1. Малы Иегова гинэ ярамон луэ, ми солы оскымон мед луомы шуыса?

 ИЕГОВА гинэ ярамон луэ, ми солы оскымон мед луомы шуыса, малы ке шуоно со милемыз кылдытӥз но милемлы улон кузьмаз (Усьт. 4:11). Ваньмыз валамон кадь, нош татын вань кышкытлыкъёс. Ми Иеговаез яратӥськомы но гажаськомы ке но, маке но мукетыз быгатоз милесьтым яратонмес сӥятыны но люкетыны солы оскымон луыны. Милемлы валаны кулэ, кызьы со озьы луыны быгатэ. Нырысь вераськомы со сярысь, мае возьматэ Иеговалы гинэ оскымон луон.

2. Мар ми карыны кулэ, Иеговалы гинэ оскымон луиськомы ке, Матфейлэсь 4:10 лыдэ басьтыса?

² Кызьы гожтэмын Библиын, Инмарлы оскымон луон возьматэ сое вань сюлмысьтымы яратэммес. Ми Иеговалы гинэ оскымон луиськомы ке, соку ми солы гинэ йыбыртъяломы. Ми нокинлы но, номырлы но ум лэзе, Инмарез яратон интые, ми мукетсэ яратыны мед кутскомы шуыса. (Лыдӟе Матфейлэсь 4:10.)

3. Малы вераны луоз, Иеговаез яратыны мугъёсмы вань шуыса?

³ Иеговалы ми огшоры гинэ оскымон ум луиське. Милям оскымон луэммы шонер тодон-валанъёс вылэ инъяськемын. Милемыз паймыто солэн паймымон сямъёсыз. Ми тодӥськомы, мар солы яра, нош мар уг яра, но ми со сямен ик малпаськыны тыршиськомы. Ми валаськомы, Иеговалэн потэ, ми пырак дауръёс ӵоже солы шумпоттыса мед ужаломы-тыршомы шуыса. Соин ик ми солэн курон-косонъёсызъя улӥськомы. Милемлы туж бадӟым дан — солэн эшъёсыз луыны (Пс. 24:14). Котьку но, куке ми Кылдытӥсьмы сярысь маке но выльзэ тодӥськомы, ми солы эшшо но матэгес луиськомы (Иак. 4:8).

4. а) Кызьы Шайтан тырше Иеговалы оскымон луэммес лябӟытыны? б) Мае ми эскеромы та статьяын?

⁴ Та дунне Шайтанлэн ки улаз возиське, но сое уже кутыса, со милесьтым мылкыдмес ӝутэ мугормылэн мылпотонъёсызлы  сётскыны (Еф. 2:1—3; 1 Иоанн 5:19). Шайтанлэн ужпумез: Иеговаез яратон сяна, ми мае ке но мукетсэ мед яратомы на. Соку ми Иеговалы гинэ оскымон ӧм луысалмы ни. Учкомы кык удысъёсты, кудъёсаз Шайтан вормисе потыны быгатэ. Нырысь ик, солэн потэ, ми узырмон мылкыдлы мед сётскомы шуыса, но кыкетӥез, милемыз шонертэм шулдыръяськон амал бырйыны мылкыдмес ӝутэ.

5. Малы милемлы чакласьконо, коньдонэз яратонлы медам сётске шуыса?

⁵ Котькудӥзлэн потэ, солэн ӟеч дӥськутэз, умой улон интыез но ческыт сиёнэз мед луоз шуыса. Озьы ке но милемлы чакласькыны кулэ, коньдонэз яратонлы медам сётске шуыса. Шайтанлэн дуннеяз туннэ тросэз адямиос коньдонэз ярато но сое, мае басьтыны луэ коньдонэн (2 Тим. 3:2). Иисус тодӥз, солэн пытьы кузяз мынӥсьёс но сыӵе яратонлы сётскыны быгатозы шуыса. Со вераз: «Нокинлэн но кык кузёлы служить каремез уг луы: уго одӥгзэ адӟемпотостэм кароз, нош мукетсэ яратоз; яке огезлы сюлмысьтыз тыршоз, нош мукетыз сярысь уз сюлмаськы. Уд быгатӥське Инмарлы но, маммоналы [узырлыклы-байлыклы] но огдыре служить карыны» (Матф. 6:24). Со, кин Иеговалы йыбыртъя но со дыре ик трос дырзэ но кужымзэ узырмон понна быдтэ, шуыны луоз, со кык кузёослы ужа-тырше шуыса. Вераны уз луы ни, со Иеговалы гинэ оскымон луэ шуыса.

6. Малы дышето милемыз Иисуслэн кылъёсыз, кудъёссэ со вераз Лаодикия карысь кенешлы?

⁶ Асьме вакытысь нырысетӥ даурлэн пумаз Лаодикия карысь куд-ог христианъёс асьсэ сярысь ушъяськыса веразы: «Мон узыр, узырми, номырлы но ёрмыса уг улӥськы». Нош Иеговалэн но Иисуслэн син азязы соос шудтэм, мискинь, куанер, синтэм,  гольык кылем муртъёс кадесь вал. Иисус соосты узыр луэмзы понна ӧз судъя, нош со соосты судъяз, узырлыкез яратонзы Иеговаен кусыпъёссэс сӧриз шуыса (Усьт. 3:14—17). Ми шӧдӥмы ке, сюлмамы узырмон мылкыд будэ шуыса, милемлы соку ик малпаськон амалмес воштыны кулэ (1 Тим. 6:7, 8). Озьы ӧм лэсьтэ ке, милям сюлэммы люкиськемын луоз, но милям йыбырттонмы Иеговалы ярамон уз луы ни. Иеговалэн потэ, ми сое вань сюлмынымы мед яратомы шуыса (Марк 12:30). Нош кызьы коньдон милям улонамы валтӥсь инты басьтыны быгатоз?

7—9. Малы дышетэ милемыз Дэвид нимо тӧролэн учырез?

⁷ Эскеромы ужаны яратӥсь Дэвид нимо тӧролэсь учырзэ, кудӥз Огазеяськем Штатъёсын улэ. Дэвид тодаз вае, со аслаз фирмаяз туж усто ужась вал шуыса. Ужезъя сое вылӥе ӝутӥзы, но пусъемын вал, шаеразы аслаз удысаз со одӥгез тужгес но умой ужась шуыса. «Со дыре мыным потэ вал, ваньмыз та Иеговалэсь кузьым шуыса»,— вера Дэвид. Нош зэм ик-а со озьы вал?

⁸ Дэвид чакланы кутскиз, солэн ужез Иеговаен эшъяськонэзлы люкетэ шуыса. «Мон шӧдӥ, кенешлэн пумиськонъёсаз но ужан-тыршонын ужысьтым шуг-секытъёс сярысь малпаськисько шуыса,— вера со.— Мыным трос коньдон тыро вал, но со дыре ик мон туж керӟег луыны кутски, соин сэрен кузпалэным кусыпъёсы сӧриськизы».

⁹ Дэвид валаз, дыр вуиз бырйыны, мар солэн улоназ валтӥсез луэ. «Мон юн ужпум кутӥ, мае ке но воштыны кулэ шуыса»,— вера со. Дэвид выльысь эскериз ужан дырзэ но аслаз малпанъёсыз сярысь кузёезлы вераз. Кытчы со вуттӥз? Дэвидэз ужысьтыз уллязы! Кызьы со та шоры учкиз? «Мукет  нуналаз ик мон гожтӥ заявление дугдылытэк юрттӥсь пионер луыса ужаны-тыршыны»,— тодаз вае со. Дэвид но солэн кышноез утялскон ужен вырыны кутскизы, улыны коньдонзы мед луоз шуыса. Кӧня ке дыр ортчыса, со пионер луыса ужаны-тыршыны кутскиз, нош берлогес кышноез но пионер луиз. Кузпалъёс шедьтӥзы уж, кудӥз даноен ӧз лыдъяськы, нош соос со сярысь нокӧня но ӧз сюлмаське. Соослэн уждунзы дас поллы ӧжытгес луиз ке но, котькуд толэзе соослы коньдонзы тырме вал. Соослэн потэ, Иегова улоназы валтӥсь инты мед басьтоз шуыса. Дэвид но солэн кышноез ас вылазы шӧдӥзы: Инмар сюлмаське соос сярысь, кинъёс Инмарлэсь Эксэйлыксэ улоназы нырысетӥ интые пукто (Матф. 6:31—33).

10. Кызьы аслэсьтыд сюлэмдэ утёно?

¹⁰ Куанересь-а ми яке узыресь-а, ваньмылы милемлы сюлэммес утьыны кулэ. Мар кароно со понна? Чаклаське, коньдонэз яратыны медад кутске шуыса. Озьы ик эн вунэтэ, милям ужмы Иеговалы ужан-тыршонлэсь кулэгес медаз луы шуыса. Кызьы эскероно, милям сыӵе шуг-секытъёсмы ӧвӧл-а? Тани кыӵе юанъёс ми асьмелы сётыны быгатысалмы: «Ӵем-а мон малпаськисько уже сярысь кенешлэн пумиськонъёсаз но ужан-тыршонын? Сюлмаськисько-а мон котьку но со сярысь, луоз-а мынам коньдонэ азьланяз? Кылдо-а мынам семьяям коньдонэн яке ваньбурен герӟаськем шуг-секытъёс? Дась-а мон дано луисьтэм уже пырыны, кудӥзлы луыса Иеговалы тросгес ужаны-тыршыны быгатысал?» (1 Тим. 6:9—12). Та юанъёс вылын малпаськыса, ойдолэ тодамы возёмы: Иегова милемыз яратэ но аслыз оскымон адямиослы кылзэ сётэ: «Уг кельты тонэ, уг кушты тонэ». Соин ик апостол Павел гожтӥз: «Коньдонэз яратӥсесь эн луэ» (Евр. 13:5, 6).

11. Кызьы адями вылын шӧдӥськыны быгато шулдыръяськонъёс?

¹¹ Иеговалэн потэ, ми шумпотыса мед уломы шуыса, но шулдыръяськонъёс юртто милемлы шумпотон шедьтыны. Кылсярысь, Инмарлэн Кылаз верамын: «Сиёнлэсь, юонлэсь но сюлмысь ужамезлэсь шумпотон басьтон сярысь, адямилы номыр умоезгес ӧвӧл ни» (Екк. 2:24, ВД). Нош тросэз шулдыръяськонъёс, кудзэ та дунне ӵектэ, ми вылын уродэн шӧдӥськыны быгато. Соос улӥе уськыто нравственность ласянь эсэпъёсты, адямиослэсь мылкыдзэс ӝуто чидаса  учкыны яке яратыны сое, мар Инмарлэн Кылаз юрӟым ужъёсын лыдъяське.

12. Малы милемлы шулдыръяськонъёсты валаса бырйыны кулэ, 1 Коринфъёслы 10:21, 22 лыдэ басьтыса?

¹² Милям Иеговалы гинэ оскымон луэммы потэ, соин ик ми ум быгатӥське «Кузё-Инмарлэн но сиськоназ», «периослэн но сиськоназы» огдыре ик пыриськыны. (Лыдӟе 1 Коринфъёслы 10:21, 22.) Куке адямиос ӵош сисько, ӵем дыръя со возьматэ, соос эшъясько шуыса. Ми бырйиськомы ке шулдыръяськонъёсты, кудъёсаз умоен возьматӥсько кужмысь карон, тунаськон-пелляськон, азон-калгон, но озьы ик мугорлэн мылпотонъёсыз но учконъёсыз, соку ми, шуыны луоз, сиськиськомы Инмарлэн тушмонъёсыныз ӵош но сииськомы соослэсь пӧрам сиёнзэс. Озьы ми асьмелы гинэ уродзэ ум лэсьтӥське, озьы ик Иеговаен кусыпъёсмес но сӧриськомы.

13, 14. Малы милемлы сак луоно, шулдыръяськонъёсты бырйыкумы, Иаковлэсь 1:14, 15 лыдэ басьтыса? Вералэ пример.

¹³ Эскеромы, малы шулдыръяськонъёсты сиськонэн ӵошатыны луэ. Сиськыкумы ми асьмеос малпаськомы, мае ымамы пономы. Нош сиёнэз ньылэммы бере, ми чакланы ум быгатӥське, кызьы со сиён мугормы вылын шӧдӥськоз. Дыр ортчыса, со, мар сиёнын вань, мугормылэн оглюкетэз луэ. Умой сиён тазалыкмес юнматэ, нош уродэз — изъян вае. Бервылъёсыз соку ик уг адӟисько, нош берлогес соос одно ик шӧдӥськозы.

¹⁴ Озьы ик, шулдыръяськонъёсты бырйыкумы но, ми асьмеос малпаськомы, маин йырвизьмес тырмытоно. Нош йырвизьмамы маке пырем бере, ми чакланы ум быгатӥське, кызьы со шӧдӥськоз малпанъёсмы но шӧдонъёсмы вылын. Умой шулдыръяськонъёс милемлы кужым сёто, нош уродъёсыз — котьку но изъян ваё. (Лыдӟе Иаковлэсь 1:14, 15.) Урод шулдыръяськонъёслэн бервылъёссы соку ик уг адӟисько, нош берлогес соос одно ик шӧдӥськозы. Соин ик Библия милемыз алэ: «Ӧрекчаськонлы эн сётске: Инмар Ассэ сантэманы эрик уг сёты. Адями мае кизе, сое ик со ара» (Гал. 6:7, 8). Тӥни малы палэнтоно вань шулдыръяськонъёсты, кудъёсаз умоен возьматӥське со, мае Иегова адӟемпотостэм каре! (Пс. 96:10).

15. Кыӵе кузьым лэсьтӥз милемлы Иегова, мылкыдмес ӝутон понна?

¹⁵ Иеговалэн тросэз ужась-тыршисьёсыз ярато учкыны интернет-телевиденимес, кудӥз духовной тазалыкмес юнматэ. Тани мар вераз Мэрилин нимо сузэрмы: «Телевиденимы мынэсьтым мылкыдме ӝутэ. Отысь ваньзэ учкыны луэ, мае ке умойтэмзэ адӟод шуыса кышкатэк. Куке мыным мӧзмыт яке ӝож луэ, мон учкисько мылкыдэз ӝутӥсь речез яке ӵукна йыбырттонлэсь программазэ. Со монэ Иеговалы но солэн организациезлы матэ каре. Интернет-телевиденимы потэм дырысен мынам выль улонэ кутскиз». Дунъяськоды-а тӥ Иеговалэсь та кузьымзэ? Котькуд толэзе потӥсь программаос сяна, телевидениысьтымы шедьтыны луэ трос мукет аудио- но видеоматериалъёсты, озьы ик мылкыдэз ӝутӥсь кырӟанъёсты но.

16, 17. Малы милемлы сак эскерыны кулэ, кӧня дыр висъяськомы шулдыръяськонъёслы, но кызьы ми сое лэсьтыны быгатомы?

¹⁶ Милемлы сак эскероно, кыӵе шулдыръяськонъёсты ми бырйиськомы, озьы ик кӧня дыр ми соослы быдтӥськомы. Озьы ӧм лэсьтэ ке, милям тросгес дырмы шулдыръяськонъёслы кошкоз, Иеговалы ужан-тыршон интые. Тросэзлы секыт чакланы, кӧня соос дыр висъяло шулдыръяськонъёслы. 18 аресъем Абигейл нимо сузэрмы вера:  «Телевизор мыным шутэтскыны юрттэ, куке мон жадьыса бертӥсько. Нош мон асме уг чакласькы ке, мон трос часъёс ортчытыны быгато телевизор азьын». Самьюэл нимо егит агаймы ачиз сярысь вера: «Мон шӧдӥ, интернетысь вакчи видеороликъёсты туж кема дыр ӵоже учкыны быгатӥсько шуыса. Малпасько одӥг гинэ ролик учкыны, нош ачим но уг валаськы, кызьы куинь-ньыль час ортче».

¹⁷ Мар юрттоз тӥледлы чакланы, кӧня дыр тӥ висъяськоды шулдыръяськонъёслы? Нырысь ик малпаське, кӧня дыр зэмзэ ик соослы кошке. Тӥ пусйыны быгатоды, кӧня дыр арня куспын шулдыръяськонъёслы быдтӥськоды. Календаре гожтэ, кӧня час тӥ телевизор учкиськоды, интернетын пукиськоды но электрон шудонэн шудӥськоды. Тӥ чаклады ке, талы туж трос дыр кошке шуыса, лэсьтэ график. Нырысь ик, кулэ луись ужъёслы дыр висъялэ, нош собере — шулдыръяськонъёслы. Куре Иеговаез тӥледлы юрттыны та графикъя улыны. Озьы тӥляд дырды но кужымды луоз ас поннады Библиез дышетыны, семьяен йыбырттыны, кенешлэн пумиськонъёсаз ветлыны, озьы ик тодытон но дышетскисьёсты дасян уже пыриськыны. Со сяна, тӥледыз возьытлыкты уз йырйы, юнме дырдэс быдтӥды шуыса.

18, 19. Кызьы ми возьматыны быгатӥськомы, Иеговалы гинэ оскымон луиськомы шуыса?

¹⁸ Шайтанлэн дуннеезлэн пумыз сярысь но вуоно выль дунне сярысь гожтыкуз, апостол Пётр вераз: «Гажаноосы, та нуналэз возьмаськоды ке, та дуннеын саптаськытэк, дун-чылкыт куен Со азе султон сярысь сюлмаське» (2 Пётр 3:14). Та куронъя улыса, озьы ик нравственной но духовной чылкытлыкез утьыса, ми уж вылын возьматомы, Иеговалы гинэ оскымон луиськомы шуыса.

¹⁹ Шайтан но солэн дуннеез азьланяз но тыршозы, ми улонамы валтӥсез сярысь мед вунэтомы шуыса (Лука 4:13). Нош ойдолэ нокинлы но, номырлы но ум лэзе, Инмарез яратон интые, ми мукетсэ яратыны мед кутскомы шуыса. Милям юн мылкыдмы вань, Иеговалы гинэ оскымон луыны, малы ке шуоно со гинэ ярамон луэ, солы мед йыбыртъяломы шуыса!