Кыкетӥ дунневыл ож дыръя атае но анае Эстониысь Германие кошкизы. Мон отын вордӥськи ини. Собере соос Канадае выжизы. Канадаын ми Отта́ва кар котыре интыяськимы. Ми улӥмы курегъёсты возён интыын. Ми туж куанересь вал ке но, ӵукна ӝӧк выламы милям котьку но курегпуз вал.

Огпол Иеговалэн Адӟись-Ивортӥсьёсыз анаелы лыдӟизы Усьтӥськонэз 21:3, 4. Та кылъёс сокем сюлмаз пыризы, солэн синкылиосыз ик потӥзы. Анае но атае Библиез дышетыны кутскизы. Собере соос ӝоген пылатӥськизы.

Атае но анае англи кылын туж ик умой ӧз вераське, озьы ке но соос зэмлыкез туж яратӥзы. Атае ужаз никелез поттон заводын Са́дбери карын (Онта́рио провинция). Котькуд кӧснуналэ кадь уйин, секыт ужамез бере, атае монэ но Сильвия сузэрме тодытыны сьӧраз басьтэ вал. Котькуд арнянуналэ быдэс семьяенымы ми «Возьмаськон башняез» эскеримы. Анае но атае дышетӥзы монэ Инмарез яратыны. Та мылкыдме ӝутӥз 1956-тӥ арын улонме Иеговалы сӥзьыны. Соку мыным 10 арес вал. Инмарез зол яратэмзы быдэс улонэ ӵоже монэ туж юнматӥз.

Школаме йылпумъяме бере ужаны-тыршыны мылкыды пуксиз. Мон малпай, пионер луи ке, быдэс дуннеез самолётэн котыртон понна, коньдон поттыны ноку уг быгаты шуыса. Мон радиоын диджей луыса ужаны кутски. Уже мыным кельше вал. Озьы ке но ӝытъёсы но ужано вал. Таин сэрен мон ялан пумиськонъёсты кельтылӥ но трос дырме ортчытъяй соосын, кинъёс Инмарез ӧз яратэ. Берлогес возьытлыке монэ йырйыны кутскиз но, мон мае ке воштыны малпай.

Мон кошки О́шава каре (Онтарио провинция). Отын мон тодматски Рэй Но́рман агаен, солэн Ле́сли сузэреныз но мукет пионеръёсын. Соос монэ туж умой пумитазы. Куке мон адӟи, макем соос шудоесь, мон пуктэм ужпумъёсме выльысь эскери. Та агайёс но сузэръёс мынэсьтым мылкыдме ӝутӥзы пионер луыны. 1966-тӥ арын куарусёнэ мон та ужпумме быдэстӥ. Улонэ мыным шумпотон вае вал. Но азьланяз монэ витьымтэ воштӥськонъёс возьмазы.

Школаын дышетскыкум, мон заявление гожтӥ ужаны-тыршыны Канадаысь Вефильын, кудӥз Торо́нто карын интыяськемын вал. Берлогес, куке мон пионер вал ини, монэ ӧтизы Вефильын 4 ар ӵоже ужаны-тыршыны. Но мыным Лесли туж кельше  вал. Соин ик мон кышкай, соглаш кариськи ке, сое ноку уг адӟы ини шуыса. Трос вӧсяськыса, мон соглаш кариськи Вефиле мыныны но секыт сюлмын Леслиен люкиськоно луи.

Вефильын мон прачечнойын ужай, собере секретарь луи. Со куспын Лесли кутскиз нимысьтыз пионер луыса ужаны-тыршыны Гатино́ карын (Квебе́к провинция). Мон ӵем малпасько вал: «Мар меда со али каре? Шонер-а мон ужпум кутӥ?» Собере монэ возьмаз воштӥськон, кудӥз бадӟым шумпотон вайиз. Леслилэсь Рэй агайзэ Вефиле ӧтизы. Ми соин ӵош одӥг комнатаын улыны кутскимы! Озьы ми Леслиен эшъяськонмес азьланьтӥмы. 1971-тӥ арын 27-тӥ тулыспалэ ми кузпалъяськимы. Со вал Вефильын ньыль ар ӵоже ужан-тыршонэлэн берпуметӥ нуналыз.

Монэ но Леслиез ыстӥзы Квебекысь француз кенеше. Кӧня ке ар ортчыса, милемыз выль воштӥськон возьмаз: монэ куризы ёросэз чаклась луыса ужаны-тыршыны. Нош мыным 28 арес гинэ вал. Мон малпай, та ужез быдэстон понна, мон укыр егит но сое быдэстыны уг быгаты шуыса. Но мыным туж юрттӥзы кылъёс, кудъёсыз гожтэмын Иеремиялэн 1:7, 8. Со сяна, мон мукетыз сярысь но сюлмаськи. Лесли кӧня ке пол авариосы сюрылӥз, соин ик солы уйин изьыны секыт вал. Быгатомы-а ми мыным сётэм ужез быдэсъяны? Дуно кышное мыным шуиз: «Иегова милемлы мае ке ӵектэ бере, ойдо соглаш кариськыса утчаломы?» Ми соглаш луимы но, мон кышноеным 17 ар ӵоже ёросэз чаклась луыса ужай-тырши.

Мон, вань кужымме поныса, ужме быдэсъяны тырши. Соин ик Леслилы дыры котьку ик уг тырмы вал. Но берлогес луиз учыр, кудӥз монэ тросэзлы дышетӥз. Огпол вордӥськон нуналэ ӵукна ӧсамы кин ке но жингыртӥз. Урамын нокин ӧй вал. Нош ӧс выжыын корзина сылӥз, кудаз понэмын вал ӝӧккышет, емышъёс, сыръёс, нянь, вина, бокалъёс но пичи гожтэт. Отын гожтэмын вал: «Кышнодэ пикнике нуллы». Нош кинлэсь ваньмыз та, гожтэмын ӧй вал. Соку туж чебер шундыё нунал вал. Но мон Леслилы валэктӥ, мыным речьёсме дасяно но соин ӵош мыныны уг быгаты шуыса. Со ваньзэ валаз ке но, мылкыдыз кӧня ке куашказ. Мон дасяськыны пукси. Но монэ возьытлыке йырйыны кутскиз. Мынам тодам лыктӥзы кылъёс, кудъёсыз гожтэмын Ефесъёслы 5:25, 28. Мыным ачиз Иегова вераз кадь: «Ре́йно, кышноедлы саклык висъя». Мон вӧсяськи но Леслилы шуи: «Кошким!» Со туж шумпотӥз! Ми шур дурын туж чебер инты шедьтӥмы но ӝӧккышетмес вӧлдӥмы. Со вал одӥгез тужгес но умой нунал, кудзэ ми ӵош ортчытӥмы. Мон речьёсме но дасяны вуи.

Мыным кельше вал ёросэз чаклась луыса ужаны-тыршыны. Ми быдэс Канадаез ортчимы: Британ Колумбиысен Ньюфа́ундленд шормуӵозь. Пичи дырысьтым пӧртэм интыосы вуылыны малпанэ быдэсмиз. Мон малпаськисько вал Галаад Школа  сярысь, но мынам миссионер луэме уг поты вал. Мон малпасько вал, миссионеръёс — со кыӵе ке нимысьтыз адямиос но мон озьы уг быгаты шуыса. Со сяна, мон кышкай, монэ ыстозы шуыса Африкаысь кыӵе ке шаере, кытын эпидемиос вӧлмо но ожмаськонъёс мыно. Мон Канадаын шумпотыса ужасько-тыршисько вал.

1992-тӥ арын луонлык кылдӥз ветлыны шаеръёсы, кудъёсыз азьвыл Совето Союзэ пыро вал. Соку милесьтым юазы, уг поты-а милям Эстониын миссионеръёс луыса ужаммы-тыршеммы. Ми понна со малпамтэ шорысь вал. Ми вӧсяськимы но нош ик малпамы: «Иегова милемлы мае ке ӵектэ бере, оло нош, соглаш кариськыса утчано?» Ми соглаш луимы но, мон капчиен шокчи: «Ну ярам, та Африка ӧвӧл ук».

Ми соку ик эстон кылэз дышетыны кутскимы. Кык толэзь ортчыса, монэ куризы ёросэз чаклась луыса ужаны-тыршыны. Милемлы ветлоно вал 46 кенешъёсы но куд-ог группаосы, кудъёсыз интыяськемын вал Балтика зарезь котырысь куинь шаеръёсын но Калининградын. Нош со понна ӧжыт ке но вераськыны быгатоно вал латыш, литва но ӟуч кылъёсын. Со капчи ӧй вал. Озьы ке но агайёс но сузэръёс тыршеммес дунъязы но котьку юрттыны дась вал. 1999-тӥ арын Эстониын филиал усьтӥськиз. Мон филиаллэн комитетаз ужаны-тыршыны кутски То́мас Э́дур, Ле́мбит Ра́йле но То́мми Ка́уко агайёсын ӵош.

Ми тодматскимы трос Адӟись-Ивортӥсьёсын, кудъёссэ куке но Сибире келязы. Соосты лек уйылӥзы-уллязы но семьяосынызы люкизы ке но, соос йыркуръяськыса ӧз улэ, нош шумпотыса но ӟырдыт мылкыдын Инмар сярысь мукетъёсызлы вераллязы. Соос шоры учкыса, ми валамы, ми но, шумпотонмес ыштытэк, ваньзэ чиданы быгатомы шуыса.

Трос аръёс ӵоже милям трос ужъёсмы вал, нош шутэтскон понна дырмы туж ик ӧй вал. Кыӵе ке но дыре Лесли шӧдӥз, жаде шуыса. Ми соку ик ӧм валалэ, со фибромиалгия висёнэз сэрен шуыса. Ми малпаськыны кутскимы Канадае берытскон сярысь. Со вакытэ милемыз ӧтизы Филиалъёслэн комитетъёсысьтызы агайёслы школае, кудӥз ортчытӥськиз Па́ттерсонын (Огазеяськем штатъёс, Нью-Йорк штат). Соку мон ӧй но тоды, быгатомы-а ми отчы мыныны. Ми ӟырдыт вӧсяськимы но соглаш кариськимы. Иегова кутэм ужпуммес бакель кариз. Дышетскыкум Лесли эмъяськиз. Кӧня ке дыр ортчыса, ми быгатӥмы азьвыл ужъёсмес быдэсъяны.

2008-тӥ арын одӥг ӝытэ, куке ми Эстониын вал ини, мыным валтӥсь кивалтонниысь жингыртӥзы но юазы, дась-а ми Конгое мыныны. Мон воксё абдрай, тужгес но ӵуказеяз ик ответ сётоно шуыса. Та сярысь со ӝытэ ик мон Леслилы ӧй вера, малы ке шуоно тодӥ, со уйбыт изьыны уз быгаты шуыса. Нош со интые, ачим уйбыт ӧй изьы. Мон Иеговалы вӧсяськи но верай, малы Африкае мыныны кышкасько.

 Мукет нуналаз мон ваньмыз сярысь Леслилы верай. Ми малпамы: «Иегова милемыз Африкае ӧте. Соглаш кариськытэк, кытысь ми тодомы, милям номыр уз пӧрмы шуыса?» Соин ик Эстониын 16 ар ӵоже улэммы бере, ми Кинша́са каре кошкимы. Филиал чебер садын интыяськемын вал. Отын ваньзы гань-гань улӥзы. Лесли соку ик поттӥз открыткаез, кудӥз милям Канадаын вал ини. Отын гожтэмын вал: «Сяськаяськы отын, кытчы тонэ мерттӥзы». Конгоын ми эшъяськимы агайёсын но сузэръёсын, озьы ик адямиосын Библиез дышетыны кутскимы. Миссионеръёс луыса ужан-тыршон милемлы бадӟым шумпотон вайиз. Озьы ик милемыз куризы ветлыны мукет филиалъёсы. Талы луыса ми Африкаысь ог 13 шаеръёсы вуылӥмы. Ми тодматскимы пӧртэм калыкъёсысь адямиосын но соослэсь чеберзэс адӟимы. Азьвыл кышканъёсы быризы. Ми Иеговалы туж тау каримы, со милемыз Африкае ыстӥз шуыса.

Конгоын милемыз пӧртэм сиёнэн куноязы, нымы-кибыосты но веръяны ӵектылӥзы. Азьвыл мон ӧй но малпа, сыӵе сиёнэз сиё шуыса. Нош агайёс но сузэръёс соосты туж ческыт потыса сиизы. Ми но веръяны малпамы, та сиён милемлы туж кельшиз.

Ми ветлӥськомы вал шаерлэн шундыӝужан палаз, вын-агайёсты юнматон но соослы ваньзэ кулэзэ ваён понна. Со интыосын бугыръяськисьёс гуртъёс вылэ урдскыло вал. Соослэн ки улазы ӵем дыръя кышномуртъёс но нылпиос сюрылӥзы. Тросэз Адӟись-Ивортӥсьёс туж куанер улӥзы. Но улӟытонлы юн оскемзы, Иеговаез зол яратэмзы но организацилы оскымон луэмзы милемыз туж юнматӥз. Соослэн улонзы милемыз эшшо огпол малпаськытӥз, малы ми Иеговалы ужаськомы-тыршиськомы. Та осконмес юнматӥз. Куд-ог вын-агайёс коркаоссэс но вань будэтэм емышъёссэс ыштӥзы. Та тодам вайытӥз, адями улэм-вылэмзэ туж ӝог ыштыны быгатэ, нош Иеговаен кусыпъёс самой валтӥсез шуыса. Туж секыт дыръя но вын-агайёс ӝожтӥськыса туж ик ӧз улэ. Соослэн мылкыдзы милемыз туж юнматӥз. Ми валамы, тазалыкен герӟаськем яке мукет шуг-секытъёс дыръя кышканлы сётсконо ӧвӧл шуыса.

Таин воштӥськонъёс ӧз быре: милемыз куризы Гонконгысь филиалэ мыныны. Ми ӧм но малпалэ, шундыӝужан палан уломы шуыса! Но ми соглаш  луимы, малы ке шуоно та аръёс куспын трос пол адӟимы ини Иеговалэсь сюлмаськемзэ. 2013-тӥ арын ми бӧрдыса ик дуно эшъёсмес но Африкаысь чебер интыосты кельтыса кошкимы. Ми ӧм тодэ, мар милемыз азьланяз возьма.

Африкаын улонэн ӵошатыса, Гонконгын улон чылкак мукет. Татын туж трос адямиос уло. Кантон диалектэз дышетыны капчи ӧй вал. Но вӧзамы яратӥсь вын-агайёс вал. Со сяна, милемлы туж кельшиз татысь сиён. Вефильын уж тросгес но тросгес луиз. Юртъёслы дунъёс но туж ӝог будӥзы. Соин ик Кивалтӥсь кенеш ужпум кутӥз филиаллэсь троссэ юртъёссэ вузаны. Ӝоген, 2015-тӥ арын, ми выжимы Лымшор Кореяе, кытын али но ужаськомы-тыршиськомы. Корей кыл но капчи ӧвӧл. Кылмес вӧлятон понна, милемлы трос дышетсконо на. Но огъя оскисьёсмы тыршеммы понна милемыз ушъяло. Та понна ми соослы туж тау кариськомы.

Выль эшъёсты шедьтыны котьку ик капчи ӧвӧл. Но ми валамы: куное ӧтьыса, адямиосын ӝоггес тодматскыны луэ. Озьы ик ми адӟимы, вын-агайёслэн, пӧртэмлыкъёссы сярысь, огкадез тросгес шуыса. Зэм но, Иегова милемыз туж паймымон кылдытӥз: ми быгатӥськомы сюлэмъёсмес паськыт усьтыны но туж трос адямиосын эшъяськыны (2 Кор. 6:11).

Ми валамы: адямиос шоры Иегова сямен учконо, озьы ик адӟоно, кызьы со милемыз яратэ но ми сярысь сюлмаське. Куке милям мылкыдмы куашкамын вал яке куке ми малпамы, мукетъёсыз милемыз туж ик уг ярато шуыса, ми эшъёсмылэсь открыткаоссэс но гожтэтъёссэс лыдӟылӥмы. Ми ас выламы шӧдӥмы, кызьы Иегова вӧсяськонъёсмылы ответ сётылӥз. Со котьку но милемыз оскытэ вал, милемлы юрттоз но милемыз юнматоз шуыса.

Та аръёс куспын ми Леслиен валамы: кӧня гинэ ужъёсмы медам луэ, ог-огмылы дыр одно ик шедьтыны кулэ. Озьы ик ми валамы: астэ серекъяны быгатоно, тужгес но соку, куке выль кылэз дышетӥськод. Котькуд ӝыт ми тыршиськомы тодамы вайыны, мар понна Иеговаез тау кареммы луэ.

Зэмзэ вераса, мон ӧй но малпа, куке но миссионер луо но мукет шаеръёсын ужало-тыршо шуыса. Но мон валай: Иеговаен номыр луонтэмез ӧвӧл. Тодам лыкто Иеремия пророклэн кылъёсыз: «Иегова, тон монэ пӧяд» (Иер. 20:7, ВД). Зэм но, Иегова милемыз трос пол малпамтэ шорысь шумпоттылӥз. Со милемлы трос кузьымъёс кузьмаз — пичи дырысьтым пӧртэм шаеръёсы самолётъёсын лобаны малпанме но быдэстӥз. Филиалъёсы ветлыса, ми вить континентъёсы вуылӥмы. Та сярысь пичи дыръям мон ӧй но малпа. Кыӵе гинэ ужъёс милемлы медам сётъялэ, Лесли котьку но мыным юрттылӥз. Та понна со мыным туж дуно.

Мон тодам возьыны тыршисько, кинлы но малы ми ужаськомы-тыршиськомы. Туннэ шумпотыса улонмы возьматэ, макем умой улон луоз азьланяз, куке ми пырак уломы. Малы ке шуоно соку Иегова вань улэп макеосты тыр кароз! (Пс. 144:16).