Лыдӟисьёслэн юанъёссы
Кызьы валано Псалтирез 11:8?
Та псаломез лыдӟыса валаны луэ, отын адямиос сярысь вераське шуыса.
Псалтирьын 11:2—5 Давид нырысь вера, «адямиос пӧлын оскиськымонэз ӧз ни кыльы» шуыса. Нош собере Псалтирьын 11:6—8 со вера:
«„Кураськисьёслэн курадӟемзы,
Куанеръёслэн лулӟиськылэмзы понна али султо но —
Утиськон сёто солы,
Кинэ кутыны туртто“,— шуэ Кузё-Инмар.
Кузё-Инмарлэн кылъёсыз — чылкыт кылъёс,
Гурын, тыл пӧлын сюйлэсь сузям, сизьым пол ӵыжатэм азвесь.
Тон, Кузё-Инмаре, милемыз утёд,
Даурысь дауръёсы та выжылэсь чаклалод».
6-тӥ кылбур возьматэ, мар кароз Инмар «кураськисьёс» понна. Со соосты утёз.
7-тӥ кылбурын верамын на, «Кузё-Инмарлэн кылъёсыз — чылкыт кылъёс», соос «сизьым пол ӵыжатэм азвесь» кадь луо шуыса. Вань христианъёс таин соглаш луо (Пс. 17:31; 118:140).
Библилэн куд-ог берыктэмъёсаз Псалтирь 11:8 тазьы берыктэмын: «Тон соосты утёд».
Нош талэсь азьвыл кылбурын верамын вал «Кузё-Инмарлэн кылъёсыз» сярысь. Соин ик куд-огъёсыз малпало, Инмар аслэсьтыз кылъёссэ уте шуыса. Кызьы ми тодӥськомы, Инмар Библиез уте. Тушмонъёс туж тыршо ке но Библиез быдтыны, уг лэзё сое лыдӟыны но берыктыны, соослэн номыр но уг пӧрмы (Ис. 40:8; 1 Пётр 1:25).
Озьы ик Иегова адямиосты но уте, кудъёсыз сярысь верамын 6-тӥ кылбурын. Инмар али но юрттэ, азьланяз но юрттоз кураськисьёслы но курадӟисьёслы но утёз соосты (Иов 36:15; Пс. 6:5; 30:2, 3; 53:9; 144:20).
Озьыен, кызьы валано 8-тӥ кылбурез?
Кинэ яке мае уте Иегова? Адямиосты яке аслэсьтыз кылъёссэ? Быдэс псаломез сак эскерыса, валаны луэ, татын адямиос сярысь вераське шуыса.
11-тӥ псаломлэн кутсконаз Давид вера Иеговалэн оскымон ужась-тыршисьёсыз сярысь, кудъёссэ кескич адямиос ӧрекчаса возё. Собере 4-тӥ кылбурын верамын, Иегова быдтоз шуыса соосты, кинъёс ас кылынызы мукетъёссэ вӧсь каро. Та псалом оскытэ милемыз, Иегова аслаз ужась-тыршисьёсыз пала пыроз шуыса. Ми Иеговалы оскыны быгатӥськомы, малы ке шуоно солэн кылъёсыз чылкытэсь.
Озьыен, 8-тӥ кылбурын верамын, Инмар утёз шуыса адямиосты, кудъёссэ сьӧлыклэсь кышкасьтэмъёс курадӟытыса возё.
Нош малы соку Библилэн куд-ог берыктэмъёсаз та кылбур берыктэмын «тон соосты утёд» шуыса? Малы ке шуоно озьы гожтэмын еврей гожтэмъёслэн куд-ог оскымон копиосазы. Нош грек Септуагинтаын та кылбурын верамын, со утёз шуыса милемыз, яке оскымон ужась-тыршисьёссэ, кудъёссэ курадӟытыса возё. Со сяна, 8-тӥ кылбурын верамын, Иегова утёз шуыса оскымон адямиоссэ «та выжылэсь», яке «сьӧлыклэсь кышкасьтэмъёслэсь» (Пс. 11:8, 9). Еврей гожтэмъёсын, кудъёсыз арамей кылэ берыктэмын, та кылбур тазьы берыктэмын: «Тон, Кузё-Инмаре, шонерлыко улӥсьёсты утёд. Тон соосты та лек выжылэсь даурысь дауръёсы утёд». Ваньмыз та возьматэ, Псалтирьын 11:8 Инмарлэн кылъёсыз сярысь уг вераськы, отын адямиос сярысь вераське шуыса.
Та кылбур оскытэ милемыз, Иегова солы оскымон адямиосты котьку но утёз шуыса.
