1. Кыӵе милям шумпотон понна мугмы вань?

 МИ ТУЖ шумпотӥськомы, Иеговалэн калыкез туж тыршыса ужа но солэн югытэз быдэс дунне вылын пиштэ шуыса. Кылем арын ми 10 миллионлэсь тросгес Библия дышетонъёсты ортчытъямы. Со сяна, трос миллион адямиос Ӝытанэ лыктӥзы но Инмарлэн яратонэз сярысь тодӥзы, кудӥз ми понна дун сётӥз (1 Иоанн 4:9).

2, 3. а) Мар уг люкеты милемлы «шунды кадь» пиштыса улыны? б) Мае ми эскеромы та статьяын?

² Иеговалэн ужась-тыршисьёсыз туж пӧртэм кылъёсын верасько. Но со уг люкеты милемлы ваньмылы ӵош инмысь Иегова Атаймес данъяны (Усьт. 7:9). Кытын гинэ ми медам улэ но кыӵе гинэ кылын медам вераське, ми «шунды кадь» пиштыса улыны быгатӥськомы (Флп. 2:15).

³ Инмар калыклэн лыдызлэн йылэмез, милям огкылысь улэммы но сак луэммы — ваньмыз со Иеговаез данъя но адямиосты зэмлыкен тунсыкъяськытэ.  Та статьяын ми эскеромы, мар карыны ми быгатӥськомы, та куинь удысъёсын Инмарлэсь нимзэ данъян понна. (Лыдӟе Матфейлэсь 5:14—16.)

4, 5. а) Ӟеч иворез верам сяна, мар эшшо ми карыны быгатӥськомы на, югытмы мед пиштоз шуыса? б) Кыӵе емыш вайыны быгатэ асьмеды лякыт воземмы? (Учке статья кутсконысь туспуктэмез.)

⁴ «Нокин но Кузё-Инмарлы оскымон кыльыны уг быгаты та дуннелы висъям дыре... со югытэзлы пиштыны уг лэзьы ке»,— верамын вал 1925-тӥ арын 1-тӥ инвожо понна поттэм «Возьмаськон башняын», «Свет, сияющий во тьме» статьяын. «Нош со понна,— валэктэмын вал отын,— музъем вылысь калыкъёслы ӟеч иворез верано но Иеговалэн шонерлыко эсэпъёсызъя улоно». Зэм, милям югытмы адямиос азьын пиштэ, куке ми ӟеч иворез вераськомы но дышетскисьёсты дасяськомы (Матф. 28:19, 20). Но Иеговаез данъяны ми асьмеды воземенымы но быгатӥськомы. Адямиос, кудъёссэ ми дорысьтызы яке урамысь пумитаськомы, туж чаклало, кызьы ми асьмеды возиськомы. Ми соослы пальпотӥмы но соосын ӟечбуръяськимы ке, соос умоен малпалозы ми сярысь но, Инмармы сярысь но.

⁵ «Нош корка пырыкуды, ӟечкыласа тазьы шуэлэ: „Каньыллык та коркалы“»,— вераз аслаз дышетскисьёсызлы Иисус (Матф. 10:12). Со палъёсын, кытын Иисус но солэн апостолъёсыз ӵемысь ӟеч иворез веразы, адямиос ӵем дыръя тодмотэм муртъёсты ас доразы пыртало вал. Нош туннэ котькытын озьы уг каро. Ӵем дыръя, ӧс азьысьтызы тодмотэм муртэ адӟыса, адямиос кышкало. Но ми асьмеды зӥбыт возиськомы но малы лыктэммес лякытэн валэктӥськомы ке, адямиослэн кышканзы быре но соос милемыз кылзыны дась луо. Шуныт пальпотон юрттоз вераськонэз кутскыны. Та визь-кенешъёс озьы ик пайдаё луозы со вын-агайёслы но сузэр-апайёслы, кудъёсыз трос калыко интыосын тележкаосын тодыто. Тӥ шӧдӥды, луоз, пальпотӥськоды но адямиосын ӟечбуръяськиськоды ке, соос ӵемгес публикациосты басьто но асьсэос вераськыны кутско.

6. Кызьы Англиысь арлыдо кузпалъёс тодытон уже тросгес пыриськыны быгатӥзы?

⁶ Англиысь арлыдо кузпалъёслы, тазалыксы уродмемен, коркась корка ӟеч иворез вераны секыт. Соин ик соос корка доразы ӟеч иворез вераны малпазы. Со дыре, куке анай-атайёс соос вӧзысь школае нылпиоссэс басьтыны лыкто, арлыдо кузпалъёс ӝӧк вылэ тыро Библия вылэ пыкиськыса гожтэм публикациосты. Тросэзлы анай-атайёслы тунсыко потӥз «Тынад юанъёсыдлы валэктонъёс» книга но куд-ог брошюраос. Со арлыдо кузпалъёс борды итӥськиз кенешысьтызы сузэр, кудӥз пионер луыса ужа-тырше. Анай-атайёслы туж кельшиз со сузэрлэн ассэ лякыт воземез но кузпалъёслэн сюлмысь тыршемзы. Нош одӥгез анай-атай Библия дышетыны но соглаш луиз.

7. Кызьы тӥ мукет шаерысь лыктэмъёслы юрттыны быгатӥськоды?

⁷ Берпум аръёсы трос шаеръёсы беженецъёс лыктӥзы. Мар карыны луоз, соослы Иегова сярысь но солэн кыл  сётонъёсыз сярысь тодыны юрттон понна? Кылсярысь, луоз дышетскыны ӟечбуръяськыны со кылъёсын, кудъёсыныз ӵемгес верасько тӥляд шаерады лыктэмъёс. Тӥледлы юрттоз мукет кылъёсты дышетон понна поттэм приложенимы. Со сяна, адямиос мед тунсыкъяськозы шуыса, луоз кӧня ке кылъёсты дышетыны. Соку тӥ возьматыны быгатоды, кызьы соослы интернетысь ас кылынызы Библия вылэ пыкиськем публикациосты но видеороликъёсты шедьтоно (К. Зак. 10:19).

8, 9. а) Кыӵе пайда вае арня вискысь пумиськон? б) Кызьы анай-атайёс нылпиоссылы юрттыны быгато кенешлэн пумиськонъёсаз эскеронэ пыриськыны?

⁸ Ми туж тау кариськомы Иеговалы «Улон но ужан-тыршон» пумиськон понна. Солэн ужпумез — юрттыны милемлы быгатыса ӟеч иворез вераны. Со пумиськонын верам пайдаё визь-кенешъёс юртто милемлы кышканмес вормыны, адямиос доры выльысь лыктыкумы но Библия дышетонъёсты ортчытъякумы.

⁹ Тросэз, кинъёс пумиськонъёсамы нырысетӥзэ лыкто, адӟо, эскеронэ нылпиос но пырисько шуыса. Анай-атайёс, дышетэ нылпиостэс пумиськонъёсамы ас кылъёсынызы валэктонъёс сётъяны — озьы соослэн но югытсы адямиос азьын пиштоз. Нылпиослэсь огшоры кылъёсын но сюлмысь верамзэс кылыса, куд-ог адямиос валазы, зэмлыкез шедьтӥзы шуыса (1 Кор. 14:25).

10. Мар ми карыны быгатӥськомы, семьяысьтымы кусыпъёсмес юнматон понна?

¹⁰ Милям югытмы адямиос азьын пиштэ соку но, куке ми семьяямы но кенешын кусыпъёсмес юнматӥськомы. Со понна анай-атайёслы ялан семьяен йыбырттон ортчытъяно. Тросэз семьяен йыбырттоназы ярато интернет-телевидениысьтымы котькуд толэзе потӥсь программаез учкыны. Учкем берады умой луысал вераськыны со сярысь, кызьы тӥ тодэмдэс улонады пыртыны быгатысалды. Эн вунэтэ, пичи нылпиослэн но быдэ вуымтэ пиналъёслэн кулэяськонъёссы пӧртэмесь шуыса. Соин ик туж кулэ сыӵе семьяен йыбырттон ортчытъяны, кудӥз котькудӥзлы нимысьтыз пайда ваёз (Пс. 148:12, 13).

11—13. Мар ми карыны быгатӥськомы, кенешысь кусыпъёсты юнматон понна?

¹¹ Егит христианъёс, кызьы тӥ юрттыны быгатӥськоды кенешысь кусыпъёсыз юнматыны но мукетъёсызлы асьсэды кулэен шӧдыны? Кылсярысь, тырше арлыдо вын-агайёслы но сузэр-апайёслы дырдэс висъяны. Соослэсь юаны луоз, мар юрттӥз соослы трос аръёс ӵоже Иеговалы оскымон ужаны-тыршыны. Со тӥлесьтыд мылкыддэс ӝутоз но юрттоз кызьы тӥледлы, озьы ик соослы но азьланяз но Иеговаез данъяны. Со сяна, котькудмы быгатӥськомы пумитаны ваньзэс, кинъёс Эксэйлык юртэ пумиськонэ лыкто, тужгес но нырысетӥзэ лыктӥсьёсты. Пальпотэ соослы, юрттэ инты шедьтыны но тодматэ вын-агайёсын но сузэр-апайёсын. Соос асьсэды доразы кадь мед шӧдозы.

¹² Тӥледлы тодытонлы сӥзем пумиськонъёсты ортчытъяны оскизы ке, тӥ троссэ лэсьтыны быгатӥськоды, арлыдоос тодытон уже пыриськыны мед быгатозы шуыса. Вань-а соослэн, кытын ӟеч иворез вераны? Куддыръя соосын ӵош егит вын-агаез яке сузэр-апаез ыстыны луоз. Соос арлыдоослы юрттыны быгатозы. Озьы ик юрттоно со ивортӥсьёслы но, кудъёсыз, тазалыксы уродмемен яке мукет югдуръёсын сэрен, тодытон уже трос пыриськыны уг быгато. Тӥ вын-агайёслэсь но сузэр-апайёслэсь югдуръёссэс лыдэ басьтӥськоды ке, соку егитъёсыз но арлыдоосыз, быгатӥсьёсыз но выльёсыз сюлмысь тодытон уже пыриськозы (Лев. 19:32).

¹³ Израиль калык туж яратэ вал огазьын Иеговалы йыбыртъяны. Псаломъёсты гожъясь гожтӥз: «Макем ӟеч, макем умой агай-вынъёслы валче улыны!» (Лыдӟе Псалтирез 132:1, 2.) Огкылысь улонэз со ӵошатӥз зырӟон вӧйын, кудӥз туж ческыт зыно вал но куэз небӟытэ вал. Милям потэ, вын-агайёслэн но сузэр-апайёслэн, милемын вераськыса, сюлэмзы мед буйгалоз но соос шумпотон мед басьтозы шуыса. Умой луысал ужпум пуктыны соосын матэгес тодматскыны (2 Кор. 6:11—13). Тӥ озьы лэсьтӥськоды ке, тӥледыз ушъяны луоз. Солы луыса кенешын вын-агайёслэн но сузэр-апайёслэн кусыпъёссы эшшо но юнгес луозы.

14. Мар кароно, бускельёсмы Библиысь зэмлыклэсь югытсэ мед адӟозы шуыса?

¹⁴ Нош мар кароно, бускельёсмы Библиысь зэмлыклэсь югытсэ мед адӟозы шуыса? Ӟеч кылъёс верано но ӟеч ужъёс лэсьтоно. Юалэ асьтэлэсь:  «Мар малпало мон сярысь бускельёсы? Чылкыт-а мынам коркае но корка котыры? Ӵектӥсько-а мон бускельёсылы юрттэтме?» Юалэ вын-агайёслэсь но сузэр-апайёслэсь, кызьы соослэн ӟеч сямъёссы но асьсэды лякыт воземзы шӧдӥськиз ӵыжы-выжыоссы, бускельёссы, ӵош ужасьёссы но ӵош дышетскисьёссы вылын. Соос тӥледлы тунсыко учыръёс вералозы, вылды (Еф. 5:9).

15. Малы туж кулэ сак улыны?

¹⁵ Милям потэ ке, югытмы азьланяз но яркыт мед пиштоз шуыса, милемлы тодамы возёно, кыӵе дыре ми улӥськомы. Иисус трос пол аслаз дышетскисьёсызлы вералляз: «Сак улэ» (Матф. 24:42; 25:13; 26:41). Веранэз ӧвӧл, ми малпаськомы ке, «бадӟым куректон» ми улон дыръя уз вуы на шуыса, ӟеч иворез вераны милям мылкыдмы уз луы (Матф. 24:21). Соин сэрен милям югытмы лябгес пиштыны кутскоз, оло нош, кысоз но.

16, 17. Мар карыны луоз, азьланяз но сак луон понна?

¹⁶ Дуннеын югдур уродгес но уродгес луэ, соин ик милемлы туж кулэ  сак луыны. Ми тодӥськомы, пум Иеговаен пуктэм дыре вуоз шуыса (Матф. 24:42—44). Со дыр вуэмын ӧвӧл на дыръя чидандэс возьматэ но тодады возе, мар азьланяз луыны кулэ. Котькуд нунал Библиез лыдӟе но «вӧсяськыса улэ» (1 Пётр 4:7). Адӟем каре оскымон христианъёслэсь, кудъёсыз трос аръёс ӵоже шумпотыса Иеговалы ужазы-тыршизы. Одӥг сыӵе христиан мурт сярысь лыдӟыны луоз «Решение, о котором он ни разу не пожалел» статьяысь, кудӥз печатламын вал «Видите ли вы руку Бога в своей жизни?» брошюралэн 14—17-тӥ бамъёсаз.

¹⁷ Азьланяз но Иеговалы мылысь-кыдысь ужалэ-тырше. Мукетъёсызлы юрттэ но дырдэс вын-агайёсын но сузэр-апайёсын ортчытъялэ. Со тӥледлы бадӟым шумпотон ваёз, но тӥ дырлэсь ортчемзэ уд но шӧдэ (Еф. 5:16). Сю ар талэсь азьло вын-агайёсмы туж трос тыршизы но со дыр куспын бадӟым азинсконъёс лэсьтӥзы. Туннэ милям эшшо тросгес ужмы, но, Иеговалэн юрттэменыз, ми сое быдэстыны быгатӥськомы. Ми ум но малпаське вал, милям югытмы сокем пиштоз шуыса!

18, 19. Кызьы тӧроос юрттыны быгато мылысь-кыдысь Иеговалы ужаны-тыршыны? Вералэ пример.

¹⁸ Ми тырбыдэстэмесь ке но, Иеговаез шумпоттыны быгатӥськомы. Сое тодон милесьтым осконмес юнматэ. Милемлы юрттон вылысь, Иегова кузьымъёс сётӥз — тӧроосты. (Лыдӟе Ефесъёслы 4:11, 12.) Тӥ доры тӧроос лыктӥзы ке, соослэсь визь-кенешъёссэс санэ понэ, тӥ со сярысь уд жалялэ.

¹⁹ Тани Англиысь одӥг учыр. Кузпалъёслэн семьяязы шуг-секытъёссы вал, но соос ас доразы тӧроосты ӧтизы. Кышноез ӝожтӥськиз, картэз Иеговалы йыбырттонэ мылысь-кыдысь уг пыриськы но семьяен йыбырттонзэс куддыръя гинэ ортчытъя шуыса. Картэз соин соглаш вал. Тӧроос кузпалъёслы тодазы вайытӥзы Иисус Христослэсь примерзэ. Со дышетскисьёсыз сярысь сюлмаське но соослэсь кулэяськонъёссэ лыдэ басьтэ вал. Тӧроос вын-агайлэсь мылкыдзэ ӝутӥзы Иисуслэсь адӟем карыны, нош кышноезлэсь — чиданзэ возьматыны. Озьы ик соос кузпалъёслы куд-ог пайдаё визь-кенешъёс сётӥзы, кызьы кык нылпиосын семьяен йыбырттон ортчытъяны (Еф. 5:21—29). Берлогес тӧроос со вын-агаез тыршемез понна ушъязы. Соос солэсь мылкыдзэ ӝутӥзы азьланяз но озьы ик тыршыны но оскыны, святой дух солы юрттоз шуыса семьяезлы умой йыр луыны. Тӧроослэн лякыт сямзы но яратэмзы туж юрттӥзы со семьялы.

20. Кыӵе емыш ваёз югытмылэн адямиос азьын пиштэмез?

²⁰ Псаломъёсты гожъясь гожтӥз: «Шудо Кузё-Инмарлэсь кышканэн улӥсь, шудо Солэн сюресъёстӥз ветлӥсь!» (Пс. 127:1). Тӥляд югытты адямиос азьын пиштэ ке, тӥ шудо луоды. Соин ик вералэ мукетъёсызлы Иегова сярысь, каре ваньзэ, мае тӥ быгатӥськоды, семьяяды но кенешын кусыпъёсты юнэсь мед луозы шуыса, но азьланяз но сак улэ. Тӥлесьтыд ӟеч ужъёстэс адӟыса, мукет адямиослэн но инмысь Атаймес данъямзы потоз (Матф. 5:16).