1. Кызьы ми яратӥсь Атаймылэсь, Иеговалэсь, адӟем карыны быгатӥськомы?

 ИЕГОВА милемыз туж яратэ (Иоанн 3:16). Милям потэ яратӥсь Атаймылэсь адӟем кареммы, соин ик ми яратонмес но гажан-жалянмес возьматыны тыршиськомы ваньмызлы, нош уката ик «асьме осконысь агай-вынъёсмылы» (Гал. 6:10; 1 Пётр 3:8). Куке вын-агайёсмы но сузэр-апайёсмы куректон-кайгуэн пумисько, милям соослы юрттэммы потэ.

2. Мае ми эскеромы та статьяын?

² Ваньзы, кинъёс Иеговалы ужаны-тыршыны мылкыд каро, шуг-секытъёсын пумиськозы (Марк 10:29, 30). Нош Шайтанлэсь дуннезэ быдтон азьын шуг-секытъёс эшшо но тросгес луозы, вылды. Кызьы ми ог-огмес юнматыны быгатӥськомы? Ойдолэ эскеромы, малы милемыз дышетыны быгато Лотлэн, Иовлэн но Ноеминьлэн учыръёссы, кудъёсыз сярысь Библиын гожтэмын. Озьы ик ми вераськомы со сярысь, маин пумиськыло вын-агайёсмы но сузэр-апайёсмы но кызьы ми соослы юрттыны быгатӥськомы.

3. 2 Пётрлэсь 2:7, 8 лыдэ басьтоно ке, малы Лотлэн ужпумез шонертэм вал но кытчы со вуттӥз?

³ Лот шонертэм ужпум кутӥз: со улыны интыяськиз Содом каре, кытын туж азыса-калгыса улӥзы. (Лыдӟе 2 Пётрлэсь 2:7, 8.) Содом узыр кар вал, нош Лот, отчы улыны мыныса, трос шуг-секытъёсын пумиськиз (Ул.-выл. 13:8—13; 14:12). Лотлэн кышноезлы со карысь ваньбур но адямиос сокем кельшо вал, вылды, со Иеговалэсь  но ӧз кылзӥськы. Со кулӥз, куке Иегова со интыез тылын но сераен быдтӥз. Озьы ик малпаське Лотлэн кык нылъёсыз сярысь. Пиосмуртъёс, кудъёсызлы соос бызьыны дасясько вал, Содомын быризы. Лот ыштӥз корказэ, ваньбурзэ, нош тужгес но кышкытэз, кышнозэ (Ул.-выл. 19:12—14, 17, 26). Кызьы Иегова ассэ возиз та учырын?

4. Кызьы Иегова Лотлы чиданзэ возьматӥз? (Учке вылбамысь суредэз.)

⁴ Содомын улыны Лот ачиз мылкыд кариз ке но, Иегова сое жаляз но со доры но семьяез доры кылчинъёсты ыстӥз. Нош, кылчинъёсты соку ик кылзӥськем интые но Содомысь соку ик кошкем интые, Лот ӧз дырты. Кылчинъёслы Лотэз но солэсь семьязэ китӥзы кутыса карысь поттоно луиз (Ул.-выл. 19:15, 16). Собере кылчинъёс косӥзы сое гурезе тубыны. Нош Лот куриськиз матысь каре бызьыса кошкыны (Ул.-выл. 19:17—20). Иегова Лотэз чидаса кылзӥз но лэзиз солы ас малпамезъя лэсьтыны. Берлогес Лотлы та карын улыны кышкыт луиз, но со мынӥз гурезе — отчы, кытчы сое Иегова кутсконаз ик ыстэ вал (Ул.-выл. 19:30). Макем паймымон чиданзэ возьматӥз Иегова! Кызьы ми солэсь адӟем карыны быгатӥськомы?

5, 6. Кызьы 1 Фессалоникаослы 5:14 кылъёсты уже кутоно но Иеговалэсь адӟем кароно?

⁵ Лот сямен, христианъёс пӧлысь кин ке но быгатэ шонертэм ужпум кутыны но соин сэрен бадӟым шуг-секытъёсын пумиськыны. Кызьы ми асьмеды возёмы сыӵе учырын? Милям вераммы потоз, вылды: «Тон араськод сое, мае кизид» (Гал. 6:7). Та малпан шонер луыны быгатэ, озьы ке но умойгес луысал мукет сямен лэсьтыны. Ми быгатӥськомы Иеговалэсь адӟем карыны. Кызьы?

⁶ Иегова кылчинъёсты Лотэз алон понна гинэ ӧз ысты, нош озьы ик, Содомез быдтыку, солы улэп кыльыны юрттон понна ыстӥз. Озьы ик туннэ но ми адӟиськомы ке, агай шонертэм ужпум кутэ шуыса, кудӥз сэрен со шуг-секытъёсын пумиськыны быгатоз, сое алыны кулэ. Нош со сяна, милемлы солы юрттыны дась луоно. Библия вылэ пыкиськыса сётэм алонлэсь со агай кылзӥськыны уг дырты ке но, милемлы чиданмес возьматоно. Тодады вае, кызьы кык кылчинъёс асьсэды возизы, но озьы ик лэсьтэ. Милемлы азьланяз но агаймылы юрттыны тыршоно но сое палэнтоно ӧвӧл. Ми солы кыл вылын гинэ юрттыны кулэ ӧвӧл, нош озьы ик уж вылын но (1 Иоанн 3:18). Вераны луоз, агаез «китӥз кутоно» но солы алонлэсь кылзӥськыны юрттоно шуыса. (Лыдӟе 1 Фессалоникаослы 5:14.)

7. Мар юрттоз милемлы вын-агайёсын но сузэр-апайёсын асьмеды возьыны озьы ик, кызьы Иегова ассэ возиз Лотэн?

⁷ Иегова быгатэ вал Лотлэн тырмымтэосызлы саклыксэ висъяны, но со озьы ӧз лэсьты. Берлогес со апостол Пётрлэсь мылкыдзэ ӝутӥз Лотэз шонер улӥсь адямиен ниманы. Ми туж шумпотӥськомы, Иегова янгышъёсмес простить каре шуыса! (Пс. 129:3). Мар юрттоз милемлы вын-агайёсын но сузэр-апайёсын асьмеды возьыны озьы ик, кызьы Иегова ассэ возиз Лотэн? Ми соослэн умой сямъёссылы саклыкмес висъяськомы ке, милемлы чиданмес возьматыны капчигес луоз. Нош соослы юрттэммылы вазиськыны капчигес луоз.

8. Мар милемлы кароно, гажан-жалянмес возьматон понна?

⁸ Лотэн ӵошатоно ке, Иов шонертэм ужпумъёс  ӧз кутылы. Озьы ке но солэн улоназ трос куректон-кайгуосыз вал: со ваньбуртэк кылиз, адямиос сое гажамысь дугдӥзы но со секыт висьыны кутскиз. Со сяна, солэн вань нылпиосыз кулӥзы. Озьы ик сое пыкылӥзы соос, кинэ со эшъёсыныз лыдъяз. Малы соос Иовлы гажан-жалянзэс ӧз возьматэ? Одӥгез муг: соос ӧз тырше валаны, мар зэмзэ но луиз Иовен. Соин сэрен соос малпаськытэк шонертэм йылпумъянъёс лэсьтӥзы но Иовез курланы кутскизы. Мар милемлы кароно, сыӵе янгышлэсь палэнскон понна? Тодады возе, Иегова гинэ адямилэн югдурез сярысь ваньзэ тодэ шуыса. Сак кылзэ сое, кин куректонэн пумиськиз. Валаны тырше, макем солы вӧсь луэ. Соку гинэ тӥ солы зэмос гажан-жаляндэс возьматыны быгатоды.

9. Малэсь ми палэнскомы, гажан-жалянмес возьматыны тыршиськомы ке, но малы?

⁹ Ми гажан-жалянмес возьматыны тыршиськомы ке, соку ми кыл ум нуллэ шуг-секытъёс сярысь, кудъёсыныз вын-агайёс но сузэр-апайёс пумиськизы. Кыл нуллон кенешез уг юнматы, нош со сое лябӟытэ (Мад. 20:19; Рим. 14:19). Кыл нуллӥсь малпаськытэк вера, но со ас кылъёсыныз эшшо но вӧсь карыны быгатэ сое, кинлы сотэк но секыт (Мад. 12:18; Еф. 4:31, 32). Ойдолэ тыршомы адямилэн умой сямъёсызлы саклыкмес висъяны но малпаськомы со сярысь, кызьы юрттоно солы шуг-секытэныз нюръяськыны.

10. Малы дышето милемыз Иов книгаысь 6:2, 3 кылъёс?

¹⁰ Лыдӟе Иов книгаез 6:2, 3. Куддыръя Иовлэн кылъёсыз «сюлме веськасьтэмесь», яке сюлэмез вӧсь карисесь, вал. Берлогес со вераз, солэн кылъёсыз шонертэмесь вал шуыса (Иов 42:6). Иов сямен, агай яке сузэр сюлэмшугъяськонэз дыръя вераны быгатэ сое, мар сярысь берлогес жаля. Кызьы  милемлы асьмеды возёно? Соосты курлано ӧвӧл, со интые умойгес луоз соослы гажан-жалянмес возьматыны. Тодады возе, адямиосты кылдытыкуз, Иеговалэн уг поты вал, соос шуг-секытъёсын но сюлэмшугъяськонъёсын мед пумиськозы шуыса. Соин ик паймонэз ӧвӧл, куке Инмарлэн ужась-тыршисьёсыз шуг-секытъёс дыръя малпаськытэк мае ке вераны быгато. Соос Иеговалы пумит яке милемлы пумит мар ке но верало ке, йыркуръяськоно но соосты судъяно ӧвӧл (Мад. 19:11).

11. Кызьы тӧроос Елиуйлэсь адӟем карыны быгато, куке соос вын-агайёслы но сузэр-апайёслы визь-кенеш сётоно луо?

¹¹ Куддыръя куректон-кайгуэн пумиськем адямилы кыӵе ке визь-кенеш яке духовной юрттэт кулэ (Гал. 6:1). Мар кароно тӧроослы таӵе учырын? Соослы туж кулэ адӟем карыны Елиуйлэсь, кудӥз Иовез кылзӥз но солы гажан-жалянзэ возьматӥз (Иов 33:6, 7). Елиуй Иовлы визь-кенеш сётӥз соку гинэ, куке валаз, мар верамез потэ вал Иовлэн. Тӧроос, кудъёсыз Елиуйлэсь адӟем каро, вын-агайёсты но сузэр-апайёсты сак кылзозы но соослэсь югдурзэс валаны тыршозы. Соку тӧроос, визь-кенеш сётыкузы, соослэсь сюлэмзэс вырӟытыны быгатозы.

12. Кызьы Ноеминь вылын шӧдӥськиз картэзлэн но кык пиосызлэн кулэмзы?

¹² Ноеминь Иеговалы оскымон ужаз-тыршиз но сое туж яратӥз. Нош кузпалыз но кык пиосыз кулэм бере со ассэ ниманы куриз Мара шуыса, кудӥз возьматэ «курыт» шуэмез (Руфь 1:3, 5, 20 сноска, 21). Солэн Руфь кенэз котькыӵе куректон-кайгуосыз дыръя соин ӵош вал. Руфь Ноеминь анаезлы юрттыса гинэ ӧз улы, нош озьы ик со сое буйгатылӥз но. Огшоры но сюлмысь кылъёсын со Ноеминез оскытылӥз, сое яратэ но ноку уз кельты шуыса (Руфь 1:16, 17).

13. Малы юрттоно соослы, кинъёс кузпалзэс ыштӥзы?

¹³ Куке христианъёс пӧлысь кинлэн ке кузпалыз кулэ, солы милям юрттэтмы кулэ луэ. Кузпалъёсты ӵошатыны луэ кык артэ будӥсь писпуосын. Аръёс ортчыса, соослэн выжыоссы ог-огенызы бинисько. Одӥг писпуэз гудӟыса поттӥзы ке, кыкетӥез туж вӧсь луоз. Озьы ик, куке адямилэн кузпалыз кулэ, солы кема дыр ӵоже туж вӧсь луыны быгатэ. Пола b, кудӥзлэн картэз шӧдтэк шорысь кулӥз, вера: «Син куспын мынам улонэ чутрак воштӥськиз. Мынам номыр карыны кужыме ӧй вал. Мон ыштӥ тужгес но умой эшме, кудӥзлы ваньзэ вераны быгатӥсько вал. Со котьку монэным ӵош шумпотэ но, куректэ но вал. Со кылзэ вал монэ, куке мон солы шуг-секытъёсы сярысь вералляй. Мынэсьтым ӝыны люкетме басьтӥзы кадь».

14, 15. Кызьы буйгатыны луэ соосты, кинъёслэн кузпалзы кулӥз?

¹⁴ Кызьы буйгатыны луэ сое, кинлэн кузпалыз кулӥз? Нырысь ик, соин вераськыны кулэ соку но, куке тӥледлы со умой уг поты но тӥ уд тодӥське, мар вераны. Пола, кудӥз сярысь вылӥынгес гожтэмын вал, вера: «Мон валасько: адямиос уг тодо, кызьы асьсэды возьыны соосын, кинъёслэн матысь адямизы кулӥз. Соос кышкало мае ке шонертэмзэ вераны. Нош эшшо но уродгес, куке адямиос воксё номыр уг верало». Куке адями кайгыре, со уг возьма, ми солы кыӵе ке мур малпан вераломы шуыса. Пола азьланьтэ: «Мыным тырмыт вал, куке эшъёсы веразы: „Мыным туж жаль“».

¹⁵ Уильям, кудӥзлэн кӧня ке ар талэсь  азьло кышноез кулӥз, вера: «Мон шумпотӥсько, куке эшъёсы кышное сярысь мар ке но верало. Со монэ оскытэ, сое яратӥзы но гажазы шуыса. Вераны ик уг луы, макем со мыным юрттэ, малы ке шуоно кышное мыным туж дуно потэ вал но улонам туж бадӟым инты басьтэ вал». Бьянка, кудӥзлэн картэз кулӥз, валэктэ: «Мыным капчигес луэ, куке мукетъёсыз монэн ӵош вӧсясько, Библиысь куд-ог кылбуръёсты лыдӟо, картэ сярысь тодазы ваё но со сярысь верамме кылзо».

16. а) Кызьы ми юрттыны быгатӥськомы соослы, кинъёслэн кузпалзы кулӥз? б) Кыӵе ужез оскиз милемлы Иегова, Иаковлэсь 1:27 лыдэ басьтоно ке?

¹⁶ Кызьы Руфь котьку ӵош вал Ноеминь анаеныз, озьы ик милемлы но котьку юрттоно соослы, кинъёс матысь адямизэс ыштӥзы. Пола вера: «Картэ кулэм бере тросэз мыным юрттӥзы но монэ буйгатӥзы. Нош дыр ортчыса, соос ас ужъёсынызы вырыны кутскизы. Нош мынам улонэ быдэсак воштӥськиз. Умой, куке мукетъёсыз валало, матысь адямизэ ыштэм муртлы одӥг толэзь ӵоже гинэ юрттэт кулэ ӧвӧл шуыса, нош куддыръя солы одӥг арлэсь но кемагес юрттоно луэ. Зэм но, вань адямиос пӧртэмесь. Кин ке но огназ кылемезлы вакчигес дыр куспын дыше. Мукетъёсызлы вӧсь луэ котьку, куке соос лэсьто сое, мае соос ӵем дыръя кузпалэнызы лэсьто вал. Куректонэн пумиськыку, адямиослэн пӧртэм шӧдонъёссы луыны быгато. Ойдолэ тодамы возёмы: Иегова милемыз куриз сюлмаськыны соос сярысь, кинъёс матысь адямизэс ыштӥзы. Ми понна со дан но бадӟым  уж, кудзэ милемлы Иегова оскиз. (Лыдӟе Иаковлэсь 1:27.)

17. Малы милемлы юрттоно соослы, кинъёсты кузпалзы кельтӥз?

¹⁷ Озьы ик туж вӧсь луэ соослы но, кинъёсты кузпалзы кельтӥз. Джойс, кудӥзлэн картэз мукет кышномурт доры кошкиз, вера: «Мынам картэ кулысал ке, мыным сокем вӧсь ӧй луысал. Соослэн, кинъёс шимучыре сюрыса яке висьыса куло, быръёнзы ӧвӧл. Нош мынам картэ бырйыны быгатэ вал, но со ужпум кутӥз монэ кельтыны. Мон асме номырлы ярасьтэмен шӧдӥ!»

18. Кызьы юрттыны луэ соослы, кинъёс кузпалтэк кылизы?

¹⁸ Куке ми мае ке умойзэ лэсьтӥськомы соос понна, кинъёслэн кузпалзы ӧвӧл ини, озьы ми возьматӥськомы, соосты зэмзэ но яратӥськомы шуыса. Таӵе дыре соослы тужгес но кулэ умой эшъёс (Мад. 17:17). Кызьы тӥ соослы умой эш луыны быгатӥськоды? Соосты ӧтьыны луэ ӵош сиськыны, кытын ке ӵош шутэтскыны, тодытон уже яке семьяен йыбырттонэ пыриськыны. Озьы тӥ Иеговаез шумпоттоды, малы ке шуоно со «сюлмынызы чигиськыса улӥсьёслы... матын улэ» но палкышноослы дурбасьтэ (Пс. 33:19; 67:6).

19. Мар карыны мылкыдмес ӝуто 1 Пётрлэн 3:8 кылъёс?

¹⁹ Куке музъемен Инмарлэн Эксэйлыкез кивалтыны кутскоз, «азьвылъёсыз куректон-кайгуос вунэтэмын луозы». Ми ӵыдытэк витиськомы со дырез, куке «азьвылъёссэ-вужъёссэ буре уз ни вае», тодазы уз ни вае (Ис. 65:16, 17). Нош али ойдолэ, ог-огмес юнматыса, уломе. Кылъёсысьтымы но ужъёсысьтымы мед адӟиськоз, ми вын-агайёсмес но сузэр-апайёсмес сюлмысьтымы яратӥськомы шуыса! (Лыдӟе 1 Пётрлэсь 3:8.)