1. Кыӵе кулэ луись уж тӧроослы сётэмын, 1 Пётрлэсь 5:2 лыдэ басьтоно ке?

 ИЕГОВА тӧроослы уж сётӥз дуно ыжъёсыз сярысь сюлмаськыны. Та вын-агайёс ужан-тыршонзэс туж дунъяло но вань кужмысьтызы тыршо Инмарлэсь уллёзэ возьманы (Иер. 23:4; лыдӟе 1 Пётрлэсь 5:2). Ми туж тау кариськомы Иеговалы та оскымон пиосмуртъёс понна!

2. Кыӵе шуг-секытъёсын пумиськыло тӧроос?

² Ужъёссэс быдэсъякузы, тӧроос трос шуг-секытъёсын пумиськыло. Кылсярысь, кенеш сярысь сюлмаськон понна, трос кужым кулэ. Огазеяськем Штатъёсысь То́ни тӧро валаз, вань ужъёсты ачиз быдэсъяны уг быгаты шуыса. Со валэктэ: «COVID-19 пандемия кутскем бере кылдӥзы трос выль ужъёс, кудъёсыз герӟаськемын вал пумиськонъёсты но тодытон ужез радъянэн. Мон ас вылам выль но выль ужъёсты басьтылӥ. Но кӧня гинэ мон медам тыршы, уж уг быры вал. Соин ик мынам дыры но, кужыме но ӧз тырмы ини Библиез лыдӟыны, сое ас поннам эскерыны но вӧсяськыны». Косово шаерысь Или́р тӧро мукет шуг-секытэн пумиськиз. Куке со улӥз отын, кытын ожмаськон мынӥз, организацимылэн кивалтэтэзлэсь кылзӥськыны солы туж ик капчи ӧй вал. Со вера: «Филиал монэ куриз юрттыны вын-агайёслы но сузэр-апайёслы, кудъёсыз кышкыт интыын улӥзы. Со понна кышкасьтэм луоно вал, нош мыным кышкыт вал, озьы ик сётэм кивалтэт мыным туж ик визьмо ӧз поты». Азиын ужась-тыршись Тим миссионерлы ваньзэ вуыны секыт вал. Со вера: «Куддыръя мыным потэ вал, мон воксё катьтэммемын шуыса». Мар юрттоз тӧроослы, кудъёсыз та выллем шуг-секытъёсын пумиськыло?

3. Малы ваньмылы умой луоз Гедеон судьялэсь примерзэ эскерыны?

 ³ Умой луоз, тӧроос Гедеон судьялэсь примерзэ эскеризы ке (Евр. 6:12; 11:32). Со Инмарлэн калыкезлы утись но возьмась вал (Суд. 2:16; 1 Пар. 17:6). Гедеонлы сямен, тӧроослы но уж сётэмын секыт дыре Инмарлэн калыкез сярысь сюлмаськыны (Ап. уж. 20:28; 2 Тим. 3:1). Ваньмы ми Гедеонлэсь тросэзлы дышетскыны быгатӥськомы. Со востэм, зӥбыт но кылзӥськись вал. Аслэсьтыз ужъёссэ быдэсъян понна, солы юн луоно вал. Тӧроос-а ми, ӧвӧл-а, ми быгатӥськомы сюлмаськись тӧроосмес эшшо но золгес дунъяны. Ойдолэ та тыршись вын-агайёсмылы юрттомы (Евр. 13:17).

4. Кызьы Гедеон зӥбыт-востэм луэмзэ возьматӥз?

⁴ Гедеон зӥбыт-востэм адями вал b. Огпол кылчин солы вераз, Иегова сое аслэсьтыз калыксэ мадиан калыклэсь мозмытыны бырйиз шуыса. Нош Гедеон зӥбыт-востэмен шуиз: «Мынам выжы-кумыосы но Манассия выжыын тужгес начаръёсыз луо, атаелэн но мон покчиез пиез луисько» (Суд. 6:15). Гедеон малпаз, калыкез мозмытыны уз быгаты шуыса. Но Иегова тодӥз, Гедеон солы сётэм ужез быдэстыны быгатоз шуыса. Инмарлэн юрттэменыз Гедеонлэн ваньмыз пӧрмиз.

5. Кыӵе учыръёсын тӧролы зӥбыт-востэм луыны капчи ӧвӧл?

⁵ Тӧроос туж тыршо котьма ласянь зӥбыт-востэмесь луыны (Мих. 6:8; Ап. уж. 20:18, 19). Соос быгатонлыкъёсынызы яке азинсконъёсынызы уг данъясько. Но со дыре ик соос котькуд янгышсы понна куректыса уг уло. Озьы ке но куддыръя соослы зӥбыт-востэм луыны капчи ӧвӧл. Шуом, тӧро соглаш кариськиз кӧня ке ужъёсты быдэстыны, нош собере валаз, ваньзэ быдэстыны уг быгаты шуыса. Тани эшшо одӥг учыр: тӧроез ушъяло яке пыкыло со понна, кызьы со кыӵе ке ужез быдэстэ. Кызьы таӵе учыръёсын тӧролы Гедеонлэн примерез юрттоз?

6. Кызьы тӧроос Гедеонлэсь зӥбыт-востэм луэмзэ адӟем карыны быгато? (Озьы ик учке суредэз.)

⁶ Юрттэт куре. Зӥбыт-востэм адями вала, ваньзэ лэсьтыны уг быгаты шуыса. Гедеон зӥбыт-востэм вал, соин ик мукетъёсызлэсь юрттэт курыны ӧз возьдаськы (Суд. 6:27, 35; 7:24). Визьмо тӧроос асьсэды озьы ик возё. Тони, кудӥз сярысь вераськиз ини,  валэктэ: «Куке монэ кыӵе ке ужъёсты быдэсъяны куризы, мон котьку но соглаш кариськылӥ, малы ке шуоно монэ озьы пичи дырысеным дышетӥзы. Соин ик мон малпай семьяен йыбырттонмы дыръя зӥбыт-востэм луон сярысь мургес эскерыны. Озьы ик кышноме вераны кури, макем умой мынам пӧрме та сямез возьматэме. Со сяна, сайтысьтымы мон учки видеоез, кудӥз нимаське „Обучайте других, доверяйте им и передавайте полномочия, подражая Иисусу“». Тони куд-ог ужъёссэ мукет агайёслы сётъяны кутскиз. Кыӵе пайда со вайиз? Тони вера: «Кенешын но ужъёс мынӥзы, мынам но тросгес дыры луиз Иеговаен кусыпъёсме юнматыны».

7. Кызьы тӧроос Гедеонлэсь адӟем карыны быгато, куке соосты пыкыло? (Иаков 3:13).

⁷ Тӥледыз пыкыло ке, лякытэн вераське. Тӧроослы капчи ӧвӧл соку но, куке соосты пыкыло. Та учырын но соос Гедеонлэсь адӟем карыны быгато. Гедеон аслаз янгышъёсыз сярысь ачиз но тодӥз. Соин ик, куке ефрем калык Гедеонэз пыкылыны кутскиз, со соосын лякытэн вераськиз (Суд. 8:1—3). Гедеон вожзэ ӧз потты. Соосты кылзыса но буйгатыса, Гедеон зӥбыт-востэм луэмзэ возьматӥз. Визьмо тӧроос Гедеонлэсь адӟем каро. Тӧроосты пыкыло ке, соос сыӵе адямиосты сак кылзо но соосын лякытэн верасько. (Лыдӟе Иаковлэсь 3:13.) Талы луыса кенеш тупаса улэ.

8. Кызьы тӧроос асьсэды возьыны кулэ, куке соосты ушъяло? Вералэ пример.

⁸ Иеговаез данъялэ. Куке Гедеонэз мадиан калыкез вормемез понна данъяны турто вал, со ваньмыз понна Иеговаез данъяз (Суд. 8:22, 23). Кызьы тӧроос Гедеонлэсь адӟем карыны быгато? Соослэн мар ке но умой пӧрме ке, соослы ваньмыз понна Иеговаез данъяно (1 Кор. 4:6, 7). Кылсярысь, кин ке но тӧроез ушъя умой дышетэмез понна. Соку тӧро та адямилэсь саклыксэ висъяны быгатэ, милемыз ваньмес Инмарлэн Кылыз но Иеговалэн организациез дышето шуыса. Куддыръя тӧролы умой луысал малпаськыны, со аслыз укыр трос саклык уг висъя-а шуыса. Тани Ти́моти нимо агайлэн учырез. Тӧро луэмез бере ик солы туж кельше вал речьёс вераны. Со шуэ: «Речьёсме веракум, мон трос кутскон кылъёс но примеръёс вералляй. Соин ик ӵем дыръя монэ ушъяло вал. Жаляса верано луэ, таӵе речьёсыным мон аслым саклык висъяй, нош Иеговалы но Библилы ӧй висъя». Дыр ортчыса, Тимоти валаз, речьёссэ мукет сямен верано шуыса (Мад. 27:21). Со азьланьтэ: «Табере агайёс но сузэръёс мыным верало, кызьы мынам рече юрттӥз соослы шуг-секытсэс сэрттыны-пертчыны, секыт дыръя юн осконэн улыны яке Иеговаен кусыпъёссэс юнматыны. Ӵошатоно ке соин, кызьы монэ быгатонлыкъёсы понна азьвыл ушъязы, таӵе кылъёс мыным тросгес шумпотон ваё».

9. Малы Гедеонлы кылзӥськыны но кышкасьтэм луыны кулэ вал? (Озьы ик учке вылбамысь суредэз.)

⁹ Израильын судья луэмез бере Гедеонлы кылзӥськыны но кышкасьтэм луыны кулэ вал. Солы сётэмын вал кышкыт уж — атаезлэсь Вааллы сӥзем курбон тырон интызэ куашкатыны (Суд. 6:25, 26). Берлогес Иегова Гедеонэз кык пол куриз ожгарчиосызлэсь лыдзэс кулэстыны (Суд. 7:2—7). Со сяна, Инмар Гедеонэз косӥз тушмонъёсыз вылэ бер уйин урдскыны (Суд. 7:9—11).

10. Кыӵе учыръёсын тӧроослы кылзӥськыны секыт луэ?

¹⁰ Тӧроос кылзӥськисесь луыны кулэ (Иак. 3:17). Кылзӥськись тӧро дась луыса быдэсъя сое, мар вера Библия но Инмарлэн организациез.  Тазьы со мукетъёсызлы умой адӟем карон возьматэ. Озьы ке но луо учыръёс, куке кылзӥськыны капчи ӧвӧл. Кылсярысь, куддыръя тӧролы секыт дырыз дыръя вань куронъёсты быдэстыны. Яке солы потэ, куд-ог куронъёс туж ик шонересь ӧвӧл но пайда уз вае шуыса. Яке солы сётӥзы сыӵе ужъёсты, кудъёсыныз сэрен со пытсэтэ но сюрыны быгатэ. Кызьы таӵе учыръёсын тӧроос Гедеонлэсь адӟем карыны быгато?

11. Кызьы Гедеонлэн примерез тӧроослы юрттэ кылзӥськись луыны?

¹¹ Кивалтэтэз сак кылзэ но солэсь кылзӥське. Инмар Гедеонлы шуиз, кызьы атаезлэсь курбон тырон интызэ куашкатоно, кытын выль курбон тырон инты пуктоно но кыӵе пудо-животэз курбонлы ваёно. Гедеон та кивалтэтэн ӧз споръяськы — со сое быдэстӥз. Туннэ но Иеговалэн организациез тӧроослы куронъёс сётъя гожтэтъёс, ялонъёс но кивалтэтъёс пыр, кудъёсыз юртто милемлы кышкатэк улыны но Иеговаен матысь кусыпъёс возьыны. Ми туж дунъяськомы тӧроосмес, соос кивалтэтлэсь кылзӥськыны тыршо шуыса. Та быдэс кенешлы пайда вае (Пс. 118:112).

12. Кызьы тӧроос уже кутыны быгато Еврейёслы 13:17, куке организацимы выль кивалтэт сётэ?

¹² Тупатскыны дась луэ. Тодамы ваёмы, Иеговалэн косэмезъя, Гедеон ожгарчиосызлэсь лыдзэс ог 99 процентлы кулэстӥз шуыса (Суд. 7:8). Гедеон малпаз, дыр: «Тае одно ик лэсьтоно-а? Быгатомы-а ми соку вормон басьтыны?» Озьы ке но Гедеон кылзӥськиз. Асьме нуналъёсы но тӧроос Гедеонлэсь адӟем каро — соос кылзӥсько организацимылэн кивалтэтэзлэсь, куке мае ке воштоно но мукет сямен лэсьтоно. (Лыдӟе Еврейёслэсь 13:17.) Кылсярысь, 2014-тӥ арын Кивалтӥсь кенеш ужпум кутӥз мукет сямен кутыны коньдонэз, кудӥз висъяськиз Эксэйлык юртъёсты но Конгрессъёсты ортчытон юртъёсты пуктон ужлы (2 Кор. 8:12—14). Кенешъёслы организацилэсь пунэмен басьтэм коньдонэз берыктоно ӧвӧл ини. Табере быдэс дунне вылысь кенешъёс коньдонзэс огазе люкало. Та юрттӥз Иеговалы йыбыртъянэн герӟаськем юртъёсты пуктыны отын, кытын со кулэ, со интыысь кенешъёслэн коньдонзы вань-а, ӧвӧл-а. Куке Хосе́ агай та воштӥськон сярысь тодӥз, солэн куд-ог юанъёсыз кылдӥзы. Со малпаз: «Тазьы ми одӥг Эксэйлык юртэз но ум пуктэ. Ми палан та кивалтэт уз ужа». Мар юрттӥз агаймылы выль кивалтэтлэсь кылзӥськыны? Со вера: «Кылъёс, кудъёсыз гожтэмын Мадёнъёсын 3:5, 6, тодам вайытӥзы, Иеговалы оскиськоно шуыса. Мон ӧй но малпа, та кивалтэт сокем бадӟым пайда ваёз шуыса. Табере ми эшшо но тросгес Эксэйлык юртъёсты пуктӥськомы. Со сяна, таӵе воштӥськонъёслы луыса ас мылкыд кареммыя сётэм коньдонмы пайда вае мукет интыосысь вын-агайёслы но сузэр-апайёслы. Та коньдон юрттыны быгатэ вань кенешъёслы, кудъёсызлы юрттэт кулэ».

13. а) Кыӵе осконэз вал Гедеонлэн? б) Кызьы тӧроос Гедеонлэсь адӟем карыны быгато? (Озьы ик учке суредэз.)

 ¹³ Кышкатэк быдэсъялэ Иеговалэсь эриксэ. Гедеон Иеговалэсь кылзӥськиз, солы сётэм ужез быдэстыны кышкыт вал ке но (Суд. 9:17). Иегова Гедеонэз оскытӥз, солы юрттоз шуыса. Соин ик Гедеон юн оскиз, Инмарлэсь калыксэ утьыны быгатоз шуыса. Туннэ куд-ог шаеръёсын кивалтӥсьёс ужмес нуыны уг лэзё. Сыӵе шаеръёсын улӥсь тӧроос Гедеонлэсь адӟем каро. Соос кышкатэк кенешлэсь пумиськонъёссэ ортчыто, тодытон ужез радъяло, озьы ик асьсэос но отчы ӟырдыт мылкыдын пырисько. Таин сэрен соос пытсэтэ сюрыны, ужзэс ыштыны яке соосты жугыны но быгато c. Бадӟым куректон дыръя кивалтэтлэсь кылзӥськон понна, тӧроослы кышкасьтэм сям кулэ луоз. Та кивалтэт герӟаськемын луоз, вылды, соин, кызьы йӧзор выллем иворез верано но кызьы Магог музъемысь Гоглэн урдскемез дыръя утиськоно (Иез. 38:18; Усьт. 16:21).

14. Кызьы эскериськиз Гедеонлэн юн луэмез?

¹⁴ Гедеон судьялы, солы сётэм ужез быдэстон понна, туж тыршыны кулэ вал. Куке уйин ожмаськемзы бере мадиан калык пегӟыса кошкиз, Гедеон соос сьӧры уйиськиз. Со соосты уйиз Изреель нёжалысен Иордан шурозь, кудӥзлэн ярдураз куакъёс будӥзы (Суд. 7:22). Гедеон Иордан азьын дугдӥз-а? Ӧз! Со но солэн 300 ожгарчиосыз жадизы ке но, соос, шур вамен потыса, азьланяз но тушмонъёссэс уйизы. Собере соос мадиан калыкез сутӥзы но пазьгизы (Суд. 8:4—12).

15. Кызьы эскериськыны быгатэ тӧролэн юн луэмез?

¹⁵ Кенешын но семьяын трос ужъёсыныз сэрен тӧро куддыръя шӧдэ, со воксё катьтэммемын шуыса. Кызьы таӵе учырын солы Гедеонлэн примерез юрттоз?

16, 17. а) Мар юрттӥз Гедеонлы солы сётэм ужез быдэстыны? б) Кыӵе осконзы вань тӧроослэн? (Исаия 40:28—31). (Озьы ик учке суредэз.)

¹⁶ Оске, Иегова тӥледлы кужым сётоз шуыса.  Гедеон юн оскиз, Иегова солы кужым сётоз шуыса. Инмар озьы ик лэсьтӥз (Суд. 6:14, 34). Куке Гедеон но солэн ожгарчиосыз мадиан эксэйёсты уйизы, соос израиль ожгарчиослэсь верблюдъёс вылын ворттыса пегӟизы. Нош израиль ожгарчиос соос сьӧры пыдын уйиськизы (Суд. 8:12, 21). Озьы ке но Инмарлэн юрттэменыз соос тушмонъёссэс сутӥзы но пазьгизы. Туннэ но тӧроос юн оскыны быгато, кулэ дыръяз Иегова соослы кужым сётоз шуыса, малы ке шуоно «Со уг жадьы, уг катьтэммы». (Лыдӟе Исаиялэсь 40:28—31.)

¹⁷ Мэтью тӧро Эмъюртъёсын герӟаськонъя комитетын ужа-тырше. Мар юрттэ солы трос ужъёссэ быдэсъяны? Со вера: «Мон ас вылам шӧдӥ, Филиппыослы 4:13 юрттэ шуыса. Ӵем дыръя, куке мон туж жадемын вал, мон вань сюлмысьтым вӧсяськылӥ. Мон Иеговаез туж кури монэ юнматыны но юрттыны мыным малпаськыны, мон вын-агайёслы юрттыны мед быгато шуыса. Соку мон шӧдӥ, кызьы Иеговалэн духез монэ юнматэ но вань ужъёсме быдэстыны юрттэ». Гедеонлэсь адӟем карыса, тӧроосмы но туж тыршо Иеговалэн ыжъёсыз сярысь сюлмаськыны, со котьку ик капчи ӧвӧл ке но. Тӧроослы валаны кулэ, ас кужыменызы гинэ соос ваньзэ лэсьтыны уз быгатэ шуыса. Но соослэн юн оскемзы луэ, Иегова юрттэт курыса вӧсяськемзэс кылоз но ваньзэ быдэстыны кужым сётоз шуыса (Пс. 114:1; Флп. 2:13).

18. Кыӵе пайда вайыны быгатэ Гедеонлэн примерез тӧроослы?

¹⁸ Кызьы ми адӟимы, Гедеонлэн примерез асьме нуналъёсы но тӧроослы бадӟым пайда вайыны быгатэ. Соослы зӥбыт-востэмесь луоно, валан понна, кӧня ужъёсты соос быдэстыны быгато но кызьы асьсэды возёно, куке соосты пыкыло яке ушъяло. Тӧроослы кылзӥськисесь но кышкасьтэмесь луоно, тужгес но али, куке та дуннелэн пумыз туж матын ини. Озьы ик соослы осконо, Инмарлэн юрттэменыз соослэн ваньмыз пӧрмоз шуыса. Ойдолэ дунъяломы тыршись тӧроосмес! (Флп. 2:29).