1, 2. Кызьы умойгес луоз Библиез лыдӟыны но эскерыны? Вералэ пример.

 ШУОМ, тӥ корка басьтыны малпаськоды. Туспуктэмзэ учкыса гинэ, тӥ корка уд басьтэ, дыр. Сое басьтон понна, тӥляд потоз отчы мынэмды, котыртӥз ортчемды но, пушказ пырыса, ваньзэ пыр-поч учкемды.

² Тае ик лэсьтыны луэ, Библиез лыдӟыкумы но сое эскерыкумы. Тодосчилэн верамезъя, Библия «ӝужытэсь башняосын но мур кисьтэм фундаментэн туж бадӟым юртлы тупа». Соку луэ-а тодыны ваньзэ, мар гожтэмын Библиын? Ӝог лыдӟыса гинэ, тӥ Библиысь валтӥсь зэмлыкъёсты гинэ тододы (Евр. 5:12). Корка басьтыкумы, ми пушказ пырыса ваньзэ умой-умой учкиськомы. Библиез лыдӟыкумы но, озьы ик карыны луэ. Соин ик адӟыны тырше, кызьы Библиысь пӧртэм зэмлыкъёс ог-огенызы герӟаськемын. Озьы ик валаны тырше, кыӵе зэмлыкъёслы тӥ оскиськоды но малы тӥ соослы оскиськоды.

3. Мар карыны ӧтиз апостол Павел вын-агайёссэ но сузэр-апайёссэ но малы? (Ефесъёслы 3:14—19).

³ Библиез умой валан понна, милемлы сое мур эскерыны кулэ. Апостол Павел ӧтиз вын-агайёссэ но сузэр-апайёссэ Инмарлэсь Кылзэ эскерыны, соос зэмлыклэсь «пасьталазэ, кузьдалазэ, ӝуждалазэ но мурдалазэ» пыр-поч мед валалозы шуыса (Еф. 3:18, 19, ВД). Та  соослы юрттысал осконзэс юнматыны. (Лыдӟе Ефесъёслы 3:14—17.) Милемлы но озьы ик кароно. Ойдолэ тодомы, мар милемлы юрттоз Инмарлэсь Кылзэ эшшо но умойгес валаны.

4. Кызьы Библиез эскерон Иеговаен кусыпъёстэс юнматыны быгатэ? Вералэ примеръёсты.

⁴ Ми христианъёс бере, Библиысь валтӥсь зэмлыкъёсты валам сяна, милям «Инмарлэсь ватӥськем мурдалаоссэ» но валаммы потэ. Соосты валаны милемлы святой дух юрттэ (1 Кор. 2:9, 10). Тӥ быгатӥськоды бырйыны тӥледлы тунсыко юанэз но сое мургес эскерыны. Сыӵе эскерон Иеговаен кусыпъёстэс юнматоз. Кылсярысь, эскере, кызьы Инмар вашкала дыръя адямиослы яратонзэ возьматъяз, но собере малпаське, кызьы та возьматэ, со тӥледыз но яратэ шуыса. Яке ӵошатэ, кызьы израиль калык вашкала дыръя Инмарлы йыбыртъяз но кызьы христианъёс туннэ солы йыбыртъяло. Озьы ик эскерыны луэ азьпалзэ ивортонъёсты, кудъёсыз Иисус Христосэн герӟаськемын.

5. Мае тӥляд мургес эскеремды потэ?

⁵ Агайёсты но сузэръёсты, кудъёсыз мур эскерон ортчытъяны ярато, вераны куризы, кыӵе юанъёсты соослэн эшшо но мургес валамзы потэ. Куд-ог верамъёссы гожтэмын  «Мае эскерыны луэ» рамкаын. Тӥледлы кельшоз та но мукет юанъёсты эскерыны «Возьмаськон башнялэн онлайн-библиотекаезъя». Библиез мур эскерон юрттоз тӥледлы «Инмар сярысь тодонэз» шедьтыны но оскондэс юнматыны (Мад. 2:4, 5). Ойдолэ мургес эскеромы Библиысь куд-ог юанъёсты.

6. а) Малы Иеговалэн малпанэз котьку но быдэсме? Вералэ пример. б) Кызьы валано, Инмар пумтэм вапумъёслэсь азьло ик малпаз шуыса, мар со кароз музъем но адямиос понна?

⁶ Иегова котьку но аслэсьтыз малпанзэ быдэстэ. Солы номыр но люкетыны уг быгаты. Эскеромы тае пример вылын.  Шуом, тӥ одӥг гуртэ мынӥськоды, но сюрес вамен писпу усиз. Соин ик та сюрес вылтӥ мыныны тӥ уд быгатӥське ини. Гуртэ вуон понна, тӥ мукет сюрестӥ мыныны малпаськоды. Озьы ик Иегова но умой тодэ, мае солэн лэсьтэмез потэ. Но аслэсьтыз малпанзэ со пӧртэм амалъёсын быдэстыны быгатэ. Соин ик нокыӵе шуг-секытъёс солы люкетыны уг быгато. «Ваньзэ Аслыз кызьы кулэ», озьы лэсьтэ (Мад. 16:4). Библия верамъя, Инмар пумтэм вапумъёслэсь азьло ик малпаз, мар со кароз музъем но адямиос понна (Еф. 3:11). Кызьы сое валано? Аслэсьтыз малпанзэ быдэстон понна, Иегова трос дыр висъяз. Озьы ик, куке Инмарлэн малпанэз быдэсмоз, ми котьку уломы озьы, кызьы со нырысь ик малпаз вал. Нош кыӵе улон малпаз Иегова аслаз кылдытэмъёсыз понна но мар со кариз, аслэсьтыз малпанзэ быдэстон понна?

7. Мар кариз Иегова, аслэсьтыз малпанзэ быдэстон понна, нырысетӥ адямиослэн солы пумит султэмзы бере? (Матфей 25:34).

⁷ Инмар нырысетӥ адямиослы вераз, кыӵе улон со малпаз соос понна. Со шуиз: «Йылэ, трос луэ, музъемез тырмытэ, сое киулады кутэ... [музъем вылысь вань кылдытэмъёсын] кузёяськыса улэ» (Ул.-выл. 1:28). Куке Адам но Ева Инмарлы пумит султӥзы, адямиос сьӧлыкоесь луизы. Но та ӧз люкеты Иеговалы аслэсьтыз малпанзэ быдэстыны. Сое быдэстон понна, Инмар мукет амал бырйиз. Иегова соку ик малпаз инмын Эксэйлыкез кылдытыны, кудӥз адямиос но музъем пумысен солэсь малпанзэ быдэстоз. (Лыдӟе Матфейлэсь 25:34.) Дауръёс ортчыса, Иегова музъем вылэ аслэсьтыз Пизэ ыстӥз, со адямиослы та Эксэйлык сярысь мед вералоз но милемыз, сьӧлыклэсь но кулонлэсь мозмытон понна, аслэсьтыз улонзэ мед сётоз шуыса. Собере Иегова Иисусэз улӟытӥз но, Иисус инме берытскиз, Инмарлэн Эксэйлыказ Эксэй луон понна. Нош мае эшшо ми тодыны быгатӥськомы на Инмарлэн малпанэз сярысь?

8. а) Библилэн кыӵе валтӥсь темаез? б) Мае эшшо Иеговалэн лэсьтэмез потэ на? (Ефесъёслы 1:8—12). (Учке вылбамысь суредэз.)

⁸ Библилэн кыӵе валтӥсь темаез? Иегова аслэсьтыз нимзэ чылкытатоз, куке Эксэйлыкез музъем пумысен малпанзэ быдэстоз. Номыр уз люкеты Иеговалы аслэсьтыз малпанзэ быдэстыны. Инмар кылзэ сётэ: ваньмыз луоз озьы, кызьы со вераз (Ис. 46:10, 11; Евр. 6:17, 18). Музъем райлы пӧрмоз, Адамлэн но Евалэн нылпиоссы тырбыдэсэсь луозы но пумтэм вапумъёс ӵоже шумпотыса улозы (Пс. 21:27). Но Инмарлэн тае гинэ лэсьтэмез уг поты. Иегова инмысь но музъем вылысь вань ужась-тыршисьёссэ огазеялоз, соос солэсь гинэ кылзӥськыса мед улозы шуыса. (Лыдӟе Ефесъёслы 1:8—12.) Макем паймымон Иегова аслэсьтыз малпанзэ быдэстэ!

9. Кӧня дыр ортчыса быдэсмоз азьпалзэ ивортон, кудӥз гожтэмын Улон-вылонын 3:15?

⁹ Эскеромы азьпалзэ ивортонэз, кудзэ Иегова Едем садын вераз. Со гожтэмын Улон-вылонын 3:15 b. Отын валэктӥське, кызьы Инмар аслэсьтыз малпанзэ быдэстоз. Но та азьпалзэ ивортон, трос дауръёс  ортчыса гинэ, быдэсмыны кутскиз. Кылсярысь, Инмар Авраамлы кылзэ сётӥз, солэн выжыысьтыз Христос потоз шуыса (Ул.-выл. 22:15—18). Собере асьме вакытысь 33-тӥ арын Иисус пыдтышказ лекамын вал (Ап. уж. 3:13—15). Быдэсак та азьпалзэ ивортон быдэсмоз, куке кидыс-выжы Шайтанлэсь йырзэ сузмытоз, нош со дырозь 1000 арлэсь тросгес на (Усьт. 20:7—10). Нош мае эшшо тодыны луэ на Библиысь со сярысь, мар азьланяз луоз?

10. а) Мар луоз азьланяз? б) Кызьы ми вуоно югдуръёслы дасяськыны быгатӥськомы? (Учке сноскаез.)

¹⁰ Малпалэ гинэ, мар азьланяз луоз, Библия верамъя. Нырысь кивалтӥсьёс ялозы: «Тупаса улон, кышкатэк улон» (1 Фес. 5:2, 3). Собере, куке соос вань зэмос луисьтэм религиос вылэ урдскозы, бадӟым куректон кутскоз (Усьт. 17:16). Адямиос «быдӟым кужымен, пиштӥсь данлыкен ин пилемъёс вылын лыктӥсь Адями Пиез адӟозы». Оло нош, соку паймымон тодметъёс луозы (Матф. 24:30). Собере Иисус адямиосты судъялоз но ыжъёсты кечъёслэсь висъялоз (Матф. 25:31—33, 46). Вань со дыр ӵоже Шайтан тэк уз пукы. Йыркурен пачылмыса, со калыкъёслэсь огазеяськонзэс, яке Магог музъемысь Гогез, Иеговалэн ужась-тыршисьёсыз вылэ урдскытоз (Иез. 38:2, 10, 11). Кыӵе ке но дыре музъем вылысь зырӟем христианъёс инме ӝутэмын луозы, Христосэн но инмысь ожгарчиосыныз ӵош Армагеддонын ожмаськон понна. Та ожмаськон бере бадӟым куректон йылпумъяськоз (Матф. 24:31; Усьт. 16:14, 16) c. Нош собере Христос сюрс ар ӵоже музъемен кивалтоз (Усьт. 20:6).

11. Кыӵе тӥляд улонды луоз сюрс ар ортчем бере? (Озьы ик учке суредэз.)

¹¹ Нош али ойдолэ малпаськомы, кыӵе улон луоз сюрс ар ортчем бере. Библиын гожтэмын, Кылдытӥсьмы «адямиослэн сюлмазы пумтэм вапумъёс улыны мылкыд понӥз» шуыса (Екк. 3:11, ВД). Малпалэ гинэ, кыӵе милям улонмы луоз но макем юнмалозы Иеговаен  кусыпъёсмы. «Иеговалы матэ кариськы» книгаын (ӟуч), 319-тӥ бамын, таӵе кылъёс гожтэмын: «Трос миллион аръёс улыса, ми Иегова сярысь туж трос тодомы. Озьы ке но ми со сярысь ваньзэ ум тодэ. [...] Ми ялан Инмар сярысь мае ке выльзэ тодомы. Пырак улон туж тунсыко луоз! Нош самой валтӥсез, милям инмысь Атаенымы кусыпъёсмы юнгес но юнгес луозы!» Нош али ойдолэ тодомы, Библиысь кыӵе юанэз мургес эскерыны луэ на.

12. Мар юрттоз тросгес тодыны инъёс сярысь?

¹² Мае тӥ адӟысалды, «вылӥын улӥсь» Иегова вӧзын луысалды ке? (Ис. 33:5). Библия тае валаны юрттэ. Отын трос вераське Иегова сярысь но организациезлэн инмысь люкетэз сярысь (Ис. 6:1—4; Дан. 7:9, 10; Усьт. 4:1—6). Кылсярысь, ми лыдӟыны быгатӥськомы, мае адӟиз Иезекииль, куке «инъёс усьтӥськизы» (Иез. 1:1).

13. Мар али каре Иисус инмын но кызьы со тӥледлы юрттэ? (Еврейёслы 4:14—16).

¹³ Малпаське, мар али каре Иисус инмын. Со Эксэй но Быдӟым священник. Соин ик ми быгатӥськомы Инмарлы вӧсяськыны но юн оскыны, со милемыз гажалоз-жалялоз но милемлы кулэ дыръя юрттоз шуыса. (Лыдӟе Еврейёслы 4:14—16.) Котькуд нунал малпаське, мае Иегова но Иисус тӥ понна лэсьтӥзы ини но лэсьто на. Соослэн яратонзы милесьтым но мылкыдмес ӝутэ соосты яратыны но вань сюлмысьтымы Иеговалы ужаны-тыршыны (2 Кор. 5:14, 15).

14. Кызьы ми Иеговалы но Иисуслы тау кареммес возьматыны быгатӥськомы? (Озьы ик учке суредэз.)

¹⁴ Кызьы ми быгатӥськомы Инмарлы но солэн Пиезлы яратонмес возьматыны?  Юрттэ адямиослы Иеговалэн Адӟись-Ивортӥсьёсыз но Иисуслэн дышетскисьёсыз луыны (Матф. 28:19, 20). Ӵапак сое лэсьтэ вал апостол Павел но, Инмарлы но Христослы тау каремзэ возьматон понна. Со тодэ вал, Иеговалэн «вань адямиосты утиськытэмез, зэмлыкез тодытэмез потэ» шуыса (1 Тим. 2:3, 4). Павел мылысь-кыдысь тыршиз вань адямиослы тодытыны. Соин ик со вераз: «Кӧнязэ ке но утён понна мон ваньмыз азьын ваньмыз кадь ик кариськылӥ» (1 Кор. 9:22, 23).

15. Мар кароно, шудо луон понна? (Псалтирь 1:2).

¹⁵ Псаломъёсты гожъясь шудо но азинлыко адями сярысь вераз: «Кузё-Инмарлэн законэз бордын солэн вань мылкыдыз, Солэсь законзэ со уй но, нунал но дышетэ!» (Пс. 1:1—3). Библиез одӥг берыктӥсь та кылбур сярысь гожтӥз: «...сыӵе адями Инмарлэсь кивалтэтсэ туж яратэ, соин ик со сое утча, валаны тырше но со вылын малпаське. [...] ...Сыӵе адямилэн малпамезъя, нунал юнме ортчиз, со Библиысь визьлыкез умойгес ӧз вала ке» (Joseph Rotherham. Studies in the Psalms). Кызьы ми адӟимы, Библиын вань туж трос юанъёс, кудъёссэ мургес эскерыны луэ. Соосты эскерон тӥледлы трос шумпотон ваёз.

16. Мае ми эскеромы вуоно статьяын?

¹⁶ Оло нош, тӥ кышкаськоды, Библиысь куд-ог зэмлыкъёсты ноку уд валалэ шуыса. Но эн сюлмаське, соосты валаны луэ. Кылсярысь, вуоно статьяын ми вераськомы Иеговалэн быдӟым духовной храмез сярысь. Со сярысь гожъяз апостол Павел Еврейёслы гожтэтаз. Тӥледлы туж кельшоз со статьяез эскерыны.