1. Мае Иегова лэсьтӥз ми пӧлысь котькудӥзлы?

 ИЕГОВА ми пӧлысь котькудзэ ас дораз вайиз (Иоанн 6:44). Малпалэ гинэ, мае та возьматэ. Музъем вылын улӥсь трос миллиард адямиос пӧлысь со адӟиз, тӥ зӥбыт-востэм адями но сое яратыны быгатоды шуыса. Иегова тае туж дунъя (1 Пар. 28:9). Инмар тӥледыз тодэ, вала но туж яратэ. Та малпан милемыз туж шумпоттэ!

2. Кызьы Иисус возьматӥз, Иегова котькуд ыжзэ яратэ шуыса?

² Иегова милемыз туж яратэ, озьы ик со яратэ вын-агайёсмес но сузэр-апайёсмес. Иисус тае валэктӥз, Иеговаез пудо возьмасен ӵошатыса. 100 ыжъем уллёысь одӥг ыж ышиз ке, мар кароз пудо возьмась? Со 99 ыжзэ гурезе кельтоз но йыромем ыжзэ утчаны мыноз. Сое шедьтыса, со шумпотоз но сое вӧсь уз кары. Малы та милемыз дышетэ? Иеговалы котькуд ыжез туж дуно потэ. Иисус таӵе йылпумъян лэсьтӥз: «Инмысь Атайдылэн та покчиос пӧлысь огзэс но быдтэмез уг поты» (Матф. 18:12—14).

3. Мае ми эскеромы та статьяын?

³ Зэм но, нокудмылэн но вын-агайёсмес но сузэр-апайёсмес вӧсь каремез уг поты. Мар со понна кароно? Нош мар кароно, милемыз кин ке но вӧсь кариз ке? Ойдолэ та юанъёслы валэктонъёсты эскеромы. Но нырысь тодомы, кинъёс со «та покчиос», кудъёсыз сярысь вераське Матфейлэсь 18-тӥ люкетын.

4. Кинъёс со «та покчиос»?

⁴ «Та покчиос» — со пӧртэм аресъем Иисуслэн дышетскисьёсыз. Кӧня гинэ арес соослы медам луы, соос шоры Иисус учке пичи нылпиос шоры кадь, малы ке шуоно соос  солэсь дышетскыны дась (Матф. 18:3). Соос пӧртэм шаеръёсысь, пӧртэм семьяосысь, пӧртэм сямоесь ке но, озьы ик пӧртэм сямен малпасько ке но, ваньзы соос Христослы оско. Нош со соосты туж яратэ (Матф. 18:6; Иоанн 1:12).

5. Мае шӧдэ Иегова, куке солэсь ужась-тыршисьёссэ вӧсь каро?

⁵ «Та покчиос» пӧлысь котькудӥз Иеговалы туж дуно потэ. Солэсь шӧдонъёссэ валан понна, малпаське, кызьы ми учкиськомы нылпиос шоры. Соос милемлы туж дуно пото. Ми нылпиосты утиськомы, малы ке шуоно соос пичиесь, троссэ уг валало но котькинлы оско. Зэм но, бадӟым муртэн кин ке но ассэ шонертэм возе ке, милемлы со уг кельшы. Нош кин ке но нылпиез вӧсь каре ке, милям сюлэммы ик вӧсь луэ. Ӵапак озьы ик Иеговалэн но милемыз утемез потэ. Солэсь ужась-тыршисьёссэ вӧсь каро ке, солы со туж уг кельшы. Со сяна, солэн вожез но потэ (Ис. 63:9; Марк 9:42).

6. Кызьы та дуннеысь адямиос учко Иисуслэн дышетскисьёсыз шоры, 1 Коринфъёслы 1:26—29 лыдэ басьтыса?

⁶ Малы эшшо Иисуслэсь дышетскисьёссэ пичи нылпиосын ӵошатыны луэ на? Ойдолэ малпаськомы. Кинэ та дуннеын гажало? Узыръёсты, нимо-дано адямиосты но кивалтӥсьёсты. Нош Иисуслэн дышетскисьёсыз шоры учко пичиесь но огшоры адямиос шоры кадь. (Лыдӟе 1 Коринфъёслы 1:26—29.) Нош Иегова соос шоры чылкак мукет сямен учке.

7. Кызьы асьмеды вын-агайёсын но сузэр-апайёсын возёно, Иеговалэн малпамезъя?

⁷ Иегова котькуд ужась-тыршисьсэ яратэ, ку гинэ со медаз пылатӥськы: алигес яке трос аръёс талэсь азьло. Инмар вань вын-агайёсмес но сузэр-апайёсмес дунъя бере, милемлы но соос шоры озьы ик учконо. Библия уг вера куд-ог христианъёсты гинэ яратоно шуыса, нош со ӧте милемыз: «Быдэс вынлыкмес яратэ» (1 Пётр 2:17, ВД). Милемлы вань кужмысьтымы тыршоно огъя оскисьёсмес утьыны но соос сярысь сюлмаськыны. Ми вын-агаез вӧсь каримы ке, малпано ӧвӧл, номыр ӧз но луы шуыса, яке со ачиз туж куатаськись но со милемыз простить карыны кулэ шуыса. Малы кин ке но куатаськыны быгатэ? Оло нош, югдур сэрен, кудаз со будӥз, али со ассэ уг гажа. Нош кин ке но али гинэ Адӟись-Ивортӥсь луиз но ӧз дышетскы на мукетъёссэ янгышъёссы понна простить карыны. Зэмзэ вераса, кин кинэ но кыӵе гинэ муген вӧсь медам кары, милемлы одно ик тыршоно кусыпъёсмес тупатыны. Со сяна, ӵем куатаськись адямилы валаны кулэ, сыӵе сямен нюръяськоно шуыса. Та сямзэ вормыса, со ачиз шумпотысагес улоз но котырысьтыз адямиослы соин капчигес луоз.

8. Адямиослэн кыӵе мылкыдзы Иисуслэн дышетскисьёсыз вылын шӧдӥськиз?

⁸ Малы Иисус пичи нылпиос сярысь вераны кутскиз? Дышетскисьёсызлэн юамзы сэрен: «Ин Эксэйлыкын кин ваньмызлэсь бадӟымез?» (Матф. 18:1). Со дыре улӥсь тросэз еврейёс туж тыршизы вылӥ инты басьтыны но нимо-дано луыны. Одӥг тодосчи та сярысь тазьы вераз: «Адямиос улӥзы но кулӥзы, нимо-дано, тодмо но гажамон адями луон понна».

9. Мар кароно вал Иисуслэн дышетскисьёсызлы?

⁹ Иисус вала вал, дышетскисьёсызлы ӵошатскон мылкыдын нюръяськыны капчи уз луы шуыса, малы ке шуоно со дыре сыӵе мылкыд еврей калык пӧлын туж вӧлмемын вал. Иисус дышетскисьёсызлы шуиз: «Кин тӥ пӧлысь бадӟымез, покчи мурт кадь  кариськы, нош кивалтӥсь медо кадь мед кариськоз» (Лука 22:26). «Покчи мурт кадь» кариськон понна, «мукетъёссэ асьтэ сярысь умоесьгес шуыса лыдъялэ» (Флп. 2:3). Ми талы дышетскимы ке, соку мукетъёссэ ӧжытгес вӧсь каромы.

10. Павеллэн кыӵе кылъёсыз вылын милемлы умой малпаськоно?

¹⁰ Вын-агайёсмы но сузэр-апайёсмы пӧлысь котькудӥз милесьтым маин ке но умойгес луэ. Тае валаны капчигес луоз, ми соослэн умой сямъёссылы саклыкмес висъямы ке. Милемлы умой малпаськоно апостол Павеллэн кылъёсыз вылын: «Зэмзэ ик, кин тонэ вылӥе пуктӥз? Маид тынад вань, ваньзэ сое тыныд Инмар ӧз сёты-а? Нош басьтӥд ке, мар бен ушъяськиськод,— ваньмыз со кузьым ӧвӧл шат?» (1 Кор. 4:7). Милемлы асьмелы дан утчано ӧвӧл но малпано ӧвӧл, ми мукетъёсызлэсь умойгес шуыса. Кылсярысь, агай умой речьёс вера ке, нош сузэр Библиез дышетонъёсты кутскыны быгатэ ке, ваньмыз понна соос Иеговаез тау карыны кулэ.

11. Малы дышетэ милемыз Иисуслэн кузё но ляльчи сярысь мадёнэз?

¹¹ Куке Иисус аслаз дышетскисьёсызлы шуиз, соос ог-огзэс вӧсь карыны кулэ ӧвӧл шуыса, со соослы кузё но ляльчи сярысь мадён вераз. Кузё аслаз ляльчиезлы бадӟым тыриськонзэ куштӥз, кудзэ со ноку тырыны ӧй быгатысал. Нош берлогес та ляльчи аслаз эшезлы ӧжытгес пунэм тыронзэ простить ӧз кары. Соин ик кузё та лек ляльчиез пытсэтэ куштӥз. Малы дышетэ милемыз та мадён? Иисус вераз: «Озьы ик кароз тӥледыз Мынам Инмысь Атае, вань сюлмысьтыды ӧд ке куштэ браттылэсь лэсьтэм сьӧлыкъёссэ» (Матф. 18:21—35).

12. Мар луоз, милемыз вӧсь карись адямиез ми простить ӧм каре ке?

¹² Та ляльчилэн ужъёсыз уродэн шӧдӥськизы ачиз вылын но, мукетъёсыз вылын но. Нырысетӥез, со ӧз жаля аслэсьтыз эшсэ, куке сое «тыронзэ сётытозьлы, пытсэтэ ворсатэм». Кыкетӥез, та учырез адӟисьёслэн мылкыдзы туж куашкам: «Тае адӟыса, эшъёсызлэн туж кӧтсы ӝож луэм». Озьы ик милям но ужъёсмы мукетъёсыз вылын шӧдӥсько. Шуом, милемыз кин ке но вӧсь кариз, нош ми сое простить ум кариське. Кытчы со вуттыны быгатэ? Нырысетӥез, ми со адямиез вӧсь кариськомы, малы ке шуоно сое простить ум кариське но асьмеды соин чурыт возиськомы. Кыкетӥез, кенешысь вын-агайёс но сузэр-апайёс асьсэды умойтэм шӧдозы, милемыз вӧсь карись адямиен ми кусыпъёсмес ӧм тупатэ ке.

13. Малы дышетэ тӥледыз одӥг сузэрлэн учырез?

¹³ Ми адямиосты простить кариськомы ке, соку милемлы но, мукетъёсызлы но умой луоз. Тае адӟыны луэ учырысь, кудӥз луиз пионер луыса ужась-тыршись Кристал b сузэрен. Сое кенешысь одӥг сузэр вӧсь каре вал. Кристал тодаз вае: «Куддыръя солэн кылъёсыз монэ пуртэн вандэм кадь вӧсь карылӥзы. Мынам соин тодытэме но уг поты вал ини. Ужан-тыршон азьло сямен мыным шумпотон ӧз вайы ни». Кристал малпаз, солэн та сузэрлы йыркуръяськыны мугъёсыз вань шуыса. Но со вожзэ поттыса ӧз улы, озьы ик аслыз но, аслаз шӧдонъёсызлы но мултэс саклыксэ ӧз висъя. Мар солы юрттӥз? Со зӥбыт-востэм сямзэ возьматӥз но уже кутӥз Библиысь визь-кенешез, кудӥз сярысь вераськиз 1999-тӥ арын 15-тӥ коньывуон понна поттэм «Возьмаськон башняысь» «Прости от сердца» статьяын. Кристал та сузэрез простить кариз. Со азьланьтэ:  «Табере мон валасько: ми пӧлысь котькудӥз воштӥськыны тырше, выль адями луон понна, озьы ик Иегова милемыз котькуд нунал простить каре. Мынам сюлмы ик буйгаз. Табере ужан-тыршон мыным нош ик шумпотон вае».

14. а) Мае апостол Пётрлы карыны секыт вал, дыр, Матфейлэсь 18:21, 22 лыдэ басьтыса? б) Мар юрттоз милемлы мукетъёссэ простить карыны?

¹⁴ Ми тодӥськомы, ми простить карыны кулэ но со шонер шуыса. Но куддыръя со секыт. Апостол Пётрлы но простить карыны секыт вал, дыр. (Лыдӟе Матфейлэсь 18:21, 22.) Мар милемлы юрттоз? Нырысетӥез, тодамы возёно, макем бадӟым яратонзэ возьматэ милемлы Иегова (Матф. 18:32, 33). Сьӧлыко луэменымы сэрен, ми простить карыны ярамонэсь ум луиське ке но, со милемыз выльысь но выльысь простить каре (Пс. 102:8—10). Озьы ик «асьмеос но огмес огмы яратыны кулэ» (1 Иоанн 4:11). Озьыен, простить кароно-а, ӧвӧл-а, ми ум бырйиське. Милемлы кулэ вын-агайёсмес но сузэр-апайёсмес простить карыны. Кыкетӥез, малпаське, кыӵе пайда вае мукетъёссэ простить карон: милемыз вӧсь карись адямилы юрттомы, кенеше тупаса улон ваёмы, Иеговаен кусыпъёсмес утёмы но секыт мылкыдын ум улэ (2 Кор. 2:7; Кол. 3:14). Куинетӥез, Иеговалэсь юрттэт куре, малы ке шуоно со милемыз куре простить карыны. Эн лэзе Шайтанлы вын-агайёсын но сузэр-апайёсын кусыпъёстэс сӧрыны (Еф. 4:26, 27). Шайтан кенешысь вын-агайёслы но сузэр-апайёслы тупаса улыны медаз люкеты шуыса, милемлы Иеговалэн юрттэтэз кулэ.

15. Мар кароно, кенешысь кин ке но тӥледыз туж вӧсь кариз ке, Колоссыослы 3:13 лыдэ басьтыса?

¹⁵ Нош мар кароно, кенешысь вын-агай яке сузэр-апай тӥледыз туж вӧсь кариз ке? Вань кужмысьтыды тырше соин тупаса улыны. Ваньмыз сярысь Иеговалы вералэ. Тӥледыз  вӧсь карись адями понна вӧсяське. Иеговаез куре юрттыны тӥледлы та агайлэсь яке сузэрлэсь адӟыны сыӵе сямъёссэ, кудъёсыз понна со сое яратэ (Лука 6:28). Та вамышъёсты лэсьтыса но, тӥледлы йыркуръяськондэс вормыны секыт ке, та адямиен вераське. Сыӵе вераськонлы умой дасяськыны кулэ. Эн вунэтэ: агай тӥледыз юри вӧсь ӧз кары (Матф. 5:23, 24; 1 Кор. 13:7). Вераськыкуды агай сярысь уродзэ эн малпалэ. Нош мар кароно, кусыпъёстэс тупатэмез солэн уг поты ке? Оскондэс эн ыштэ, азьланяз но тырше кусыпъёстэс тупатыны. (Лыдӟе Колоссыослы 3:13.) Нош солэсь но кулэезгес, йыркуръяськыса эн улэ, малы ке шуоно со Иеговаен кусыпъёстэс лябӟытыны быгатэ. Та визь-кенешъёсты уже кутыса, тӥ возьматоды, Иеговаен эшъяськон тӥледлы котьмалэсь но дуно потэ шуыса (Пс. 118:165).

16. Мар карыны тыршоно ми пӧлысь котькудӥзлы?

¹⁶ Ми Иеговаез тау кариськомы, вын-агайёсынымы но сузэр-апайёсынымы ӵош солы огкылысь ужаны-тыршыны быгатӥськомы шуыса, «одӥг уллё» кадь «одӥг Возьмасьлэн» кивалтэмез улсын (Иоанн 10:16). «Иеговалэсь эриксэ быдэсъяны радъямын» книгалэн (ӟуч) 165-тӥ бамаз гожтэмын: «Табере тыныд тыршыны кулэ [кенешын тупаса улонэз возьыны]». Соин ик милемлы вын-агайёсмы но сузэр-апайёсмы шоры адями синмын учконо ӧвӧл, нош Иегова сямен учкыны тыршоно. Нош Иегова ми шоры учке пичи нылпиос шоры кадь, кудъёссэ туж яратэ. Нош тӥ вын-агайёс но сузэр-апайёс шоры озьы ик учкиськоды-а? Иегова адӟе но дунъя ваньзэ, мае тӥ соос понна лэсьтӥськоды (Матф. 10:42).

17. Мар карыны тӥлесьтыд мылкыддэс ӝутӥз та статья?

¹⁷ Ми яратӥськомы вын-агайёсмес но сузэр-апайёсмес, соин ик соосты вӧсь ум каре. Озьы ик ми соосты асьмелэсь бадӟымгес шуыса лыдъяськомы но вань сюлмысьтымы простить кариськомы. Лэзёно ӧвӧл йыркуръяськонъёслы Иеговаен кусыпъёсмес лябӟытыны. Ойдолэ вань кужмысьтымы «утчаломе сыӵе улонэз, кудӥз тупаса улонэз вае»! (Рим. 14:19).