1, 2. Кыӵе дан сётэмын Иеговалэн оскымон ужась-тыршисьёсызлы?

 ӴЕМ дыръя Иегова шоры ми учкиськомы Атаймы, Инмармы но Эшмы шоры кадь. Иегова сярысь ми трос мукетсэ но вераны быгатӥськомы на. Нош тӥ куке но малпаськиды-а, Иегова — со Инмар шуыса, кудӥз милемыз ас дораз куное ӧте?

² Давид эксэй Иеговаез кузёен ӵошатӥз, нош солэсь оскымон ужась-тыршисьёссэ — куноосыныз. Давид юаз: «Кузё-Инмаре, Тынад улон интыяд кинлэн улэмез луоз? Тынад святой гурезяд кинлэн интыяськемез луоз?» (Пс. 14:1). Адӟиське, адями Иеговалэн улон интыяз улыны быгатэ, яке со Иеговалэн куноез, эшез луыны быгатэ. Со туж бадӟым дан! Та сярысь малпаськыса, милям сюлэммы ик бугырске.

ИЕГОВА КУНООСТЫ ЯРАТЭ

3. а) Кин луиз Иеговалэн нырысетӥез куноез? б) Кельше вал-а Иеговалы но солэн нырысетӥ куноезлы ог-огенызы дырзэс ортчытъяны?

³ Нырысь Иегова огназ улӥз. Но собере со аслэсьтыз Пизэ кылдытӥз. Со нырысетӥез куноез луиз. Та Иеговалы бадӟым шумпотон вайиз. Библиысь адӟиське, Иеговалы аслаз Пиеныз дырзэ ортчытъяны туж кельше вал шуыса. Пиез но туж шумпотэ вал Атаез вӧзын улыны (Мад. 8:30).

4. Кинэ эшшо Иегова ас дораз куное ӧтиз?

⁴ Берлогес Иегова мукет кылчинъёсты кылдытӥз но соосты  ас дораз куное ӧтиз. «Инмар пиос» шумпотыса соин ӵош улӥзы (Иов 38:7; Дан. 7:10). Нырысь Иеговалэн куноосыз пӧлын вал соос гинэ, кинъёс соин ӵош инмын улӥзы. Но берлогес Инмар адямиосты кылдытӥз. Соосты но со ас дораз куное ӧтиз. Кылсярысь, Иеговалэн куноосыз пӧлын вал Енох, Ной, Авраам но Иов. Инмар соосты аслаз эшъёсыныз лыдъяз, малы ке шуоно соос солэсь кылзӥськыса улӥзы (Ул.-выл. 5:24; 6:9; Иов 29:4; Ис. 41:8).

5. Мае тодыны луэ азьпалзэ ивортонысь, кудӥз гожтэмын Иезекиильлэн 37:26, 27?

⁵ Дыр ортчемъя Иегова ас дораз выль но выль адямиосты куное ӧте. (Лыдӟе Иезекиильлэсь 37:26, 27.) Иезекиильлэн азьпалзэ ивортонэз возьматэ, Инмарлэн потэ, солэн но оскымон ужась-тыршисьёсызлэн умой кусыпъёссы мед луозы шуыса. Иегова кылзэ сётӥз «сӥзён-косон пыр соосын тупаса улон кусып» кылдытыны. Та азьпалзэ ивортон возьматэ вал, азьланяз зырӟем христианъёс но адямиос, кудъёсыз музъем вылын улыны оско, «одӥг уллё» луозы но ваньзы ӵош Инмарлэн куноосыз луозы шуыса (Иоанн 10:16). Та азьпалзэ ивортон али быдэсме!

ИНМАР ВАНЬ КУНООСЫЗ СЯРЫСЬ СЮЛМАСЬКЕ

6. Ку адями Иегова доры куное лыктэ но кытын солэн улон интыез?

⁶ Вашкала дыръя адямиос шатёръёсын уло вал. Отын шутэтскыны но урод куазьлэсь ватскыны луэ вал. Кин ке доры куное лыктыку, адями тодэ вал, со сярысь умой сюлмаськозы шуыса. Иеговалы улонмес сӥзьыса, ми со доры куное лыктӥськомы (Пс. 60:5). Со милемлы трос духовной сиён ӵектэ, озьы ик ми мукет куноосыныз эшъяськыны быгатӥськомы. Иеговалэн улон интыез — со кыӵе ке инты ӧвӧл. Солэн улон интыез отын, кытын солэн ужась-тыршисьёсыз (Усьт. 21:3). Тӥ мукет шаеръёсы ветлӥды ке — кылсярысь, нимысьтыз конгрессэ,— тӥ адӟиды, вылды, вын-агайёсты но сузэр-апайёсты, кудъёсыз, тӥ сямен ик, Иеговалы ужало-тыршо. Соос но Иегова доры куное лыктэмын.

7. Малы вераны луэ, Иеговалэн кулэм ужась-тыршисьёсыз азьвыл сямен ик со дорын куноын шуыса? (Озьы ик учке суредэз.)

⁷ Нош мар вераны луоз Иеговалэн оскымон ужась-тыршисьёсыз сярысь, кудъёсыз кулӥзы ини? Луэ-а вераны, соос азьвыл сямен ик со дорын куноын шуыса?  Луэ. Малы? Малы ке шуоно Иеговалэн син азяз соос улэпесь. Та адӟиське Иисуслэн кылъёсысьтыз: «Кулэмъёслэсь улӟыса султонзэс Моисей но куак дорысен возьматӥз, соку со Кузё-Инмарез Авраамлэн Инмарез, Исааклэн Инмарез, Иаковлэн Инмарез шуыса нимаз. Инмар — кулэмъёслэн Инмарзы ӧвӧл, Со — улэпъёслэн Инмарзы. Инмар азьын ваньмыз улэпесь» (Лука 20:37, 38).

МАРЛЭСЬ УТЕ ИЕГОВА АСЛЭСЬТЫЗ КУНООССЭ НО МАР СО СООСЛЭСЬ ВОЗЬМА

8. Марлэсь утиськыны быгато соос, кинъёс Иегова доры куное лыкто?

⁸ Шатёрын шутэтскыны, озьы ик зорлэсь но тӧллэсь ватӥськыны луэ вал. Нош Иегова доры куное лыктыса, ми утиськиськомы ваньмызлэсь, мар соин кусыпъёсмес сӧрыны но вуоноезлы осконмес лябӟытыны быгатэ. Иеговаен кусыпъёсмы юнэсь луизы ке, Шайтан милемлы тупатыны луонтэм изъян вайыны уз быгаты (Пс. 30:24; 1 Иоанн 3:8). Выль дуннеын но Иегова оскымон эшъёссэ утёз ваньмызлэсь, мар соин кусыпъёссэс лябӟытыны быгатэ. Со сяна, со соосты кулонлэсь но утёз (Усьт. 21:4).

9. Мае Иегова возьма аслаз куноосызлэсь?

⁹ Иегова милемыз ас дораз куное ӧтиз бере, со милемыз аслаз эшъёсыныз лыдъя. Ми понна со туж бадӟым дан. Ми пырак дауръёс ӵоже соин эшъяськыны быгатӥськомы. Кызьы тау кароно Иеговалы милемыз куное ӧтемез понна? Шуом, тӥледыз куное ӧтизы. Отчы лыктыса, тӥ асьтэлэсь куронъёстэс уд пуктылэ ук. Кылсярысь, вань куноос пыдкутчанзэс кылё ке, тӥ но кылёды. Ӵапак озьы ик милемлы тодыны кулэ, мае возьма Иегова аслаз куноосызлэсь. Ми Иеговаез яратӥськомы, соин ик «котьмар ласянь Солы тэрытскыса» улэммы потэ (Кол. 1:10). Иегова — милям Эшмы. Со сяна, со милям Инмармы но Атаймы, кудзэ гажаны кулэ (Пс. 24:14). Милемлы тае тодамы возёно но котьку сое мур гажано. Та юрттоз милемлы котьку но Иеговалэсь сюлэмзэ шумпоттыса улыны. Милям туж потэ Инмармы азьын зӥбыт-востэмесь луэммы (Мих. 6:8).

КЫЗЬЫ ИЕГОВА ВАШКАЛА ДЫРЪЯ ВАНЬ КУНООСЫЗ СЯРЫСЬ СЮЛМАСЬКИЗ

10, 11. Малы вераны луэ, луоё кыр дуннеын Иегова быдэс израиль калык сярысь сюлмаськиз шуыса?

¹⁰ Иегова сюлмаське вань куноосыз сярысь (Рим. 2:11). Та адӟиське отысь, кызьы со ассэ возиз аслаз калыкеныз Сӥнай луоё кыр дуннеын.

¹¹ Израиль калыкез Египетысь поттэмез бере Иегова сое скинияез пуктыны косӥз, озьы ик отчы священникъёсты но левитъёсты ужаны-тыршыны пуктӥз. Возьматэ вал-а та, соослы, кинъёс скинияын ужазы-тыршизы яке со котырын улӥзы, Иегова тросгес саклыксэ висъяз шуыса? Уг! Иегова котькин сярысь сюлмаське.

12. Кытысь адӟиське, Иегова калык пӧлысь котькудӥз сярысь сюлмаськиз шуыса? (Потон 40:38). (Озьы ик учке суредэз.)

¹² Израиль калык пӧлысь котькудӥз Иеговалэн эшез луыны быгатэ вал, станлэн кыӵе интыяз гинэ со медам улы но кыӵе ужъёсты гинэ медам быдэсъя. Кылсярысь, Иегова сюлмаськиз, быдэс калык мед адӟоз шуыса пилемез но тыл юбоез, кудъёсыз скиния йылын сылӥзы. (Лыдӟе Потонэз 40:38.) Куке пилем ӝутске вал, мукет интые кошкон понна, сое адӟо вал соос но, кинъёс стан пумын улӥзы. Талы луыса соос быгато вал дырыз дыръя  улэм-вылэмзэс люканы но ваньмыныз ӵош кошкыны (Лыд. 9:15—23). Озьы ик ваньзы кыло вал кык азвесь гумыослэсь бадӟым куаразэс, кудӥз возьматэ вал, сюрес вылэ потоно шуыса (Лыд. 10:2). Кин ке но скиния вӧзын улэ вал ке, со уг возьматы вал, мукетъёсыныз ӵошатыса, солэн Иеговаен кусыпъёсыз юнгес шуыса. Калыкысь котькудӥз быгатэ вал Иегова доры куное лыктыны но со дорысь утиськон шедьтыны. Ӵапак озьы ик туннэ но: кытын гинэ ми медам улэ, ми оскыны быгатӥськомы, яратӥсь Инмармы милемлы кивалтэт сётоз но милемыз утёз шуыса.

КЫЗЬЫ ИЕГОВА ТУННЭ ВАНЬ КУНООСЫЗ СЯРЫСЬ СЮЛМАСЬКЕ

13. Кызьы Иегова сюлмаське вань куноосыз сярысь туннэ?

¹³ Туннэ Инмарлэн куд-ог ужась-тыршисьёсыз уло валтӥсь кивалтонни вӧзын яке Иеговалэн Адӟись-Ивортӥсьёсызлэн кыӵе ке филиалзы вӧзын. Кин ке но отын ужа-тырше но. Соин ик сыӵе вын-агайёс но сузэр-апайёс быгато Вефильлы юрттыны но эшъяськыны вын-агайёсын, кудъёсыз дано ужъёсты быдэсъяло. Нош кин ке но ёросэз чаклась луыса ужа-тырше яке мукет амалэн, вань дырзэ сётыса, нимысьтыз ужан-тыршонэ пыриське. Тӥ али сыӵе амалъёсын ужаны-тыршыны уд ке быгатӥське — нош ми пӧлысь тросэз озьы ужаны-тыршыны уг быгато,— мылкыдды медаз куашка. Валтӥсез, тӥ — Иеговалэн куноосыз. Нош со яратэ ваньзэс, кинэ ас дораз куное ӧтиз. Со котькудӥзлы саклыксэ висъя. Котькин Инмарлэн калыкысьтыз духовной сиён, кивалтэт но утиськон шедьтыны быгатэ (1 Пётр 5:7).

14. Вералэ, мар эшшо возьматэ на, Иегова котькин сярысь сюлмаське шуыса.

¹⁴ Тани эшшо мар возьматэ на, Иегова котькин сярысь сюлмаське шуыса. Туннэ Библиез вань адямиос лыдӟыны быгато, дуннелэн кыӵе сэрегаз гинэ соос медам  улэ. Нырысь Библия гожтэмын вал еврей, арамей но грек кылъёсын. Но луэ-а вераны, соослэн, кинъёс Библиез та куинь кылъёсын лыдӟыны быгато, Иеговаен кусыпъёссы юнгес шуыса, ӵошатоно ке соосын, кинъёс та кылъёсты уг тодо? Валамон, со озьы ӧвӧл! (Матф. 11:25).

15. Кытысь адӟиське, Иегова пӧртэм адямиослы соин эшъяськыны ӵектэ шуыса? (Озьы ик учке суредэз.)

¹⁵ Ми быгатӥськомы Иеговалэн эшъёсыз луыны вылӥ образованитэк но, озьы ик вашкала кылъёсты тодытэк но. Библиез валан понна, профессор луыны кулэ ӧвӧл. Иегова сюлмаськиз, Библия кӧня ке сюрс кылъёсы берыктэмын мед луоз шуыса. Соин ик быдэс дунне вылысь адямиос быгато Инмарен тодматскыны но солэсь визь-кенешъёссэ улоназы пыртыны (2 Тим. 3:16, 17).

АЗЬЛАНЯЗ НО УЛЭ ИЕГОВАЛЭН УЛОН ИНТЫЯЗ

16. Мае возьма Иегова аслаз куноосызлэсь? (Апостолъёслэн ужъёссы 10:34, 35).

¹⁶ Ми туж тау кариськомы Иеговалы, со милемыз ас дораз куное ӧтиз шуыса. Со котькинлэсь ӟеч, яратӥсь но куно карись кузё. Со сяна, Инмар котькин сярысь сюлмаське. Иегова ас дораз ӧте пӧртэм адямиосты, пиосмуртъёсты но кышномуртъёсты, кытын гинэ соос медам улэ, кыӵе калыкысь гинэ соос медам потэ но кыӵе аресъем гинэ соос медам луэ. Но Иегова возьма, куноосыз сое гажалозы шуыса. (Лыдӟе Апостолъёслэсь ужъёссэс 10:34, 35.)

17. Мае ми эскеромы вуоно статьяын?

¹⁷ Давид юаз: «Кузё-Инмаре, Тынад улон интыяд кинлэн улэмез луоз? Тынад святой гурезяд кинлэн интыяськемез луоз?» (Пс. 14:1). Собере святой духлэн валтэмез улсын Давид та юанъёслы валэктонъёс гожтӥз. Вуоно статьяын ми пыр-поч эскеромы 14-тӥ псаломез но тросгес тодомы, мае Иегова возьма аслаз куноосызлэсь.