1, 2. Маин пӧртэм вал Ахав но Манассия но кыӵе юанъёсты ми али эскеромы?

 ТРОС дауръёс талэсь азьло кивалтӥзы кык эксэйёс: одӥгез кивалтӥз Израиль эксэйлыкен, нош мукетыз — Иуда эксэйлыкен. Соос пӧртэм дыре улӥзы, нош соослэн трос огкадез вал. Соос кыксы ик Иеговалы пумит мынӥзы но солэсь калыксэ сьӧлыке кыскизы. Кыксы ик йыбыртъязы сульдэръёслы-идолъёслы но трос адямиосты виылӥзы. Озьы ке но соос вискын одӥг пӧртэмлыкез вал: одӥгез кулытозяз йыружъёс лэсьтыса улӥз, нош мукетыз сьӧлыкъёсыз понна ӧпкелиз но простить каремын вал. Кинъёс сярысь вераськон мынэ?

² Ахав вал Израильлэн эксэез, нош Манассия — Иудалэн эксэез. Куке ми тодомы, маин пӧртэм вал та кык пиосмуртъёслэн асьсэды воземзы, соку умойгес валаломы одӥг кулэ луись темаез — ӧпкелёнэз (Ап. уж. 17:30; Рим. 3:23). Мар со сыӵе ӧпкелён? Кызьы сое возьматоно? Милемлы кулэ тае валаны, малы ке шуоно милям потэ, Иегова милесьтым сьӧлыкъёсмес простить мед кароз шуыса. Та юанъёслы валэктонъёс шедьтон понна, ми малпаськомы Ахавлэн но Манассиялэн улонзы сярысь но адӟомы, малы ми дышетскыны быгатомы. Собере ми эскеромы, мар вераське ӧпкелён сярысь Иисуслэн одӥг мадёназ.

3. Кыӵе эксэй вал Ахав?

³ Ахав сизьыметӥез эксэй вал дас выжыослэн Израиль шуыса нимаськись эксэйлыказы. Со кышно басьтӥз Иезавелез, Сӥдон карысь эксэйлэсь нылзэ. Узыр Сӥдон кар интыяськемын вал уйпалан. Соослэн кузпалъяськемзы Израилез  узыргес кариз, вылды, нош израиль калыкез Иеговалэсь эшшо но кыдёке палэнтӥз. Иезавель йыбыртъяз Вааллы. Ахав пыр со израиль калыкез та юрӟым йыбыртъянэ кыскиз. Соос кутскизы храмын азон-калгонэн вырыны но пиналъёсты курбонлы сётылӥзы. Иезавель кивалтыку, Иеговалэн одӥг пророкез но кышкатэк улыны ӧз быгаты. Троссэ соос пӧлысь Иезавель виылӥз (3 Экс. 18:13). Ахав но «Кузё-Инмарлэн син азяз солэсь азьвыл луэм эксэйёслэсь ваньзылэсь тросгес урод ужъёс лэсьтыса улӥз» (3 Экс. 16:30). Тае Иеговалэсь ватыны уг луы вал: Инмар умой тодӥз, кыӵе ужъёсын выризы Ахав но Иезавель. Озьы ке но Иегова гажан-жалянзэ возьматылӥз соослы но, вань израиль калыклы но. Илия пророк пыр со соослэсь мылкыдзэс ӝутылӥз кырсь ужъёссэс кельтыны но со пала кариськыны. Нош Ахав но Иезавель Инмарлэсь кылъёссэ кылэм но ӧз каре.

4. Кыӵе приговор ялӥз Иегова Ахавлы но кызьы со ассэ возиз?

⁴ Озьы ке но Иегова ужпум кутӥз, тае уз ни чида шуыса. Ахав но Иезавель доры со Илия пророкез ыстӥз. Со соослы таӵе приговорез ялыны кулэ вал: быдэс семьязы быдтэмын луоз. Та кылъёс Ахавлэсь сюлэмзэ пуртэн бышкалтэм кадь вӧсь каризы. Паймоно кадь, но та вылтӥяськись эксэй «зӥбыт-востэм луиз» (3 Экс. 21:19—29).

5, 6. Малы вераны луоз, Ахав вань сюлмысьтыз ӧз ӧпкельы шуыса?

⁵ Та учырын Ахав зӥбыт-востэм луиз ке но, солэн ужъёсыз возьматӥзы, со ӧз ӧпкельы шуыса. Тыршиз-а со аслаз эксэйлыказ Вааллы йыбыртъянэз быдтыны? Ӧз. Ӝутӥз-а со израиль калыклэсь мылкыдзэ Иеговалы йыбыртъяны? Нош ик ӧз. Ахав ӧз ӧпкельы шуыса, возьмато мукет учыръёс но.

⁶ Кӧня ке дыр ортчыса, Ахав Иудеялэн Иосафат эксэезлэсь юрттэт куриз, Сирияен ожмаськон понна. Иосафат Инмарлы оскымон эксэй вал, соин ик ожмаськыны мынон азяз со ӵектӥз Иеговалэн пророкезлэсь визь-кенеш курыны. Ахавлы та малпан ӧз кельшы. Со вераз: «Вань на эшшо одӥг адями, кин пыр Кузё-Инмарлэсь юаны луоно на, но мон сое уг яратӥськы, уго со мынам азьпалы сярысь ӟечсэ уг вера, уродзэ гинэ вера». Озьы ке но эксэйёс Михей пророкез ӧтизы. Валамон ини, Ахав сярысь со номыр умойзэ ӧз вера. Ӧпкелем но Иеговаез сьӧлыкъёссэ куштыны сюлворыса курем интые, лек Ахав пророкез пытсэтэ куштӥз (3 Экс. 22:7—9, 23, 27). Зэм, солэн пӧрмиз эриктэк кельтыны Иеговалэсь пророксэ, нош со люкетыны ӧз быгаты Инмарлэн азьпалзэ ивортонэзлы быдэсмыны. Со ожмаськонын Ахавез виизы (3 Экс. 22:34—38).

7. Мар вераз Иегова Ахав сярысь солэн кулэмез бере?

⁷ Ахав кулэм бере валамон луиз, мар малпаз Иегова со сярысь. Куке Иосафат «каньылэн дораз Иерусалиме берытскиз», Иегова со доры Ииуй пророкез ыстӥз Ахавен эшъяськемез понна судъяны. Пророк вераз: «Кулэ вал-а тыныд сьӧлыклэсь кышкасьтэмлы юрттӥськыны, Кузё-Инмарез синазькыль карисьёсты яратыны?» (2 Пар. 19:1, 2). Малпаське: Ахав вань сюлмысьтыз ӧпкельысал ке, нимасал-а сое пророк сьӧлыклэсь кышкасьтэм адямиен, кудӥз Иеговаез синазькыль каре? Адӟиське, Ахав аслаз лек ужъёсыз сярысь жаляз ке но, со ӧз ӧпкельы.

8. Мае ми тодӥськомы ӧпкелён сярысь Ахавлэн учырысьтыз?

⁸ Малы дышетэ милемыз Ахавлэн учырез? Куке Ахав кылӥз, семьяезлы приговор ялэмын шуыса, со зӥбыт-востэм луиз. Та шонер вал. Отысь, кызьы Ахав берлогес ассэ возиз, адӟиськиз, со вань сюлмысьтыз ӧз ӧпкельы шуыса. Озьыен, ӧпкелён понна тырмыт ӧвӧл урод ужъёс сярысь жаляса вераны гинэ. Нош табере эскеромы мукет учырез, кудӥз возьматоз, мар со сыӵе зэмос ӧпкелён.

9. Кыӵе кивалтӥсь вал Манассия?

⁹ Ог 200 ар ортчыса, Иуда эксэйлыкен Манассия кивалтыны кутскиз. Вераны луоз, со Ахавлэсь но тросгес йыружъёс лэсьтӥз. Ми лыдӟиськомы: «Кузё-Инмарлэн азяз со трос ярантэм ужъёс лэсьтӥз» (2 Пар. 33:1—9). Манассия зэмос луисьтэм инмаръёслы курбон-сётон ӝӧкъёс пуктылӥз, озьы ик Иеговалэн святой храмаз емыш сётӥсь инмарлэсь сульдэрзэ пуктӥз. Со «тунаськиз, пелляськиз, кулэм муртъёсты ӧтисьёсты, син пӧртмасьёсты котыраз люказ». Со сяна, со «туж трос янгыштэм вирез кисьтӥз». Манассия трос адямиосты виылӥз, озьы ик «ас пиоссэ тыл вамен поттӥз», зэмос луисьтэм инмаръёслы курбонлы сётон понна (4 Экс. 21:6, 7, 10, 11, 16).

10. Кызьы Иегова Манассияез кыл кутытӥз но кызьы эксэй ассэ возиз?

¹⁰ Иегова Манассия доры трос пол пророкъёссэ ыстылӥз, сое алон понна, нош со, Ахав сямен ик, пумит луиз соосты кылзыны. Соин ик «Кузё-Инмар соос вылэ [Иуда вылэ] Ассириялэн эксэезлэсь ожен кивалтӥсьёссэ лэзиз, соос лыктӥзы но Манассияез сьӧлтазы, жильыосын думылӥзы но Вавилонэ нуизы». Но тани, вордӥськем музъемезлэсь палэнын, пытсэтын пукыкуз, Манассия туж зол малпаськыны кутскиз аслаз улонэз сярысь. Со «атайёсызлэн Инмарзы азьын туж зӥбыт-востэм кариськиз». Со сяна, Манассия «Солы вӧсяськиз», трос пол вӧсяськиз, вылды. Сыӵе кышкыт адями воштӥськыны кутскиз. Со Иегова шоры аслаз Инмарез шоры кадь учкыны кутскиз но солэн соин эшъяськемез потӥз (2 Пар. 33:10—13).

11. Кызьы 2 Паралипоменонысь 33:15, 16 кылъёс возьмато, Манассия вань сюлмысьтыз ӧпкелиз шуыса?

¹¹ Иегова Манассиялэн сюлворыса вазиськемезлы ответ сётӥз, малы ке шуоно солэн вӧсяськонысьтыз адӟиськиз, со мукет адями луиз шуыса. Манассия вань сюлмысьтыз вӧсяськемез бере Иегова сое выльысь эксэй кариз. Со, мар Манассия берлогес кариз, возьматӥз, со вань сюлмысьтыз ӧпкелиз шуыса. Та кылъёсысьтыз гинэ ӧз адӟиськы: Ахавлэн учыраз кадь, Манассия ассэ мукет сямен возьыны кутскиз. Со ӟырдыт мылкыдын Иудеяысь зэмос луисьтэм инмаръёслы йыбыртъянэз быдтӥз но иудей калыклэсь мылкыдзэ ӝутӥз Иеговалы гинэ йыбыртъяны. (Лыдӟе 2 Паралипоменонэз 33:15, 16.) Зэм но, со понна юн оскон но кышкасьтэм сям кулэ вал, малы ке шуоно трос дасо аръёс талэсь азьло Манассия ӵыжы-выжыоссэ, ляльчиоссэ но мукет иудей калыкез Иеговалэсь палэнтӥз. Нош арлыдо луыса, Манассия югдурез тупатыны тыршиз, кудӥз понна со ачиз ик янгыш вал. Озьы ик со умой адӟем карон возьматӥз, вылды, Аммон пиезлэн пичи пиезлы, Иосиялы, кудӥз берлогес туж умой эксэй луиз (4 Экс. 22:1, 2).

12. Мае ми тодӥськомы ӧпкелён сярысь Манассиялэн учырысьтыз?

¹² Малы дышетэ милемыз Манассиялэн  учырез? Ахав сямен ик, со зӥбыт-востэм луиз. Озьы ик со эшшо маке кариз на: со вӧсяськиз но сюлворыса куриз Иеговаез, солы гажан-жалянзэ мед возьматоз шуыса. Манассия быдэсак воштӥськиз но урод ужъёсызлэсь бервылъёссэ вань кужмысьтыз тупатыны тыршиз. Со ачиз гинэ Иеговалы вань сюлмысьтыз ӧз йыбыртъя, нош со мукетъёсызлэсь но озьы лэсьтыны мылкыдзэс ӝутӥз. Манассия эксэйлэн учырез секыт сьӧлык лэсьтэм адямиослы оскон сётэ, соос простить каремын луозы шуыса. Та учыр умой возьматэ, Иегова Инмар «ӟечлыко, туж гажась, жалясь» шуыса (Пс. 85:5). Адями вань сюлмысьтыз ӧпкеле ке, Иегова сое одно ик простить кароз.

13. Вань-а пӧртэмлыкез жалян но ӧпкелён вискын? Вералэ пример.

¹³ Сьӧлыкъёсыз сярысь жалям сяна, Манассия тросгес лэсьтӥз. Та туж кулэ луись малпан. Пуктэ син азяды таӵе учырез: тӥ лыктӥды вузкаронние нянь басьтыны, нош нянь интые вузкарись тӥледлы пызь сётэ. Та тӥледлы ярасал-а? Ӧз, дыр. Нош вузкарись вераз ке, пызь нянь пӧлы пыре шуыса? Таиз но валэктон тӥледлы ӧз кельшысал, дыр. Озьы ик Иегова но возьма, сьӧлыкам адями ӧпкелёз шуыса. Со адями сьӧлыкъёсыз сярысь жаля ке, со умой. Нош, жалям сяна, ӧпкелён пӧлы маке но мукетыз пыре на. Мар эшшо пыре на ӧпкелён пӧлы, ми тодомы Иисуслэн одӥг мадёнысьтыз.

14. Мар возьматӥз, йыромем пи ӧпкельыны кутскиз шуыса?

¹⁴ Лукалэсь 15:11—32 гожтэмын йыромем пи сярысь сюлэмез бугыртӥсь учыр. Ваменэс пияш ужпум кутӥз, атаезлэн куронъёсызъя уз ни улы шуыса. Со пияш атай юртсэ кельтӥз, «кыдёкысь шаере» кошкиз но отын шулдыръяськыса но азыса-калгыса улӥз. Куке секыт дыръёс вуизы, со мур малпаськыны кутскиз аслаз улонэз сярысь. Со валаз, макем умойгес вал атай юртаз улыны. Иисуслэн кылъёсызъя, та пияш валатскиз, шонертэм лэсьтӥз шуыса. Со ужпум кутӥз дораз берытскыны но атайзэ курыны, сое простить мед кароз шуыса. Куке пияш валаз, шонертэм ужъёс лэсьтӥз шуыса, соку со ӧпкельыны кутскиз. Нош азьланяз солы эшшо мар ке кароно на вал.

15. Кызьы Иисуслэн мадёнысьтыз пияш возьматӥз, зэмзэ ик ӧпкеле шуыса?

¹⁵ Пияш зэмзэ ик ӧпкеле шуыса, адӟиськиз солэн ужъёсысьтыз. Дораз берытскон понна, со кузь сюресэз ортчиз. Атайзэ адӟыса, со вераз: «Инлы но, тон азьын но мон сьӧлыкай, тынад пиед шуыса лыдӟиськыны но мон уг яраськы ни» (Лука 15:21). Пияшлэн сыӵе сюлмысь верам кылъёсыз возьматӥзы, солэн Иеговаен выльысь эшъяськемез потэ шуыса. Нош эшшо со валаз, макем вӧсь кариз атаезлэсь сюлэмзэ. Атаеныз кусыпъёссэ выльысь тупатон понна, со дась вал секыт ужъёсты  быдэсъяны, атаезлэн медоез но луыны! (Лука 15:19). Та мадён сюлэмез бугыртэм сяна, тӧроослы возетъёс сётэ, кудъёссэ соос лыдэ басьтыны кулэ. Та возетъёс соослы валаны юрттозы, зэм ик-а ӧпкеле христиан мурт, кудӥз секыт сьӧлык лэсьтӥз?

16. Малы тӧроослы котьку ик капчи ӧвӧл валаны, адями зэм ик ӧпкеле-а шуыса?

¹⁶ Куддыръя секыт валаны, зэм ик-а ӧпкеле сьӧлыкам адями, малы ке шуоно тӧроос адямилэсь сюлэмзэ адӟыны уг быгато. Соин ик адямилэсь ужъёссэ лыдэ басьтыса, соослы валаны кулэ, адӟемпотостэм каре-а та адями сьӧлыко ужъёссэ. Нош куддыръя христиан мурт сокем секыт сьӧлык лэсьтэ, тӧроос уг но оско, со сюлмысь ӧпкеле шуыса.

17. а) Кыӵе учыр возьматэ, сьӧлыкась адямилэн ӝоже усемез котьку ик сюлмысь ӧпкелемез сярысь уг вера шуыса? б) 2 Коринфъёслы 7:11 лыдэ басьтыса, мар карыны кулэ адями, кудӥз зэмзэ ик ӧпкеле?

¹⁷ Эскеромы таӵе учырез. Агай трос аръёс ӵоже кышноезлэсь палэнын мукет кышномуртэн кӧла. Юрттэт курем интые, со аслэсьтыз ужъёссэ ватыса улэ кышноезлэсь, эшъёсызлэсь но тӧроослэсь. Нош дыр ортчыса, солэн сьӧлыкъёсыз шарае пото. Собере соин правовой комитет пумиське. Агай вера, кышноезлэсь палэнын мукет кышномуртэн кӧлаз шуыса. Адӟиське, со та сярысь туж жаляз шуыса. Нош адямилэн сьӧлыкаменыз сэрен ӝоже усемез гинэ тырмыт ӧвӧл, малы ке шуоно адями малпаськытэк одӥг пол гинэ ӧз сьӧлыка, нош трос аръёс ӵоже сьӧлыкаса улӥз. Та агай ас мылкыд каремезъя сьӧлыкъёсыз сярысь ӧз вера, со сярысь тодмо луиз. Тӧроослы валаны кулэ, та адями зэмзэ ик сьӧлыкъёссэ адӟемпотостэм каре шуыса, озьы ик аслэсьтыз малпаськон амалзэ но улонзэ воштӥз шуыса. (Лыдӟе 2 Коринфъёслы 7:11.) Таӵе воштӥськонъёс лэсьтон понна, трос дыр кулэ. Оло нош, та адямиез христиан кенешысь но поттоно луоз. Со берытскыны быгатоз соку гинэ, куке ужъёсыныз возьматоз, зэмзэ ик ӧпкеле шуыса (1 Кор. 5:11—13; 6:9, 10).

18. Мар возьматэ, кенешысь поттэм адями зэмзэ ик ӧпкеле шуыса, но малы со юн оскыны быгатэ?

¹⁸ Мар возьматоз, адями зэмзэ ик ӧпкеле шуыса? Кенешысь поттэм адямилы ялан кенешлэн пумиськонъёсаз ветлоно, вӧсяськоно но Библиез эскероно. Та сярысь солы одно ик вералозы тӧроос. Озьы ик солы туж тыршоно палэнскыны югдуръёслэсь, кудъёсыз сое выльысь сьӧлыке кыскыны быгатозы. Инмарен кусыпъёссэ тупатон понна, сьӧлыкам адями тыршыны кулэ лэсьтыны ваньзэ, мае быгатэ. Соку со юн оскыны быгатэ: Иегова сое быдэсак простить кароз но тӧроос сое кенеше пыртозы. Зэм но, сьӧлыкам адямиослэн учыръёссы огкадесь ӧвӧл. Соин ик, котькуд нимысьтыз учырез эскерыкузы, тӧроос пыр-поч эскеро вань югдуръёсты но укыр чурытэсь куронъёс уг пукто солы, кинлэн кенеше берытскемез потэ.

19. Мае возьматэ зэмос ӧпкелён? (Иезекииль 33:14—16).

 ¹⁹ Йылпумъян лэсьтомы. Зэмос ӧпкелён уг возьматы, лэсьтэм сьӧлык понна простить карыны куремез гинэ. Сьӧлыкам адями йыраз но сюлмаз воштӥськонъёс лэсьтыны кулэ. Солы сьӧлыко улонзэ кельтоно но улыны кутсконо озьы, кызьы куре Иегова. (Лыдӟе Иезекиильлэсь 33:14—16.) Сыӵе адямилэн Инмарен кусыпъёсыз туж сӧриськизы бере, соин ик солы туж тыршоно Инмарен кусыпъёссэ тупатыны.

20, 21. Кызьы ми юрттыны быгатомы адямилы, кудӥз секыт сьӧлыказ?

²⁰ Иисуслэн верамезъя, ужан-тыршонэзлэн одӥгез валтӥсь мугез — «сьӧлыкоосты ӧпкельыса сьӧлыкъёссылэсь куштӥськонэ ӧтьыны» (Лука 5:32). Милемлы но озьы ик лэсьтыны тыршоно. Шуом, тӥ тодӥды, матысь эшты секыт сьӧлыказ шуыса. Мар тӥ кароды?

²¹ Эштылэсь сьӧлыксэ ватыны тыршыса, тӥ солы ик урод лэсьтоды. Сьӧлыкез ватыны но уз пӧрмы, малы ке шуоно Иегова ваньзэ адӟе (Мад. 5:21, 22; 28:13). Эштылы юрттыны быгатоды соку, куке солэсь мылкыдзэ ӝутоды вазиськыны тӧроослы, кудъёсыз ми сярысь сюлмасько. Солэн сьӧлыкез сярысь тӧроослы верамез ӧз поты ке, тӥледлы асьтэлы со сярысь верано луоз. Озьы тӥ возьматоды, зэмос эш луиськоды шуыса, малы ке шуоно эштылэн Иеговаен кусыпъёсыз сӧриськыны быгато.

22. Мае ми эскеромы вуоно статьяын?

²² Нош мар кароно, куке христиан мурт кема дыр ӵоже секыт сьӧлыкаса улӥз но тӧроос ужпум кутӥзы сое христиан кенешысь поттыны? Возьматэ-а со, вын-агайёс гажан-жалянзэс ӧз возьматэ шуыса? Та юанэз сэрттыны-пертчыны милемлы вуоно статья юрттоз. Отын ми вераськомы, кызьы Иегова гажан-жалянзэ возьматэ, куке сьӧлыкам муртэ кыл кутытэ. Озьы ик тодомы, малы ми солэсь дышетскыны быгатомы.