Мон вордӥськи 1929-тӥ арын 22-тӥ толсуре Бельгиысь Нови́лль гуртын, кудӥз интыяськемын Бастонь кар котырын но Арде́нны гурезё интыын. Отын укмыс фермаос вал. Мон шумпотыса тодам вайисько пичи дырме, куке анай-атаеным улӥ. Раймо́н выныным ми котькуд нунал скалъёсты кыскимы, нош аран вакытэ бусыын юрттӥськимы. Гуртысьтымы адямиос огкылысь улӥзы но котьку ог-огзылы юрттӥськизы.

Эми́ль атае но Али́са анае католикъёс вал. Котькуд арнянуналэ соос черке ветлӥзы. Но 1939-тӥ ар котырын гуртамы Англиысь пионеръёс лыктӥзы. Соос атаелы ӵектӥзы «Буйгатон» (али «Сайкалэ!») журналлэсь котькуд выль поттэмзэ басьтылыны. Атае соку ик валаз, зэмлыкез шедьтӥз шуыса, но Библиез лыдӟыны кутскиз. Черке ветлэмысь дугдэмез бере лякытэсь бускельёсмы лек тушмонъёсмы луизы. Соос атайме косо вал черке ветлыны. Таин сэрен соос трос споръяськизы.

Куке мон адӟи, кызьы бускельёсмы асьсэды атайенымы возё вал, мынам сюлмы ик вӧсь луэ вал. Соин ик мон Инмарлэсь юрттэтсэ утчаны кутски. Мон солы вань сюлмысьтым вӧсяськи. Та сярысь мон кутсконаз верай вал ини. Куке бускельёсмы пумитъяськемысь ӧжыт дугдӥзы, мон туж шумпотӥ! Мон валай, Иегова вӧсяськонъёсты кылзэ шуыса.

1940-тӥ арын 10-тӥ куартолэзе Германия Бельгиен ожмаськыны кутскиз. Таин сэрен тросэз шаерысь кошкизы. Милям семьямы пегӟиз Лымшор Францие. Отчы ми мынӥмы кышкыт интыос пыр, кытын Германилэн но Францилэн ожгарчиоссы ожмаськизы.

Фермаямы берытскеммы бере ми адӟимы, троссэ улэм-вылэммес лушкаллям шуыса. Милемыз  Бо́бби пунымы гинэ пумитаз. Сыӵе югдурен сэрен мынам юанэ кылдӥз: «Малы дунне вылын сокем трос ожъёс но курадӟонъёс?»

Со дырегес ик ми доры Эми́ль Шранц a агай ветлыны кутскиз. Со тӧро но пионер луыса ужаз-тыршиз. Солэн юрттэменыз мон аслам юанъёсылы Библиысь валамон валэктонъёс шедьтӥ. Мынам Иеговаен кусыпъёсы юнгес луизы, озьы ик мон валай, со яратонлэн Инмарез шуыса.

Ож быремын ӧй вал на ке но, семьямы мукет Адӟись-Ивортӥсьёсын ӵемгес пумиськылыны кутскиз. 1943-тӥ арын гудырикошконэ фермаямы лыктӥз Жозе́-Никола́ Мине́ агай. Речь верамез бере со юаз: «Кинлэн пылатӥськемез потэ?» Атае но мон кимес ӝутӥмы. Ми пылатӥськимы артысь пичи шурын.

1944-тӥ арын толсуре шундыпуксён палан Германия берпуметӥзэ бадӟым ожмаськонэз кутскиз, кудӥз тодмо Арде́нн операция шуыса. Ожмаськон улон интымы палан мынӥз. Соин ик милемлы толэзь котыр подвалын ватскыса улоно луиз. Огпол, куке мон пудомес сюдыны потӥ, ыбылӥськыны кутскизы. Одӥг снаряд фермаямы сюриз но кеносмылэсь липетсэ ишкалтӥз. Америкаысь ожгарчи, кудӥз гидамы ватскыса улэ вал, мыным кеськиз: «Выд!» Мон со доры бызьыса лыктӥ но вӧзаз выдӥ. Со аслэсьтыз касказэ кылиз но мыным дӥсяз.

Ож бере ми эшъяськиськомы вал вын-агайёсын но сузэр-апайёсын, кудъёсыз Лье́ж карысь кенешын ужало-тыршо вал. Ми дорысь со интыяськемын вал уйпалан, ог 90 иськем кемын. Кӧня ке дыр ортчыса, Бастонь карын пичи группа кылдӥз. Мон налоговой службае ужаны пыри но со дыре ик юридик школаын дышетскыны кутски. Берлогес мон нотариальной контораын ужаны кутски. 1951-тӥ арын Бастонь карын ми пичи ёросысь конгрессэз ортчытӥмы. Отын ог сю адями вал, озьы ик Э́лли Ро́йтер сузэр но, кудӥз ӟырдыт мылкыдын пионер луыса ужа-тырше вал. Конгрессэ вуон понна, со велосипедэн 50 иськем ортчиз. Ӝоген ми ог-огмес яратӥмы но ог-огмылы кыл сётӥмы, кузпалъяськомы шуыса. Со дыре ик Эллиез Галаад школаын дышетскыны  ӧтизы, кудӥз Огазеяськем Штатъёсын интыяськемын. Со валтӥсь кивалтонние гожтэт гожтӥз но валэктӥз, малы дышетскыны уз быгаты, вылды. Норр агай, кудӥз со вакытэ Иеговалэн калыкезлэн уженыз кивалтэ вал, солы умой гожтэт гожтӥз но вераз, куке но со картэныз ӵош Галаад школаын дышетскыны быгатоз на шуыса. 1953-тӥ арын тулыспалэ ми кузпалъяськимы.

Со арын ик ми Эллиен ветлӥмы «Выль дуннеын улӥсь адямиос» конгрессэ, кудӥз ортчиз Нью-Йоркын, «Янки» стадионын. Отын мон тодматски одӥг агаен, кудӥз мыным умой уж ӵектӥз, но со понна Огазеяськем Штатъёсы улыны кошконо вал. Ужпум кутэмлэсь азьло ми Эллиен вӧсяськимы. Собере мон ӵектонзэ палэнтӥ но, ми Бельгие берытскимы, азьланяз но Бастонь карысь дас ивортӥсьёс сярысь сюлмаськон понна. Вуоно араз милям Серж пимы вордӥськиз. Но сизьым толэзь дыръяз со висьыны кутскиз но кулӥз. Милям сюлэммы туж куректыса улӥз. Ваньзэ чидан понна, ми трос вӧсяськиськомы вал но улӟытонлы осконмес юнматӥськомы вал.

1961-тӥ арын коньывуонэ мон шедьтӥ уж, кудӥз юрттӥз мыным пионер луыса ужаны-тыршыны. Со нуналэ ик мыным жингыртӥз агай, кудӥз Бельгиысь филиалын ужаз-тыршиз. Со мынэсьтым юаз, быгатӥсько-а мон ёросэз чаклась луыса ужаны-тыршыны. Мон юай: «Яра-а милемлы нырысь пионеръёс луыса ужаны-тыршыны?» Со соглаш луиз. Ми тямыс толэзь ӵоже пионеръёс вал, нош 1962-тӥ арын куарусёнэ мон ёросэз чаклась луыса ужаны-тыршыны кутски.

Кык ар ортчыса, милемыз Брюссельысь Вефиле ӧтизы. Ми отын ужаны-тыршыны кутскимы 1964-тӥ арын коньывуонэ. Со туж шудо вакыт вал. 1965-тӥ арын Вефилямы Норр агай лыктӥз. Мон туж пайми, куке солэн ветлэмез бере монэ куризы филиаллэн ужъёсыз понна кылкутыны. Берлогес милемыз Эллиен дышетскыны ӧтизы Галаад школалэн 41-тӥ классаз. Норр агайлэн кылъёсыз, кудъёссэ со 13 ар талэсь азьло вераз, быдэсмизы. Дышетскеммы бере ми Бельгиысь Вефиле берытскимы.

Юридик удысын ужаме пайда ваиз. Малы ке шуоно трос аръёс ӵоже мон юрттӥ Европаысь но мукет шаеръёсысь агайёслы Иеговалы кышкатэк йыбыртъяны правозэс утьыны (Флп. 1:7). Мон пумиськылӥ кивалтӥсьёсын 55-лэсь но тросгес шаеръёсысь, кудъёсаз тодытон ужмес нуыны люкето яке воксё уг лэзё вал. Мон юрист шуыса верам интые, мон верасько вал, мон Инмарлэн ужась-тыршисез шуыса. Мон котьку оскиськисько вал Иегова вылэ, малы ке шуоно тодам возисько вал Библиысь таӵе кылъёсты: «Эксэйлэн [яке судьялэн] сюлмыз — Кузё-Инмарлэн кияз визыл кошкись ву кадь: кытчы берыктэмез потэ, сое Со отчы берыктэ» (Мад. 21:1).

Тужгес но тодам кылиз одӥг учыр. Мынам одӥг кивалтӥсен пумиськеме потэ вал. Кӧня ке  пол куреме бере гинэ со соглаш кариськиз. Нырысь ик со шуиз: «Тӥляд вить минутты вань, вералэ мар тӥледлы кулэ». Мон йырме мыкыртӥ но вӧсяськыны кутски. Пиосмурт йыркуръяськыса ик юаз, мар мон карисько. Мон йырме ӝутӥ но шуи: «Мон Инмарез тау кари, тӥ солэн медоез шуыса». Со юаз: «Мар сярысь тӥ вераськоды?» Мон солы возьматӥ Римъёслы 13:4. Со протестант вал, соин ик та кылбурез сак лыдӟиз. Кыӵе со пайда вайиз? Кивалтӥсь мыным ӝыны час висъяз. Пумиськонмы бадӟым пайда вайиз. Озьы ик со Иеговалэсь Адӟись-Ивортӥсьёссэ ушъяз но вераз, ми умой ужез быдэсъяськомы шуыса.

Европаысь Иеговалэн ужась-тыршисьёсыз, асьсэды утён понна, судъёсын трос ужъёсты нуизы. Кылсярысь, соос герӟаськемын вал нейтралитетэн но выт тыронэн. Мон трос ужъёсы пыриськи но ас синъёсыным адӟи, кызьы Иегова милемлы азинлык но вормон кузьмаз. Иеговалэн Адӟись-Ивортӥсьёсыз Адямилэсь правооссэ утёнъя Европаысь судын 140-лэсь но тросгес ужъёсты вормизы!

1990-тӥ аръёсы мон ужай валтӥсь кивалтонниысь Фи́лип Бра́мли агаен но Ва́льтер Фарне́ти агаен, кудӥз Италиысь филиалын ужаз-тыршиз. Ми тыршимы юрттыны Кубаысь агайёслы, кивалтӥсьёслэн пумитъяськемзы шоры учкытэк, соос Иеговалы йыбыртъяны мед быгатозы шуыса. Мон гожтэт гожъяй Кубаысь кивалтӥсьёслы, кудъёсызлэн Бельгиын посольствозы вал, но одӥг пиосмуртэн пумиськи, кудӥз милесьтым ужмес эскере вал. Нырысь ми ӧм быгатэ сэрттыны мугъёсты, кудъёсыз сэрен кивалтӥсьёс ужмес нуыны люкето вал.

Ми Иеговалы кивалтэт курыса вӧсяськимы. Собере ми кивалтӥсьёсты куримы, милемлы мед лэзёзы шуыса Кубае 5 000 Библиос вайыны. Милемлы лэзизы. Библиос шаере вуизы но, соосты агайёслы сётъязы. Ми валамы, Иегова милемыз бакель каре шуыса. Собере ми кивалтӥсьёсты куримы лэзьыны милемлы эшшо 27 500 Библиос вайыны. Милемлы нош ик лэзизы. Мон туж шумпотӥсько вал, тыршеммылы луыса Кубаысь котькуд агайлэн но сузэрлэн табере аслаз Библиез вань шуыса!

Мон ӵем ветлӥсько вал Кубае, пӧртэм юридик юанъёсты сэрттон-пертчон понна. Со дыр куспын трос кивалтӥсьёсын милям умой кусыпъёсмы кылдӥзы.

1994-тӥ арын, куке Руандаын бугыръяськонъёс вал, 1 000 000-лэсь тросгес адямиос виемын  вал. Иеговалэн куд-ог Адӟись-Ивортӥсьёсыз но бырыны шедизы. Ӝоген агайёсты куризы отчы гуманитарной юрттэт ыстыны.

Кига́ли шоркаре вуыкумы, ми адӟимы, берыктон офислэн но литературной складлэн борддоръёссы ыбылыса пасямын шуыса. Ми кылӥмы трос ӝож учыръёсты со сярысь, кызьы вын-агайёсмес но сузэр-апайёсмес бадӟым пуртъёсын вандыса виизы. Озьы ик вал трос учыръёс, кызьы агайёс но сузэръёс ог-огзылы яратонзэс уж вылын возьматӥзы. Кылсярысь, ми тодматскимы тутси калыкысь агаен, кудзэ хуту калыкысь Адӟись-Ивортӥсьёслэн семьязы 28 нунал ӵоже азбаразы гуын ватыса возиз. Агайёсмес но сузэръёсмес юнматон понна, ми Кигалиын пумиськон радъямы, кудаз 900-лэсь но тросгес адямиос лыктӥзы.

Собере ми кошкимы Заир шаере (али Конго Демократической Республика). Со шаере Руандаысь трос Адӟись-Ивортӥсьёс кошкизы. Соос улӥзы Го́ма кар котырысь беженецъёслэн лагерязы. Но ми соосты шедьтыны ум быгатӥське вал, соин ик вӧсяськиськомы вал, Иегова милемлы мед юрттоз шуыса. Собере ми адӟимы, кызьы ми пала одӥг адями лыктэ, но солэсь юамы, тодэ-а со кинэ ке Иеговалэн Адӟись-Ивортӥсьёсыз пӧлысь. Со вераз: «Тодӥсько, мон Адӟись-Ивортӥсь. Мон тӥледлы юртто пумиськыны юрттэт сётонъя комитетысь агайёсын». Со агайёсын адӟиськеммы бере ми 1600-лэсь тросгес беженецъёсын пумиськимы, соосты буйгатон понна но оскытон понна, Иегова соосты яратэ шуыса. Ми соослы лыдӟимы Кивалтӥсь кенешлэсь гожтэтсэ. Со соослэн сюлмазы ик пыриз. Отын гожтэмын вал: «Ми котьку тӥ сярысь вӧсяськиськомы. Ми тодӥськомы, Иегова тӥледыз уз кельты шуыса». Кивалтӥсь кенеш шонер вераз. Али Руандаын 30 000-лэсь тросгес Адӟись-Ивортӥсьёс. Ваньзы соос шумпотыса Иеговалы ужало-тыршо!

2011-тӥ арын дуно кышное кулӥз. Ми ог 58 ар кузпалъяськемын вал. Сотэк мыным туж секыт вал. Со сярысь мон Иеговалы вералляй. Со монэ туж буйгатылӥз. Озьы ик мон юнматскисько вал, мукетъёсызлы Эксэйлык сярысь ӟеч иворез вераса.

Али мыным 90 ареслэсь тросгес ини, но мон азьло сямен ик котькуд арня тодытон уже пыриськисько. Со сяна, мон шумпотӥсько, быгатӥсько шуыса Бельгиысь филиалысь юридик ёзэтлы юрттыны но вефиль семьяез юнматыны.

Иеговалы нырысетӥзэ вӧсяськеме бере ог 84 ар ортчиз. Озьы мон Иеговаен эшъяськыны кутски. Со аръёс куспын Инмарен кусыпъёсы юнгес но юнгес луизы. Мон Иеговалы туж тау карисько, быдэс улонэ ӵоже со монэ кылзӥз но вӧсяськонъёсылы ответ сётылӥз шуыса! (Пс. 65:19) b.