1. Кызьы 2 Коринфъёслы 3:1—3 возьматэ, кинлы ке пылатӥськыны юрттыны ми понна бадӟым дан луэ шуыса? (Учке вылбамысь туспуктэмез.)

 КЫӴЕ тӥляд шӧдонъёсты кылдо, куке адӟиськоды, кызьы пылатӥське кенешысьтыды адями, кудӥз Библиез дышетӥз? Тӥ туж шумпотӥськоды, дыр (Матф. 28:19). Нош тӥ асьтэос со адямиен дышетӥды ке, тӥляд шумпотонды эшшо но бадӟымгес луоз! (1 Фес. 2:19, 20). Та адямилэн Инмарен эшъяськемез но пылатӥськемез возьмато, тӥ но кенешысьтыды мукет вын-агайёс но сузэр-апайёс сюлмысь тыршиды шуыса, солы юрттон понна. (Лыдӟе 2 Коринфъёслы 3:1—3.)

2. а) Кыӵе кулэ луись юанэз милемлы эскероно но малы? б) Мар со сыӵе Библиез дышетон? (Учке сноскаез.)

² Туж шумпотоно, берпум ньыль аръёс ӵоже быдэс дунне вылын котькуд толэзе 10 000 000 пала Библиез дышетонъёс b ортчытъяськизы шуыса. Со дыре ик котькуд ар пылатӥськизы Христослэн ог 280 000 выль дышетскисьёсыз. Кызьы юрттоно пылатӥськыны трос миллион адямиослы, кудъёсыз Библиез дышоно на? Иегова али ке но адямиослы луонлык сётэ на солэн ужась-тыршисьёсыз луыны. Соин ик лэсьтоно ваньзэ, мае быгатӥськомы, соослы ӝоггес пылатӥськыны юрттон понна. Дыр ӧжыт кылемын ини! (1 Кор. 7:29а; 1 Пётр 4:7).

3. Мае ми тодомы та статьяысь?

 ³ Туннэ тужгес но кулэ дышетскисьёсты дасяны. Соин ик Кивалтӥсь кенеш пӧртэм шаеръёсысь филиалъёслэсь юалляськиз, валан понна, кызьы юрттоно тросэзлы дышетскисьёслы пылатӥськыны. Та но вуоно статьяосысь тодомы, малы дышетскыны луэ быгатӥсь пионеръёслэсь, миссионеръёслэсь но ёросэз чакласьёслэсь (Мад. 11:14; 15:22) c. Ми тодомы, мар карыны быгато соос, кинэн Библиез дышето, озьы ик соос, кинъёс соосын дышето, со дышетонъёс пайдаёгес мед луозы шуыса. Та статьяын эскерисько вить визь-кенешъёс, кудъёсыз дышетскисьлы юрттозы Инмарен эшъяськыны но пылатӥськыны.

4. Мае тодамы возёно, Библиез дышетонэз ӧс куспын ортчытыкумы?

⁴ Тросэз вын-агайёс но сузэр-апайёс Библиез дышетонэз ортчыто ӧс куспын. Со туж умой амал, адями Библиен тунсыкъяськыны мед кутскоз шуыса. Ӵем дыръя сыӵе дышетонъёс вакчиесь луо но котькуд арняе уг ортчытӥсько. Адями тросгес мед тунсыкъяськоз шуыса, куд-ог ивортӥсьёс юало, кызьы соин герӟаськыны луоз. Собере дышетонъёс вискын жингырто яке гожъяло солы но Библиысь кыӵе ке малпанэз вакчияк верало. Сыӵе вакчияк Библиез эскеронъёс трос толэзьёс ӵоже кыстӥськыны быгато, озьы ке но рос-прос Библиез дышетонлы уг пӧрмо. Быгатоз-а адями, кудӥныз ми Библиез дышетӥськомы, Инмарлы матэ кариськыны, солы сӥзиськыны но пылатӥськыны, Библиез дышетонлы трос дырзэ ӧз висъя ке но тырмыт кужымзэ ӧз поны ке? Уз быгаты, дыр.

5. Кызьы Иисуслэн кылъёсыз, кудъёсыз гожтэмын Лукалэсь 14:28—33, юртто милемлы дышетскисьёсты быгатыса дасяны?

⁵ Одӥг пол Иисус примеръёс вылын валэктӥз, мар кароно адямилы, кудӥзлэн Иисуслэн дышетскисез луэмез потэ. Иисус вераз адями сярысь, кудӥз каланча пуктыны малпаз, но эксэй сярысь, кудӥз ожмаськонэ мыныны дасяськиз. Иисус валэктӥз, каланча пуктыны малпасьлы нырысь ик пуксёно но лыдъяно шуыса, кӧня солэн коньдонэз кошкоз, валан понна, быгатоз-а со каланча пуктонзэ йылпумъяны. Эксэйлы но пуксьыса мукетъёсыныз кенешоно, валан понна, быгатозы-а солэн ожгарчиосыз тушмонъёссэс вормыны. (Лыдӟе Лукалэсь 14:28—33.) Озьы ик адямилы но, кудӥзлэн потэ христиан мурт луэмез, умой-умой малпаськоно,  мар солы со понна кароно луоз. Ми адямилы юрттыны быгатӥськомы сое валаны. Соин ик солэсь мылкыдзэ ӝутоно котькуд арняе Библиез дышетыны. Нош кызьы солэсь мылкыдзэ ӝутоно?

6. Мар карыны тыршоно, Библия дышетонэз пайдаёгес карон понна?

⁶ Нырысь тырше ӧс куспын Библиез дышетондэс кемагес дыр ӵоже ортчытыны. Оло нош, пумиськемдылы быдэ тӥ быгатоды Библиысь, одӥг кылбур интые, кык кылбур эскерыны. Куке адями дышоз, ӧс куспын Библиез эскерон кемагес кыстӥське шуыса, юалэ солэсь, луоз-а, кытчы ке пуксьыса, дышетонэз азьланьтыны. Со, мар вералоз адями, возьматоз, макем кулэ солы Библиез дышетон. Дыр ортчыса, дышетскисьлы Инмарлы матэгес кариськыны юрттон понна, юаны луоз, потэ-а солэн арняяз кык пол дышетэмез. Озьы ке но, дышетскисез пылатӥськонлы дасян понна, арняяз соин одӥг пол яке кык пол дышетыны гинэ тырмыт ӧвӧл.

7. Кызьы дасяськоно котькуд дышетонлы?

⁷ Тӥ Библиез дышетон ортчытӥськоды ке, котькуд дышетонлы умой-умой дасяське. Нырысь ик лыдӟе ваньзэ, мае тӥ ӵош эскероды, но Библиысь кылбуръёсты. Пусъе валтӥсь малпанъёсты. Малпаське люкетлэн яке уроклэн нимыз вылын, подзаголовокъёс но дышетон понна юанъёс вылын, «лыдӟе» шуыса пусъем кылбуръёс, суредъёс но видеороликъёс вылын, кудъёсыз юрттозы дышетон темаез валаны. Собере малпаське, кызьы та темаез валамон валэктоно дышетскисьтылы, со сое мед валалоз но тодэмзэ улоназ пыртыны мед кутскоз шуыса (Неем. 8:8; Мад. 15:28а).

8. Мар сярысь Иеговаез курыны луоз, дышетскисьмы сярысь вӧсяськыкумы, Колоссыослы 1:9, 10 лыдэ басьтыса?

⁸ Дасяськыкуды вӧсяське Иеговалы адями сярысь, кудӥныз Библиез дышетӥськоды, но солэн кулэяськонъёсыз сярысь. Иеговалэсь юрттэт куре дышетскисьлы Библиысь зэмлыкез валэктыны озьы, со солэсь сюлэмзэ мед вырӟытоз шуыса. (Лыдӟе Колоссыослы 1:9, 10.) Азьло ик тырше валаны, мае дышетскисьлы секыт луоз валаны яке маин секыт луоз соглаш кариськыны. Тодады возе: тӥляд ужпумды — юрттыны солы пылатӥськонлы дасяськыны.

9. Кызьы тӥ дышетскисьтылы юрттыны быгатӥськоды дышетонлы дасяськыны?

⁹ Ми оскиськомы: Библиез ялан эскерыса, дышетскись дунъяны кутскоз сое, мае лэсьтӥзы со понна Иегова но Иисус, но тросгес  тодон-валан басьтэмез потоз (Матф. 5:3, 6). Библиез дышетон тросгес пайда мед ваёз шуыса, дышетскисьлы вань саклыксэ висъяно солы, мае со эскере. Соин ик дышетскисьтылы валэктэ, макем кулэ котькуд дышетонлы дасяськыны: азьло ик лыдӟыны эскероно люкеттэс но малпаськыны, кызьы со басьтэм тодон-валанзэ улоназ пыртыны быгатоз. Кызьы тӥ солы юрттыны быгатӥськоды? Кыӵе ке люкетлы яке уроклы ӵош дасяське, возьматон понна, кызьы дышетонлы дасяськыны луэ d. Возьматэ солы, кызьы юанлы абзацысь валэктон шедьтоно, но валэктэ, валтӥсь кылъёсты пусйыса, валэктонэз тодэ вайыны капчигес луоз шуыса. Собере куре дышетскисьтэс юанлы валэктонэз ас кылъёсыныз вераны. Соку тӥ адӟоды, дышетскись эскероно люкетэз умой валаз-а, ӧз-а шуыса. Мар карыны эшшо дышетскисьлэсь мылкыдзэ ӝутыны луэ на?

10. Малы кулэ котькуд нунал Библиез лыдӟыны? Мар кароно, Библиез лыдӟон зэмзэ ик пайдаё мед луоз шуыса?

¹⁰ Милемын котькуд арня Библиез дышетэм сяна, дышетскисьлы туж кулэ аслыз котькуд нунал Иеговаез кылзыны но соин вераськыны. Инмарез кылзон понна, котькуд нунал Библиез лыдӟоно (Иис. Н. 1:8; Пс. 1:1—3). Возьматэ дышетскисьлы, кызьы уже кутыны луоз «Библиез лыдӟон графикез» e. Библиез лыдӟон дышетскисьлы зэмзэ ик пайда мед ваёз шуыса, солэсь мылкыдзэ ӝутэ малпаськыны со вылын, мар отын гожтэмын Иегова сярысь, озьы ик со вылын, кызьы басьтэм тодон-валанзэ со улоназ кутыны быгатоз (Ап. уж. 17:11; Иак. 1:25).

11. Кызьы ми дышетскисьлы юрттыны быгатӥськомы шонер вӧсяськыны но малы солы Иеговаен ӵем вераськыны кулэ?

¹¹ Дышетскисьлэсь мылкыдзэ ӝутэ Иеговаен вераськыны, яке котькуд нунал вӧсяськыны солы. Котькуд дышетонды азьын но со бере сюлмысь вӧсяське. Вӧсяськыкуды дышетскисьты сярысь вералэ. Вӧсяськемдэс кылзыса, со валалоз, вӧсяськыны Иеговалы кулэ шуыса, Иисус Христос пыр. Озьы со дышетскоз вань сюлмысьтыз инмысь Атаеныз вераськыны (Матф. 6:9; Иоанн 15:16). Малпалэ гинэ, макем юнмалозы дышетскисьтылэн Инмарен кусыпъёсыз, куке со котькуд нунал Библиез лыдӟоз, яке Иеговаез кылзоз, но вӧсяськоз, яке Иеговаен вераськоз! (Иак. 4:8). Ваньмыз та юрттоз солы Инмарлы  сӥзиськыны но пылатӥськыны. Кызьы эшшо ми дышетскисьлы юрттыны быгатӥськомы на?

12. Кызьы ми дышетскисьмылы юрттыны быгатӥськомы Иеговаен эшъяськыны?

¹² Библиысь басьтэм тодон-валан дышетскисьлэн сюлмаз пыӵаны кулэ, нош йыраз гинэ кыльыны кулэ ӧвӧл. Малы? Малы ке шуоно тодон-валан адямилэн сюлмаз пыӵаз ке, соку солэн мылкыдыз ӝутскоз тодэмзэ улоназ пыртыны. Иисус адямиосты тросэзлы дышетӥз но, соослэн солэсь дышетскемзы потэ вал. Адямиослэн мылкыдзы ӝутске вал Иисуслэн дышетскисез луыны, малы ке шуоно со адямиослэсь сюлэмзэс вырӟытыны быгатӥз (Лука 24:15, 27, 32). Дышетскисьты мед оскоз, Иегова зэмзэ но вань шуыса, озьы ик соин эшъяськыны луэ шуыса. Ми дышетскисьлы юрттыны кулэ Иегова шоры учкыны Атай, Инмар но Эш шоры кадь (Пс. 24:4, 5). Дышетонды дыръя кыӵе гинэ юанэз тӥ медад эскере, дышетскисьтылэсь саклыксэ висъялэ Инмарлэн паймымон сямъёсызлы (Пот. 34:5, 6; 1 Пётр 5:6, 7). Юрттэ дышетскисьтылы дунъяны Иеговалэсь яратонзэ, ӟечлыксэ но гажан-жалянзэ. Иисус вераз, «нырысетӥез но ваньмызлэсь бадӟымез курон-косон» — со «Инмардэ Кузё-Инмарез... яраты» (Матф. 22:37, 38). Юрттэ дышетскисьтылы Иеговаез юн яратыны.

13. Кызьы ми дышетскисьмылы юрттыны быгатӥськомы Иеговалэсь сямъёссэ тодыны? Вералэ пример.

¹³ Вералэ дышетскисьтылы, малы тӥ Иеговаез яратӥськоды. Соку со валалоз, вылды, солы аслыз но Иеговаен эшъяськоно но сое яратыны дышетсконо шуыса (Пс. 72:28). Кылсярысь, куке эскероно люкетысьтыды яке кылбурысь кыӵе ке малпан тӥлесьтыд сюлэмдэс вырӟытӥз но мае ке выльзэ тодыны юрттӥз Иеговалэн яратонэз, визьлыкез, шонерлыкез яке кужымез сярысь, вералэ сое дышетскисьтылы но. Со мед валалоз, та одӥгез гинэ муг шуыса, малы тӥ инмысь Атайдэс яратӥськоды. Нош мар эшшо кароно на дышетскисьлы, пылатӥськонлы дасяськон понна?

14. Мар вераське кенешлэн пумиськонъёсыз сярысь Еврейёслы 10:24, 25 гожтэм кылъёсын?

¹⁴ Милям ваньмылэн потэ, дышетскисьёсмы пылатӥськыны ужпум мед кутозы шуыса. Нош со понна соослы кенешлэн пумиськонъёсаз ветлыны кулэ. Ӵем дыръя адӟыны луэ: соос, кинъёс пумиськонъёсы соку  ик ветлыны кутско, Инмарен кусыпъёссэс ӝоггес юнмато (Пс. 110:1). Куд-ог вын-агайёс но сузэр-апайёс дышетскисьёссылы валэкто, Библиез пыр-поч валан понна, кенешлэн пумиськонъёсаз ветлоно шуыса. Дышетскисеныды эскере Еврейёслы 10:24, 25 (лыдӟе) но вералэ, кыӵе пайда ваёзы солы пумиськонъёс. Возьматэ солы «Мар каро Эксэйлык юртын?» f видеороликез. Дышетскисьтылэсь мылкыдзэ ӝутэ кельтылытэк ветлыны котькуд арняе ортчись пумиськонъёсамы.

15. Кызьы дышетскисьлэсь мылкыдзэ ӝутоно пумиськонъёсы кельтылытэк ветлыны?

¹⁵ Мар карыны луоз, куке дышетскисьмы кенешлэн пумиськоназ уг ветлы яке куддыръя гинэ ветлэ? Ӝутскем мылкыдын вералэ солы, мае тӥ алигес тодӥды пумиськонын. Куке дышетскисьты тӥлесьтыд ӝутскем мылкыддэс адӟоз, солэн но пумиськонэ лыктэмез потоз. Сётэ солы «Возьмаськон башняез» яке «Улон но ужан-тыршон» ужан тетрадез, кудъёсыз али пумиськонъёсын эскерисько. Возьматэ, мар эскериськоз вуоно пумиськонын, озьы ик юалэ солэсь, пумиськонлэн кыӵе люкетэз солы тужгес но тунсыко потэ. Сое, мае дышетскисьты адӟоз но кылоз нырысетӥ пумиськоназ, ӵошатыны уз луы мукет религиозной пумиськонъёсын, кудъёсаз со азьвыл ветлӥз вал (1 Кор. 14:24, 25). Со тодматскоз соосын, кинъёслэсь адӟем карыны быгатоз, озьы ик соосын но, кинъёс юрттозы солы Инмарен кусыпъёссэ юнматыны но пылатӥськонлы дасяськыны.

16. Кызьы ми дышетскисьмес пылатӥськонлы дасяны быгатӥськомы? Мае ми эскеромы вуоно статьяын?

¹⁶ Озьыен, кызьы дышетскисьмес пылатӥськонлы дасяно? Юрттэ солы валаны, макем кулэ котькуд арняе Библиез дышетыны но котькуд дышетонмылы дасяськыны. Со сяна, солэсь мылкыдзэ ӝутэ Иеговаен эшъяськыны, котькуд нунал соин вераськыны но кенешлэн пумиськонъёсаз ялан ветлыны. (Учке « Мар кароно дышетскисьлы, пылатӥськонлы дасяськон понна?» рамкаез.) Озьы ик вань на эшшо вить визь-кенешъёс, кудъёсыз юрттозы милемлы дышетскисьмес пылатӥськонлы дасяны. Соос сярысь вераськоз вуоно статьяын.