Зэм но, Иегова кужым сётӥз та ужась-тыршисьёслы, кудъёсыз мылысь-кыдысь тодытӥзы. Арлэн кутсконаз книга вӧлмытӥсьёслэн, яке пионеръёслэн, лыдзы 225 вал. Нош арлэн пумаз соос 350 луизы. Валтӥсь кивалтонние нырысетӥзэ отчётъёссэс ыстӥзы 8 000-лэсь тросгес ивортӥсьёс — Библиез дышетонъя группаосы пыриськисьёс. Иегова та ивортӥсьёслэсь тыршемзэс бакель кариз — туж трос адямиос ӟеч иворез кылзӥзы.

1920-тӥ арын 21-тӥ южтолэзе Джозеф Рутерфорд, кудӥз со дыре Библиез Эскерисьёслэн уженызы кивалтӥз, «Трос миллион али улӥсьёс ноку уз кулэ» речез вераны кулэ вал. Библиез Эскерисьёс та речез кылзыны, кужымзэс жалятэк, вань тунсыкъяськись адямиосты ӧтизы. Соос Нью-Йоркысь одӥгзэ тужгес но бадӟым театрез арендовать каризы но 320 000 пала ӧтёнъёсты вӧлмытӥзы.

Библиез Эскерисьёс ӧз но малпалэ, сокем трос адямиос лыктозы шуыса. Театр, кудаз 5 000-лэсь но тросгес адямиос тэрыны быгато вал, быдэсак тырмиз. Кырын кылизы на эшшо 7 000 адямиос, кудъёсызлы инты ӧз тырмы. «Возьмаськон башня» нимаз та речез «тужгес но азинлыко ужрадэн, кудзэ ортчытӥзы Калыккуспо Библиез Эскерисьёс».

Библиез Эскерисьёс тодытӥзы, «трос миллион али улӥсьёс ноку уз кулэ» шуыса. Талы луыса соос тросэзлы тодмо луизы. Соку Библиез Эскерисьёс ӧз валалэ, Эксэйлык сярысь иворез дуннелэн мукет палъёсаз но тодытоно луоз но та уж кемагес дыр ӵоже кыстӥськоз шуыса. Озьы ке но та ивортӥсьёс ӟырдыт мылкыдын ужазы-тыршизы. Айда Олмстед, кудӥз пумиськонъёсы ветлыны кутскиз 1902-тӥ арын, тодаз вае: «Ми тодӥмы, адямиос трос бакель каронъёс басьтозы шуыса, но та сярысь вераны тыршимы котькинлы, кинэ пумитамы».

Вын-агайёслы но сузэр-апайёслы духовной сиён сётъян понна, Вефиль куд-ог публикациосты ачиз печатланы кутскиз. Со понна Бруклинын (Миртл-авеню, 35), Вефильлэсь кыдёкын ик ӧвӧл, вын-агайёс одӥг юртэз арендовать каризы но отчы печатлан тӥрлык пуктӥзы.

Тани мар верало Лио Пелл но Уолтер Кесслер, кудъёсыз Вефильын ужаны-тыршыны кутскизы 1920-тӥ арын, толшоре. Уолтер тодаз вайылӥз: «Куке ми вуимы, типографилэсь ужзэ радъясь ми шоры учкиз но вераз: „Нуназеозь час но ӝыны вань на“, нош собере ыстӥз милемыз подвалысь книгаосын коробкаосты поттаны».

Лио вераз, мар луиз мукет нуналаз: «Милемыз куризы нырысетӥ этажысь борддоръёсты миськыны.  Талэсь но кырсь ужез мынам адӟеме ӧй вал. Но ми тыршимы Иегова понна, соин ик та ужез данэн лыдъямы».

Трос арня ик ӧз ортчы, вын-агайёс «Возьмаськон башняез» асьсэос печатланы кутскизы. Кыкетӥ этаже пуктӥзы печатлан машинаез. Соин печатлазы 60 000 «Возьмаськон башня» журналъёсты, кудъёсыз 1920-тӥ арын 1-тӥ тулыспал понна поттэмын вал. Со дыре ик та юртлэн подвалаз вын-агайёс пуктӥзы эшшо одӥг печатлан машинаез. Со туж бадӟым вал, соин ик сое «Линкор» шуыса нимазы. 1920-тӥ арын 14-тӥ оштолэзь понна поттэмысен кутскыса, та машинаен «Зарни даур» журналэз печатланы кутскизы. Ваньмыз та валамон возьматӥз: Иегова бакель кариз вань кужымзэс сётыса ужасьёслэсь тыршемзэс.

Иеговалэн оскымон ужась-тыршисьёсыз шумпотӥзы, соос азьло сямен ик тупаса улыны но мылысь-кыдысь тодытыны быгато шуыса. Нош огыр-бугыр вакытэ, 1917—1919-тӥ аръёсы, куд-огъёсыз Библиез Эскерисьёс организациысь кошкизы. Кызьы соослы юрттыны луэ вал?

1920-тӥ арын 1-тӥ оштолэзь понна поттэм «Возьмаськон башняын» печатламын вал «Ойдолэ тупаса уломы» статья. Отын таӵе шуныт кылъёс гожтэмын: «Ми оскиськомы, ваньзы, кинъёслы святой дух сётэмын... азьвыл лэсьтэм янгышъёссэс вунэтозы... но огкылысь, одӥг лулмугор кадь, улозы шуыса».

Тросэз та ӧтёнлы вазиськизы. Одӥг кузпалъёс гожтӥзы: «Арлэсь кемагес ми тэк пукимы, нош мукетъёсыз тодытӥзы. Макем ми янгышамы! [...] Оскиськомы, сюрес вылысь ми ноку ум палэнске ини шуыса». Вын-агайёсты но сузэр-апайёсты, кудъёсыз выльысь ужаны-тыршыны кутскизы, трос уж возьмаз.

1920-тӥ арын 21-тӥ инвожое Библиез Эскерисьёс кутскизы «Ватӥськыса улӥсь зэмлык быдэсмиз» книгаез вӧлмытонъя кампаниез. Та книга небыт вылбамен поттэмын вал. Сое «ZG» a шуыса нимазы.  Куке 1918-тӥ арын «Ватӥськыса улӥсь зэмлык быдэсмиз» книгаез кивалтӥсьёс вӧлмытыны ӧз лэзе ни, трос книгаос складэ кылизы.

Та кампание пыриськыны книга вӧлмытӥсьёсты гинэ ӧз ӧте, нош ваньзэс Библиез дышетонъя группаосы пыриськисьёсты ӧтизы. 1920-тӥ арын инвожо понна поттэм «Бюллетеньын» b гожтэмын вал: «Библиез дышетонъя группаысь котькудӥз сӥзиськем [пылатӥськем] мурт, кудӥз та кампание пыриськыны быгатэ, сое мылысь-кыдысь карыны кулэ. Мед милемын валтозы та кылъёс: „Мынам ужпуме — ‚ZG‘ книгаез вӧлмытыны“». Эдмунд Хупер тодаз вайылӥз, та кампания дыръя тросэз нырысетӥзэ коркась корка тодытӥзы шуыса. Озьы ик со вераз: «Ми соку гинэ валаны кутскимы, макем паськыт вӧлмоз уж, кудзэ быдэстыны кулэ вал».

Нырысетӥ дунневыл ож дыръя куд-ог шаеръёсысь Библиез Эскерисьёсын герӟаськыны секыт вал. Соин ик Рутерфорд агайлэн потӥз соослэсь мылкыдзэс ӝутэмез но тодытон ужез выльысь радъямез. Сыӵе ужпумен 1920-тӥ арын 12-тӥ гудырикошконэ со но мукет ньыль вын-агайёс кузь сюрес вылэ потӥзы, Великобритание но мукет шаеръёсы вуон понна.

Куке Рутерфорд агай Великобританиын вал, Библиез Эскерисьёс ортчытӥзы 3 конгресс но 12 пумиськонъёс, кудъёсаз со речь вераз. Та пумиськонъёсы ог 50 000 адямиос лыктӥзы. Со сярысь, кыӵе пайда вайизы та пумиськонъёс, «Возьмаськон башняын» вераськиз: «Вын-агайёслэн но сузэр-апайёслэн мылкыдзы ӝутскиз. Яратон но ужан-тыршон соосты эшшо но огазеязы. Тросэз кайгырись сюлэмъёс шумпотонэн пачылмизы». Нош куке Рутерфорд «Трос миллион али улӥсьёс ноку уз кулэ» речьсэ Парижын вераз, залын буш инты ӧй вал. Речьсэ верамез бере 300 адямилэн тросгес тодон-валан басьтэмез потӥз.

Собере Рутерфорд агай но мукет ньыль вын-агайёс вуылӥзы Афиные, Каире но Иерусалиме. Со интыысь адямиос зэмлыкен тунсыкъяськемен, Рутерфорд Иерусалим котырысь Рамаллах карын филиал кылдытӥз. Собере Рутерфорд агай Европае берытскиз но Швейцариын центральноевропейской филиал кылдытӥз, отын публикациос мед печатласькозы шуыса.

1920-тӥ арын, сӥзьыл, Библиез Эскерисьёс «Зарни даур» журналлэсь 27-тӥ номерзэ печатлазы. Со вал нимысьтыз поттэм, кудаз шара вераськиз, кызьы 1918-тӥ арын Библиез Эскерисьёсты уйылыса-улляса возизы. «Линкор», уй но нунал  ужаса, ньыль миллионлэсь но тросгес журнал печатлаз.

Та журналысь лыдӟисьёс тодӥзы Эмма Мартин сузэрлэн судын эскериськись ужез сярысь. Та сузэр ужаз-тыршиз книга вӧлмытӥсь луыса Сан-Бернардино карын (США, Калифорния штат). 1918-тӥ арын 17-тӥ южтолэзе Эмма но куинь агайёс, Эдуард Хамм, Эдуард Сонненбург но Эрнест Стивенс, Библия Эскерисьёслэн пичи гинэ пумиськоназы лыктӥзы.

Нош одӥг адями та пумиськонэ лыктӥз чылкак мукет ужпумен. Солэн Библия сярысь тросгес тодэмез уг поты вал. Берлогес судын со тазьы вераз: «Мон отчы лыктӥ прокурорлэн косэмезъя. Мыным шедьтоно вал мае ке, мар понна соосыз янгыше уськытыны луысал». Со шедьтӥз, мае утчаз,— «Ватӥськыса улӥсь зэмлык быдэсмиз» книгаез. Кӧня ке нунал ортчыса, Мартин сузэрез, Хамм, Сонненбург но Стивенс агайёсты арестовать каризы. Соосты янгыше уськытӥзы, соос вӧлмытыны лэзьымтэ книгаез вӧлмыто но озьы Шпионаж сярысь катэз тӥяло шуыса.

Эмма но куинь вын-агайёс сярысь ужпум кутӥзы, соос янгыш луо но соосты куинь арлы пытсэтэ пуктоно шуыса. Та сузэр но вын-агайёс трос пол судэ вазиськылӥзы, соосты шонере мед поттозы шуыса, но номыр ӧз юртты. 1920-тӥ арын 17-тӥ куартолэзе соосты пытсэтэ пуктӥзы. Но ӝоген югдур умой пала воштӥськиз.

1920-тӥ арын 20-тӥ инвожое Рутерфорд агай вераз та учыр сярысь Сан-Франциско карын ортчись конгрессын. Конгрессэ лыктэмъёс туж паймизы, кыӵе ужпум кутэмын вал судын та христианъёс пумысен, но США-лэн азьмуртэзлы телеграмма ыстӥзы. Соос гожтӥзы: «Ми оскиськомы, миссис Мартин шонертэм янгыше уськытэмын, Шпионаж сярысь катэз тӥяз шуыса». Озьы ик вын-агайёс гожтӥзы, кивалтӥсьёслэн правозы ӧй вал шуыса Мартин сузэрез пӧяса янгыше уськытыны но пытсэтэ пуктыны.

Мукет нуналаз ик Вудро Вильсон, США-лэн азьмуртэз, Мартин сузэрез, Хамм, Сонненбург но Стивенс агайёсты шонере поттӥз. Собере соосты пытсэтысь мозмытӥзы.

1920-тӥ арлэн пумаз Библиез Эскерисьёслэн шумпотон понна мугъёссы трос вал. Валтӥсь кивалтонниын уж тросгес но тросгес луиз. Библиез Эскерисьёс эшшо но ӟырдыт мылкыдын тодытӥзы, Инмарлэн Эксэйлыкез гинэ вань шуг-секытъёсты сэрттоз-пертчоз шуыса (Матф. 24:14). Нош 1921-тӥ арын Эксэйлык сярысь зэмлык эшшо но паськытгес вӧлмыны кулэ вал.