1. Малы тросэз адямиос йыромемын?

 ТРОС сюрс религиосысь адямиос, кудъёсыз асьсэды христианъёс шуыса нимало, верало, соос гинэ Инмарлы шонер йыбыртъяло шуыса. Соин ик тросэзлэн юанзы кылдэ: одӥг гинэ-а зэмос религия яке вань религиос Инмарлы ярамон луо? Паймонэз ӧвӧл: адямиос йыромемын! Нош оскиськомы-а ми, Иеговалэн Адӟись-Ивортӥсьёсыз зэмлыклы дышето но соослэн йыбыртъянзы Инмарлы ярамон луэ шуыса? Милям осконмы юнме ӧвӧл-а? Ойдолэ та юанъёсты эскеромы.

2. Малы Павел юн оскиз, зэмлыкез шедьтӥз шуыса? (1 Фессалоникаослы 1:5).

² Апостол Павел юн оскиз, зэмлыкез шедьтӥз шуыса. (Лыдӟе 1 Фессалоникаослы 1:5.) Со ас мылпотэмезъя гинэ ӧз оскы, нош пыр-поч эскериз «быдэс Священной Гожтэмез» но валаз, со «Инмарлэн Духеныз вордскытэмын» шуыса (2 Тим. 3:16). Мае тодӥз Павел та эскеронъёслы луыса? Священной Гожтэмысь со шедьтӥз оскытыса веранъёсты, Иисус — со Мессия шуыса, кудӥз сярысь азьло ик верамын вал. Нош со дыре Иудеяысь религиозной кивалтӥсьёс талы ӧз оске. Та чеберъяськись кивалтӥсьёс адямиосты Инмар сярысь дышетӥзы, нош асьсэос ужъёсынызы возьматӥзы, Инмарез адӟемпотостэм каро шуыса (Тит. 1:16). Павел чылкак мукет сямен учкиз Инмарлэн Кылыз шоры. Со ӧз бырйы, кыӵе дышетонлы со оскоз, нош кудъёссэ палэнтоз. Со «номыре ватытэк Инмарлэсь вань эриксэ» тодытӥз (Ап. уж. 20:27).

3. Быгатӥськомы-а ми юн оскыны, зэмлыкез шедьтӥмы шуыса, вань юанъёсмылы валэктонъёс ӧм шедьтэ ке но? (Озьы ик учке « Адямиос уз быгатэ „Инмарлэсь кутсконысеныз пумозяз лэсьтэм ужъёссэ тодыны-валаны“» рамкаез.)

 ³ Куд-огъёсыз малпало, зэмос религия валэктонъёс сётыны кулэ вань юанъёссылы, Библиын соослы нимысьтыз валэктонъёс ӧвӧл ке но. Нош шонер-а тазьы малпаны? Апостол Павел милемлы умой адӟем карон кельтӥз. Со вын-агайёслэсь но сузэр-апайёслэсь мылкыдзэс ӝутӥз: «Ваньзэ чаклалэ-эскере» (1 Фес. 5:21). Нош со дыре ик со валаз, ваньзэ уг тоды шуыса. Со вераз: «Уго милям тодонъёсмы тырмыт ӧвӧл». Озьы ик со ватсаз: «Та дуннеын ваньзэ пеймыт пияла пыртӥ, уй вӧтын кадь адӟиськомы» (1 Кор. 13:9, 12). Зэм, Павел ваньзэ ӧз вала, ми но али ваньзэ ум валаське. Нош со умой тодӥз Иегова сярысь валтӥсь зэмлыкъёсты. Зэмлыкын юн сылон понна, та солы тырмыт вал.

4. Кызьы ми валаны быгатомы, зэмлыкез шедьтӥмы шуыса, но мае ми тодомы та статьяысь зэмос христианъёс сярысь?

⁴ Ми зэмлыкез шедьтӥмы шуыса валан понна, ойдолэ ӵошатомы, кызьы Инмарлы йыбыртъяз Иисус Христос но кызьы йыбыртъяло Иеговалэн Адӟись-Ивортӥсьёсыз туннэ. Та статья возьматоз, зэмос христианъёс: 1) сульдэръёслы-идолъёслы уг йыбыртъяло, 2) Инмарлэсь Иегова нимзэ гажало, 3) зэмлыкез ярато но 4) ог-огзэс сюлмысь ярато шуыса.

5. Мае ми тодӥськомы Иисуслэсь шонер йыбырттон сярысь но мар карыны кулэ солэн дышетскисьёсыз?

⁵ Иисус туж зол яратэ Иеговаез, соин ик со йыбыртъя солы гинэ (Лука 4:8). Со озьы вал инмын улыкуз но, музъем вылын улыкуз но. Аслэсьтыз дышетскисьёссэ но со дышетӥз  Иеговалы гинэ йыбыртъяны. Инмарлы йыбыртъякузы, Иисус ачиз но, солэн оскымон дышетскисьёсыз но ноку сульдэръёсты-идолъёсты уже ӧз кутэ. Инмарез адӟыны уг луы, соин ик адямиен лэсьтэм нокыӵе арбериос соин уз ӵошатӥське! (Ис. 46:5). Нош яра-а святойёслы йыбыртъяны но соослы вӧсяськыны? Дас курон-косонъёс пӧлысь кыкетӥяз Иегова вераз: «Аслыд сульдэр-идол эн лэсьты; мар вань вылӥын — инмын, мар вань улӥын — музъем вылын... соослы эн йыбыртъя, соослы ужаса-тыршыса эн улы» (Пот. 20:4, 5). Соос, кинъёслэн потэ Инмарлы ярамон луэмзы, та кылъёсты умой валало.

6. Кинлэсь адӟем каро Иеговалэн Адӟись-Ивортӥсьёсыз со пумысен, кызьы Инмарлы йыбыртъяно?

⁶ История удысысь тодосчиос верало, нырысетӥ даурысь христианъёс Инмарлы гинэ йыбыртъязы шуыса. Кызьы гожтэмын христиан черклэн историезъя одӥг ужын, нырысетӥ христианъёслы малпаны гинэ но юрӟым вал йыбыртъян интыосазы сульдэръёсты-идолъёсты пуктыны (History of the Christian Church). Асьме нуналъёсы Иеговалэн Адӟись-Ивортӥсьёсызлэн сыӵе ик учконъёссы. Ми ум вӧсяськиське святойёслы но, кылчинъёслы но, озьы ик Иисус Христослы но. Озьы ик ми асьмелэсь шаермес ваньмызлэсь умоен ум лыдъяське но кунлэсь пусъёссэ ум данъяське. Мар гинэ милемын медаз луы, ми улӥськомы Иисуслэн кылъёсызъя: «Инмаредлы Кузё-Инмарлы йыбыртъя» (Матф. 4:10)

7. Маин Иеговалэн Адӟись-Ивортӥсьёсыз туж пӧртэм луо мукет религиослэсь?

⁷ Туннэ пӧртэм черкъёсысь пасторъёсты туж нимо-дано адямиосын лыдъяло. Адямиос соосты туж паймыса кылзо, куддыръя соослы йыбыртъяны но дась. Туж трос адямиос черкъёсы ветло, отысь книгаоссэс басьтыло но трос коньдонзэс отчы кельто. Черке ветлӥсьёс пасторъёслэн котькуд верам кылзылы оско но, соосты адӟыса, туж зол шумпото. Ачиз Иисус Христос но лыктысал ке, соос сыӵе шумпотонзэс ӧз возьматысалзы, дыр! Нош соос, кинъёс Инмарлы шонер йыбыртъяло, одӥг адямиез но нимысьтыз уг данъяло. Ми гажаськомы ке но соосты, кинъёс милемын валто, Иисус аслаз дышетскисьёсызлы валамон вераз: «Тӥ ваньды — агай-вынъёс» (Матф. 23:8—10). Соин ик ми нокыӵе адями сьӧры ум мынӥське, озьы ик религия яке политика удысысь азьветлӥсьёс сьӧры но. Политика удысын ми нокин пала кариськытэк улӥськомы, озьы ик та дуннелэн ужъёсаз ум пыриськиське. Таин ми пӧртэм луиськомы та дуннеысь мукет христиан религиослэсь (Иоанн 18:36).

8. Кытысь ми тодӥськомы: Иеговалэн потэ, солэсь нимзэ мед данъялозы но со сярысь мукет адямиослы мед вералозы шуыса?

⁸ Одӥг пол Иисус вӧсяськыкуз шуиз: «Атае! Аслэсьтыд нимдэ данъя». Вӧсяськемез бере инмысь Иеговалэн куараез кылӥськиз: «Данъяй ни, но эшшо но данъяло на» (Иоанн 12:28). Вань ужан-тыршонэз ӵоже Иисус Атаезлэсь нимзэ данъяз (Иоанн 17:26). Кыӵе йылпумъян лэсьтыны луэ? Зэмос христианъёслы но кулэ Инмарлы нимызъя вазиськыны, со сярысь мукетъёслы вераны но тае бадӟым данэн лыдъяны.

9. Кытысь адӟиськиз, нырысетӥ даурысь христианъёс Инмарлэсь нимзэ гажало вал шуыса?

⁹ Асьме вакытысь нырысетӥ дауре, христиан кенеш кылдэм берегес ик, Иегова «азьвыл ик язычникъёс пумысен сюлмаськиз, Аслэсьтыз нимзэ нуллӥсь калык кылдытон понна соос пӧлысь адямиосты люказ»  (Ап. уж. 15:14). Христианъёс, кудъёсыз со дыре улӥзы, данъяськизы, Инмарлэн нимыз сярысь мукетъёслы вераны быгато шуыса. Озьы ик соос Инмарлэсь нимзэ уже кутӥзы, книгаосты гожтыкузы, кудъёсыз берлогес Библие пыризы b. Озьы та христианъёс возьматӥзы: ӵапак соос луо со калык, кудӥз Инмарлэсь нимзэ нуллэ (Ап. уж. 2:14, 21).

10. Мар возьматэ: Иеговалэн Адӟись-Ивортӥсьёсыз — со калык, кудӥз Иеговалэсь нимзэ нуллэ?

¹⁰ Зэм-а, Иеговалэн Адӟись-Ивортӥсьёсыз — со калык, кудӥз Инмарлэсь нимзэ нуллэ? Ойдолэ та юанэз эскеромы. Туннэ тросэз священникъёс лэсьто ваньзэ, черке ветлӥсьёс Инмарлэсь нимзэ медаз тодэ шуыса. Соос сое асьсэлэн Библиысьтызы ӵушо, нош куд-ог учыръёсы Инмарлы йыбыртъян дыръя та нимез вераны но уг лэзё c. Дӥсьтоз-а кин ке пумит вераны, Иеговалэн Адӟись-Ивортӥсьёсыз гинэ Инмарлэсь Иегова нимзэ данъяло шуыса? Вань на-а кыӵе ке мукет религия, кудӥз Инмарлэсь нимзэ гажа но со сярысь мукетъёслы вера? Зэм, ми туж тыршиськомы Иеговалэсь нимзэ мукет адямиослы но вераны, соин ик ми Иеговалэн Адӟись-Ивортӥсьёсыз шуыса нимаськиськомы! (Ис. 43:10—12). Ми 240 миллионлэсь но тросгес Библилэсь «Выль дунне» берыктэмзэ печатламы, кудаз Иеговалэн нимыз  пуктэмын отчы, кытысь сое мукет берыктӥсьёс куштӥзы. Озьы ик ми 1000-лэсь но тросгес кылъёсын поттӥськомы Библия вылэ пыкиськыса гожтэм публикациосты, кудъёсаз Иегова ним кутӥське!

11. Кытысь адӟиськиз нырысетӥ даурысь христианъёслэн зэмлыкез яратэмзы?

¹¹ Иисус яратӥз Инмар сярысь но солэн эрикез сярысь зэмлыкез. Со улӥз та зэмлыкъя но со сярысь мукетъёсызлы вераз (Иоанн 18:37). Соос но, кинъёс Иисус сьӧры мынӥзы, зэмлыкез туж яратӥзы (Иоанн 4:23, 24). Апостол Пётр христиан осконэз «зэмлык сюрес» шуыса нимаз (2 Пётр 2:2). Зэмлыкез юн яратон нырысетӥ даурысь христианъёслэсь мылкыдзэс ӝутӥз куштӥськыны ваньмызлэсь, мар зэмлыклы пумит мынӥз. Кылсярысь, соос куштӥськизы Инмар сярысь шонертэм дышетонъёслэсь, калыксылэн сям-йылолъёссылэсь яке ас мылпотонъёссылэсь (Кол. 2:8). Озьы ик туннэ но зэмос христианъёс тыршо «зэмлык бордын» улыны (3 Иоанн 3, 4). Та возьматэ: соослэн осконзы Иеговалэн Кылыз вылэ пыкиське но соос Инмарлэн курон-косонъёсызъя уло.

12. Мар каре Кивалтӥсь кенеш, куке адӟе, кыӵе ке зэмлыклэсь валэктонзэ тупатоно шуыса, но малы?

¹² Инмарлэн ужась-тыршисьёсыз уг верало, соос валало шуыса ваньзэ, мар гожтэмын Библиын. Дырын-дырын Библиысь кыӵе ке дышетонэз соос шонертэм валэкто яке шонертэм ужпумъёс куто. Милемлы талы паймоно ӧвӧл. Библиын гожтэмъя, дыр ортчыса, Инмарлэн калыкез зэмлыкез умойгес но умойгес валалоз (Кол. 1:9, 10). Иегова зэмлыкез пумен-пумен усьтэ. Соин ик милемлы чидан кулэ, тыл югытгес но югытгес луытозь (Мад. 4:18). Куддыръя Кивалтӥсь кенеш вала, Библиысь кыӵе ке зэмлыкез шонертэм валэктэ шуыса. Соку со ӝегатскытэк выль сямен зэмлыкез валэктэ. Туннэ тросэз христиан черкъёс кыӵе ке дышетонъёсты вошто, малы ке шуоно соослэн потэ черказы ветлӥсьёслы ярамон луэмзы яке та дуннеын дано луэмзы. Нош Иеговалэн калыкез воштӥськонъёс лэсьтэ, Инмарлы ярамон луон понна но солы шонергес йыбыртъян понна, озьы, кызьы Иисус лэсьтӥз (Иак. 4:4). Соос уг тыршо та дуннелы яраны, нош тыршо Библиысь зэмлыкъёсты умойгес валаны. Зэм но, ми туж зол яратӥськомы зэмлыкез! (1 Фес. 2:3, 4).

13. Кыӵе сямынызы тодмо луо зэмос христианъёс но кызьы сое Иеговалэн Адӟись-Ивортӥсьёсыз возьмато?

¹³ Нырысетӥ даурысь христианъёс тодмо вал ог-огзэс яратэменызы. Иисус вераз: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:34, 35). Туннэ но быдэс дунне вылын Иеговалэсь Адӟись-Ивортӥсьёссэ ӵапак яратон огазея. Ми мукет религиослэсь пӧртэм луиськомы, малы ке шуоно ми одӥг семья кадь. Ми ум учкиське, кыӵе шаерысь луиськомы, кыӵе кылын вераськиськомы но кыӵе сям-йылолъёсмы. Пумиськонъёсамы но конгрессъёсамы тужгес но адӟиське, ми ог-огмес яратӥськомы шуыса. Та эшшо но зол оскытэ милемыз, Иеговалы милям йыбырттонмы ярамон луэ шуыса.

14. Кытысь адӟиське, ми ог-огмес сюлмысь яратӥськомы шуыса? (Колоссыослы 3:12—14).

¹⁴ Библия милесьтым мылкыдмес ӝутэ: «Огдэс огды сюлмысь яратыса улэ» (1 Пётр 4:8). Вын-агайёсмес но сузэр-апайёсмес яратэменымы, ми соосты простить кариськомы но соослэн тырмымтэоссылы саклыкмес ум висъяське. Со сяна, тыршиськомы кенешысь ваньмызлы шырыт сяммес возьматыны  но соосты куно карыны, озьы ик соосты но, кинъёс милемыз вӧсь каризы. (Лыдӟе Колоссыослы 3:12—14.) Яратон, кудӥз асьмелэсь вынлыкмес огазея, возьматэ, ми зэмос христианъёс луиськомы шуыса.

15. Мар эшшо возьматэ на, ми нырысетӥ даурысь христианъёс сямен Инмарлы йыбыртъяськомы шуыса?

¹⁵ Мар эшшо возьматэ на, ми нырысетӥ даурысь христианъёс сямен Инмарлы йыбыртъяськомы шуыса? Кылсярысь, милям кенешъёсамы сыӵе ик радлык, кудзэ апостолъёс пуктӥзы. Милям вань ёросэз чакласьёсмы, тӧроосмы, кенешлы юрттӥсьёсмы (Флп. 1:1; Тит 1:5). Азон-калгон, кузпалъяськон, вир но кенешез ӧпкелисьтэм сьӧлыкасьлэсь утён шоры ми учкиськомы озьы ик, кызьы нырысетӥ христианъёс учкизы (Ап. уж. 15:28, 29; 1 Кор. 5:11—13; 6:9, 10; Евр. 13:4).

16. Кыӵе валтӥсь зэмлык гожтэмын Ефесъёслы 4:4—6?

¹⁶ Кызьы шуиз Иисус, тросэз вералозы, соос солэн дышетскисьёсыз луо шуыса (Матф. 7:21—23). Нош зэмзэ вераса, соос зэмос дышетскисьёс уг луо. Библия озьы ик алэ, тросэз «вылтуссыя Инмарлы оскись кадесь луозы» шуыса (2 Тим. 3:1, 5). Озьы ик отын валамон верамын, «одӥг оскон» гинэ вань шуыса, кудӥз Инмарлы ярамон луэ. (Лыдӟе Ефесъёслы 4:4—6.)

17. Кин туннэ Иисус сьӧры мынэ но Инмарлы шонер йыбыртъя?

¹⁷ Кинъёс туннэ Инмарлы шонер йыбыртъяло? Кин туннэ Инмарлы йыбыртъя озьы ик, кызьы йыбыртъязы Иисус но нырысетӥ даурысь христианъёс? Та юанъёсты эскерыса, ми валамы, валэктонэз татын одӥг гинэ шуыса: со Иеговалэн Адӟись-Ивортӥсьёсыз. Иеговалэн калыкез, Инмар но солэн эрикез сярысь тодыны — бадӟым дан! Ойдолэ азьланяз но, номыр шоры учкытэк, зэмлыкын юн сыломы!