1. Мар со сыӵе Инмарлэсь кышкан но малы сыӵе кышкан кулэ соослы, кинъёс Инмарез ярато?

 ХРИСТИАНЪЁС Инмарез ярато но со дыре ик солэсь кышкало. Куд-огъёсыз малпаны быгатозы, та ог-огзылы пумит луись веранъёс луо шуыса. Нош вераськон уг мыны кышкан сярысь, кудӥз китэм-пыдтэм каре. Адямиос, кудъёсыз Инмарлэсь кышкало, сое сӥлы каро но вань сюлмысьтызы гажало. Соослэн уг поты инмысь Атайзэс ӝоже уськытэмзы, малы ке шуоно соин кусыпъёссэс ыштэмзы уг поты (Пс. 110:10; Мад. 8:13).

2. Псалтирьысь 85:11 кылъёсты лыдэ басьтыса, кыӵе кык юанъёсты ми та статьяын эскеромы?

² Лыдӟе Псалтирез 85:11. Давид эксэйлэн кылъёсысьтыз адӟиське: со валаз, макем кулэ Инмарлэсь кышканы. Ойдолэ малпаськомы, малы дышетскыны быгатӥськомы солэн вӧсяськонысьтыз. Нырысетӥез, ми тодомы, малы милемлы Инмарлэн нимызлэсь кышканы кулэ. Кыкетӥез, ми эскеромы, кызьы, нуналысь нуналэ ужъёсты быдэсъякумы, Инмарлэсь нимзэ мур гажаммес возьматыны быгатӥськомы.

3. Кыӵе югдур Моисейлы юрттӥз, вылды, Инмарлэн нимызлэсь кышкаса улыны?

³ Малпалэ гинэ, мае шӧдӥз Моисей, куке Хорив гурезьын дыръяз Иеговалэсь данлыксэ адӟиз. Со туж паймымон адӟон вал, кудзэ одӥг адями но ӧз адӟылы, Иисус музъем вылэ лыктытозь. Со кылӥз кылъёсты, кудъёссэ кылчин вераз, вылды:  «Кузё-Инмар, Кузё-Инмар, адямиез яратӥсь, гажась-жалясь, кема чидась, туж гажась-жалясь, зэмлыко Инмар. Со сюрсэтӥ выжылы но гажан-жалянзэ возьматэ, Со янгышъёсты, йыружъёсты, сьӧлыкъёсты ӵуше-куштэ» (Пот. 33:17—23; 34:5—7). Моисей та югдур сярысь тодаз вайылӥз, луоз, куке Иеговалэсь нимзэ вералляз. Соин ик берлогес Израиль калыклэсь со мылкыдзэ ӝутӥз Иеговалэн «данлыко но кышкыт нимызлэсь» кышкаса улыны (К. Зак. 28:58).

4. Инмарлэн кыӵе сямъёсыз сярысь малпаськыса, ми сое мур гажаны кутскиськомы?

⁴ Иеговалэн нимыз сярысь малпаськыкумы, умой луысал тодамы возьыны сямъёссэ солэсь, кин та нимез нуллэ: солэсь кужымзэ, визьлыксэ, шонерлыксэ но яратонзэ. Иеговалэн та но мукет сямъёсыз сярысь малпаськыса, ми сое мур гажаны кутскиськомы (Пс. 76:12—16).

5, 6. а) Мае возьматэ Иегова ним? б) Потонэз 3:13, 14 но Исаиялэсь 64:8 лыдэ басьтыса, кызьы Иегова аслэсьтыз эриксэ быдэсъя?

⁵ Мае ми тодӥськомы Инмарлэн нимыз сярысь? Тросэз тодосчиос лыдъяло: Иегова ним возьматэ «Со ваньмызлы луыны сётэ» шуэмез. Та милемлы тодамы вайытэ, Иегова котьку но лэсьтэ шуыса сое, мае лэсьтыны малпаз. Кызьы со сое лэсьтэ?

⁶ Нырысь ик, Иегова луэ со, кин луыны кулэ аслэсьтыз эриксэ быдэстон понна. (Лыдӟе Потонэз 3:13, 14.) Еврей кылын гожтэм «Мон Со, Кин Вань» верамез берыктыны луэ «Мон луо со, кин луэме потэ» шуыса. Милесьтым ӵем дыръя мылкыдмес ӝуто малпаськыны Инмарлэн та паймымон быгатонлыкез сярысь. Кыкетӥез, Иегова котькуд тырбыдэстэм ужась-тыршисезлы луыны юрттэ со, кин луыны кулэ, аслэсьтыз эриксэ быдэстон понна. (Лыдӟе Исаиялэсь 64:8.) Валамон луэ: нокин но Иеговалы люкетыны уз быгаты аслэсьтыз эриксэ быдэстыны (Ис. 46:10, 11).

7. Мар юрттоз милемлы инмысь Атаймылы тау каронмес будэтыны?

⁷ Милям инмысь Атаймес эшшо но золгес тау кареммы потоз, куке малпаськомы солэн ужъёсыз сярысь но со сярысь, мае ми лэсьтӥмы солэн юрттэменыз. Кылсярысь,  Иеговалэн паймымон кылдытэмъёсыз сярысь малпаськыса, ми шумпотӥськомы солы, макем бадӟым уж со лэсьтӥз (Пс. 8:4, 5). Нош куке ми малпаськиськомы со сярысь, кызьы Иеговалэн юрттэменыз солэсь эриксэ быдэстыны быгатӥмы, ми сое эшшо но золгес гажаны кутскиськомы. Зэм но, Инмарлэн нимыз милесьтым мылкыдмес ӝутэ сое сӥлы карыны! Та нимлэн мур пуштросэз, кудӥз возьматэ Атаймылэсь вань сямъёссэ, озьы ик ваньзэ сое, мае со лэсьтӥз ини но мае со азьланяз лэсьтоз на (Пс. 88:8, 9).

8. Кыкетӥ Законэз 32:2, 3 лыдэ басьтыса, кызьы милемлы Инмарлэн нимыз шоры учконо?

⁸ Израиль калык Сӥзем музъеме пырон азьын Иегова Моисеез одӥг кырӟанлы дышетӥз (К. Зак. 31:19). Нош Моисей та кырӟанлы вань калыкез дышетӥз. Солэсь кылъёссэ лыдӟыны луэ Кыкетӥ Законысь, 32-тӥ люкетысь. (Лыдӟе Кыкетӥ Законэз 32:2, 3.) 2-тӥ но 3-тӥ кылбуръёсысь умой адӟиське: Иеговалэн уг поты, солэсь нимзэ мед ватозы но сое сокем дун-чылкытэн мед лыдъялозы шуыса, кудзэ вераны но ӧй дӥсьтысалзы. Инмарлэн потэ, солэсь нимзэ ваньзы мед тодозы шуыса! Израиль калык шумпотӥз, та кырӟанын Моисей соослы Иегова сярысь но солэн дано нимыз сярысь зэмлыкез усьтӥз шуыса. Моисейлэн кылъёсыз соосты юнматӥзы но буйгатӥзы озьы ик, кызьы зор шапыкъёс вож турынлы будыны юртто. Нош кызьы милемлы валано, милям кылъёсмы юнмато шуыса соосты, кинъёслы ми тодытӥськомы но кинъёсын Библиез дышетӥськомы?

9. Кызьы ми Инмарлэсь нимзэ дун-чылкыт карыны юрттӥськомы?

⁹ Куке ми трос калыко интыосын тодытӥськомы но, коркась корка ветлыса, ӟеч иворез вераськомы, милям адямиослы Инмарлэсь Иегова нимзэ Библиысь возьматэммы луэ. Ми быгатӥськомы соослы ӵектыны чебер публикациосмес, возьматыны тунсыко видеороликъёсты но тодматыны сайтысьтымы пайдаё материалэн. Ваньмыз та Иеговаез данъя. Уж дорамы, школаын но шутэтскыкумы милям луонлыкмы кылдыны быгатоз дуно Инмармы но солэн сямъёсыз сярысь кинлы ке вераны. Ми соослы вераны быгатомы, кыӵе малпанэз Иеговалэн адямиос но музъем пумысен. Но куке соос та сярысь кылозы, соос валаны кутскозы, вылды, макем юн яратэ милемыз Иегова. Мукетъёслы яратӥсь Атаймы сярысь зэмлыкез вераса, ми Инмарлэсь нимзэ дун-чылкыт кариськомы. Ми адямиослы валаны юрттӥськомы, Инмар сярысь тросэз дышетонъёссы пӧяськон луэ шуыса, но ӵектӥськомы соослы самой умой но пайдаё духовной сиён (Ис. 65:13, 14).

10. Малы дышетскисьлы Инмарлэн шонерлыко эсэпъёсыз сярысь вераны гинэ тырмыт ӧвӧл?

¹⁰ Адямиен Библиез дышетыкумы, милям потэ, со Инмарлэсь нимзэ мед тодоз но солы нимызъя мед вазиськоз шуыса. Со сяна, милям потэ: адями мед валалоз, мае возьматэ Инмарлэн нимыз. Быдэстомы-а ми та ужпуммес, куке огшоры гинэ вераломы, мар карыны Инмар лэзе, нош мар карыны уг лэзьы? Дышетскись быгатэ Инмарлэсь куронъёссэ тодыны, озьы ик соосын данъяськыны но. Нош адӟиськомы-а ми, дышетскись, Инмарез яратыса, соосты быдэсъя шуыса? Тодамы ваёмы Евалэсь учырзэ: со тодӥз Инмарлэсь курон-косонъёссэ, нош солэн ӧй вал зэмос яратонэз солы, кин та куронэз сётӥз. Сое ик вераны луоз Адам сярысь но (Ул.-выл. 3:1—6). Озьыен, дышетскисьлы Инмарлэн шонерлыко эсэпъёсыз сярысь вераны гинэ тырмыт ӧвӧл.

11. Кызьы ми дышетскисьёсмылы юрттыны быгатомы Инмарлэсь катъёссэ яратыны, озьы ик сое ассэ но?

¹¹ Иеговалэн вань катъёсыз милемлы пайда ваё (Пс. 118:97, 111, 112). Нош куддыръя  дышетскисьёс тае соку ик уг валало. Соослы адӟыны кулэ, Иегова та катъёсты яратыса сётӥз шуыса. Соин ик, дышетон ортчытыку, умой луоз таӵе юанъёс сётъяны: «Кызьы тон малпаськод, малы Инмар тае лэсьтыны куре, нош тае уг лэзьы. Мар вера та курон Инмар сярысь?» Куке ми дышетскисьёсты Иегова сярысь малпаськыны дышетӥськомы но солэсь дано нимзэ зэмзэ ик яратыны юрттӥськомы, соку милемлы соослэсь сюлэмзэс вырӟытыны капчигес луоз. Ми дышетскисьёсмес Инмарлэсь катъёссэ гинэ яратыны ум дышетэ, нош озьы ик сое ассэ но (Пс. 118:68). Соослэн осконзы юнмалоз но, со юрттоз соослы бадӟым шуг-секытъёсты но чиданы (1 Кор. 3:12—15).

12. Кызьы Давидлэн сюлмыз Инмарлэсь палэнскиз но кытчы со вуттӥз?

¹² Псалтирьын 85:11 валтӥсь веран — «сюлэмме берыкты». Та кылъёсты Давид гожтӥз. Со котькинлэсь но умой тодӥз, макем капчиен сюлэм Иеговалэсь палэнскыны быгатэ. Одӥг пол коркаезлэн липет вылысеныз со адӟиз, кызьы пыласькиз кышномурт — мукет пиосмуртлэн кышноез. Кыӵе вал Давидлэн сюлмыз со дыре: Инмар пала берытскемын яке солэсь палэнскемын? Со умой тодӥз Инмарлэсь катсэ: «Муртлэсь кышнозэ... аслыд кулэ эн кары» (Пот. 20:17). Нош со та кышномурт шоры учкыса улӥз, луоз. Давидлэн сюлмыз Иеговалы ярамон луон мылкыдлэсь палэнскиз. Солэн Вирсавия нимо кышномуртэз аслыз каремез потӥз. Давид трос аръёс ӵоже Иеговаез яратэ вал но солэн нимызлэсь кышка вал ке но, со Инмарлэсь курон-косонзэ тӥяз. Давид солэсь нимзэ сантэмаз но трос изъян вайиз янгыш луисьтэм адямиослы, озьы ик аслаз семьяезлы но (2 Экс. 11:1—5, 14—17; 12:7—12).

13. Кытысь ми тодӥськомы, Давид сюлэмзэ нош ик Инмар пала берыктӥз шуыса?

¹³ Иегова Давидлы валаны юрттӥз, макем бадӟым сьӧлык со лэсьтӥз. Талы луыса Давид Инмарен кусыпъёссэ тупатӥз (2 Экс. 12:13; Пс. 50:4—6, 19). Со тодаз возиз кышкыт бервылъёс сярысь, куке солэн сюлмыз Инмарлэсь палэнскиз. Псалтирьысь 85:11 кылъёсты вераны луоз тазьы но: «Сёт мыным сюлэм, кудӥз тон бордысь уз палэнскы». Юрттӥз-а Иегова Давидлы сюлэмзэ быдэсак Инмар пала берыктыны? Юрттӥз, малы ке шуоно берлогес Библиын верамын вал, Давидлэн сюлмыз быдэсак Инмарезлы Кузё-Инмарлы сётэмын вал шуыса (3 Экс. 11:4; 15:3).

14. Мар сярысь астэ юано но малы?

¹⁴ Давидлэн учырез милемыз юнматэ, озьы ик малпаськытэ но. Солэн бадӟым  сьӧлык лэсьтэмез Инмарлэн ужась-тыршисьёсызлы алон луэ. Милям сыӵе ик янгышъёс лэсьтэммы уг поты. Ми трос аръёс ӵоже Иеговалы ужаськомы-тыршиськомы-а яке ум-а, асьмеды юаны кулэ: «Юн сылӥсько-а мон, куке Шайтан сюлэмме Инмарлэсь палэнтыны тырше?»

15. Кызьы Инмарлэсь кышкан уте милемыз, куке син азямы шонертэм малпанъёсы вуттӥсь суредъёс кылдо?

¹⁵ Кылсярысь, мар тӥ кариськоды, куке интернетысь яке телевизорысь адӟиськоды сое, мар тӥлесьтыд мылкыддэс ӝутэ азон-калгон сярысь малпаськыны? Тӥ асьтэды оскытыны быгатоды, та суредэз яке фильмез быдэсак порнографиен лыдъяны уг луы шуыса. Нош та учырын Шайтан тӥлесьтыд сюлэмдэс Инмарлэсь палэнтыны уз тыршы-а? (2 Кор. 2:11). Со суредэз ӵошатыны луэ пичи корт тулэн, кудӥныз бадӟым корез пилё. Нырысь коре пырто туллэсь векчи палзэ, нош собере сое мургес шукко, кор пилиськытозь. Луоз-а ӵошатыны шонертэм малпанъёсы вуттӥсь суредэз та тулэн? Со, мар нырысь номыр уродзэ уз вайы кадь потэ, собере сьӧлыке ӝог вуттыны быгатэ, соин сэрен адямилэн сюлмыз Иеговалэсь палэнске. Соин ик чаклаське, сюлмады нокыӵе но шонертэм малпанъёс медаз пыре шуыса! Сюлэмдэс Инмар пала берыктыса улэ, солэн нимызлэсь кышканы мед быгатоды шуыса!

16. Кыӵе юанъёс аслыд сётоно, визь сынаськонэн пумиськыку?

¹⁶ Шонертэм малпанъёсы вуттӥсь суредъёсты сяна, Шайтан кутэ на мукет сьӧлтэтъёсты но, умойтэм ужъёс лэсьтыны мылкыдмес ӝутон понна. Кызьы ми учкиськомы со сьӧлтэтъёс шоры? Зэм но, капчи малпаны, соос кышкытлык уз вае шуыса. Кылсярысь, малпаны луоз: «Монэ та уж понна кенешысь уз поттэ ук, озьыен, со туж ик кышкыт ӧвӧл». Сыӵе малпаськонъёс туж шонертэмесь луо. Умой луысал аслыд таӵе юанъёс сётыны: «Уг  тыршы-а Шайтан таӵе амалэн мынэсьтым сюлэмме Инмарлэсь палэнтыны? Мон шонертэм мылпотонъёслы сётски ке, уг сантэма-а Инмарлэсь нимзэ? Луо-а мон Иеговалы матэгес яке солэсь палэнско-а?» Малпаське та юанъёс вылын. Визьлык курыса вӧсяське, та юанъёслы шонер валэктонъёс сётон понна (Иак. 1:5). Со тӥледыз зэмзэ ик утёз но юн мылкыдын визь сынаськонэз палэнтыны юрттоз озьы ик, кызьы юрттӥз Иисуслы, кудӥз вераз: «Кошкы Мон дорысь, шайтан» (Матф. 4:10).

17. Малы Инмарлэсь палэнскем сюлэм номыр умойзэ уг вайы? Вералэ пример.

¹⁷ Инмарлэсь палэнскем сюлэм номыр умойзэ уг вайы. Пуктэ син азяды футболэн шудӥсь командаез, кудаз шудӥсьёс ог-огенызы туж ик уг тупало. Одӥгъёсызлэн асьсэлэн гинэ вормемзы потэ, мукетъёсызлэн куронъёсъя шудэмзы уг поты, нош куинетӥосыз тренерзэс уг гажало. Таӵе команда вормоз-а меда? Нош огкылысь шудӥсь командалы капчигес луоз вормыны. Тӥляд потэ ке, сюлэмды вормись команда кадь мед луоз шуыса, соку малпанъёсты, мылпотонъёсты но шӧдонъёсты Иеговалы ужан-тыршонэн герӟаськемын луыны кулэ. Тодады возе: Шайтанлэн туж потэ сюлэмдэс Иеговалэсь палэнтэмез. Солэн потэ, тӥляд малпанъёсты, мылпотонъёсты но шӧдонъёсты Иеговалэн эсэпъёсызлы пумит мед мынозы шуыса. Нош тӥледлы вань сюлмысьтыды Иеговалы ужаны-тыршыны кулэ (Матф. 22:36—38). Ноку но эн лэзе Шайтанлы сюлэмдэс палэнтыны!

18. Мар карыны тӥлесьтыд мылкыддэс ӝуто Михейлэн 4:5 кылъёс?

¹⁸ Давид сямен, Иеговалы вӧсяське: «Тынад нимыдлэсь кышкан пала сюлэмме берыкты». Тырше та вӧсяськонъя улыны. Котькуд нунал тӥляд ужпумъёсты, пичиесь-а соос яке бадӟымесь-а, мед возьматозы, тӥ Инмарлэсь нимзэ мур гажаськоды шуыса. Озьы ми, Иеговалэн Адӟись-Ивортӥсьёсыз луыса, та нимез данъяломы (Мад. 27:11). Соку ми но, Михей пророк сямен, вераломы: «Ми асьмелэн Инмармылы Кузё-Инмарлы йыбыртъяломы вапумъёсысь вапумъёс ӵоже» (Мих. 4:5).