Сётэм ужез быдэстон понна, Библиез эскерисьёслы кышкасьтэм луоно вал, малы ке шуоно, зӥбыт-востэм адямиослы «ӟеч ивор» верам сяна, озьы ик кулэ вал лек адямиослы но «Инмармылэсь пунэм берыктон нуналзэ тодытыны».

Канадаысь Джон Хоскин агай кышкасьтэм тодытӥсь вал. Одӥг пол 1921-тӥ арын, тулыс, со методистской черклэсь тодытӥсьсэ пумитаз. Джон солы ӵектӥз: «Ойдолэ лякытэн вераськомы Библия сярысь. Кыӵе ке юанъёсын ми пӧртэм сямен малпамы ке, ми быгатомы вераськонмес лякытэн йылпумъяны». Нош со озьы ӧз луы! Хоскин агай тодаз вае: «Кӧня ке минут гинэ ортчиз, со тодытӥсь, вожез потыса, сокем зол ӧссэ пытсаз, мон малпай, ӧс бордысь пиялаез ик пырдыса усьылоз шуыса».

«Мын ай тон язычникъёс доры но тае соослы вера!» — кеськиз со пиосмурт. Джон солы пумит номыр ӧз вера, но ас понназ малпаз: «Мон ӵапак али соос пӧлысь одӥгеныз вераськи!»

Ӵуказеяз но со черкын ужась ӧз буйгатскы. Кызьы тодаз вае Хоскин агай, со тодытӥсь, проповедь лыдӟыкуз, аслаз кылзӥсьёсызлы вераз, соослэн каразы Джон тужгес но кышкыт пӧяськись но сое виыны кулэ шуыса. Озьы ке но агаймы ӧз кышка: со тодытон ужзэ азьланьтӥз но, сое трос адямиос кылзӥзы. Джон вера: «Та вал туж умой дыр! Ужан-тыршонын куд-огъёсыз мыным веразы: „Тонэ ачиз Инмар лэзиз!” — но ӵектӥзы юрттэт, нокыӵе кулэяськонъёсы медаз луэ шуыса».

Зэмлыкен тунсыкъяськись адямиослы Инмарен кусыпъёссэс юнматыны юрттон понна, Библиез Эскерисьёс «Зарни даур» a журналын печатлазы пӧртэм дышетон программаос. Кылсярысь, анай-атайёслы юрттон понна, печатласькиз «Библиез егит эскерисьёс» рубрика. Атайёс но анайёс пиналъёссылы отысь юанъёс сётъязы, нош собере соослы Библиысь валэктонъёс шедьтыны юрттӥзы. Куд-ог юанъёс огшорыесь вал, кылсярысь: «Кӧня Библиын книгаез?» Нош мукет юанъёс юрттӥзы егитъёслы кышкасьтэм тодытӥсьёс луыны. Кылсярысь, таӵе юан: «Котькудӥз-а зэмос христиан мурт уйылон-уллянъёсын пумиськоз?»

Озьы ик печатласькиз «Инмарлэсь дауръёслы малпанзэ мургес эскерон» рубрика. Отын  сётъяськизы юанъёс соослы, кинъёс Библиез мургес тодо вал ини. Валэктонъёссэ шедьтыны луэ «Гожтэмъёсты эскеронъёс» книгалэн нырысетӥ томысьтыз. Кыкез ик та рубрикаос пайда вайизы трос сюрс лыдӟисьёслы. Нош 1921-тӥ арын 21-тӥ толсур понна поттэм «Зарни даур» журналын гожтэмын вал ялон, та рубрикаос уз ни печатлаське шуыса. Нош малы?

Агайёс, кудъёсыз ас вылазы кивалтэт басьто вал, валазы, зэмлыкен тунсыкъяськись адямиосын Библиез дышетон понна, кыӵе ке радлык кулэ шуыса. Соин ик 1921-тӥ арын шуркынмон толэзе поттэмын вал «Инмарлэн арфаез» книга. Адями сое басьтыны соглаш луэ ке, сое гожто вал Библиез дышетонъя курсэ, кудзэ со ас понназ ортчыны быгатӥз. Та курс лыдӟисьёслы юрттӥз тросгес тодыны Инмарлэн малпанэз сярысь адямиослы пырак улон сётыны. Кызьы ортчиз та дышетон?

Та книгаен ӵош адямилы сёто вал карточкаез, кудаз гожтэмын, кыӵе бамъёсты лыдӟыны кулэ. Арня ортчыса, со адями почта пыр басьтэ вал мукет карточкаез, кудаз лыдӟем люкетлы юанъёс сётэмын вал. Нош карточкалэн пумаз гожтэмын луэ вал, кыӵе бамъёсты лыдӟоно мукет арнялы.

Та курс кыстӥськиз 12 арня ӵоже. Котькуд арняе дышетскисьлы лэзё вал ужъёсын выль карточкаез, кудзэ солы келяз со интыысь Библиез эскерисьёслэн кружоксы (соку озьы нимаськизы кенешъёс). Ӵем дыръя та ужез сёто вал арлыдо вын-агайёслы но сузэр-апайёслы яке соослы, кинъёс ляб тазалыксы сэрен коркась-корка ветлыса тодытыны ӧз быгатэ. Кылсярысь, тани мар вера Анна Гарднер сузэр, кудӥз улэ вал Милвейлын (Пенсильвания штат): «Мынам Тейл сузэре сӧсыр вал, нош „Инмарлэн арфаез” книгалы луыса со быгатӥз тросгес ужаны-тыршыны. Со ыстылӥз дышетскисьёслы юанъёсын карточкаосты». Курс йылпумъяськем бере кружокысь кин ке но лыктэ вал адями доры, солы Библиез эшшо но умойгес валаны юрттон понна.

1921-тӥ арлэн пумаз Джозеф Рутерфорд агай Библиез Эскерисьёслэн вань кружокъёссылы гожтэт ыстӥз. Отын верамын вал: «Азьло аръёсын ӵошатыса, та арын Эксэйлык сярысь ивор эшшо но золгес верамын вал. Со эшшо но тросгес адямиослы юрттӥз». Рутерфорд агай вын-агайёслэсь но сузэр-апайёслэсь мылкыдзэс ӝутӥз азьланяз но тыршыны: «Милям ужмы трос на. Мукетъёслэсь но мылкыдзэс ӝутэ милемын ӵош пыриськыны уже, кудзэ Инмар бакель каре». Кызьы возьматӥз дыр, Библиез Эскерисьёс солэн кылъёсызлэсь кылзӥськизы. 1922-тӥ арын соос эшшо но ӟырдыт мылкыдын но кышкатэк веразы Эксэйлык сярысь иворез.