Озьы ик та договорлы луыса кылдӥз выль организация — Нациослэн Лигазы. Солэн ужпумез вал «калыкъёс куспын огъя улонэз азинтон но быдэс дунне вылын тупаса но кышкатэк улонэз тупатон». Тросэз христиан черкъёс Нациослэсь Лигазэс умоен лыдъязы. Америкаысь Христослэн черкъёсызлэн федеральной кенешсы сое нимаз «политической организациен, кудӥз Инмарлэн Эксэйлыкезлэсь музъем вылын кивалтэмзэ возьматэ». Та кенеш Лига шоры умоен учкемзэ возьматӥз, Парижын ортчись Тупаса улон пумысен конференцие аслэсьтыз адямиоссэ ыстыса. Соос пӧлысь одӥгез вераз, конференцилы луыса «адямиослэн улоназы выль вакыт кутскиз» шуыса.

Зэм но, выль вакыт кутскиз, нош конференцие пыриськисьёслэн кужыменызы со ӧз кутскы. 1919-тӥ арын тодытон ужын выль вакыт кутскиз — Иегова ас калыкезлы кужым сётӥз азьло сярысь эшшо но тросгес тодытыны. Нош нырысь Библиез Эскерисьёслы бадӟым шуг-секытъёс пыр потоно вал.

1919-тӥ арын 4-тӥ толшоре, кӧснуналэ, луыны кулэ вал Возьмаськон башнялэн, Библиослэн но трактатъёслэн обществозылэсь директоръёссэ быръён, кудӥз котькуд аре ортчытӥське. Нош та дыре Джозеф Рутерфорд, кудӥз соку Иеговалэн калыкезлэн уженыз кивалтӥз, но сизьым мукет вын-агайёс, шонертэм янгыше уськытыса, Атлантаын (Джорджия штат, США) пытсэтэ пуктэмын вал. Соин ик юан кылдӥз: кулэ-а кыл кутӥсь агайёсты выльысь бырйыны яке соосты воштоно-а?

Пытсэтын пукыса, Рутерфорд агай сюлмаськиз, мар луоз организациен азьланяз. Со тодӥз, куд-ог вын-агайёс президентэ кинэ ке мукетсэ бырйысалзы шуыса. Соин ик Рутерфорд быръёнъёсы люкаськемъёслы гожтэт гожтӥз но президентэ бырйыны ӵектӥз Эвандер Кауард агаез. Со вераз, Кауард агай лякыт сямо, визьмо но Господьлы оскымон адями шуыса. Нош тросэзлэн вын-агайёслэн мукет ужпум кутэмзы потэ вал: быръёнъёсты ӝыны арлы берлогес ортчытыны. Пытсэтын пукись вын-агайёслы  юрттӥсь юристъёс таин соглаш вал. Вераськон мынэмъя югдур секытгес но секытгес луыны кутскиз.

Собере луиз со, мае Ричард Барбер берлогес «бугыръяськись вуэз буйгатон» шуыса нимаз. Одӥгез агай вераны кыл куриз но шуиз: «Мон юрист ӧвӧл, нош вераськон катъёс сярысь кутскиз бере, мон тодӥсько оскымонъёслэн законзы сярысь. Инмар оскымон луыны косэ. Мон малпамъя, оскеммес возьматон понна, быръёнъёсты ортчытоно но Рутерфорд агаез выльысь президентэ быръёно» (Пс. 17:26).

Александр Макмиллан, кудӥз мукет вын-агайёсын ӵош пытсэтын пукиз, берлогес тодаз вайиз, кызьы мукет нуналэ Рутерфорд агай камералэн борддораз йыгаськиз но куриз: «Решётка пыр кидэ потты». Со Макмиллан агайлы телеграмма сётӥз. Сое адӟыса, Макмиллан агай соку ик валаз, мар сярысь отын вераське. Отын гожтэмын вал: «РУТЕРФОРД УАЙЗ ВАН БАРБЕР АНДЕРСОН БУЛЛИ НО СПИЛЛ ПРЕЗИДЕНТ НЫРЫСЕТӤ КУИНЕЗ ПРАВЛЕНИЛЭН ЧЛЕНЪЁСЫЗ ВАНЬЗЭС ЯРАТӤСЬКОМЫ». Со возьматӥз, вань директоръёс выльысен быръемын вал шуыса, нош Джозеф Рутерфорд но Уильям ван Амбург правление кылизы шуыса. Озьыен, Рутерфорд агай озьы ик президент кылиз.

Тямыс вын-агайёс пытсэтын пукыкузы, оскымон Библиез Эскерисьёс подписьёс бичазы, кивалтӥсьёс соосты мед мозмытозы шуыса. Та кышкасьтэм вын-агайёс но сузэр-апайёс 700 000-лэсь тросгес подписьёс люказы. 1919-тӥ арын 26-тӥ южтолэзе, вирнуналэ, люкам подписьёсты сётэмлэсь азьло ик, Рутерфорд но мукет кыл кутӥсь вын-агайёс мозмытэмын вал.

Рутерфорд агай, солэсь бертэмзэ возьмась вын-агайёслы вазиськыса, вераз: «Мон оскисько: шуг-секытъёс, кудъёсыз пыр ми ваньмы потӥмы, милемыз эшшо но секытгес дыръёслы дасязы. [...] Тӥ вын-агайёсты пытсэтысь поттон понна ӧд нюръяське. Со валтӥсез ӧй вал. [...] Тӥляд нюръяськемдылэн зэмос ужпумез Инмарез данъян вал, но соос, кинъёс та уже пыриськизы, трос бакель каронъёс басьтӥзы».

Вын-агайёсмес судъянэн герӟаськем югдуръёс возьматӥзы, кызьы Иегова ужъёсын кивалтыны быгатэ. 1919-тӥ арын 14-тӥ куартолэзе апелляционной суд ужпум кутӥз: «Янгыше уськытэмъёслэн учыразы та ужъя ӧз ортчытӥське... шонерлыко эскеронъёс, кудъёссэ ортчытыны кулэ вал, соин ик ялэм приговор ӵушиське». Вын-агайёс кышкыт йыружъёс понна пытсэтын пукизы, но соосты огшоры гинэ амнистировать карысалзы ке яке кыл кутытонзэс небӟытысалзы ке, документъёсазы пусъемын луысал, соос судъямын вал шуыса. Но азьланяз янгыше уськытонъёс ӧй вал ини. Соин ик судья Рутерфорд аьзланяз но юридик ужъёсты нуыны быгатӥз, Иеговалэсь калыксэ США-ысь Верховной судын утён понна.

«Милям азьтэмъяськеммы но тэк пукеммы уг поты вал, возьмаса, куке Господь милемыз инме басьтоз,— тодаз вайиз Макмиллан агай.— Ми валамы, Господьлэсь эриксэ адӟон понна, маке но карыны тыршоно шуыса».

Нош валтӥсь кивалтонниын ужасьёслы капчи ӧй вал азьланьтыны литератураез печатлан ужзэс, кудзэ соос трос аръёс ӵоже нуизы. Малы? Кыл кутӥсь вын-агайёс пытсэтын пукыкузы, печатлан понна кулэ луись арбериос тӥямын вал. Соин сэрен соослэн мылкыдзы куашказ, но куд-огъёсыз малпазы, тодытон уж дугдӥз шуыса.

Кин ке тунсыкъяськиз на-а Эксэйлык сярысь зэмлыкен, кудӥз сярысь Библиез Эскерисьёс тодытӥзы? Тае тодон понна, Рутерфорд агай лекция вераны малпаз. Вань мылкыд карисьёс ӧтемын вал. «Нокин но ӧз лыктысал ке,— тодаз вае Макмиллан агай,— ми валасалмы, тодытон уж йылпумъяськиз шуыса».

Озьыен, 1919-тӥ арын 4-тӥ куартолэзе, арнянуналэ, Лос-Анджелесын (Калифорния штат), секыт висёнэз шоры учкытэк, Рутерфорд агай «Курадӟись адямиослы оскиськон» лекция вераз. Лекциез кылзӥзы 3 500 пала адямиос, но вал на трос лыктэмъёс, кудъёсызлы инты ӧз тырмы. Мукетаз нуналэ эшшо 1 500 адямиос лыктӥзы на. Вын-агайёс валазы: адямиослэн туж потэ вал зэмлыкез тодэмзы!

Со, мар каризы собере вын-агайёс, туннэ но шӧдӥське Иеговалэн Адӟись-Ивортӥсьёсызлэн тодытон ужзы вылын.

1919-тӥ арын 1-тӥ гудырикошкон понна поттэм «Возьмаськон башняын» ялэмын вал, куарусёнлэн кутсконаз Сидар-Пойнтын (Огайо штат) огъя конгресс ортчоз шуыса. «Котькудӥз лыдъяз, со отын луыны кулэ шуыса»,— тодаз вайиз Кларенс Бити, Миссури штатысь егит Библиез Эскерись. 6 000-лэсь тросгес вын-агайёс но сузэр-апайёс  люкаськизы. Нокин ӧз но малпа, сомында адямиос лыктозы шуыса. Шумпотонзы эшшо но тросгес луиз, куке 200-лэсь тросгес адямиос пылатӥськизы Эри тыын, кудӥз конгресслы матын вал.

1919-тӥ арын 5-тӥ куарусёнэ, конгресслэн витетӥ нуналаз, Рутерфорд агай «Огъя ужасьёслы вазиськон» речаз ялӥз выль журналлэн потэмез сярысь, кудӥз нимаськиз «Зарни даур» a. Та журнал кулэ вал «валтӥсь югдуръёс сярысь вераны но, Библиез уже кутыса, валэктыны, малы со озьы луэ».

Библиез Эскерисьёслэсь ваньзылэсь мылкыдзэс ӝутӥзы выль журналэн кышкатэк тодытыны. Валэктӥсь гожтэтын верамын вал: «Котькудӥз сӥзиськем [пылатӥськем] ужась-тыршись тодаз возьыны кулэ: тодытон — со бадӟым дан. Али ик ини та луонлыкез уже кутыны кулэ но лэсьтоно ваньзэ, та дуннелы тодытон понна». Тросэз вазиськизы та ӧтёнлы! Эксэйлыклэн тодытӥсьёсызлэн тыршемзылы луыса, толсур толэзьлы 50 000-лэсь тросгес адямиос выль журналлы гожтӥськизы.

1919-тӥ арлэн пумозяз Иеговалэн калыкезлэн ужез мукет сямен радъямын вал но ивортӥсьёс выль кужым басьтӥзы. Со сяна, берпуметӥ нуналъёс сярысь куд-ог азьпалзэ ивортонъёс быдэсмизы. Инмарлэсь калыксэ эскерон но чылкытатон йылпумъяськизы, кудъёсыз сярысь вераське Малахиялэн 3:1—4. Иеговалэн ужась-тыршисьёсыз «Быдӟым Вавилонлэн» ки улысьтыз мозмытэмын вал, озьы ик Иисус «оскиськымон, визьмо ляльчиез» пуктӥз (Усьт. 18:2, 4; Матф. 24:45) b. Табере Библиез Эскерисьёс дась вал быдэстыны ужез, кудзэ соослы Иегова сётыны малпаз.