СИНОПТИК сак учке метеорадарлэн экранэз шоры. Со адӟе: одӥг ёросэ, кытын трос калык улэ, бадӟым ӝоглыкен сильтӧл матэктэ. Адямиослэн улонзы кышкытлыке сюремын! Соин ик, туж бер ӧвӧл на бере, со лэсьтэ ваньзэ, калыкез алон понна.

Иегова но Музъем вылын улӥсьёсты вуоно «кужмо сильтӧл» сярысь алэ. Со кышкытгес котькыӵе сильтӧллэсь, кудӥз сярысь иворъёсын вераны быгато. Кызьы Иегова адямиосты алэ? Но малы оскыны луэ, утиськон понна мар ке но карыны со тырмыт дыр сётэ шуыса? Та юанъёслы валэктонъёс шедьтон понна, ойдолэ эскеромы куд-ог алонъёсты, кудъёссэ Иегова вашкала дыръёсы сётъяз.

Вашкала дыръёсы Иегова алӥз «кужмо сильтӧлъёс» сярысь, яке приговоръёссэ быдэстон сярысь, кудъёссэ со вералляз соослы, кинъёс валаса вылысь солэсь ӧз кылзӥське (Мад. 10:25; Иер. 30:23). Котькуд учыре кылзӥськисьтэм адямиосты со азьло ик алэ вал но вера вал, мае соослы воштыны кулэ, Иеговалэн эрикезъя улон понна (4 Экс. 17:12—15; Неем. 9:29, 30). Адямиос кулэ луись воштӥськонъёс мед лэсьтозы шуыса, Инмар оскымон ужась-тыршисьёссэ куриз музъем вылын солэсь приговоръёссэ вераны но валэктыны, ӝегатскытэк мар ке но кароно шуыса (Ам. 3:7).

Одӥгез со ужась-тыршисьёс пӧлысь Ной вал. Со трос аръёс ӵоже кышкатэк алӥз азыса-калгыса улӥсь но лек калыкез, Бадӟым ву тудӟон матэктэ шуыса (Ул.-выл. 6:9—13, 17). Озьы ик со валэктылӥз, мар соослы кароно утиськон понна. Ной сокем трос со сярысь вералляз, берлогес сое «шонерлыкез тодытӥсь» шуыса но нимазы (2 Пётр 2:5).

Ной туж тыршиз ке но, адямиос ӧз кылзэ сое, мае Инмарлэн верамез потэ вал. Соос возьматӥзы, соослэн осконзы чик ӧвӧл шуыса. Озьыен, «бадӟым ву лыктыса ваньзэс» быдтӥз — соос кулӥзы (Матф. 24:39; Евр. 11:7). Нокин но соос пӧлысь вераны ӧз быгаты, Инмар соосты ӧз алы шуыса.

Мукет учыръёсын Иегова адямиосты алӥз судъян кутскон азьын гинэ. Соку но со сюлмаськиз, алонэз санэ басьтон понна, соослэн тырмыт дырзы мед луоз шуыса. Кылсярысь, озьы вал, куке Иегова вашкала Египет вылэ дас шугадӟонъёс лэзьыны ужпум кутӥз. Сизьыметӥ шугадӟон азьын Иегова Моисеез но Ааронэз вераны куриз фараонлы но солэн ляльчиосызлы, вуоно нуналаз со туж кужмо йӧзор лэзёз шуыса. Быгатӥзы-а адямиос со дыр куспын утиськон инты шедьтыны? Библиын гожтэмын: «Кузё-Инмарлэн верам кылызлэсь кышкась фараонлэн ляльчиосыз дыртыса ляльчиоссэс, пудооссэс липетъёс улэ люказы; нош кинъёс Кузё-Инмарлэсь верам кылъёссэ санэ ӧз понэ, соос ляльчиоссэс, пудозэс бусые кельтӥзы» (Пот. 9:18—21). Кызьы адӟиське, Иегова тырмыт дыр сётӥз, адямиос та шугадӟонлэн тужгес но кышкыт бервылъёсызлэсь палэнскыны мед быгатозы шуыса. Соос, кинъёс вакчи дыр куспын та алонлэсь кылзӥськизы, утиськыны быгатӥзы.

Дасэтӥ шугадӟонэз лэзён азьын Иегова со сярысь фараонэз но солэсь ляльчиоссэ алӥз. Нош соос асьсэды визьмо ӧз возе но Инмарлэн кылъёсызлэсь ӧз кылзӥське (Пот. 4:22, 23). Озьыен, вань нырысь вордскем пиоссы кулӥзы. Нош соос пиоссэс утьыны быгато вал! (Пот. 11:4—10; 12:29). Вал-а соослэн дырзы та алонлэсь кылзӥськыны? Одно ик вал! Моисей израиль калыклы дасэтӥ шугадӟон сярысь соку ик  вераз но валэктӥз, мар соослы кароно, ӵыжы-выжыоссэс утён понна (Пот. 12:21—28). Тросэз-а солэсь кылзӥськизы? Куд-ог эскеронъёсъя, куинь миллион адямиос Инмарлэн судэз дыръя утиськизы но Египетысь кошкизы. Израиль калык сяна, соос пӧлын «пӧртэм выжыосысь адямиос» вал, озьы ик египет калык но (Пот. 12:38).

Кызьы возьмато та учыръёс, алонъёсызлэсь кылзӥськон понна, Иегова адямиослы котьку тырмыт дыр сётылӥз (К. Зак. 32:4). Малы? Апостол Пётр валэктӥз, Иеговалэн потэ, «нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса» (2 Пётр 3:9). Адӟиське, Инмар адямиос сярысь сюлмаськиз шуыса. Солэн потэ вал: суд кутскытозь, соос мед ӧпкелёзы но солэн кылъёсызлэсь мед кылзӥськозы (Ис. 48:17, 18; Рим. 2:4).

Туннэ но вань адямиослы кулэ луись алонлэсь кылзӥськоно, кудӥз быдэс дунне вылысь ваньмызлы верамын. Иисус азьло ик вераз, та дунне бадӟым куректон дыръя быдтэмын луоз шуыса (Матф. 24:21). Со пыр-поч валэктӥз, мае адӟозы но мар пыр потозы солэн дышетскисьёсыз, вуоно суд лыктытозь. Ваньмыз, мар сярысь Иисус вераз, милям син азямы быдэсме (Матф. 24:3—12; Лука 21:10—13).

Соин ик Иегова котькинлэсь мылкыдзэ ӝутэ солы ужаны-тыршыны но солэсь кылзӥськыны. Солэн потэ, кылзӥськись адямиос тужгес но умой улонлы мед шумпотозы туннэ но, азьланяз но, куке со шонерлыко выль дунне тупатоз (2 Пётр 3:13). Иеговалэн адямиослы юрттэмез потэ, соос та кыл сётонлы мед оскозы шуыса. Инмар юрттэ соослы, улонэз утись иворез вераса. Со Эксэйлык сярысь ӟеч ивор луэ, кудӥз, Иисуслэн азьло ик верамезъя, вань калыкъёслы «быдэс дунне вылын тодытэмын луоз» (Матф. 24:14). Та иворез вераны Иегова куриз аслэсьтыз ужась-тыршисьёссэ, кудъёсыз ог 240 шаеръёсын но интыосын тодыто. Иеговалэн потэ, тросгес адямиос та алонлэсь мед кылзӥськозы но вуоно «кужмо сильтӧллэсь», яке шонерлыко судэзлэсь, мед утиськозы шуыса (Соф. 1:14, 15; 2:2, 3).

Кызьы ми адӟимы эскерем учыръёсысь, Иегова котьку но тырмыт дыр сётэ, адямиос алонъёсызлэсь мед кылзӥськозы шуыса. Соин ик валтӥсь юан: та кылем дырез адямиос шонер кутозы-а? Инмарлэн ивортӥсьёсыз луыса, ми номыр вератэк ум улэ. Ми азьланяз но лэсьтомы ваньзэ, мае быгатӥськомы, тросгес адямиос та дуннеез быдтон дыръя утиськыны мед быгатозы шуыса!