ВАШКАЛА дыръя израиль калык коньдон сётылӥз, зэмос йыбырттонлы юрттон понна. Но со дырлы, куке Иисус музъем вылэ ужаны-тыршыны лыктӥз, вытъёсты тырон еврейёс понна валантэм но секыт луиз.

Скинияын, берлогес храмын но, ужан-тыршонлы юрттон понна, еврей калыкысь котькуд пиосмуртлы арлы быдэ ӝыны сӥкль (кык драхма) выт тыроно вал. Нырысетӥ даурын та коньдонэз уже кутӥзы, курбонъёсты вайылон понна но Иродэн пуктэм храмез эскерон-тупатъян понна. Одӥг пол еврейёс Пётрлэсь юазы, мар малпа Иисус та вытэз тырон сярысь. Христослэн кылъёсысьтыз адӟиськиз, со талы пумит ӧй вал шуыса. Озьы ик со Пётрлы валэктӥз, кытысь коньдон шедьтоно, сое тырон понна (Матф. 17:24—27).

Со сяна, Инмарлэн калыкез тырыны кулэ вал дасэтӥ люкетэз — басьтэм коньдонзылэсь яке бичам емышъёссылэсь дас процентсэ (Лев. 27:30—32; Лыд. 18:26—28). Религиозной кивалтӥсьёс калыкез косо вал ваньмызлэсь дасэтӥ люкетсэ сётыны, озьы ик «бутниклэсь, анислэсь, калямперлэсь» гинэ но. Иисус номыр пумит ӧз вера дасэтӥ люкетэз тырон пумысен. Озьы ке но со судъяз чеберъяськись книга тодӥсьёсты но фарисейёсты, малы ке шуоно соос «законлэсь туж бадӟымзэ» палэнтӥзы (Матф. 23:23).

Эшшо Иисус улон нуналъёсы еврей калык тырыны кулэ вал пӧртэм вытъёсты рим кивалтэтлы, кудӥз соку соосын кивалтӥз. Кылсярысь, музъем вылын ужасьёс бичам емышъёссылэсь коньдонэн яке ваньбурен 20—25 процентсэ тырыны кулэ вал. Озьы ик рим кивалтэт еврейёсты косэ вал котькуд лул понна выт тырыны. Куке фарисейёс та сярысь Исуслэсь юазы, Иисус шуиз: «Кесарьлэсьсэ кесарьлы сётэлэ, нош Инмарлэсьсэ — Инмарлы» (Матф. 22:15—22). Туннэ но христианъёс выт тырон шоры озьы ик учко.

Озьы ик вытъёсты тыризы со понна, мае ваё вал кыӵе ке ёросъёсысь яке нуо вал кыӵе ке ёросъёсы. Вытъёсты бичало вал портъёсын, шур вамен потан выж вылъёсын, ульча сэрегъёсын, кар капкаос дорын но базаръёсын.

Рим кивалтыку, вытъёсты тырыны туж секыт луиз. История удысысь Тацит нимо рим тодосчилэн верамезъя, Тиберий император дыръя, кудӥз Иисус улон нуналъёсы кивалтӥз, «Сирия но Иудея, кудъёсызлы туж бадӟым вытъёс тыроно вал, вытъёсты кулэстыны куронэн вазиськизы».

Югдур эшшо но секытгес луэ вал соин сэрен, кызьы вытъёсты бичазы. Вытъёсты бичаны правоез басьто вал аукционын. Сое басьтыны быгатӥзы соос, кинъёс тросгес коньдон ӵектӥзы. Нош та адямиос медъяло вал соосты, кинъёс адямиослэсь вытъёсты бичазы. Соосыз но, таосыз но выт бичаса узырмыны тыршизы. Кылсярысь, Закхейлэн но вал, дыр, медъям выт бичасьёсыз (Лука 19:1, 2). Соин ик валамон, малы со дыре адямиос йыркуръяськизы соин сэрен, кызьы вытъёсты бичан радъямын вал но малы соос выт бичасьёсты адӟемпотостэм каризы.