1, 2. Маин милям шуг-секытъёсмы кельшо Лотлэн шуг-секытъёсызлы?

 АСЬМЕ нуналъёсы адямиос асьсэды уродгес но уродгес возё. Тае адӟыса, ми шӧдӥськомы сое ик, мае шӧдӥз шонерлыко Лот. Со «ортчыт азыса-калгыса улӥсь адямиос пӧлын» улыны жадиз, малы ке шуоно тодӥз, инмысь Атаез сыӵе ужъёсты адӟемпотостэм каре шуыса (2 Пётр 2:7, 8). Лот Инмарлэсь кышказ но сое яратӥз. Талы луыса со ассэ котырысьтыз адямиос кадь ӧз возьы. Ми но улӥськомы адямиос пӧлын, кудъёсыз Иеговалэсь вылӥ эсэпъёссэ лыдэ уг басьто. Но ми быгатӥськомы асьмеды чылкыт возьыны. Со понна дышетсконо Инмарез яратыны но солэсь кышканы (Мад. 14:2).

² Милемлы юрттон понна, Иегова Мадёнъёсын книгаез сётӥз. Та книга милесьтым мылкыдмес ӝутэ асьмеды шонер возьыны. Вань христианъёслы — пиосмуртъёслы но кышномуртъёслы, арлыдоослы но егитъёслы — умой луоз та книгаысь визь-кенешъёс вылын малпаськыны.

3. Мадёнъёсты 17:3 лыдэ басьтыса, малы аслэсьтыд сюлэмдэ утёно? (Озьы ик учке суредэз.)

³ Милемлы малпанъёсмес, шӧдонъёсмес но мылпотонъёсмес утёно, малы ке шуоно Иегова сюлэммес чакла-эскере. Со адӟе сое, мае мукетъёсыз уг адӟо, но тодэ, кыӵеесь ми зэмзэ ик луиськомы. (Лыдӟе Мадёнъёсты 17:3.) Солы кельше, куке ми визьмес тырмытӥськомы визьлыкен, кудӥз улон сётэ (Иоанн 4:14). Соин ик ми тыршиськомы палэнтыны малпанъёсты но ужъёсты, кудъёсыз Шайтанлэсь но солэн дуннеезлэсь пото (1 Иоанн 5:18, 19). Иеговаен кусыпъёсмес юнматыса,  ми сое эшшо но золгес яратӥськомы но гажаськомы. Милям инмысь Атаймес вӧсь кареммы уг поты. Соин ик сьӧлыко ужъёс сярысь малпанъёс гинэ но милемлы юрӟым пото. Сьӧлык лэсьтыны мылкыд ӝутскыку, умой луоз аслэсьтыд юаны: «Потэ-а мынам валаса вылысь вӧсь кареме сое, кин монэ туж зол яратэ?» (1 Иоанн 4:9, 10).

4. Кызьы Иеговалэсь кышкан одӥг сузэрлы сьӧлыклэсь палэнскыны юрттӥз?

⁴ Хорватиысь Марта b сузэр, ӧжыт гинэ азон-калгон сьӧлыке ӧз пыры. Со гожтӥз: «Соку мыным туж секыт вал шонер малпаськыны но шонертэм мылкыдме палэнтыны. Но монэ Иеговалэсь кышкан утиз». Кызьы солы юрттӥз Инмарлэсь кышкан? Марта малпаськиз, мар луысал, со шонертэм мылкыдызлы сётскысал ке. Со милемлы умой адӟем карон возьматӥз. Самой уродэз, кытчы вуттыны быгатэ сьӧлык,— христиан мурт Иеговаез ӝоже уськытоз но пырак дауръёс ӵоже солы ужаны-тыршыны уз быгаты ини (Ул.-выл. 6:5, 6).

5. Малы тӥледыз дышетэ Лео агайлэн учырез?

⁵ Ми Иеговалэсь кышкамы ке, соку урод ужъёсты шонере поттыны ум тырше. Тае ас вылаз шӧдӥз Конгоысь Лео агай. Пылатӥськемез бере ньыль ар ортчыса, со умойтэм адямиосын эшъяськиз. Лео малпаз, со ачиз урод ужъёс уг лэсьты бере, со Иеговалы пумит уг сьӧлыка шуыса. Но ӝоген урод эшъёсыз сэрен со трос вина юыны кутскиз но азон-калгон сьӧлыке пыриз. Соку со тодаз вайиз, малы сое дышетӥзы христиан луись анай-атаез но кыӵе со шудо вал, Иеговалэсь кылзӥськыса улыкуз. Та юрттӥз солы урод ужъёссэ кельтыны но тӧроослэн юрттэменызы Инмар доры берытскыны. Туннэ Лео тӧро но нимысьтыз пионер луыса ужа-тырше.

6. Кыӵе кык кышномуртъёс сярысь ми вераськомы?

 ⁶ Ойдолэ эскеромы Мадёнъёсын книгаысь 9-тӥ люкетэз. Отын визьлык но визез ыштон ӵошатӥсько кык кышномуртъёсын. (Ӵошатэ Римъёслы 5:14; Галатъёслы 4:24.) Кыкез ик та кышномуртъёс вазисько укылтэмъёслы, яке вакчи визьем муртъёслы. Та кышномуртъёс верало кадь: «Пырелэ мон доры, сиелэ, юэлэ!» (Мад. 9:1, 5, 6, 13, 16, 17). Соослэн ӧтёнъёссы одӥг кадесь ке но, бервылъёссы туж пӧртэмесь луозы. Туннэ Шайтанлэн дуннеез выемын азон-калгонэн но порнографиен герӟаськем ужъёс пӧлы (Еф. 4:19). Соин ик милемлы туж кулэ дышетскыны Инмарлэсь кышканы но урод ужъёслэсь палэнскыны (Мад. 16:6). Озьыен, ваньмылы милемлы — пиосмуртъёслы но, кышномуртъёслы но — умой луоз Мадёнъёсын книгаысь 9-тӥ люкетэз эскерыны.

7. Мадёнъёсты 9:13—18 лыдэ басьтыса, мар возьма соосты, кинъёс «визьзэ ыштэм... кышномурт» доры пыро? (Озьы ик учке суредэз.)

⁷ Саклыкмес висъяломы, мар карыны ӧте «визьзэ ыштэм... кышномурт». (Лыдӟе Мадёнъёсты 9:13—18.) Со укылтэмъёсты ӧте ас дораз пырыны но сиськыны, тодэ ке но, мар луоз со адямиосын. Со доры пырисьёсты кулон возьма. Оло нош, тӥляд тодады лыкто та выллем ик ӵошатонъёс, кудъёсыз сярысь вераське Мадёнъёсын книгаысь мукет люкетъёсын. Отын Библия палэнскыны ӧте «калгись кышномуртлэсь» но «аслаз кылыныз кӧясь-вӧясь» кышномуртлэсь: «Солэн корказ пыран кулонэ нуэ» (Мад. 2:11—19). Нош Мадёнъёсын 5:3—10 вераське «мурт кышномурт» сярысь, кудӥзлэн «пыдъёсыз кулон доры васько».

8. Кыӵе быръён милемлы лэсьтыны кулэ?

⁸ Соослы, кинъёс «визьзэ ыштэм... кышномуртлэсь» ӧтёнзэ кыло, бырйыны кулэ: ӧтёнэзлы соглаш кариськоно яке сое палэнтоно. Куддыръя милемлы но быръёно луоз, дыр. Кызьы ми асьмеды возёмы, азон-калгонэн герӟаськем сьӧлыке пырыны мылкыдмы ӝутскиз ке? Мар ми каромы, телевизорамы, смартфонамы яке планшетамы порнографиен герӟаськем суред потӥз ке?

9, 10. Малы азон-калгонлэсь палэнсконо?

⁹ Милям вань трос мугъёсмы азон-калгонлэсь палэнскыны. «Визьзэ ыштэм... кышномурт» вера: «Лушкам ву ческыт йӧтэ». Мар со сыӵе «лушкам ву»? Библиын картлэн но кышнолэн кусыпъёссы ӵошатӥсько сюэз юзматӥсь вуэн (Мад. 5:15—18). Пиосмурт но кышномурт гожтӥськемын ке, озьы ик соос асьсэды чылкыт возё ке, соос быгато сыӵе  кусыпъёссылы шумпотыны. Но тае уг луы вераны «лушкам ву» сярысь — азон-калгон сярысь. Ӵем дыръя адямиос азон-калгон сьӧлыке пыро мукетъёсызлэсь лушкемен, лушкаськисьёс кадь. «Лушкам ву» ческыт потыны быгатэ тужгес но соослы, кинъёс малпало, сьӧлыкамзы понна соослы номыр уродэз уз луы шуыса. Но со озьы ӧвӧл! Малы ке шуоно Иегова ваньзэ адӟе. Самой уродэз, кытчы вуттыны быгатэ сыӵе сьӧлык,— адями Иеговалы ярамон уг луы ини. Нош соку отын номыр «ческытэз» ӧвӧл ини (1 Кор. 6:9, 10). Но та ваньмыз ӧвӧл на.

¹⁰ Азон-калгон сьӧлык возьытэ вуттэ. Сыӵе сьӧлыке пырисьёс асьсэды гажамысь дугдо. Нылмуртъёс малпамтэ шорысь секытэн луо. Семьяос люкисько. Соин ик туж визьмо луысал «визьзэ ыштэм... кышномуртлэн» коркаезлэсь палэнтӥ ортчыны! Та кышномуртлэн ӧтёнэзлы соглаш кариськыса, Иеговаен кусыпъёс гинэ уг сӧрисько. Азон-калгонэ пырись тросэз адямиос висьыны кутско сыӵе висёнъёсын, кудъёсыз кулонэ но вутто (Мад. 7:23, 26). 9-тӥ люкетысь 18 кылбурын вераське, «визьзэ ыштэм... кышномуртлэн» куноосыз «дунне пыдэслэн мурдалаяз» шуыса, яке соос кулэмын. Соку малы тросэз адямиос та кышномуртлэн ӧтёнэзлы соглаш карисько но солэн сьӧлтэтаз сюро? (Мад. 9:13—18).

11. Малы порнография бадӟым изъян вае?

¹¹ Кылсярысь, туннэ туж вӧлмемын порнография. Куд-огъёсыз уг валало, со туж кескич сьӧлтэт шуыса. Соослэн малпамзыя, отын номыр уродэз ӧвӧл. Но порнография туж бадӟым изъян вае. Соин сэрен адямиос асьсэды но мукетъёсты гажамысь дугдо. Соослэн сое выльысь но выльысь учкемзы потэ. Азон-калгонэн герӟаськем суредъёслэн туж бадӟым кужымзы вань. Соос йырвизьме туж мур пыро, соин ик соосты вунэтыны туж секыт. Со сяна, порнография, шонертэм мылпотонъёсты кысэм интые, соосты эшшо но пуромытэ (Иак. 1:14, 15; Кол. 3:5). Тросэз порнографиез учкемзы бере азон-калгон сьӧлыке пыро.

12. Кызьы возьматоно, ми палэнтӥськомы шуыса суредъёсты, кудъёсыз азон-калгон сьӧлыке вуттыны быгато?

¹² Ми христианъёс бере, мар милемлы кароно, электрон тӥрлыкамы порнографиен герӟаськем суред потӥз ке? Сыӵе суредэз ӝегатскытэк син азьысьтымы басьтоно. Мар милемлы юрттоз? Тодамы возёно, Иеговаен кусыпъёс — ми понна самой дуноез шуыса. Кыӵе ке но суредъёс порнографиен уг лыдъясько ке но, соос азон-калгон мылкыдэз ӝутыны быгато. Малы христианъёслы сыӵе суредъёс шоры учконо ӧвӧл? Малы ке шуоно милям малпаммы но уг поты азон-калгон сьӧлыке пырон сярысь (Матф. 5:28, 29). Таиланд шаерысь Дэвид агай вера: «Мон котьку аслэсьтым юасько: „Та порнография ӧвӧл ке но, кельшоз-а Иеговалы, мон сое учки ке?“ Таӵе малпаськон юрттэ мыным асме визьмо возьыны».

13. Мар юрттоз милемлы асьмеды визьмо возьыны?

¹³ Ми быгатомы асьмеды визьмо возьыны, Иеговаез ӝоже уськытыны кышкамы ке. Инмар азьын шонер кышкан — «визьлыклэн кутсконэз» (Мад. 9:10). Та сярысь умой гожтэмын Мадёнъёсын книгаысь 9-тӥ люкетлэн кутсконаз. Татын вераське кыкетӥез кышномурт сярысь. Таиз кышномурт ӵошатӥське визьлыкен.

14. Кыӵе ӧтён сярысь вераське Мадёнъёсын 9:1—6?

¹⁴ Лыдӟе Мадёнъёсты 9:1—6. Та куать кылбуръёсын гожтэмын Иегова Кылдытӥсьмылэн ӧтёнэз, кудӥз бордысь зэмос визьлык потэ (Мад. 2:6; Рим. 14:26). Татын вераське сизьым юбоосын бадӟым корка сярысь. Та  возьматэ: Иегова шырыт сямо но со шумпотыса ас дораз ӧте ваньзэс, кинъёслэн солэн визьлыкезъя улэмзы потэ.

15. Мар карыны мылкыдмес ӝутэ Инмар?

¹⁵ Иегова ваньзэ жалятэк сётэ. Со шырыт сямо но сюлмаськись Инмар. Та сямъёс визьлыко луэмез возьмато. Нош Мадёнъёсын 9-тӥ люкетын визьлык кышномуртэн ӵошатӥське. Отын вераське, та кышномурт сӥль, вина дасяз но соосты ӝӧк вылэ пуктӥз шуыса (Мад. 9:2). Собере 4-тӥ но 5-тӥ кылбуръёсын гожтэмын: «Визьзы вакчи муртъёслы со вераз: „Чалелэ, сиелэ няньме“». Кулэ-а милемлы визьлыклэн ӧтёнэзлы соглаш кариськыны но со дорын кунояськыны? Иеговалэн потэ, солэн нылпиосыз визьлыкоесь мед луозы но соосын номыр уродэз медаз луы шуыса. Солэн уг поты, ми ас янгышъёсмы вылын мед дышетскомы но собере та сярысь мед жаляломы шуыса. Соин ик Иегова шонер улӥсьёслы визьлык сётыны дась (Мад. 2:7, ВД). Иегова азьын шонер кышкан мылкыдмес ӝутэ солы ярамон луыны. Ми шумпотыса солэн визь-кенешъёсызлэсь кылзӥськиськомы (Иак. 1:25).

16. Кызьы Инмарлэсь кышкан Аланлы юрттӥз визьмо ужпум кутыны но кыӵе пайда со вайиз?

¹⁶ Эскеромы, кызьы Инмарлэсь кышкан А́лан нимо тӧролы юрттӥз визьмо ужпум кутыны. Со школаын дышетӥсь луыса ужа. Алан вера: «Тросэз дышетӥсьёс малпазы, порнографиен герӟаськем фильмъёсты учконо шуыса, та удысын тросгес тодон-валан басьтон понна». Но Алан соосын соглаш ӧй вал. Со вера: «Мынам Инмар азьын кышканэ вань. Соин ик мон сыӵе фильмъёсты учкыны соглаш ӧй кариськылы. Дышетӥсьёслы мон котьку но валэктылӥ, малы сыӵе ужпум кутӥ». Со уже кутӥз таӵе визь-кенешез: «Визьнодо улонлэн сюрес вылтӥз ветлэ» (Мад. 9:6). Аланлэн ассэ юн воземез куд-ог дышетӥсьёсты туж паймытӥз. Али соос Библиез дышето но христиан пумиськонъёсы ветло.

17, 18. Кыӵе бакель каронъёс басьто соос, кинъёс визьлыклэн ӧтёнэзлы соглаш карисько, но мар соосты азьланяз возьма? (Озьы ик учке суредэз.)

¹⁷ Визьлыкез но визез ыштонэз кык кышномуртъёсын ӵошатыса, Иегова валэктэ, мар кароно, шудо луон понна. Соос, кинъёс «визьзэ ыштэм, куашетыны яратӥсь... кышномуртлэн» ӧтёнэзлы соглаш карисько, азон-калгонэн герӟаськем ужъёсысь шумпотон утчало. Соос туннэ нуналэн гинэ уло, вуоноез сярысь чик уг малпасько. Но азьланяз соосты кулон возьма (Мад. 9:13, 17, 18).

¹⁸ Нош соос, кинъёс визьлыклэн ӧтёнэзлы соглаш карисько, асьсэды чылкак мукет сямен возё! Визьлыклэн куноосыз али ик ини чебер духовной ӝӧк сьӧрын пуко, кудӥз вылэ  ческыт но пайдаё сиён пуктылэмын (Ис. 65:13). Исаия пророк пыр Иегова вера: «Монэ сак кылзӥськиды ке, ӟечлык сиёды, тӥляд лулды кӧйын-вӧйын тыр луоз» (Ис. 55:1, 2). Ми дышетскиськомы яратыны сое, мае яратэ Иегова, но адӟемпотостэм карыны сое, мае со адӟемпотостэм каре (Пс. 96:10). Милемлы туж кельше мукетъёссэ визьлык доры куное ӧтьыны. Городлэн ӝужыт интыосысеныз ми ялӥськомы кадь: «Визьнодтэмъёс, берытске!» Соос, кинъёс та ӧтёнлы соглаш карисько, али но, вуонояз но та сярысь уз жалялэ. Ми быгатомы пырак улыны но котьку визьлыклэн сюрес вылтӥз мыныны! (Мад. 9:3, 4, 6).

19. Мар карыны мылкыдмес ӝуто кылъёс, кудъёсыз гожтэмын Екклесиастын 12:13, 14? (Озьы ик учке « Кыӵе пайда вае Инмарлэсь кышкан» рамкаез.)

¹⁹ Лыдӟе Екклесиастэз 12:13, 14. Инмарлэсь кышкан сюлэммес мед утёз но милемлы мед юрттоз азон-калгонлэсь палэнскыны но Инмарен матысь кусыпъёс возьыны. Ми Иеговаез вань сюлмысьтымы яратӥськомы но гажаськомы бере, ми азьланяз но адямиосты ӧтёмы визьлыкез утчаны но соя улыны.