1. Мар карыны быгатэ Иегова, аслэсьтыз эриксэ быдэстон понна?

 БИБЛИЕЗ эскерись куд-ог тодосчиослэн верамзыя, Иеговалэн нимыз «со ваньмызлы луыны сётэ» шуыса верамез возьматэ. Иегова луыны быгатэ со, кин луыны кулэ, аслэсьтыз эриксэ быдэстон понна. Кылсярысь, со луыны быгатэ Дышетӥсь, Буйгатӥсь, Ӟеч иворез тодытӥсь, но та ваньмыз ӧвӧл на, кин луыны со быгатэ (Ис. 48:17; 2 Кор. 7:6; Гал. 3:8). Озьы ик, аслэсьтыз эриксэ быдэстон понна, со адямиосты кутэ (Матф. 24:14; 28:19, 20; 2 Кор. 1:3, 4). Котькудмылы ми пӧлысь Иегова визьлык но кужым сётыны быгатэ луыны со, кинъёс ми луыны кулэ, солэсь эриксэ быдэстон понна.

2. а) Малы куддыръя ми малпаны быгатомы, Иегова милемыз кутыны уз быгаты шуыса? б) Мае ми эскеромы та статьяын?

² Ваньмылэн милям Иеговалэсь эриксэ быдэстонын пайда ваеммы потэ. Нош куд-огъёсыз малпало, Инмар соосты кутыны уз быгаты шуыса. Малы? Малы ке шуоно соослэн арлыдзы бадӟым, югдурзы секыт яке быгатонлыкъёссы ӧжыт. Мукетъёсызлы тырмыт луэ со, мар соос ужан-тыршонын лэсьто ини, но соос уг тыршо тросгес лэсьтыны. Та статьяын ми вераськомы со сярысь, кызьы Иегова котькудмес дасяны быгатэ аслэсьтыз эриксэ быдэсъяны. Собере ми эскеромы Библиысь учыръёсты, куке Иегова аслаз ужась-тыршисьёсызлы — пиосмуртъёслы но кышномуртъёслы — ӟеч ужъёс лэсьтыны мылкыд но кужым сётылӥз. Нош статьялэн пумаз учкомы, мар кароно, Иегова милемыз кутыны мед быгатоз шуыса.

3. Филиппыослы 2:13 лыдэ басьтыса, кызьы Иегова милемлы аслэсьтыз эриксэ быдэстыны мылкыд сётыны быгатэ?

³ Лыдӟе Филиппыослы 2:13 b. Иегова милемлы аслэсьтыз эриксэ быдэстыны мылкыд сётыны быгатэ. Кызьы? Кылсярысь, ми тодӥмы, кенешамы юрттэт кулэ шуыса. Яке тӧроос филиалысь гожтэт лыдӟизы, мукет интыын юрттэт кулэ шуыса. Но ми малпаськомы: «Кызьы мон юрттыны быгато?» Яке милемлы бадӟым уж сётыны малпало, нош ми малпаськомы: «Быгато-а мон сое быдэстыны?» Яке Библиез лыдӟыкумы, асьмелы юан сётӥськомы: «Кызьы та кылбуръёсты уже кутыны луоз, кинлы ке юрттон понна?» Иегова милемыз маке но карыны кужмысь уз косы. Нош куке со адӟе, кызьы ми малпаськиськомы мукетъёсызлы юрттон сярысь, соку малпанмес быдэстыны со мылкыд сётыны быгатэ.

4. Кызьы Иегова милемлы аслэсьтыз эриксэ быдэстыны кужым сётыны быгатэ?

⁴ Иегова озьы ик милемлы кужым сётыны быгатэ, ми солэсь эриксэ быдэсъяны мед быгатомы шуыса (Ис. 40:29). Кызьы? Со аслэсьтыз святой духсэ сётыны дась, быгатонлыкъёсмес умоятон понна (Пот. 35:30—35). Аслаз организациез пыр Иегова дышетэ милемыз куд-ог ужъёсты быдэсъяны. Тӥ та ужез быдэстыны уд быгатэ шуыса малпаськоды ке, куре юрттэт. Но озьы ик вӧсяське инмысь яратӥсь Атаймылы, «мертантэм бадӟым кужым» курыса (2 Кор. 4:7; Лука 11:13). Библиын вань трос учыръёс, куке Иегова пиосмуртъёслы но кышномуртъёслы мылкыд но кужым сётылӥз, аслэсьтыз эриксэ быдэстон понна. Ойдолэ эскеромы куд-ог сыӵе учыръёсты но малпаськомы, кызьы Иегова милемыз но кутыны быгатоз.

5. Малы милемыз дышетэ со, кызьы но ку Иегова Моисеез аслэсьтыз калыксэ мозмытыны куриз?

⁵ Иегова Моисейлэсь мылкыдзэ ӝутӥз израиль калыклы мозмытӥсь луыны. Нош Иегова та ужез ӧз сёты соку, куке Моисей «Египетлэн вань визьнодлыкезлы... дышетэмын вал» но ассэ та ужез быдэстыны дась шуыса лыдъяз (Ап. уж. 7:22—25). Иегова кутӥз сое соку гинэ, куке юрттӥз солы зӥбыт-востэм адями луыны (Ап. уж. 7:30, 34—36). Иегова Моисейлы сыӵе кышкасьтэм сям сётӥз, со Египетысь ваньмызлэсь быдӟым кивалтӥсен но вераськыны быгатӥз (Пот. 9:13—19). Малы милемыз дышетэ со, кызьы но ку Иегова Моисеез кутӥз? Иегова быръе соосты, кинъёс солы ярамон сямъёсты возьмато но солэсь кужым куро (Пс. 120:1, 2).

6. Малы милемыз дышетэ, Иегова Давид сярысь Верзеллий пыр сюлмаськиз шуыса?

⁶ Нош тани мар луиз, трос сю аръёс ортчыса. Давид эксэй но солэн адямиосыз жадемын вал, соослэн сиемзы но юэмзы потэ вал, куке соос Давидлэн Авессалом пиезлэсь пегаса улӥзы. Соку Иегова соослы Верзеллий пыр юрттэт сётӥз. Та арлыдо адями мукетъёсыныз ӵош улонзэ но ыштыны дась вал, Давидлы но солэн адямиосызлы ваньзэ кулэзэ сётон понна. Верзеллий ӧз малпа, со пересь ини но Иеговалы нокыӵе пайда вайыны уз быгаты ни шуыса. Со интые, Верзеллий Иеговалэн ужась-тыршисьёсызлы сётӥз ваньзэ, маиз солэн вал (2 Экс. 17:27—29). Малы ми та учырысь дышетскыны быгатӥськомы? Кӧня гинэ арес милемлы медаз луы, ми пыр Иегова сюлмаськыны быгатэ ёрмыса улӥсь вын-агайёс но сузэр-апайёс сярысь, кудъёсыз уло ми палан яке мукет шаеръёсын (Мад. 3:27, 28; 19:17). Куке ми асьмеос  юрттыны ум быгатӥське, соку ми быдэс дунне вылын ортчись ужрадлы коньдон сётыны быгатӥськомы, организацимы вын-агайёслы но сузэр-апайёслы юрттыны мед быгатоз шуыса, кытын но ку со кулэ луоз (2 Кор. 8:14, 15; 9:11).

7. Кызьы Иегова Симеонэз кутӥз но кызьы со милесьтым мылкыдмес ӝутэ?

⁷ Иегова кылзэ сётӥз Иерусалимын улӥсь Симеонлы, Инмарлы оскымон арлыдо адямилы, Мессияез адӟытэк, со уз кулы шуыса. Та кыл сётон туж шумпоттӥз, дыр, Симеонэз, кудӥз трос аръёс ӵоже Мессиялэсь лыктэмзэ возьмаз. Осконэз но чидамез понна со бакель каремын вал. Одӥг пол, «духен тыр луыса», со храме пыриз но отысь пичи Иисусэз адӟиз. Симеон пыр Иегова азьпалзэ ивортыса вераз, со нуны Христос луыны кулэ шуыса (Лука 2:25—35). Иисус ужаны-тыршыны кутскытозь Симеон ӧз улы, дыр, нош озьы ке но со туж тау кариз Иеговалы сыӵе дан понна. Но тужгес но бадӟым бакель карон сое азьланяз возьма! Выль дуннеын Иеговалэн та оскымон ужась-тыршисез адӟоз, кызьы Иисуслэн кивалтэмез улсын дунне вылысь вань калыкъёс бакель каремын луозы (Ул.-выл. 22:18). Милемлы но дунъяно котькуд луонлыкез, кудзэ Иегова ужан-тыршонын милемлы усьтэ.

8. Кызьы Иегова милемыз кутыны быгатэ озьы ик, кызьы со куке но Варнаваез кутӥз?

⁸ Иосия, шырыт сямо адями, кудӥз асьме вакытысь нырысетӥ даурын улӥз, дась вал, Иегова сое мед кутоз шуыса (Ап. уж. 4:36, 37). Мукетъёссэ умой буйгатыны быгатэмезлы луыса, вылды, апостолъёс сое Варнава шуыса нимазы. Та ним «буйгатӥсь» шуэмез возьматэ. Кылсярысь, куке Савл христиан мурт луиз, тросэз вын-агайёс соин вераськыны кышказы, малы ке шуоно азьвыл со лек уйылӥсь-уллясь вал. Нош Варнава Савлэз буйгатӥз но юрттӥз солы, но Савл та ӟеч уж понна туж тау кариз (Ап. уж. 9:21, 26—28). Берлогес Иерусалимысь тӧроос буйгатыны мылкыд каризы вын-агайёсты, кудъёсыз кыдёкын интыяськем Сирияысь Антиохияын улӥзы. Кинэ соос отчы ыстӥзы? Варнаваез! Но соослэн быръёнзы шонер вал. Ми лыдӟиськомы, Варнава «ваньзэс чылкыт сюлэмен Кузё-Инмар бордын возиськыны куриз» шуыса (Ап. уж. 11:22—24). Озьы ик туннэ но Иегова котькудмылы юрттыны быгатэ вын-агайёс но сузэр-апайёс понна «буйгатӥсь» луыны. Кылсярысь, ми пыр со буйгатыны быгатэ соосты, кинъёслэн матысь адямизы кулӥз. Яке со милесьтым мылкыдмес ӝутыны быгатэ лыктыны со доры, кин висе яке кинлэн мылкыдыз куашкамын, сое ӟеч кылъёсын буйгатон понна, яке солы жингыртыны. Лэзёды-а тӥ Иеговалы тӥледыз та ӟеч ужын кутыны, кызьы со куке но Варнаваез кутӥз? (1 Фес. 5:14).

9. Малы милемыз дышетэ со, кызьы Иегова юрттӥз Василий агайлы христиан кенешын умой возьмась луыны?

⁹ Иегова юрттӥз Василий нимо агайлы христиан кенешын умой возьмась луыны. Солы 26 арес вал, куке сое тӧро каризы, но со кышказ, вын-агайёслы но сузэр-апайёслы духовной юрттэт сётыны уз быгаты шуыса, тужгес но соослы, кинъёс бадӟым шуг-секытъёсын пумиськыло. Нош солы юрттӥз быгатӥсь тӧроосын ӵош ужамез но Эксэйлыклы ужан-тыршон школаын дышетскемез. Со туж тыршиз ӟеч сямъёссэ будэтыны. Кылсярысь, со гожтӥз пичи ужпумъёсты, кудъёссэ солы быдэстыны кулэ вал. Огез бӧрсьы мукет ужпумзэ быдэсъяса, со пумен аслэсьтыз кышканзэ вормиз. Табере со вера: «Со, мар монэ азьло кышкатэ вал, али шумпотон вае. Куке Иегова мыным вын-агаез яке сузэр-апаез буйгатон понна Библиысь тупамон кылбур шедьтыны юрттэ, мынам сюлмы шумпотонэн пачылме». Вын-агайёс, тӥ Василий сямен асьтэдыз Иеговалы сётӥськоды  ке, со тӥледлы кенешын тросгес лэсьтыны юрттоз.

10. Мар кариз Авигея но кызьы ми солэсь адӟем карыны быгатӥськомы?

¹⁰ Давидлы но солэн ожгарчиосызлы, кудъёссэ Саул эксэй уйылӥз-улляз, юрттэт кулэ вал. Давидлэн адямиосыз Израильысь Навал нимо узыр адямилэсь кӧня ке сиёнзэ куризы. Соос малпазы, Навал юрттыны кулэ шуыса, малы ке шуоно азьвыл соос Наваллэсь ыж уллёоссэ луоё кыр интыын возьмаса улӥзы. Нош ассэ яратӥсь Навал пумит луиз соослы юрттыны. Давидлэн вожез потӥз, но со Навалэз но солэн дорысьтыз вань пиосмуртъёсты виыны малпаз (1 Экс. 25:3—13, 22). Наваллэн Авигея кышноез вылтусын гинэ чебер ӧй вал, но озьы ик со валась кышномурт вал. Кышкасьтэм сямзэ возьматыса, со Давид доры лыктӥз но со азе пыдесъяськыса уськытскиз. Авигея Давидэз сюлворыса куриз, со пунэмзэ медаз берыкты но вир медаз кисьты шуыса. Со лякытэн Давидлы визь-кенеш сётӥз Иегова кие ваньзэ сётыны. Авигеялэн зӥбыт-востэмен верам кылъёсыз но визьмо луэмез Давидлэн сюлмаз пыризы. Со валаз, та кышномуртэз Иегова лэзиз шуыса (1 Экс. 25:23—28, 32—34). Авигея умой сямъёссэ будэтӥз, кудъёсызлы луыса Иегова сое кутыны быгатӥз. Озьы ик туннэ но: христиан кышномуртъёс пыр, кудъёсыз эшшо но лякыт но визьмо луыны тыршо, Иегова соослэсь семьяоссэс но кенешысь вын-агайёсты но сузэр-апайёсты юнматыны быгатэ (Мад. 24:3; Тит. 2:3—5).

11. Кыӵе уже пыриськизы Шаллумлэн нылъёсыз но кинэн ӵошатыны луэ соосты туннэ?

¹¹ Трос аръёс ортчыса, Иегова аслаз калыкезлэсь мылкыдзэ ӝутӥз Иерусалимлэсь борддоръёссэ выльысь ӝутыны. Та ужын со Шаллумлэсь нылъёссэ кутӥз (Неем. 2:20; 3:12). Шаллум кузёйыр вал ке но, солэн нылъёсыз секыт но кышкыт ужез дась луыса быдэстӥзы (Неем. 4:15—18). Нош Фекояысь нимо-дано адямиос «чыртызэс ӧз мыкыртэ», яке пуктӥськон уже пыриськемзы ӧз поты (Неем. 3:5). Пуктэ син азяды, макем шумпотӥзы Шаллумлэн нылъёсыз, куке борддоръёс 52 нунал куспын пуктэмын вал! (Неем. 6:15). Асьме нуналъёсы ӟырдыт сюлэмо сузэр-апайёс шумпотыса пырисько нимысьтыз ужан-тыршонэ — Иеговалы йыбырттон юртъёсты пуктон но тупатъян уже. Та ужлэн азинскемез герӟаськемын соослэн быгатонлыкъёсынызы, тыршеменызы но Инмарлы оскымон луэменызы.

12. Кызьы Иегова милемыз кутыны быгатэ, Тавифаез сямен?

¹² Иегова Тавифалэсь мылкыдзэ ӝутӥз «трос ӟеч ужъёс лэсьтыса» улыны, тужгес но палкышноослы; со «ёрмыса улӥсьёслы трос юрттэт сётъяз» (Ап. уж. 9:36). Тавифа туж лякыт но шырыт сямо кышномурт вал, соин ик тросэз куректӥзы, куке со кулӥз. Макем соос шумпотӥзы, куке апостол Пётр сое улӟытӥз! (Ап. уж. 9:39—41). Малы дышетэ милемыз Тавифалэн учырез? Ми ваньмы — егитъёс но арлыдоос, пиосмуртъёс но кышномуртъёс — вын-агайёсмылы но сузэр-апайёсмылы ӟеч ужъёс лэсьтыны быгатӥськомы (Евр. 13:16).

13. Кызьы Иегова юнматӥз Руфь нимо возьдаськись сузэрез но мар со вераз?

¹³ Руфь нимо возьдаськись сузэрлэн миссионер луэмез потэ вал. Пичи дыръяз со одӥг коркась мукетаз бызьылыса ветлӥз, буклетъёсты кельтылыса. Руфьлы туж кельшиз таӵе ужан-тыршон, нош солы секыт вал адямиосын ӧс дорын вераськыны но Инмарлэн Эксэйлыкез сярысь вераны. Возьдаськемез шоры учкытэк, 18 арес дыръяз Руфь пионер луиз. 1946-тӥ арын со Галаад библейской  школаын дышетскиз, нош собере Гавайи шормуӵъёсын но Япониын ужаз-тыршиз. Отын Иегова сое ӟеч иворез тодытонын трос ужъёс лэсьтон понна кутӥз. Тани мар со вераз, ужан-тыршонын ог 80 ар ортчытэмез бере: «Иегова монэ котьку но юнматъяз. Со юрттӥз мыным возьдаськонме вормыны. Мон оскисько, Иегова ужан-тыршонын юнматоз котькудзэ, кин со вылэ оскиське».

14. Мар милемлы кароно, Иегова милемыз мед кутоз шуыса, кызьы гожтэмын Колоссыослы 1:29?

¹⁴ Трос дауръёс ӵоже Иегова аслэсьтыз ужась-тыршисьёссэ пӧртэм сямен кутылӥз. Кин луыны со тӥледлы юрттоз? Ӵем дыръя со герӟаськемын соин, макем зол тӥ тыршиськоды. (Лыдӟе Колоссыослы 1:29.) Тӥ асьтэдыз Иеговалэн кияз сётӥськоды ке, со юрттоз тӥледлы ӟырдыт сюлэмо тодытӥсьёс, быгатӥсь дышетӥсьёс, сюлмаськись буйгатӥсьёс, усто ужасьёс, оскымон эшъёс луыны яке котькин, кин луыны кулэ, солэсь эриксэ быдэстон понна.

15. Мар сярысь егит вын-агайёслы Иеговалэсь куроно, кызьы гожтэмын 1 Тимофейлы 4:12, 15?

¹⁵ Нош мар вераны луоз тӥ сярысь, егит вын-агайёс, тӥ быдэ вуиськоды ини ке? Али туж кулэ етӥз но кужмо пиосмуртъёс, кудъёсыз кенешлы юрттӥсь луыны но ас вылазы тросгес уж басьтыны быгатысалзы. Тросаз кенешъёсын тӧроос тросгес, кенешлы юрттӥсьёс сярысь. Быгатысалды-а тӥ, егит вын-агайёс, мылкыддэс будэтыны, кенешлы тросгес юрттон понна? Куддыръя агай вераны быгатэ: «Мыным тырмыт, мон ивортӥсь гинэ шуыса». Тон но озьы малпаськод ке, кур Иеговалэсь, со тынэсьтыд кенешлы юрттӥсь луон понна куронъёслы тупаны мылкыддэ мед будэтоз шуыса но кужым мед сётоз шуыса, вань сюлмысь солы ужан-тыршон понна (Екк. 12:1). Милемлы туж кулэ тынад юрттэмед! (Лыдӟе 1 Тимофейлы 4:12, 15.)

16. Мар сярысь милемлы Иеговаез куроно но малы?

¹⁶ Иегова тӥлесьтыд мылкыддэс ӝутыны быгатэ луыны со, кин луыны кулэ, аслэсьтыз эриксэ быдэстон понна. Соин ик куре Инмарез сётыны тӥледлы мылкыд солэсь эриксэ быдэсъяны но озьы ик куре со понна тырмыт кужым. Егитэсь-а тӥ яке арлыдоесь-а, эн жалялэ дырдэс, кужымдэс но ваньбурдэс, Иеговаез данъян понна! (Екк. 9:10). Эн лэзе, кышкан но аслыд ачид оскытэк улон Иеговалы ужан-тыршонын тросгес лэсьтыны мед люкетозы шуыса. Тодады возе, милемлы ваньмылы бадӟым дан, ми Инмарлэн ужаз мар ке но карыны быгатӥськомы шуыса, малы ке шуоно озьы ми яратӥсь Атаймес данъяськомы, нош со данлыкез басьтыны ярамон луэ!