлэн гинэ кужымез вань шуыса музъем вылэ зэмзэ ик шонерлыко улон вайыны! Ӵапак со сярысь мон верасько берпум 25 ар ӵоже». Африкаысь вын-агай аслэсьтыз шибодызэ «Духлэн мечезлы», Инмарлэн Кылызлы, воштӥз но табере тупаса улон сярысь ӟеч иворез пӧртэм калыкысь адямиослы вера (Еф. 6:17). Европаысь мукетыз сузэр Иеговалэн Адӟись-Ивортӥсез луэмез бере бызиз со калыкысь вын-агайлы, кудзэ со адӟемпотостэм каре вал. Вань та адямиос воштӥськыны быгатӥзы, малы ке шуоно Христослэсь адӟем каремзы потӥз.

¹⁶ Макем кулэ со выллем воштӥськонъёс лэсьтыны! Библиын адямиос бугыръяськись зарезен ӵошатэмын, кудӥз ноку но чус уг кариськы (Ис. 17:12; 57:20, 21; Усьт. 13:1). Политика удысысь споръяськонъёс адямиослэсь кусыпъёссэс сӧро но кулэтэм кужмысь каронэ вутто. Ми тыршиськомы тупаса но огкылысь улыны. Адӟыса, кызьы та дуннеын адямиослэн кусыпъёссы уродгес но уродгес луо, Иегова туж шумпотэ, солэн калыкез тупаса улэ шуыса. (Лыдӟе Софониялэсь 3:17.)

17. а) Кыӵе куинь амалъёсын ми тупаса улон вайиськомы? б) Мае ми эскеромы мукетаз статьяын?

¹⁷ Кызьы ми адӟимы, христианъёс тупаса улон вайыны быгато куинь амалэн: 1) оскыны, Инмарлэн ин Эксэйлыкез шонерлыко ужъёсты быдтоз шуыса, 2) политика удысын нокин пала кариськытэк улыны но 3) кужмысь каронэз палэнтыны. Но вераны кулэ, тупаса улонмес адямиос сярысь азьвыл ик кылдэм урод малпан сӧрыны быгатэ шуыса. Мукетаз статьяын ми эскеромы, кызьы сыӵе малпанъёсын нюръяськоно но кызьы нюръяськизы соосын нырысетӥ даурысь христианъёс.