1, 2. Мар кароно, Иеговалэн матысь эшъёсыз луон понна? (Псалтирь 24:14).

 ТӤ МАЛПАМЪЯ, кыӵе сямо луыны кулэ зэмос эшъёс? Тӥ вералоды, дыр, матысь эшъёс ог-огзэс яратыны но ог-огзылы юрттыны кулэ шуыса. Тӥ уд малпалэ, дыр, эшъёс ог-огзылэсь кышканы кулэ шуыса. Но, та статьялы валтӥсь кылбурез лыдӟыса, валаны луэ: Иеговаен эшъяськон понна, солэсь кышканы кулэ. (Лыдӟе Псалтирез 24:14.)

² Кемалась-а ми Иеговалы ужаськомы-тыршиськомы, ум-а, ваньмылы Инмарлэсь кышкано. Мае возьматэ Иеговалэсь кышкан? Кызьы дышетсконо Инмарлэсь кышканы? Озьы ик ми тодомы, малы дышетскеммы луэ эксэй юртэн кивалтӥсь Авдийлэсь, Иодай быдӟым священниклэсь но Иоас эксэйлэсь.

3. Валэктэ, кыӵе пайда вайыны быгатэ кышкан.

³ Улонмылы кышкытлык кылдэ ке, ми кышканы быгатӥськомы. Сыӵе кышкан пайда вайыны быгатэ. Со мылкыдмес ӝутэ асьмеды визьмо возьыны. Кылсярысь, ми усьыны кышкаськомы бере, ми меӵ ярдурлэн дураз ик ум сылэ. Ми кышкаськомы вӧсь луыны, соин ик кышкыт учыръёслэсь палэнскиськомы. Нош ми матысь адямиенымы кусыпъёсмес сӧрыны кышкаськомы бере, ми урод кылъёслэсь но ужъёслэсь возиськомы.

4. Кыӵе кышкан Шайтан милемлы пыӵатыны тырше?

⁴ Шайтанлэн потэ, адямиос Иеговалэсь дыр куалекъяса  мед кышкалозы шуыса. Солэн потэ, ми мед малпаломы, Иегова лек, пунэмзэ берыктӥсь но солы ярамон луыны уг луы шуыса (Иов 4:18, 19). Шайтанлэн потэ, Иеговалэсь кышкаменымы, ми солы ужамысь-тыршемысь мед дугдомы шуыса. Та сьӧлтэтлэсь палэнскон понна, милемлы дышетсконо Инмарез гажаны но кышканы сое вӧсь карыны.

5. Мае возьматэ Инмарлэсь кышкан?

⁵ Адями, кудӥзлэн Инмар азьын шонер кышканэз вань, сое яратэ но соин кусыпъёссэ утьыны тырше. Ӵапак сыӵе кышканэз Иисуслэн вал. Библиын вераське, со Инмарлэсь кышказ шуыса (Евр. 5:7, ВД). Но Иисус Инмарлэсь дыр куалекъяса ӧз кышка (Ис. 11:2, 3). Иисус Иеговаез туж яратэ вал но солэсь котьку кылзӥськемез потэ вал (Иоанн 14:21, 31). Иисус сямен, ми но Иеговаез туж гажаськомы, малы ке шуоно со яратӥсь, визьлыко, шонерлыко но кужмо Инмар. Ми тодӥськомы: Иегова милемыз туж яратэ но учке, кылзӥськиськомы-а ми солэсь, ум-а. Асьмелэн ужъёсынымы ми быгатӥськомы Иеговалэсь сюлэмзэ вӧсь карыны яке шумпоттыны (Пс. 77:41; Мад. 27:11).

6. Мар милемлы юрттоз Инмар азьын шонер кышканэз будэтыны? (Псалтирь 33:12).

⁶ Иеговалэсь кышканэн ми ум вордӥськиське. Сое будэтыны кулэ. (Лыдӟе Псалтирез 33:12.) Кызьы? Кылсярысь, Инмарлэсь кылдытэмъёссэ эскерыса. Соосты эскерыкумы, ми адӟиськомы Иеговалэсь визьлыксэ, кужымзэ, озьы ик милемыз юн яратэмзэ. Инмарлэсь кылдытэмъёссэ эскерыса, ми эшшо но мургес сое гажаськомы но яратӥськомы (Рим. 1:20). Э́йдриен сузэр вераз: «Монэ туж паймыто Иеговалэн кылдытэмъёсыз. Со туж визьмо! Соин ик мон юн оскисько: Инмар тодэ, мар мон понна самой умоез луоз». Тазьы малпаськыса, Эйдриен таӵе йылпумъян лэсьтӥз: «Соку малы бен мон Иеговаен, Улон сётӥсеным, кусыпъёсме сӧрыны кулэ?» Быгатӥськоды-а тӥ та арня куспын ик Инмарлэн кыӵе ке кылдытэмез вылын малпаськыны? Та юрттоз тӥледлы Иеговаез эшшо но юнгес яратыны но гажаны (Пс. 110:2, 3).

7. Кызьы вӧсяськон милемлы юрттыны быгатэ Иегова азьын шонер кышканэз будэтыны?

⁷ Со сяна, Инмар азьын кышканэз будэтыны милемлы юрттэ вӧсяськон. Иеговалы вӧсяськыса, ми эшшо но золгес оскиськомы, со зэм но вань шуыса. Куке ми, шуг-секытмес чидан понна, Иеговалэсь кужым куриськомы, ми тодамы вайиськомы, Инмар туж кужмо шуыса. Куке ми Иеговаез Пиезлэн курбонэз понна тау кариськомы, ми тодамы вайиськомы, Инмар милемыз туж яратэ шуыса. Нош куке ми Иеговалэсь сюлворыса юрттэт куриськомы шуг-секытмес сэрттыны-пертчыны, ми эшшо огпол адӟиськомы, со визьлыко шуыса. Вӧсяськон милемлы юрттэ Иеговаез эшшо но мургес гажаны но юн мылкыдын палэнтыны ваньзэ, мар соин кусыпъёсмес сӧрыны быгатэ.

8. Мар милемлы юрттоз Инмарлэсь кышканэн улыны?

⁸ Мар милемлы юрттоз Инмарлэсь кышканэн улыны? Библиез эскерон. Ми быгатӥськомы малпаськыны Библиысь умой но урод примеръёс вылын. Нырысь ойдолэ вераськомы Иеговалэн кык оскымон ужась-тыршисьёсыз сярысь: Авдий сярысь, кудӥз Ахав эксэйлэн юртаз кивалтӥсь вал, но Иодай быдӟым священник сярысь. Собере ми тодомы, малы дышетскеммы луэ Иудеяысь Иоас эксэйлэсь, кудӥз нырысь Иеговалы оскымон вал, нош собере солэсь палэнскиз.

9. Кызьы Иеговалэсь кышкан Авдийлы юрттӥз? (3 Эксэйлыкъёслэн 18:3, 12).

⁹ Тани мар гожтэмын Библиын Авдий b сярысь: «Авдий Инмарлэсь кышканэн улӥсь мурт вал». (Лыдӟе 3 Эксэйлыкъёслэн 18:3, 12.) Кыӵе пайда вайиз та кышкан Авдийлы? Со юрттӥз солы пӧяськытэк улыны но оскиськымон адями луыны. Соин ик эксэй Авдиез быдэс юртэныз кивалтыны пуктӥз. (Ӵошатэ Неемиялэн 7:2.) Озьы ик Инмарлэсь кышкан Авдийлы юрттӥз туж кышкасьтэм луыны. Та сям солы туж кулэ вал. Со улӥз, Ахав эксэй кивалтыку, кудӥз «Кузё-Инмарлэн син азяз солэсь азьвыл луэм эксэйёслэсь ваньзылэсь тросгес урод ужъёс лэсьтыса улӥз» (3 Экс. 16:30). Со сяна, Ахавлэн кышноез, Иезавель, Вааллы йыбыртъяз. Иеговаез туж зол адӟемпотостэм каременыз, Иезавель уйпал эксэйлыкын чылкыт йыбырттонэз быдтыны тыршиз. Та эксэй кышно Инмарлэсь трос пророкъёссэ вииз (3 Экс. 18:4). Зэм, Авдий туж секыт дыре Иеговалы ужаз-тыршиз.

10. Кызьы Авдий кышкасьтэм сямзэ возьматӥз?

¹⁰ Кызьы Авдий кышкасьтэм сямзэ возьматӥз? Куке Иезавель Инмарлэсь пророкъёссэ виылӥз, Авдий сю пророкъёсты «витьтон муртэн гурезьысь пещераосы» ватылӥз но «нянен, вуэн сюдыса, сектаса» возиз (3 Экс. 18:13, 14). Та сярысь тодмо луысал ке, Авдиез виысалзы. Валамон, Авдийлэн кулэмез уг поты вал. Но со, аслэсьтыз улонзэ сярысь, Иеговаез но солэсь ужась-тыршисьёссэ золгес яратӥз.

11. Кызьы туннэ Иеговалэн ужась-тыршисьёсыз Авдийлэсь адӟем каро? (Озьы ик учке суредэз.)

¹¹ Туннэ Иеговалэн тросэз ужась-тыршисьёсыз уло шаеръёсын, кытын кивалтӥсьёс ужмес нуыны уг лэзё. Та агайёс но сузэръёс кивалтӥсьёсты гажало. Но, Авдийлэсь адӟем карыса, нырысь ик соос Иеговалы оскымон луыны тыршо (Матф. 22:21). Соос Инмарлэсь кышканзэс возьмато, адямиос интые, солэсь кылзӥськыса (Ап. уж. 5:29). Соин соос азьло сямен ик чакласькыса ӟеч иворез тодыто но огазе люкаськыло  (Матф. 10:16, 28). Соос тыршо, огъя оскисьёссылэн духовной сиёнзы мед луоз шуыса. Тани Анри́ агайлэн учырез. Со улэ Африкаысь одӥг шаерын, кытын куке но кивалтӥсьёс ужмес нуыны уг лэзё вал. Со вакытэ Анри мылкыд кариз вын-агайёсызлы но сузэр-апайёсызлы духовной сиён нуллыны. Тани мар со гожтӥз: «Мон возьдаськись. Соин ик мон тодӥсько, Иеговаез мур гажаменым гинэ, кышкасьтэм луыны быгатӥ шуыса». Быгатоды-а тӥ, Анри сямен, кышкасьтэмесь луыны? Быгатоды, тӥляд Инмарлэсь кышканды вань ке.

12. Кызьы Иодай быдӟым священник но солэн кышноез Иеговалы оскымон луэмзэс возьматӥзы?

¹² Иодай быдӟым священник Иеговалэсь кышкаса улӥз. Соин ик со ачиз но Иеговалы оскымон вал, мукетъёсызлэсь но мылкыдзэс ӝутӥз Инмарлы йыбыртъяны. Та тужгес но адӟиськиз, куке Иудеяын Иезавельлэн Гофолия нылыз кивалтыны кутскиз. Гофолиялэсь кышканы трос мугъёс вал. Со туж лек вал но кивалтэтэз аслаз ки улаз воземез потэ вал. Соин ик со тыршиз быдтыны аслэсьтыз внукъёссэ, кудъёсыз со интые кивалтыны быгатысалзы (2 Пар. 22:10, 11). Иодайлэн Иосавеф кышноез со нылпиос пӧлысь одӥгзэ утьыны быгатӥз. Со вал Иоас. Иодай но Иосавеф та пияшез ватыса возизы но со сярысь сюлмаськизы. Тазьы Иодай но Иосавеф Давидлэн выжыысьтыз потэм эксэйёсты утизы. Иодай Иеговалы оскымон вал но Гофолиялэсь кышкаса ӧз улы (Мад. 29:25).

13. Кызьы Иодай Иеговалы оскымон луэмзэ нош ик возьматӥз, куке Иоаслы сизьым арес вал?

¹³ Куке Иоаслы сизьым арес вал, Иодай Иеговалы оскымон луэмзэ нош ик возьматӥз. Со малпаз Иоасэз эксэе пуктыны. Ваньмыз пӧрмысал ке, Давидлэн выжыысьтыз потэм адями эксэй луысал. Нош Иодайлэн малпанэз ӧй пӧрмысал ке, сое виысалзы, вылды. Иеговалэн юрттэменыз ваньмыз пӧрмиз. Иодайлы юрттӥзы эксэй юртэз возьмасьёслэн кузёоссы но левитъёс. Соослэн юрттэмзылы луыса Иодай Иоасэз эксэе пуктӥз, нош Гофолияез виыны косӥз (2 Пар. 23:1—5, 11, 12, 15; 24:1). Собере «Иодай Кузё-Инмарен, эксэен но калыкен сӥзён-косон кутӥз, Кузё-Инмарлэн калыкез мед луоз шуыса» (4 Экс. 11:17). Со сяна, «кырсь адями малы но солы медаз пыра шуыса... [Иодай] Кузё-Инмарлэн коркаезлэн капка дораз возьмаськисьёсты пуктӥз» (2 Пар. 23:19).

14. Кыӵе дан сётэмын вал Иодайлы?

¹⁴ Солэсь азьвыл Иегова вераз вал: «Мон Монэ данъясьёсты данэ потто» (1 Экс. 2:30). Иегова зэм но Иодаез бакель кариз. Кылсярысь, та быдӟым священниклэн умой ужъёсыз Библие гожтэмын, милемыз дышетон понна (Рим. 15:4). Нош кулэмез бере Иодайлы нимысьтыз дан сётэмын вал. Со сярысь ми лыдӟиськомы: «Сое Давидлэн городаз эксэйёсын огазе ватӥзы, малы ке шуоно со Израильын ӟеч ужъёс лэсьтӥз Инмар понна но, Солэн коркаезлы но» (2 Пар. 24:15, 16).

15. Малы милемыз дышетэ Иодайлэн учырез? (Озьы ик учке суредэз.)

¹⁵ Иодайлэн учырез милемыз дышетыны быгатэ Инмарлэсь кышканы. Тӧроос быгато Иодайлэсь адӟем карыны, вань сюлмысьтызы кенеш сярысь сюлмаськыса но Иеговалэсь ыжъёссэ утьыса (Ап. уж. 20:28). Иодайлэн учырез арлыдоосты но юнматыны быгатэ. Соос Иеговалэсь кышкало но солы оскымон луо ке, Инмар соосты уг вунэты. Озьы ик соос азьланяз но быгатозы солэсь  эриксэ быдэсъяны. Егитъёслы но умой луоз саклыксэс висъяны солы, кызьы Иегова Иодаен ассэ возиз. Соос быгато Инмарлэсь адӟем карыны, мур гажаса арлыдоосты, тужгес но соосты, кинъёс трос аръёс ӵоже ини Иеговалы ужало-тыршо (Мад. 16:31). Ваньмы ми быгатӥськомы адӟем карыны кивалтӥсьёслэсь но левитъёслэсь, кудъёсыз Иодайлы юрттӥськизы. Ойдолэ кылзомы но юрттомы соослы, кинъёс «визь-нод сёто, дышето» (1 Фес. 5:12).

16. Кытысь адӟиськиз, Иоас ляб адями вал шуыса?

¹⁶ Куке Иоасэз Иодай дышетылӥз, Иоас ассэ шонер возиз (4 Экс. 12:2). Солы луыса егит эксэйлэн Иеговаез шумпоттэмез потэ вал. Но Иодайлэн кулэмез бере Иоас кылзыны кутскиз Иудеяысь кивалтӥсьёсты, кудъёсыз Иеговаез кельтӥзы. Кытчы со вуттӥз? Иоас но солэн ляльчиосыз «писпуослы йыбыртъяны, сульдэръёслы-идолъёслы йыбыртъяны кутскизы» (2 Пар. 24:4, 17, 18). Та Инмарлэсь сюлэмзэ туж вӧсь кариз. «Соосты Кузё-Инмар пала берыктон понна Кузё-Инмар соос доры пророкъёсты ыстылӥз... нош соос кабыл ӧз басьтэ». Соос ӧз кылзэ Иодайлэсь пизэ но, Захарияез c, кудӥз Иеговалэн пророкез но священникез луыса ужаз-тыршиз, озьы ик Иоаслэн ӵыжы-выжыез вал. Иоас сое утись семьялы тау  каремзэ ӧз возьматы. Со интые, со Захарияез виыны косӥз (2 Пар. 22:11; 24:19—22).

17. Мар луиз Иоас эксэен?

¹⁷ Иоас Иеговалэсь кышкамысь дугдӥз но бырон улэ сюриз. Иегова шуиз: «Монэ сантэмасьёс возьытэ вуттэмын луозы» (1 Экс. 2:30). Берлогес ӧжыт гинэ сири ожгарчиос Иоаслэсь трос ожгарчиоссэ быдтӥзы, нош ассэ вӧсь каризы. Куке сири ожгарчиос кошкизы, Иоаслэн ожгарчиосыз сое ассэ виизы, Захарияез виемез понна. Та лек эксэез «эксэйёсты ватон шайгуосы ӧз ватэ» (2 Пар. 24:23—25).

18. Мар кароно, Иоас кадесь медам луэ шуыса? (Иеремия 17:7, 8).

¹⁸ Малы милемыз дышетэ Иоаслэн учырез? Со кельше вал мур выжытэм писпулы, кудӥз пыкъеттэк сылыны ӧз быгаты. Иодаез сыӵе пыкъетэн ӵошатыны луэ. Солэн кулэмез бере но Инмарлэсь палэнскем адямиос котыраз кылдэм бере Иоас усиз. Татысь адӟиське, эшъёсмылэсь яке семьямылэсь адӟем карыса гинэ, Инмарлэсь кышкано ӧвӧл шуыса. Инмарен юн кусыпъёс возён понна, милемлы асьмелы тыршоно солы оскымон луыны но солэсь кышкаса улыны. Нош со понна кулэ ялан Библиез эскерыны, со вылын малпаськыны но вӧсяськыны (лыдӟе Иеремиялэсь 17:7, 8; Кол. 2:6, 7).

19. Мае куре милесьтым Иегова?

¹⁹ Иегова милесьтым укыр троссэ уг куры. Солэн куронъёсыз сярысь вакчияк гожтэмын Екклесиастын 12:13: «Инмарлэсь кышка но Солэн курон-косонъёсызъя ул,— та бордын адямилэн вань улонэз возиське». Инмарлэсь кышкамы ке, ми быгатомы вуоно шуг-секытъёсты чиданы, озьы ик, Авдий но Иодай сямен, Инмарлы оскымон кыльыны. Соку Иеговаен кусыпъёсмес номыр уз сӧры.