ЭСКЕРОН ПОННА СТАТЬЯ 25
«Мон Ачим ыжъёсме утчаса шедьто»
«Мон Ачим ыжъёсме утчаса шедьто, соосты эскеро-учко» (ИЕЗ. 34:11).
105-ТӤ КЫРӞАН «Бог есть любовь»
ТА СТАТЬЯЫН a
1. Малы Иегова ассэ ӵошатӥз сюлмаськись анаен?
«ВУНЭТОЗ-А кышномурт вож нунызэ?» — та кылъёсты Иегова вераз Исаия пророк улон нуналъёсы. «Со вунэтоно ке но луысал, нош Мон тонэ уг вунэты»,— шуиз Иегова аслаз калыкезлы (Ис. 49:15). Инмар ассэ туж шер ӵошатэ анаен. Нош та учырын со ӵапак таӵе ӵошатон кутэ. Иегова вера анайлэн нылпиеныз кусыпъёсыз сярысь, малы ке шуоно солэн возьматэмез потэ, макем юн со яратэ аслэсьтыз ужась-тыршисьёссэ. Тросэз анайёс соглаш луозы Жасмин b нимо сузэрен, кудӥз вераз: «Нылпиды сярысь сюлмаськыкуды, тӥляд соин вань улытозядылы туж матысь кусыпъёсты кылдо».
2. Мар шӧдэ Иегова, куке нылпиосыз пӧлысь одӥгез солэсь палэнске?
2 Иегова сюлмаське, куке нылпиосыз пӧлысь одӥгез ке но тодытэмысь но кенешлэн пумиськонъёсаз ветлэмысь дугдэ. Пуктэ син азяды, макем солы вӧсь луэ, куке котькуд ар трос ужась-тыршисьёсыз тодытон уже пыриськемысь дугдо c.
3. Кыӵе мылкыдыз вань Иеговалэн?
3 Тросэз вын-агайёс но сузэр-апайёс, кудъёсыз тодытон уже пыриськемысь дугдӥзы вал, выльысь кенеше берытско но, ми солы туж шумпотӥськомы! Иеговалэн потэ, ваньзы, кинъёс солэсь палэнскизы, кенеше мед берытскозы шуыса, милям но сыӵе ик мылкыдмы вань (1 Пётр 2:25). Нош кызьы ми соослы юрттыны быгатӥськомы? Та юанлы валэктон сётэмлэсь азьло, ойдолэ тодомы, малы куд-ог вын-агайёс но сузэр-апайёс кенешлэн пумиськонъёсаз ветлэмысь но тодытэмысь дугдо.
МАЛЫ КУД-ОГ ХРИСТИАНЪЁС ИЕГОВАЛЫ УЖАМЫСЬ-ТЫРШЕМЫСЬ ДУГДО?
4. Мар луыны быгатэ куд-ог христианъёсын ужзы сэрен?
4 Куд-ог христианъёс ужзы пӧлы йырынызы выё. Хань нимо агай, кудӥз Азиын улэ, вера: «Мон шонертэм малпаны кутски, коньдонэ трос луиз ке, Иеговалы ужаны-тыршыны капчигес луоз шуыса. Соин ик мон тросгес но тросгес ужаны тырши. Мон ӵемгес но ӵемгес пумиськонъёсты кельтылыны кутски, нош собере кенеше ветлэмысь воксё дугдӥ. Шӧдске, та дуннеын ваньмыз озьы кылдытэмын, адямиосты Инмарлэсь каллен-каллен палэнтон понна».
5. Кызьы шуг-секытъёс одӥг сузэр вылын шӧдӥськизы?
5 Мукет вын-агайёслэн но сузэр-апайёслэн мылкыдзы куашкамын, малы ке шуоно соос трос шуг-секытъёсын пумиськоно луизы. Великобританиысь Энн нимо сузэрмылэн вить нылпиосыз. Со вера: «Одӥгез мынам пие вордӥськем дырысеныз ик секыт висёнъёсын курадӟе. Мукет пиелэн психической висёнэз кылдӥз, нош одӥгзэ нылме кенешысь поттӥзы. Мынам мылкыды сокем куашкамын вал, мон кенеше ветлэмысь но, ӟеч иворез верамысь но дугдӥ. Дыр ортчыса, мон тодытон уже ӧй пыриськы ни». Милемлы туж жаль, Энн но солэн семьяез, озьы ик мукет вын-агайёс но сузэр-апайёс та выллем шуг-секытъёсын пумисько шуыса.
6. Малы кин ке но Иеговалэн калыкезлэсь палэнскыны быгатэ, куке Колоссыослы 3:13 гожтэм визь-кенешлэсь уг кылзӥськы?
6 Лыдӟе Колоссыослы 3:13. Вань на сыӵе ужась-тыршисьёс, кудъёссэ вӧсь каризы кенешысь вын-агайёс но сузэр-апайёс. Апостол Павел вераз, куддыръя милям мукет христиан мурт вылэ ӝожтӥськыны мугмы луыны быгатэ шуыса. Ми шонерлыктэм ужен но пумиськыны быгатӥськомы. Асьмеды ӧм чаклалэ ке, вожмы но потыны быгатоз. Сыӵе учырын ми Иеговалэн калыкезлэсь палэнскыны но быгатомы. Тани мар луиз Пабло нимо агаен, кудӥз Лымшор Америкаын улэ. Сое шонертэм янгыше уськытӥзы, маин сэрен кенешысь дано ужъёссэ со быдэсъяны ӧз быгаты ни. Кызьы со ассэ возиз? Пабло тодаз вае: «Мынам туж воже потӥз, собере мон кенешлэсь каллен палэнскыны кутски».
7. Мар луыны быгатэ адямиен, куке сое возьытлыкез йыръе?
7 Сое, кин азьвыл Инмарлэсь курон-косонзэ тӥяз, кема дыр ӵоже возьытлыкез йырйыны быгатэ. Оло нош со малпаны но кутскоз, Инмар сое уг ни яраты шуыса. Сыӵе христиан мурт ӧпкелиз ке но, солэн шӧдонъёсыз кылдыны быгатозы, Инмарлэн калыкез пӧлын луыны со ярамон ӧвӧл ни шуыса. Тазьы ик малпаз Франсиско нимо агай но. Со вера: «Монэ тупатон понна, тӧроос мыным визь-кенеш сётӥзы, малы ке шуоно мон азон-калгон сьӧлыке пыри. Нырысь мон кенешлэн пумиськонъёсаз азьло сямен ик ветлӥ ке но, мынам мылкыды куашказ но мон шӧдӥ, Инмарлэн ужась-тыршисьёсыз пӧлын луыны ярамон ӧвӧл ни шуыса. Возьытлыке монэ йырйыса улӥз. Мон малпай, Иегова монэ простить ӧз кары шуыса. Дыр ортчыса, мон тодытэмысь но кенешлэн пумиськонъёсаз ветлэмысь дугдӥ». Кызьы тӥ учкиськоды вын-агайёс но сузэр-апайёс шоры, кудъёсыз та выллем югдуръёсы сюризы? Соос тӥледлы жаль пото-а? Нош эшшо но кулэезгес, кызьы соос шоры учке Иегова?
ИЕГОВА АСЛЭСЬТЫЗ ЫЖЪЁССЭ ЯРАТЭ
Израильысь пудо возьмасьёс туж сюлмаськизы йыромем ыжзы сярысь (Учке 8-тӥ но 9-тӥ абзацъёсты.) e
8. Вунэтэ-а Иегова соосты, кинъёс азьло солы ужазы-тыршизы? Валэктэ.
8 Иегова уг вунэты соосты, кинъёс солы ужамысь-тыршемысь но солэн калыкеныз кусып воземысь огдырлы дугдӥзы. Со уг вунэты соослэсь ужам-тыршемзэс но (Евр. 6:10). Исаия пророк чебер вераз со сярысь, кызьы Иегова аслэсьтыз ужась-тыршисьёссэ яратэ но соос сярысь сюлмаське: «Пудо возьмась кадь Со Аслэсьтыз уллёзэ возьмалоз; ыжпиоссэ кияз кутоз но гадь бордаз ӟыгыртыса нуллоз» (Ис. 40:11). Мар шӧдэ Быдӟым Возьмась, куке ыжъёсыз пӧлысь одӥгез уллёлэсь палэнэ кыле? Тани кызьы тае Иисус аслаз дышетскисьёсызлы валэктӥз: «Кызьы кадь потэ тӥледлы? Кинлэн ке но, шуом, вань сю ыжез, но соос пӧлысь одӥгез йыромем, соку со, укмыстон укмыссэ гурезе кельтыса, уз мыны-а йыромемзэ утчаны? Шедьтыны быгатӥз на ке, зэм ик тӥледлы верасько, йыромымтэ укмыстон укмыс ыжъёсыз сярысь, таизлы со золгес шумпотоз» (Матф. 18:12, 13).
9. Кызьы вашкала дыръёсы умой возьмасьёс ыжъёссы сярысь сюлмаськизы? (Учке вылбамысь суредэз.)
9 Малы ми Иеговаез пудо возьмасен ӵошатыны быгатӥськомы? Малы ке шуоно вашкала дыръёсы умой возьмась ыжъёсыз сярысь туж тыршыса сюлмаськиз. Кылсярысь, уллёзэ утён понна, Давид левен но гондырен нюръяськиз (1 Экс. 17:34, 35). Сю ыжъёс пӧлысь одӥгез ке но йыромысал ке, умой возьмась сое одно ик адӟысал (Иоанн 10:3, 14). Со 99 ыжъёссэ котыртэм интые кельтысал яке мукет возьмасез соосты чакланы курысал, нош ачиз одӥг йыромемзэ утчаны мынысал. Иисус та ӵошатонэз кутӥз, милемыз кулэ луись зэмлыклы дышетон понна: «Озьыен, тӥляд Инмысь Атайдылэн та покчиос пӧлысь огзэс но быдтэмез уг поты» (Матф. 18:14).
Пудо возьмась ышем ыжлэсь яразэ бине. (Учке 9-тӥ абзацез.)
ИЕГОВА АСЛЭСЬТЫЗ ЫЖЪЁССЭ УТЧА
10. Иезекиильлэсь 34:11—16 лыдэ басьтоно ке, мар карыны Иегова кылзэ сётӥз йыромем ыжъёсыз понна?
10 Иегова ми пӧлысь котькудмес яратэ, уллёлэсь палэнэ кылемъёссэ но. Иезекииль пророк пыр Иегова кылзэ сётӥз, йыромем ыжъёссэ утчалоз шуыса но асэныз матысь кусыпъёс тупатыны юрттоз шуыса. Озьы ик со оскытӥз: соосты утён понна лэсьтоз сое ик, мар карысал Израильысь пудо возьмась, кудӥзлэн ыжез йыромиз. (Лыдӟе Иезекиильлэсь 34:11—16.) Нырысь пудо возьмась ыжзэ утча вал, со понна трос дыр но кужым кошкыны быгатӥз ке но. Сое шедьтыса, со сое уллёе вайылӥз. Собере, ыж лябӟемын но вӧсь луэмын вал ке, пудо возьмась со сярысь сюлмаськиз: солэсь яраоссэ биньылӥз, сое пельпум вылаз нуллӥз но сюдӥз. Тӧроослы, Инмарлэсь уллёзэ возьмасьёслы, кенешлэсь палэнскемъёслы юрттон понна, лэсьтоно сое ик (1 Пётр 5:2, 3). Тӧроос соосты утчало, яратыса юртто соослы кенеше берытскыны но Инмарлэн эшез луыны d.
11. Мае вала вал умой возьмась?
11 Умой пудо возьмась вала вал, ыж ышыны быгатэ шуыса. Сыӵе учыръёсы возьмась ыжен ассэ лек ӧз возьы. Ойдолэ эскеромы, кызьы Иегова юрттӥз аслаз ужась-тыршисьёсызлы, кудъёсыз огдырлы солэсь палэнскизы, озьы ик тодомы, малы со милемыз дышетэ.
12. Мар кариз Иегова, куке Иона солэсь ӧз кылзӥськы?
12 Иона пророк Иеговалэсь ӧз кылзӥськы но солы сётэм ужез ӧз быдэсты. Нош Иегова солэсь ӧз палэнскы. Умой пудо возьмась сямен, Иегова Ионаез утиз но юнматӥз, солы сётэм ужез быдэстыны мед быгатоз шуыса (Иона 2:8; 3:1, 2). Будосэн пример вылын Иегова Ионалы валаны юрттӥз, макем дуно солы потэ котькуд адямилэн улонэз (Иона 4:10, 11). Малы со милемыз дышетэ? Тӧроос уг дырто малпаны, ивортӥсь, кудӥз тодытон уже пыриськемысь дугдӥз, номырлы ярасьтэм ини шуыса. Соос валаны тыршо, малы со сыӵе югдуре сюриз. Нош куке со Иегова доры берытске, тӧроос азьло сямен ик солы яратэмзэс возьмато но саклыксэс висъяло.
13. Малы милемыз дышетэ со, кызьы Иегова учкиз 72-тӥ Псаломез гожъясьлэн верамез шоры?
13 Лек адямиослэсь азинлыко улэмзэс адӟыса, 72-тӥ Псаломез гожъясьлэн мылкыдыз куашказ. Со сокем ӧз оскы ни, Инмарлэсь кылзӥськон пайда вае шуыса (Пс. 72:12, 13, 16). Кызьы та шоры учкиз Иегова? Инмар Псаломез гожъясез ӧз судъя. Со сяна, Инмарлэн эрикезъя, та кылъёсты Библие но гожтӥзы. Псаломез гожъясь валаз, Инмарен эшъяськон улонын котьмалэсь дуно луэ шуыса (Пс. 72:23, 24, 26, 28). Малы со милемыз дышетэ? Тӧроос уз дыртэ кыӵе ке йылпумъянъёс лэсьтыны, куке вын-агай яке сузэр-апай сокем уз оскы ни, Иеговалы ужан-тыршон пайда вае шуыса. Адямиез судъям интые, тӧроослы валаны тыршоно, малы со ассэ озьы возьыны кутскиз. Собере гинэ тӧроос быгато соин Библиысь кылбуръёсты эскерыны, сое юнматон понна.
14. Малы Илиялы юрттэт кулэ вал но кызьы Иегова сое юнматӥз?
14 Илия пророк, аслэсьтыз улонзэ утён понна, Иезавель эксэй кышномуртлэсь бызьыса кошкиз (3 Экс. 19:1—3). Со малпаз, Иеговалэн мукет пророкъёсыз ӧвӧл ни шуыса но солэн ужан-тыршонэз пайда уг вайы шуыса. Илиялэн сокем мылкыдыз куашкамын вал, солэн кулэмез но потӥз (3 Экс. 19:4, 10). Иегова Илияез ӧз судъя, нош оскытӥз, со одӥгназ ӧвӧл, со Инмарлэн кужымезлы оскиськыны быгатэ но азьпалан трос уж на шуыса. Иегова сак кылзӥз аслэсьтыз пророксэ, куке со сюлмаськонъёсыз сярысь вераз, нош собере солы выль ужъёс сётӥз (3 Экс. 19:11—16, 18). Малы со милемыз дышетэ? Милемлы ваньмылы, тужгес но тӧроослы, Иеговалэн ыжъёсыныз асьмеды лякытэн возёно. Христиан мурт аслаз шӧдонъёсыз сярысь вераку, тӧроос сое сак кылзо, соку но, куке адямилэн вожез потэ яке со малпа, Иегова сое ноку простить уз кары ни шуыса. Кылзэмзы бере тӧроос сыӵе адямиез оскытыны тыршо, Иегова сое яратэ шуыса.
КЫЗЬЫ МИЛЕМЛЫ УЧКОНО ИЕГОВАЛЭН ЙЫРОМЕМ ЫЖЪЁСЫЗ ШОРЫ?
15. Иоаннлэсь 6:39 лыдэ басьтыса, кызьы Иисус учкиз Атаезлэн ыжъёсыз шоры?
15 Кызьы милемлы учконо Иеговалэн йыромем ыжъёсыз шоры? Мае милесьтым возьма Иегова? Ойдолэ эскеромы, кыӵе адӟем карон возьматӥз милемлы Иисус. Со тодӥз, Иеговалы вань ыжъёсыз дуно пото шуыса. Соин ик со лэсьтӥз ваньзэ, мае быгатӥз, «Израиль юртлэн бырем ыжъёсызлы» Инмар доры берытскыны юрттон понна (Матф. 15:24; Лука 19:9, 10). Озьы ик Иисус но, «ӟеч ыж возьмась» луыса, вань кужымзэ понӥз, Иеговалэн одӥг ыжез но медаз ышы шуыса. (Лыдӟе Иоаннлэсь 6:39; 10:11, 14.)
16, 17. Кызьы тӧроос учко соослы сётэм уж шоры? (Учке « Мар соос шӧдо» рамкаез.)
16 Апостол Павел Ефес кенешысь тӧроослэсь мылкыдзэс ӝутӥз Иисуслэсь адӟем карыны: «Тӥ... лябъёслы юрттӥськыны, Кузё-Инмарлэсь Иисуслэсь кылъёссэ тодады возьыны кулэ... Уго Со Ачиз шуиз: „Басьтон сярысь, сётыны умойгес“» (Ап. уж. 20:17, 35). Та кылъёсысь адӟиське: тӧроослы нимысьтыз уж сётэмын — Иеговалэн калыкез сярысь сюлмаськыны. Тани мар вера Испаниысь Сальвадор нимо тӧро: «Куке мон малпаськисько со сярысь, макем Иегова яратэ йыромем ыжъёссэ, мынам лэсьтэме потэ ваньзэ, мае быгатӥсько, соослы юрттон понна. Мон юн оскисько: Иеговалэн потэ, мон соос сярысь мед сюлмаськом шуыса».
17 Вын-агайёслы но сузэр-апайёслы, кудъёсыз сярысь та статьяын вераськиз, юрттӥзы Иегова доры берытскыны. Нош вань на трос ивортӥсьёс, кудъёсыз Инмарлэсь палэнскизы, но соослэн со доры берытскемзы потэ. Вуоно статьяын вераське со сярысь, кызьы ми соослы юрттыны быгатӥськомы.
139-ТӤ КЫРӞАН Представь себя в новом мире
a Малы куд-ог вын-агайёс но сузэр-апайёс, кудъёсыз трос аръёс ӵоже Иеговалы оскымон ужазы-тыршизы, тодытэмысь но кенешлэн пумиськонъёсаз ветлэмысь дугдӥзы? Кызьы соос шоры учке Инмар? Ойдолэ эскеромы та юанъёсты но вераськомы со сярысь, кызьы вашкала дыръёсы Иегова юрттылӥз соослы, кинъёс огдырлы солэсь палэнскизы, озьы ик тодомы, малы со милемыз дышетэ.
b Куд-ог нимъёс воштэмын.
c ВАЛЭКТОН. Ивортӥсь тодытон уже пыриськемысь дугдӥз шуыса лыдъяське соку, куке со тодытон уж сярысь отчётсэ куать яке тросгес толэзьёс ӵоже ӧз сётъя. Озьы ке но сыӵе ивортӥсьёс азьло сямен ик асьмелэн вын-агайёсмы но сузэр-апайёсмы луо но, ми соосты туж яратӥськомы.
d Вуоно статьяын вераське, кызьы тӧроос та вамышъёсты лэсьтыны быгато.
