Библия та сярысь номыр уг вера. Но отын вань тунсыко малпанъёс, кудъёсыз та юанэз валаны юртто.

Кылчин Мариялы вераз, со секытэн луоз но пи нуны ваёз шуыса. Соку Мария но Иосиф улӥзы Галилеяысь Назарет карын (Лука 1:26—31; 2:4). Берлогес Египетын, кӧня ке дыр ӵоже улэмзы бере, соос Назаретэ берытскизы. Иисус та карын будӥз. Талы луыса тросэз тодӥзы, со Назаретысь шуыса (Матф. 2:19—23). Соин ик, Иисус, Иосиф но Мария сярысь вераськыкумы, ми ӵем дыръя Назарет карез тодамы вайылӥськомы.

Мариялэн вал Елисавета нимо ӵыжы-выжыез, кудӥз Иудеяын улӥз. Со Захария священниклэн кышноез вал но Иоанн Пылатӥсьлэн анаез луиз (Лука 1:5, 9, 13, 36). Мария Елисавета доры куное мынӥз но со дорын Иудеяын ог 3 толэзь ӵоже улӥз. Собере Мария Назаретэ берытскиз (Лука 1:39, 40, 56). Озьыен, валаны луэ, Иудея музъем солы тодмо вал шуыса.

Ӝоген «калыкез гожъян сярысь косон потӥз». Иосиф Назаретысь Вифлееме мынӥз. Вифлеем «Давидлэн... городэз» вал, кудаз, азьпалзэ ивортонын верамъя, Мессия вордӥськыны кулэ вал (Лука 2:3, 4; 1 Экс. 17:15; 20:6; Мих. 5:2). Отын Мария Иисусэз вайиз. Иосифлэн уг поты вал, со али гинэ вордӥськем нуныен Назаретэ нуись кузь сюрес вылэ мед потоз шуыса. Соос Вифлееме кылизы. Та кар Иерусалимлэсь ог 9 иськем кемын интыяськемын вал. Соин ик соослы капчигес вал нуныенызы отчы мыныны но, Законлэн куремезъя, храмын курбонъёсты вайыны (Лев. 12:2, 6—8; Лука 2:22—24).

Иисуслэн вордӥськемезлэсь азьло Инмарлэн кылчинэз Мариялы вераз, солэн пиез «Давидлэсь... эксэй пуконзэ» басьтоз но Эксэй луоз шуыса. Иосиф но Мария бадӟым саклыксэс висъязы, вылды, Иисус Давидлэн городаз вордӥськиз шуыса (Лука 1:32, 33; 2:11, 17). Соос малпазы, вылды, Вифлееме кыльыны но Инмарлэсь кивалтэтсэ возьманы визьмо луоз шуыса.

Ми ум тодӥське, астрологъёслэн лыктэмзы азьын кӧня дыр ӵоже соос Вифлеемын улӥзы. Но соку та семья коркан улӥз ини, озьы ик соослэн пизы вож нуны ӧй вал ини (Матф. 2:11). Соос улон понна корка шедьтӥзы бере, валаны луэ, калыкез гожъян бере соос Назаретэ ӧз берытске, нош Вифлеемын кӧня ке дыр ӵоже улӥзы шуыса.

Ирод «Вифлеемысь... кык но солэсь пичи аресъем вань вож нуныосты виылыны» косӥз (Матф. 2:16). Инмар та сярысь Иосифлы вераз. Соин ик, Марияез но Иисусэз басьтыса, Иосиф Египетэ кошкиз. Отын соос Иродлэн кулытозяз улӥзы. Берлогес Иосиф аслаз семьяеныз Назаретэ кошкиз. Малы соос Вифлееме ӧз берытске? Соослэн уг поты вал пумиськемзы Архелаен, Иродлэн лек пиеныз, кудӥз Иудеяен кивалтӥз. Со сяна, Инмар Иосифлы алон сётӥз. Назаретын Иосиф, номырлэсь кышкатэк, Иисусэз Инмарлэн законъёсызъя будэтыны быгатӥз (Матф. 2:19—22; 13:55; Лука 2:39, 52).

Куке Иисус инмын улыны сюресэз усьтӥз, Иосиф кулэмын вал, дыр, ини. Озьыен, Иосиф музъем вылын улыны улӟытэмын луоз. Тросэз быгатозы соин пумиськыны но солэсь юаны, малы Иисуслэн вордӥськемез бере соос Марияен Вифлееме кылизы.