1. Мар милемлы юрттэ Иеговалы ужаны-тыршыны секыт дыръя но?

 «СЕКЫТ дыръёс». Тазьы Библия вера асьме нуналъёсмы сярысь (2 Тим. 3:1). Иеговалэн калыкез пумиськылэ шуг-секытъёсын, кудъёсыныз ваньмыз пумиськыло. Со сяна, ми уйылон-уллянъёсын но пумиськылӥськомы на. Малы ми секыт дыръя но Инмарлы ужаны-тыршыны быгатӥськомы? Малы ке шуоно ми ас выламы шӧдӥмы, Иегова — со «Улэп Инмар» шуыса (Иер. 10:10; 2 Тим. 1:12).

2. Малы вераны луэ, Иегова — со улэп Инмар шуыса?

² Иегова зэм но вань. Со вань шуг-секытъёсмы сярысь тодэ но милемлы котьку юрттыны быгатэ (2 Пар. 16:9; Пс. 22:4). Ми тодамы возимы ке, Иегова — со улэп Инмар шуыса, соку ваньзэ чиданы быгатомы. Ойдолэ тае эскеромы Давид эксэйлэн примерез вылын.

3. Мар сярысь вераз Давид, куке шуиз: «Кузё-Инмаре улэп!»?

³ Давид Иеговаез тодӥз но со вылэ оскиськыса улӥз. Саул эксэйлэсь но мукет тушмонъёсызлэсь пегаса улыкуз, Давид Иеговалэсь юрттэтсэ утчаз (Пс. 17:7). Куке Инмар Давидлы юрттӥз но сое утиз, Давид шумпотыса вераз: «Кузё-Инмаре улэп!» (Пс. 17:47). Та кылъёсын Давид Инмар зэм но вань шуыса гинэ ӧз вера. Давид вераз, Иегова — со улэп Инмар шуыса, кудӥз котьку но калыкезлы юрттэ. Зэм, Давид ас вылаз шӧдӥз, Иегова — со улэп Инмар шуыса. Солэн юн мылкыдыз вал азьланяз но Иеговалы ужаны-тыршыны но сое данъяны (Пс. 17:29, 30, 50).

4. Кыӵе пайда ваёз, ми оскимы ке, Иегова — со улэп Инмар шуыса?

 ⁴ Ми оскимы ке, Иегова — со улэп Инмар шуыса, соку вань сюлмысьтымы солы ужаны-тыршыны быгатомы. Ми вань шуг-секытъёсты чидаломы но азьланяз но солы ужаломы-тыршомы. Озьы ик ми номырлы ум лэзе Иеговаен кусыпъёсмес лябӟытыны.

УЛЭП ИНМАР ТӤЛЕДЛЫ КУЖЫМ СЁТОЗ

5. Малы милемлы шуг-секытъёслэсь кышкано ӧвӧл? (2 Коринфъёслы 4:7).

⁵ Ми быгатомы ваньзэ чиданы, тодамы возимы ке, Иегова — со улэп Инмар но милемлы котьку юрттыны дась шуыса. Инмар котькинлэсь кужмо, соин ик со быгатэ вань шуг-секытъёсмес сэрттыны-пертчыны но милемыз юнматыны. (Лыдӟе 2 Коринфъёслы 4:7.) Озьыен, милемлы шуг-секытъёслэсь кышкано ӧвӧл. Куке ми адӟиськомы, кызьы Иегова милемлы пичи шуг-секытъёс дыръя юрттэ, милям осконмы юнма, со милемыз бадӟым шуг-секытъёс дыръя но уз кельты шуыса.

6. Кыӵе учыръёс, кудъёсыз Давидэн егит дыръяз луизы, солэсь осконзэ юнматӥзы?

⁶ Тодамы ваёмы кык учыръёсты, кудъёсыз Давидлэсь осконзэ юнматӥзы. Егит дыръяз со атаезлэсь уллёзэ возьма вал. Одӥг пол лев ыжзэ нуиз, нош мукет дыръя гондыр уллёез вылэ урдскиз. Кыказ ик учыръёсын Давид кышкатэк соос сьӧры уйиськиз но ыжъёссэ утиз. Озьы ке но Давид данъяськыса ӧз улы. Со тодӥз, солы Иегова вормон кузьмаз шуыса (1 Экс. 17:34—37.). Давид котьку тодаз возиз, кызьы Иегова солы юрттылӥз. Та сярысь малпаськыса, солэн осконэз юнмаз, улэп Инмар сое азьланяз но юнматоз шуыса.

7. Мар сярысь малпаськиз Давид но кызьы та солы юрттӥз Голиафлэн пумитаз потыны?

⁷ Берлогес Давид израиль ожгарчиос доры лыктӥз, аслэсьтыз агайёссэ чаклан понна. Соку солы 20 арес но ӧй вал на. Со адӟиз, ожгарчиос кышкамын вал шуыса Голиаф нимо филистим пилэсь, кудӥз израиль ожгарчиосты серем карыса улэ вал (1 Экс. 17:10, 11). Соос кышкамын вал, малы ке шуоно асьсэлэн тушмонзы сярысь но солэн кылъёсыз сярысь гинэ малпаськыса улӥзы (1 Экс. 17:24, 25). Нош Давид мукетыз сярысь малпаськиз. Со вала вал, Голиаф израиль ожгарчиосты гинэ серем уг кары, нош «улэп Инмарлэсь ожгарчиоссэ» серем каре шуыса (1 Экс. 17:26). Давид Иегова сярысь малпаськиз. Со юн оскиз, Инмар, кудӥз солы юрттӥз пудо возьмась дыръяз, солы али но юрттоз шуыса. Соин ик Давид Голиафлэн пумитаз потӥз но сое вормиз! (1 Экс. 17:45—51).

8. Мар юрттоз осконмес юнматыны, Иегова милемыз ноку уз кельты шуыса? (Озьы ик учке суредэз.)

⁸ Ми но быгатомы шуг-секытъёсмес чиданы, тодамы возимы ке, улэп Инмар милемлы котьку юрттыны дась шуыса (Пс. 117:6). Мар юрттоз осконмес юнматыны? Лыдӟе Библиысь со сярысь, кызьы Иегова юрттылӥз аслаз ужась-тыршисьёсызлы азьвыл (Ис. 37:17, 33—37). Озьы ик jw.org сайтысьтымы шедьтыны луэ учыръёсты, кудъёсаз вераське, кызьы Иегова юрттэ аслаз ужась-тыршисьёсызлы туннэ. Со сяна, тодады вае, кызьы Иегова тӥледлы юрттылӥз. Тӥ малпаськоды ке, тӥледлы левен но гондырен нюръяськем кадь секыт ноку ӧй вал шуыса, эн сюлмаське. Иегова котьку тӥледын вал! Со тӥледлы ӵектӥз солэн эшез луыны (Иоанн 6:44). Со али но тӥледлы юрттэ зэмлыкъя улыны. Куре  Иеговаез юрттыны тӥледлы тодады вайыны, кызьы со тӥледлы вӧсяськонъёстылы ответ сётылӥз, самой кулэ дыръя тӥледлы юрттылӥз но секыт дыръя тӥледыз юнматылӥз. Таӵе малпаськон оскондэс юнматоз, Иегова тӥледыз ноку уз кельты шуыса.

9. Мар сярысь тодамы возёно секыт дыръя? (Мадёнъёс 27:11).

⁹ Ми тодамы возиськомы ке, Иегова — улэп Инмар шуыса, соку шуг-секытъёсмы шоры шонер учкомы. Секыт дыръя асьмеды воземмы Иеговаез шумпоттыны яке ӝоже уськытыны быгатэ. Шайтан вера, секыт дыръя ми Инмарез кельтомы шуыса (Иов 1:10, 11; лыдӟе Мадёнъёсты 27:11). Но Иеговалы оскымон кыльыса, ми возьматӥськомы, сое яратӥськомы, нош Шайтан пӧяське шуыса. Кыӵе шуг-секытэн тӥ али пумиськиськоды? Оло нош, тӥледлы кивалтӥсьёс пумитъясько, коньдонэн герӟаськем шуг-секытъёсты кылдо яке адямиос ӟеч иворез уг кылзо. Маин гинэ тӥ медад пумиське, Иеговалэн шӧдонъёсыз сярысь малпаське. Тодады возе, секыт дыръя тӥ Иеговаез шумпоттыны быгатӥськоды шуыса. Эн вунэтэ: тӥ котькыӵе шуг-секытъёс пыр потыны быгатӥськоды (1 Кор. 10:13). Иегова тӥледлы ваньзэ чиданы юрттоз.

УЛЭП ИНМАР ТӤЛЕДЫЗ БАКЕЛЬ КАРОЗ

10. Кызьы улэп Инмар аслэсьтыз ужась-тыршисьёссэ бакель кароз?

¹⁰ Иегова аслэсьтыз ужась-тыршисьёссэ котьку бакель каре (Евр. 11:6). Со али ик ини милемлы юрттэ тупаса улыны но шудо луыны, нош азьланяз пырак улон кузьмалоз. Ми оскиськомы Инмарлэн кылсётонъёсызлы, малы ке шуоно соосты быдэстыны солэн мылкыдыз но, кужымез но вань. Та сярысь малпаськон милесьтым мылкыдмес ӝутэ вань сюлмысьтымы Инмарлы ужаны-тыршыны. Ӵапак озьы лэсьтӥзы вашкала дыръя Инмарлэн куд-ог ужась-тыршисьёсыз, кылсярысь, Тимофей (Евр. 6:10—12).

11. Малы Тимофей кенешын трос ужъёсты быдэсъяз? (1 Тимофейлы 4:10).

 ¹¹ Лыдӟе 1 Тимофейлы 4:10. Тимофей улэп Инмар вылэ оскиськиз, соин ик кенешын трос ужъёс быдэсъяз. Кыӵе ужъёс? Павеллэн верамезъя, со тыршиз эшшо но умой дышетыны тодытон ужын но кенешын. Озьы ик Тимофей котьмар ласянь умой адӟем карон возьматӥз агайёслы но сузэръёслы, егитъёсызлы но, арлыдоосызлы но. Солэн секыт ужъёсыз но вал. Кылсярысь, кулэ дыръяз со быгатэ вал шонерак но яратыса визь-кенеш сётыны соослы, кинъёс Инмарлэн сюрес вылысьтыз кожизы (1 Тим. 4:11—16; 2 Тим. 4:1—5). Адямиос Тимофейлэсь тыршемзэ котьку ик ӧз адӟылэ но тау ӧз карылэ. Озьы ке но со юн оскиз, Иегова сое одно ик бакель кароз шуыса (Рим. 2:6, 7).

12. Мар тӧроослэсь мылкыдзэс ӝутэ кенешын трос ужъёс быдэсъяны? (Озьы ик учке суредэз.)

¹² Дуно тӧроос, тодады возе: Иегова тыршемдэс адӟе но туж дунъя. Тӥ возьмасьёс, дышетӥсьёс но тодытӥсьёс гинэ ӧвӧл. Тӥ пӧлысь тросэз пуктӥськон ужъёсы пырисько но инкуазь шимучыръёсы сюремъёслы юрттӥсько. Кин ке но эмъюртъёсын кыллись агайёс но сузэръёс доры ветлэ яке эмъюртъёсын герӟаськонъя комитетъёсын ужа-тырше. Тӧроос тодо, агайёс но сузэръёс — со Иеговалэн уллёез шуыса, кыӵе ке адямиослэн ӧвӧл. Соин ик соос вань сюлмысьтызы асьсэлэсь ужъёссэс быдэсъяло но юн оско, Иегова соосты бакель кароз шуыса (Кол. 3:23, 24).

13. Дунъя-а Иегова ужам-тыршеммес? Валэктэ.

¹³ Ваньзы тӧроос луыса ужаны-тыршыны уг быгато, но ваньзы быгато Иеговалы мар ке но сётыны. Со туж дунъя, куке ужан-тыршонын ми лэсьтӥськомы ваньзэ, мае быгатӥськомы. Инмар адӟе Эксэйлыклэн ужезлы ас мылкыд кареммыя сётэм коньдонмес, со трос ик ӧвӧл ке но.  Со туж шумпотэ, куке ми, возьдаськеммы шоры учкытэк, кенешлэн пумиськонъёсаз кимес ӝутӥськомы но валэктон сётӥськомы. Озьы ик со туж шумпотэ, куке ми куатаськыны ум дыртӥське но мукетъёсты простить кариськомы. Тӥляд уг луы ке Иеговалы ужамды-тыршемды сомында, кӧня потэ, юн оске: со тыршемдэс адӟе. Со тӥледыз туж яратэ но одно ик бакель кароз (Лука 21:1—4).

УЛЭП ИНМАРЛЭСЬ ЭН ПАЛЭНСКЕ

14. Кызьы Иеговаен юн кусыпъёс юртто милемлы солы оскымон кыльыны? (Озьы ик учке суредэз.)

¹⁴ Ми оскимы ке, Иегова зэм но вань шуыса, милемлы капчигес луоз солы оскымон кыльыны. Та адӟиське Иосифлэн учырысьтыз. Солэн малпанэз но ӧй вал азон-калгон сьӧлыке пырыны. Иосифлэн Иеговаез ӝоже ускытэмез уг поты вал (Ул.-выл. 39:9). Иегова зэм но вань шуыса осконмес юнматон понна, милемлы дыр висъяно вӧсяськонлы но солэсь Кылзэ эскеронлы. Иосиф сямен, ми но Иеговаен кусыпъёсмес дунъямы ке, соку палэнскомы ваньмызлэсь, мар соин кусыпъёсмес лябӟытыны быгатэ (Иак. 4:8).

15. Малы милемыз дышетэ учыр, кудӥз луиз израиль калыкен луоё кыр дуннеын? (Еврейёслы 3:12).

¹⁵ Соос, кинъёс вунэто, Иегова — улэп Инмар шуыса, солэсь палэнскыны быгато. Тодамы ваёмы, мар луиз израиль калыкен луоё кыр дуннеын. Соос тодӥзы, Иегова зэм но вань шуыса. Озьы ке но соослэн осконзы лябӟиз, Инмар соос сярысь сюлмаськыны быгатоз шуыса. Соос юаны кутскизы: «Асьме пӧлын Кузё-Инмар вань-а, ӧвӧл-а?» (Пот. 17:2, 7). Соин сэрен соос Инмарлы пумит ӝутскизы. Милям асьмеды соос кадь воземмы уг поты. Милям Инмарлэсь кылзӥськыса улэммы потэ! (Лыдӟе Еврейёслы 3:12.)

16. Мар осконмес лябӟытыны быгатэ?

¹⁶ Та дунне туж тырше милемыз Иеговалэсь палэнтыны. Тросэз нокӧня но уг оско, Инмар вань шуыса. Ӵем дыръя малпан  кылдэ, соос, кинъёс Инмарлэсь уг кылзӥсько, шудо уло шуыса. Таин сэрен осконмы лябӟыны быгатэ. Ми оскиськомы ке но, Инмар вань шуыса, милям малпанмы кылдыны быгатэ, со милемлы уз юртты шуыса. 72-тӥ псаломез гожъясьлэн но та выллем шӧдонъёсыз вал. Со адӟиз, со котырысь адямиос Инмарлэн законъёсыз сярысь уг ик малпасько, но шудо уло шуыса. Соин ик со малпаськыны кутскиз, кулэ-а солы азьланяз но Иеговалы ужаны-тыршыны (Пс. 72:11—13).

17. Мар милемлы юрттоз котьку но Иеговалы оскымон луыны?

¹⁷ Мар юрттӥз псаломез гожъясьлы кылдэм югдур шоры шонер учкыны? Со малпаськиз со сярысь, мар луоз Иеговалэсь палэнскемъёсын (Пс. 72:18, 19, 27). Озьы ик со малпаськиз ваньмыз умоез сярысь, мар вань Инмарлэн ужась-тыршисьёсызлэн (Пс. 72:24). Ми но быгатӥськомы тодамы вайыны, кызьы Иегова улонмес умой пала воштӥз. Малпалэ гинэ, кызьы тӥ улысалды, Иеговаен ӧд тодматскысалды ке. Та милемлы юрттоз котьку но солы оскымон луыны. Псаломъёсты гожъясь сямен, ми но шуомы: «Мыным шумпотон — Инмарлэн матаз мыныны»! (Пс. 72:28).

18. Малы ми вуоноезлэсь ум кышкаське?

¹⁸ Ми ум тодӥське, кыӵе шуг-секытъёсын та берпум нуналъёсы пумиськомы. Но ми ваньзэ чидаломы, малы ке шуоно «улэп, зэм Инмарлы» йыбыртъяськомы (1 Фес. 1:9). Со яратэ аслэсьтыз ужась-тыршисьёссэ но котьку соослы юрттэ. Иегова азьвыл аслаз калыкезлы котьку юрттылӥз, со туннэ но милемлы юрттоз. Ӝоген бадӟым куректон вуоз, кыӵеез дунне вылын ӧй вал на. Но ми огнамы ум луэ — Иегова милемыз уз кельты (Ис. 41:10). Соин ик ми юн осконэн вераськомы: «Уг кышка, Кузё-Инмар мон палан»! (Евр. 13:5, 6).