1. Мар вераз апостол Пётр Иерусалиме лыктэм адямиослы?

 ИЕРУСАЛИМЕ пӧртэм шаеръёсысь но пӧртэм кылын вераськись трос пиосмуртъёс но кышномуртъёс лыктӥзы. Соос ас синмынызы паймымон мае ке адӟизы. Огшоры, дышетскымтэ еврейёс соослэн кылъёсынызы вераськыны кутскизы! Та туж паймымон вал ке но, соосты эшшо но золгес паймытӥз со, мае соос кылӥзы Иисуслэн дышетскисьёсызлэсь. Апостол Пётр та трос адямиослы вазиськыса валэктӥз: соос утиськыны быгатозы, Иисус Христослы оскемзэс уж вылын возьматӥзы ке. Та кылъёс соослэн сюлмазы ик пыризы. Соос юазы: «Милемлы мар кароно?» Пётр соослы шуиз: «Ваньды... пылатӥське» (Ап. уж. 2:37, 38).

2. Мае ми эскеромы та статьяын? (Учке вылбамысь суредэз.)

² Со, мар луиз Пётрлэн верам кылъёсыз бере, туж паймымон вал. Со нуналэ ик ог 3 000 адямиос пылатӥськизы но Христослэн дышетскисьёсыз луизы. Озьы кутскиз дышетскисьёсты дасян уж, кудзэ Иисус аслэсьтыз дышетскисьёссэ быдэсъяны косӥз. Та уж туннэ но нуиське. Зэм но, адямиез пылатӥськонлы дасян понна, кӧня ке час гинэ уз тырмы. Куддыръя кӧня ке толэзьёс, ар яке тросгес но ортчыны быгатэ. Дышетскисьёсты дасян понна, туж тыршоно. Соос, кинъёс адямиосын Библиез дышето, сое туж умой тодо. Та статьяын ми эскеромы, кызьы юрттоно соослы, кинъёс Библиез дышето, Христослэн пылатӥськем дышетскисьёсыз луыны.

3. Мар карыны кулэ дышетскись, пылатӥськонлы дасяськон понна, Матфейлэсь 28:19, 20 лыдэ басьтыса?

³ Пылатӥськон понна дышетскисьлы улоназ пыртоно сое, малы дышетэ Библия. (Лыдӟе Матфейлэсь 28:19, 20.) Иисуслэн верамезъя, соку гинэ со кельшоз визьмо муртлы, кудӥз «гу гудӟыса пыдло пырем но коркаезлэсь инъетсэ из вылэ пуктэм» (Лука 6:47, 48; Матф. 7:24, 25). Нош кызьы ми дышетскисьлы юрттыны быгатӥськомы Библиысь басьтэм тодон-валанзэ улоназ пыртыны? Ойдолэ эскеромы куинь визь-кенешъёсты.

4. Кызьы ми дышетскисьлы юрттыны быгатӥськомы пичиен-пичиен пылатӥськонлы дасяськыны? (Озьы ик учке « Юрттэ дышетскисьлы ужпумъёс пуктыны но соосты быдэсъяны» рамкаез.)

⁴ Юрттэ дышетскисьлы ужпумъёс пуктыны. Малы со кулэ? Пуктэ син азяды: тӥ кытчы ке кыдёке мыныны дасяськиськоды ке, тӥ ужпум кутоды, дыр, дугдылыны чебер интыосы, кудъёсыз сюрес вылын пумиськозы. Солы луыса сюрес сокем секыт уз поты ни. Озьы ик дышетскись но аслыз пичиесь ужпумъёс пуктэ ке но соосты быдэсъя ке, пылатӥськыны ужпум солы сокем секыт уз поты ни. Со понна «Пумтэм вапумъёс ӵоже шумпотыса улэ!» книгаын вань рамкаос, кудъёсыз нимасько «Уж». Урок пумын эскере адямиен, кызьы рамкаын сётэм уж юрттоз солы эскерем материалэз улоназ пыртыны. Нош тӥ малпаськоды ке, дышетскисьлы мае ке умоятоно на шуыса, сое гожтыны луэ отчы, кытын гожтэмын «Мукетыз». Та рамкаез уже кутыса, тӥ дышетскисьлы юрттоды ас азяз пичиесь но бадӟымесь ужпумъёс пуктыны но соосты быдэсъяны.

5. Мар вераз Иисус узыр адямилы но малы, Марклэсь 10:17—22 лыдэ басьтыса?

⁵ Юрттэ дышетскисьлы улоназ воштӥськонъёс лэсьтыны. (Лыдӟе Марклэсь 10:17—22.) Кылсярысь, Иисус одӥг узыр адямилы вераз, солы вузано ваньзэ, маиз солэн вань, но берыктэм коньдонзэ куанеръёслы сётъяно шуыса (Марк 10:23). Иисус тодӥз: сыӵе бадӟымесь воштӥськонъёс лэсьтыны со адямилы секыт луоз. Озьы ке но со шонерак вераз, сое лэсьтыны кулэ шуыса. Малы? Малы ке шуоно Иисус та адямиез яратӥз. Куддыръя ми малпаськомы, дышетскись  воштӥськонъёс лэсьтыны дась ӧвӧл на шуыса. Соин ик ми ум дӥсьтӥське солэсь мылкыдзэ ӝутыны воштӥськонъёс лэсьтыны. Зэм но, адямилы дыр кулэ, мур пыӵам сямъёсызлэсь куштӥськон понна но выль адями луон понна (Кол. 3:9, 10). Но макем ӝоггес тӥ соин вераськоды, воштӥськонъёс лэсьтыны кулэ шуыса, сокем ӝоггес со соосты лэсьтоз. Озьы тӥ возьматоды, дышетскись сярысь сюлмаськиськоды шуыса (Пс. 140:5; Мад. 27:17).

6. Малы малпаськытӥсь юанъёс сётъяно?

⁶ Дышетон дыръя туж кулэ дышетскисьлэсь мылкыдзэ ӝутыны аслэсьтыз малпанзэ вераны. Соин ик сётъялэ солы малпаськытӥсь юанъёс, кудъёсыз тӥледлы валаны юрттозы, малы со оске но вала-а со эскериськись материалэз. Дышетскись сыӵе юанъёслы валэктонъёс сётъяны дышиз ке, вуонояз тӥледлы капчигес луоз эскерыны сыӵе юанъёсты но, кудъёсыз солы секытэсь пото. Малпаськытӥсь юанъёс ӵем кутӥсько «Пумтэм вапумъёс ӵоже шумпотыса улэ!» книгаын. Кылсярысь, 4-тӥ урокын вань таӵе юан: «Кызьы тӥ малпаськоды, кельше-а Иеговалы, куке тӥ солы нимызъя вазиськиськоды?», нош 9-тӥ урокын — «Мар сярысь тӥляд вӧсяськемды потэ?» Нырысь дышетскисьлы сыӵе юанъёслы валэктонъёс сётъяны секыт потыны быгатоз. Солы капчигес мед луоз шуыса, малпаське соин, кызьы Библиысь кылбуръёс но суредъёс герӟаськемын уроклэн нимыныз.

7. Кызьы улонысь учыръёс юртто милемлы адямиосты дышетыны?

⁷ Дышетскисьлэн воштӥськыны мылкыдыз мед луоз шуыса, солы улонысь учыръёсты верано. Шуом, адямилы кенешлэн пумиськонъёсаз ялан ветлыны секыт на. Соку тӥ быгатӥськоды солы возьматыны 14-тӥ урокысь «Тросгес тодэ» рамкаысь «Иегова мон сярысь сюлмаськиз» видеороликез. Та выллем видеороликъёслы ссылкаос трос урокъёсын вань. Тӥ шедьтоды соосты та выллем ик рамкаысь яке «Мургес эскере» люкетысь b. Со дыре ик эн ӵошатэ дышетскисьтэс кинэн ке мукетыныз но эн вералэ та выллем кылъёсты: «Со быгатӥз бере, тон но быгатод». Адями ачиз сыӵе йылпумъян мед лэсьтоз. Соин ик дышетскисьлэсь саклыксэ висъялэ видеороликысь валтӥсь малпанъёслы, кылсярысь, Библиысь валтӥсь кылбурлы яке солы, кызьы адями, кудӥз сярысь роликын возьматэмын вал, басьтэм тодон-валанзэ улоназ пыртыны быгатӥз но кызьы солы Иегова юрттӥз.

8. Кызьы дышетскисьлы юрттоно Иеговаез яратыны?

⁸ Юрттэ дышетскисьлы Иеговаез яратыны. Котькуд тупась учыре дышетскисьлэсь саклыксэ висъялэ Иеговалэн сямъёсызлы. Юрттэ солы валаны: Иегова — со шудо Инмар, кудӥз юрттэ соослы, кинъёс сое ярато (1 Тим. 1:11; Евр. 11:6). Дышетскисьлы валэктэ, Библиысь басьтэм тодон-валанъёссэ улоназ пыртӥз ке, со солы пайда ваёз шуыса. Нош со возьматэ, Иегова сое яратэ шуыса (Ис. 48:17, 18). Макем золгес дышетскись Иеговаез яратоз, сокем юнгес луоз солэн мылкыдыз кулэ луись воштӥськонъёс лэсьтыны (1 Иоанн 5:3).

9. Кызьы кылъёс, кудъёсыз гожтэмын Марклэсь 10:29, 30, дышетскисьёслы юрттыны быгато пылатӥськон понна малэсь ке но куштӥськыны?

⁹ Пылатӥськон понна дышетскисьёслы малэсь ке но куштӥськоно луоз. Узыр адямилы, кудӥныз Иисус вераськиз, быръён лэсьтоно вал. Куд-ог дышетскисьёслы но сыӵе ик быръён лэсьтоно. Оло нош, соослы ваньбурзэс кельтоно луоз, кылсярысь, ужзэс воштоно  луоз, кудӥз Библиысь возетъёслы пумит мынэ. Тросэзлы эшъяськемысь дугдоно луоз соосын, кинъёс Иеговаез уг ярато. Нош куд-ог дышетскисьёслы пумитъяськозы ӵыжы-выжыоссы, кудъёсызлы Иеговалэн Адӟись-Ивортӥсьёсыз уг кельшо. Иисус тодӥз: котькуд дышетскисьлы малэсь ке куштӥськыны капчи уз луы. Но со кылзэ сётӥз, со сьӧры мынӥсьёс бакель каремын луозы шуыса. Соослэн яратӥсь духовной семьязы луоз. (Лыдӟе Марклэсь 10:29, 30.) Нош мар карыны быгатӥськомы ми дышетскисьёс понна?

10. Малы дышето тӥледыз Мануэль агайлэн кылъёсыз?

¹⁰ Дышетскисьтылы эш луэ. Дышетскисьлы возьматыны кулэ, тӥ со сярысь сюлмаськиськоды шуыса. Тани мар вера Мексикаысь Мануэль агай: «Агай, кудӥз монэн Библиез дышетӥз, котькуд дышетон азьын юалляськиз, кыӵе мынам ужъёсы. Та юрттӥз мыным асме каньыл шӧдыны. Соин ик мон быгатӥ соин котьмар сярысь но вераськыны. Мон адӟи, со мон сярысь зэмзэ но сюлмаське шуыса».

11. Ми дышетскисьёсынымы дырмес ортчытъямы ке, кыӵе со соослы пайда ваёз?

¹¹ Иисус дышетскисьёсыныз дырзэ ортчытъяз. Тӥ но дышетскисьёсыныды дырдэс ортчытъялэ (Иоанн 3:22). Со улоназ воштӥськонъёс лэсьтэ ке, умой луысал сое куное ӧтьыны, кылсярысь, чай юыны, нуназеяны яке JW Broadcasting^® программаез учкыны. Дышетскисьлы со туж кельшоз, тужгес но праздникъёс дыръя, куке солы мӧзмыт луыны быгатэ. Тани мае тодаз вае Угандаысь Казибве агай: «Мон Иегова сярысь троссэ тодыны быгатӥ дышетонъёсмы дыръя, озьы ик соку но, куке дырме ортчытъяй агаен, кудӥз монэн Библиез дышетӥз. Мон адӟи, кызьы Иегова аслаз ужась-тыршисьёсыз сярысь сюлмаське но макем соос шудоесь. Ӵапак сыӵе улонэз ик мон утчай вал!»

12. Малы дышетонэ пӧртэм вын-агайёсты но сузэр-апайёсты ӧтьыны кулэ?

¹² Дышетонэ пӧртэм ивортӥсьёсты ӧте. Куддыръя малпан кылдыны быгатэ, капчигес луоз дышетонэ ветлыны мукет ивортӥсьёстэк  яке ялан одӥг ивортӥсен гинэ. Но ми дышетскись доры пӧртэм вын-агайёсын но сузэр-апайёсын ветлӥмы ке, со солы тросгес пайда ваёз. Тае адӟыны луэ Молдоваысь Дмитрийлэн кылъёсысьтыз. Со вера: «Котькуд ивортӥсь, кыӵе ке юанэз валэктыкуз, аслэсьтыз примеръёссэ вераз. Со юрттӥз мыным эскериськись юанъёс шоры пӧртэм палъёсысен учкыны. Со сяна, мон туж ик ӧй кышка ни, куке нырысетӥзэ кенешлэн пумиськоназ лыктӥ, малы ке шуоно отын мон тросэныз тодмо вал ини».

13. Малы дышетскисьлэсь мылкыдзэ ӝутоно кенешлэн пумиськонъёсаз ветлыны?

¹³ Дышетскисьлэсь мылкыдзэ ӝутэ кенешлэн пумиськонъёсаз ветлыны. Малы со кулэ? Ачиз Иегова аслэсьтыз ужась-тыршисьёссэ косӥз ӵош люкаськыны. Асьмелэн пумиськонъёсмы Инмарлы йыбыртъянлэн оглюкетэз луо (Евр. 10:24, 25). Со сяна, кенешысь вын-агайёсынымы но сузэр-апайёсынымы кусыпъёс кельшо ӵыжы-выжыосынымы кусыпъёслы. Пумиськонъёсамы лыктыса, ми соосын одӥг ӝӧк сьӧрын семьяен сиськыны люкаськиськомы кадь. Дышетскисьлэсь кенешлэн пумиськонъёсаз лыктыны мылкыдзэ ӝутыса, тӥ юрттӥськоды солы пылатӥськон понна кулэ луись вамыш лэсьтыны. Нош со котькинлы капчи ӧвӧл. Кызьы та удысын юрттыны быгатэ «Пумтэм вапумъёс ӵоже шумпотыса улэ!» книга?

14. Кызьы адямилэсь мылкыдзэ ӝутоно кенешлэн пумиськонъёсаз ветлыны?

¹⁴ Со сярысь, малы кулэ кенешлэн пумиськонъёсаз ветлыны, вераське 10-тӥ урокын. Та книгаез поттэмлэсь азьло куд-ог быгатӥсь ивортӥсьёсты куризы сое уж вылын эскерыны. Соос веразы, со туж пайдаё шуыса. Валамон, адямиез пумиськонэ ӧтён понна, возьмано ӧвӧл, куке тӥ соин 10-тӥ урокез эскероды. Тырше сое ӝоггес ӧтьыны но ялан ӧтьылэ. Котькуд дышетскисьлэн аслаз шуг-секытъёсыз вань. Соин ик валаны тырше, мар солы люкетэ кенешлэн пумиськонъёсаз ветлыны. Малпаське, маин тӥ солы юрттыны быгатӥськоды. Мылкыдды медаз куашка, адями пумиськонэ ӧтемдылы соку ик ӧз вазиськы ке. Чидасесь луэ но киостэс эн лэзе.

15. Малэсь кышканы быгатэ дышетскись?

¹⁵ Тодады вае со дырез, куке тӥ асьтэос Библиез дышетӥды. Ӧд кышкалэ-а тӥ, Иеговалэн Адӟись-Ивортӥсез луыса, тӥледлы тодытоно луоз шуыса? Оло нош, тӥ сюлмаськиды, ӵыжы-выжыосты но эшъёсты тӥледлы пумитъяськозы шуыса? Со озьы ик вал ке, соку тӥ дышетскисьтылэсь шӧдонъёссэ валалоды. Иисус тодӥз, куд-ог дышетскисьёслы кышкыт луоз шуыса. Со дыре ик со соослэсь мылкыдзэс ӝутӥз, кышканлы сётскытэк, азьланяз но Иеговалы ужаны-тыршыны (Матф. 10:16, 17, 27, 28). Кызьы Иисус аслаз дышетскисьёсызлы юрттӥз кышканъёссэс вормыны? Кызьы ми солэсь адӟем карыны быгатӥськомы?

16. Кызьы дышетскисез дышетоно осконэз сярысь мукетъёсыныз вераськыны?

¹⁶ Дышетскисьтэс пичиен-пичиен дышетэ осконэз сярысь мукетъёсыныз вераськыны. Куке Иисус нырысетӥзэ дышетскисьёссэ тодытыны ыстӥз, соос сюлмаськизы, дыр. Мар соослы юрттӥз? Иисус соослы валэктӥз, кытчы мыноно но мар верано (Матф. 10:5—7). Кызьы ми Иисуслэсь адӟем карыны быгатӥськомы? Дышетскисьтылы вералэ, кытын со тодытыны быгатэ. Кылсярысь, Библиысь кыӵе ке зэмлыкез эскерыса, юалэ, тодмоосыз пӧлысь кинлы сое тодыны кулэ. Собере юрттэ солы дасяськыны. Со понна возьматэ, кызьы тӥ асьтэос та зэмлыкез огшоры кылъёсын валэктысалды. Дышетскисеныды ӵош малпаське, мар адямилы вераны луоз. Со понна  уже кутэ «Пумтэм вапумъёс ӵоже шумпотыса улэ!» книгаысь «Кин ке но вераны быгатоз» но «Кин ке но юаны быгатоз» рамкаосты. Пусъе: адямиосын вераськыку, туж кулэ Библиез уже кутыны, озьы ик огшоры но лякытэн вераськыны.

17. Кызьы ми дышетскисьлы юрттыны быгатӥськомы Иеговалы оскиськыны? (Матфей 10:19, 20, 29—31).

¹⁷ Дышетскисьтэс Иеговалы оскиськыны дышетэ. Иисус аслэсьтыз дышетскисьёссэ оскытӥз, Иегова соослы одно ик юрттоз шуыса, малы ке шуоно со соосты туж яратэ. (Лыдӟе Матфейлэсь 10:19, 20, 29—31.) Дышетскисьлы тодаз вайытэ, Иегова солы но юрттоз шуыса. Солы капчигес луоз Иеговалы оскиськыны, ӵош вӧсяськыкуды, тӥ солэн ужпумъёсыз сярысь верады ке. Польшаысь Францишек агай вера: «Агай, кудӥз монэн Библиез дышетӥз, ӵем вӧсяськиз, мон пуктэм ужпумъёсме быдэстыны мед быгатом шуыса. Мон адӟи, кызьы Иегова солэн вӧсяськонъёсызлы ответ сётылӥз, соин ик ачим но вӧсяськыны кутски. Мон шӧдӥ Иеговалэсь юрттэмзэ, куке уж дорысьтым куриськылӥ, кенешлэн пумиськонъёсаз но конгрессъёсы ветлон понна».

18. Кызьы Иегова учке дышетскисьёсты дасян уж шоры?

¹⁸ Иегова туж сюлмаське соос сярысь, кинъёс Библиез дышето. Со вала, макем тырше солэн калыкез, адямиослы соин матысь кусыпъёс будэтыны юрттон понна. Иегова яратэ та тыршись дышетӥсьёсты (Ис. 52:7). Ми асьмеос кинэн ке Библиез дышетӥськомы-а яке вын-агайёс но сузэр-апайёс милемыз асьсэлэн дышетоназы ӧтё-а, ойдолэ уже кутомы та статьяысь визь-кенешъёсты. Озьы ми юрттомы адямиослы Инмарен кусыпъёссэс юнматыны но пылатӥськонлы дасяськыны.