ВАНЬМЫ ми оскиськомы: та «берпум аръёсы» Иегова калыкеныз кивалтэ но сётэ ваньзэ, мар кулэ, соин матысь кусыпъёс возён понна (2 Тим. 3:1). Нош милемлы котькудмылы Иеговалэсь кылзӥськыны кулэ. Милесьтым югдурмес ӵошатыны луэ израиль калыклэн югдуреныз, кудӥз, луоё кыр дуннеетӥ ветлыкуз, гумылэн куараезлы вазиськыны кулэ вал.

Иегова Моисеез азвесьлэсь кык дурем гумы лэсьтыны косӥз но вераз: «Калыкез ӧтчаны, станъёсты интыысьтыз воштыны мед юрттозы» (Лыд. 10:2). Гумыосы пӧртэм сямен пелляса, священникъёс калыклы ивортылӥзы, мар солы карыны кулэ (Лыд. 10:3—8). Туннэ Инмарлэн калыкезлы кивалтэт пӧртэм амалъёсын сётӥське. Кылсярысь, ми понна бадӟым пумиськонъёс радъясько, тӧроос нимысьтыз дышетскон ортчо, озьы ик быдэс дунне вылысь кенешъёс басьто кивалтэт, кудӥз куддыръя выльдӥське яке воштӥське. Ӵошатомы тае вашкала Израильысь югдурен.

Куке Иеговалэн потэ вал, «вань калык» скиниялэн шундыӝужан паласен пырон дораз огазе мед люкаськоз шуыса, священникъёс кык гумые пеллязы (Лыд. 10:3). Та куараез вань выжыос кылыны быгатӥзы. Выжыос ньыльлы люкемын вал, соос скиния котырын интыяськизы. Со выжыос, кудъёсыз скинияе пыронлы матын интыяськемын вал, люкаськон интые кӧня ке минут куспын лыктыны быгатӥзы. Нош соосызлы, кудъёсыз пыронлэсь кыдёкын интыяськизы, лыктон понна тросгес дыр но кужым кулэ луиз. Озьы ке но Иеговалэн потэ вал, вань калык мед люкаськоз но солэсь кивалтэтсэ мед кылзоз шуыса.

Туннэ ми скиния доры ум люкаськиське ке но, ми ӧтемын Инмарлэн калыкеныз ӵош люкаськылыны. Кылсярысь, ми ветлӥськомы улосысь конгрессъёсы но мукет нимысьтыз пумиськонъёсы, кытын ми кулэ луись тодон-валан но кивалтэт басьтӥськомы. Быдэс дунне вылысь шаеръёсын Иеговалэн калыкез одӥг кивалтэт басьтэ. Котькин, кин сыӵе пумиськонъёсы лыктэ, туж шумпотэ Иеговалэн трос шудо ужась-тыршисьёсыз пӧлын луыны. Куд-огъёсыз та пумиськонъёсы кыдёкысь лыкто, мукетъёсыз матынгес уло. Озьы ке но соос, кинъёс сыӵе ӧтёнлы вазисько, валало, со пайда вае шуыса.

Нош мар вераны луоз пичи группаос сярысь, кудъёсыз бадӟым кенешъёслэсь палэнын интыяськемын? Туала технологиослы луыса соос пӧлысь тросэз быгато пумиськонъёсты учкыны но шӧдыны, соос но бадӟым кенешлэн люкетэз луо шуыса. Кылсярысь, куке Бенин шаерысь филиалэ валтӥсь кивалтонниысь агай лыктӥз, программаез видеотрансляция пыр учкыны быгатӥзы Нигер шаерысь Арли карын, кудӥз Сахара луоё кыр дуннеын интыяськемын. Программаез учкыны быгатӥз 21 адями  — вын-агайёс, сузэр-апайёс но зэмлыкен тунсыкъяськисьёс. Та группа туж кыдёкын вал ке но, соос асьсэды та бадӟым пумиськонын луо шуыса шӧдӥзы, кытчы 44 131 адями лыктӥз. Тани мар гожтӥз одӥг агай: «Вань сюлмысьтымы та видеотрансляция понна туж бадӟым тау шуиськомы. Со эшшо одӥг пол возьматӥз, макем юн тӥ милемыз яратӥськоды».

Куке священник одӥг гумые гинэ пельтэ вал, скиния доры «Израильлэн кивалтӥсьёсыз, сюрс муртэн кивалтӥсьёсыз» гинэ люкаськылӥзы (Лыд. 10:4). Соку Моисей соосты дышетӥз но выль кивалтэт сётылӥз. Та юрттӥз кивалтӥсьёслы ужъёссэс быдэсъяны. Тӥ со кивалтӥсьёс пӧлысь одӥгез луысалды ке, ӧд лэсьтысалды-а ваньзэ, мае быгатӥськоды, со пумиськонэ лыктон понна но Моисеез сак кылзон понна?

Христиан кенешысь тӧроосты «кивалтӥсьёс» шуыса ниманы уг луы, малы ке шуоно соос Инмарлэн уллёеныз кузёяськыса уг уло (1 Пётр 5:1—3). Озьы ке но соос лэсьто ваньзэ, мае быгато, Иеговалэн ыжъёсыз сярысь сюлмаськон понна. Соин ик соос шумпотыса соглаш карисько нимысьтыз дышетсконэз ортчыны, кылсярысь, Эксэйлыклы ужан-тыршон школаын. Та школаын тӧроос дышетско кенешын сётэм ужъёссэс эшшо но умойгес быдэсъяны. Сыӵе дышетсконлы луыса тӧроослэн но, кенешысь ивортӥсьёслэн но Иеговаен кусыпъёссы юнмало. Озьыен, сыӵе школаос тӥледлы но пайда вайыны быгато, тӥ асьтэос отын ӧд дышетске ке но.

Куддыръя Израильысь священникъёс гумыен куара сётылӥзы, вис карыса. Та куара возьматӥз, Иегова быдэс калыкез сюрес вылэ вырӟыны косэ шуыса (Лыд. 10:5, 6). Станлэн сюрес вылэ потонэз туж умой радъямын вал. Со возьматэ, калыкысь котькудӥз туж тыршиз шуыса. Нош куддыръя куд-огъёсызлы мукет интые вырӟыны капчи ик ӧй вал, дыр. Малы?

Куд-огъёсыз малпазы, вылды, ӝутскыны ӧтись куара туж ӵем но шӧдтэк шорысь чузъяськылӥз шуыса. Библиын валэктӥське: израиль калык сюрес вылэ вырӟылӥз, куке пилем скиния йылэ ӝутскылӥз. Макем ӵем со озьы луэ вал? Куддыръя «пилем ӝытазеысен ӵукнаозь» сылӥз, нош куддыръя — «кык нунал яке быдэс толэзь, яке кӧня ке нунал ӵоже» (Лыд. 9:21, 22). Нош кӧня пол израиль калык интызэ вошъяз? Лыдпусъёс книгаын 33-тӥ люкетын израиль станлэн ог 40 дугдылон интыосыз сярысь вераське.

Куддыръя израиль калыкысь куд-огъёсыз шатёрзэс саюлэ пуктыны быгатӥзы — «туж шимес луоё кыр дуннеын» со бадӟым шумпотон вал (К. Зак. 1:19). Соин ик, куке сюрес вылэ вырӟоно вал, соослэн малпанзы кылдыны быгатӥз, выль интыын уродгес луоз шуыса.

Куке выжыос сюрес вылэ потылӥзы, кинлы ке но ас черодзэ возьманы секыт вал, дыр. Вис карыса сётэм куараез кылӥзы ваньзы, нош соос огдыре вырӟыны уг быгато вал. Нырысетӥзэ, вис карыса, куара сёто вал шундыӝужан палан интыяськемъёслы: Иуда, Иссахар но Завулон выжыослы (Лыд. 2:3—7; 10:5, 6). Соослэн кошкемзы бере, священникъёс кыкетӥ ползэ, вис карыса, куара сётылӥзы, сюрес вылэ лымшор палан интыяськем куинь выжыос мед потозы шуыса. Озьы лэсьтӥзы, вань 12 выжыослэн сюрес вылэ потытозязы.

Организациын лэсьтэм куд-ог воштӥськонъёсын соглаш кариськыны секыт луыны быгатэ. Малы? Оло нош, тӥ малпамъя, воштӥськонъёс туж трос луо. Яке тӥ малпаськоды, али но ваньмыз умой, номыре воштоно ӧвӧл шуыса. Кызьы гинэ медам луы, вылезлы дышыны котьку ик капчи ӧвӧл, солы дыр кулэ. Нош ми выль югдуръёслы дышыны тыршимы ке, соку адӟомы, вылды, воштӥськонъёс милемлы пайда ваё но ми Иеговалы ярамонэсь луиськомы шуыса.

Моисей улон нуналъёсы Иегова луоё кыр дуннеетӥ кӧня ке миллион пиосмуртъёсты, кышномуртъёсты но нылпиосты нуиз. Инмар та калык сярысь ӧй ке сюлмаськысал но солы кивалтэт ӧй ке сётысал, со утиськыны ӧй быгатысал. Та берпум аръёсы Иегова милемлы но кивалтэт сётэ. Инмар юрттэ милемлы соин матысь кусыпъёс возьыны но юн осконэн улыны. Ойдолэ котьку Иеговалэсь кылзӥськомы но адӟем каромы оскымон израиль калыклэсь, кудӥз гумылэн куараезлы дась луыса вазиськылӥз!