1. Малы вашкала дыръя улӥсь Инмарлэн ужась-тыршисьёсыз кужмоесь вал?

 БИБЛИЫН гожтэмын Инмарлэн трос оскымон ужась-тыршисьёсыз сярысь, кудъёсыз кужмоесь вал. Но соос пӧлысь самой кужмоосыз но куддыръя асьсэды ляб шуыса шӧдӥзы. Кылсярысь, Давид эксэй куддыръя ассэ юн гурезь кадь шӧдылӥз, нош куддыръя кышкатскылӥз (Пс. 29:8). Самсон Инмарлэн духезлы луыса туж кужмо вал ке но, со вала вал, Иеговатэк со лябӟоз но огшоры адями кадь луоз шуыса (Суд. 14:5, 6; 16:17). Та адямиослы Иегова кужым сётылӥз. Талы луыса гинэ соос сокем кужмоесь вал.

2. Малы апостол Павел вераз, куке со лябӟемын, со кужмо шуыса? (2 Коринфъёслы 12:9, 10).

² Апостол Павел вала вал, солы Иеговалэн кужымез кулэ шуыса. (Лыдӟе 2 Коринфъёслы 12:9, 10.) Ми пӧлысь тросэз кадь ик, со но висьылӥз (Гал. 4:13, 14). Куддыръя солы капчи ӧй вал ассэ шонер возьыны (Рим. 7:18, 19). Нош куддыръя секыт югдуръёсын солы кышкыт вал (2 Кор. 1:8, 9). Но соку Иегова солы кужым сётылӥз. Та юрттӥз солы вань шуг-секытъёсыз пыр потыны.

3. Мае ми тодомы та статьяысь?

³ Иегова кылзэ сётэ милемыз кужмо карыны (1 Пётр 5:10). Но со понна милемлы асьмелы но мар ке но кароно. Учкомы тае пример вылын. Машина мед мыноз шуыса, энергия кулэ. Сое сётэ двигатель. Но адямилэн машинаен кытчы ке мынэмез потэ ке, солы аслыз пыдыныз газ вылэ  зӥбоно. Милемын но озьы ик. Иегова кужым сётэ. Но сое басьтон понна, милемлы асьмелы но мар ке но кароно. Мар сётӥз милемлы Иегова, милям кужыммы мед луоз шуыса? Мар милемлы кароно, сое басьтон понна? Ми тае тодомы, Инмарлэн куинь ужась-тыршисьёсызлэсь учыръёссэс эскерыса. Ми эскеромы, кызьы Иегова юнматӥз Иона пророкез, Иисуслэсь Мария анайзэ но апостол Павелэз. Озьы ик ми адӟомы, кызьы Иегова юнматэ аслэсьтыз ужась-тыршисьёссэ туннэ.

4. Мар милемлы кароно, Иеговалэсь юрттэтсэ басьтон понна?

⁴ Одӥгез амал, кызьы Иеговалэсь юрттэтсэ басьтыны луэ,— со вӧсяськон. Вӧсяськеммы бере Иегова «мертантэм бадӟым кужым» сётыны быгатэ (2 Кор. 4:7). Озьы ик милям юнматскеммы луэ, Инмарлэсь кылзэ лыдӟыса но сое эскерыса (Пс. 85:11). Малы ке шуоно Библиысь иворлэн туж бадӟым кужымез вань (Евр. 4:12). Вӧсяськон но Библиез лыдӟон тӥледлы юрттыны быгато шуг-секытъёс пыр потыны, шумпотыса улыны яке секыт ужез быдэстыны. Эскеромы, кызьы Иегова юнматӥз Иона пророкез.

5. Малы Иона пророклы Иеговалэн юрттэмез туж кулэ вал?

⁵ Иона пророк кышкыт учыре сюриз. Куке Иегова солы секыт уж сётӥз, Иона бызьыса кошкиз. Зарезь вылын кужмо сильтӧлэн сэрен со ӧжыт гинэ бырыны ӧз сюры. Озьы ик соин сэрен корабль вылын мукет адямиос но кулыны быгато вал. Куке Ионаез зарезе куштӥзы, сое бадӟым чорыг ньылӥз. Солэн кӧт пушказ сюрыны со чик но уг малпа вал. Отын пеймыт но кышкыт вал. Мае шӧдӥз Иона? Малпаз-а со, табере кулоз ини шуыса? Сюлмаськиз-а со, Иегова солэсь палэнскиз шуыса? Ионалы туж кышкыт вал, дыр.

6. Мар кариз Иона юнматскон понна, куке со чорыглэн кӧт пушказ вал? (Иона 2:2, 3, 8).

⁶ Куке Иона чорыглэн кӧт пушказ вал, мар со кариз юнматскон понна? Со вӧсяськиз. (Лыдӟе Ионалэсь 2:2, 3, 8.) Иона Иеговалэсь ӧз кылзӥськы ке но, со оскиз, Инмар солэсь ӧпкелемзэ адӟе но вӧсяськемзэ кылэ шуыса. Озьы ик Иона малпаськиз Священной Гожтэм вылын. Малы озьы вераны луэ? Вӧсяськонын, кудӥз гожтэмын Ионалэн книгаысьтыз 2-тӥ люкетын, пумисько Псалтирьысь трос кылъёс. (Кылсярысь, ӵошатэ Ионалэсь 2:3, 6 но Псалтирез 68:2; 85:7.) Татысь адӟиське, Иона Священной Гожтэмысь та кылъёсты умой тодӥз шуыса. Соос вылын малпаськыса, солэн осконэз юнмаз, Иегова солы юрттоз шуыса. Берлогес, куке бадӟым чорыг Ионаез музъем вылэ поттӥз, со дась вал Иеговалэсь выль ужзэ быдэстыны (Иона 2:11—3:4).

7, 8. Мар юрттэ Тайваньысь одӥг агайлы шуг-секытъёссэ чиданы?

⁷ Ионалэн учырез милемлы юрттыны быгатэ, шуг-секытъёсын пумиськыкумы. Кылсярысь, Тайваньысь Чжими́н b агайлэн секыт висёнэз вань. Со сяна, Иеговалы оскемез понна ӵыжы-выжыосыз асьсэды соин туж урод возё. Чжимин агаез вӧсяськон но эскерон юнмато. Со вера: «Шуг-секытъёс кылдыку, мон сокем сюлмаськыны кутскисько, ас поннам Библиез эскерыны но уг быгатӥськы ни». Но Чжимин кизэ уг лэзьы. Со азьланьтэ: «Нырысь мон Иеговалы вӧсяськисько. Собере наушникъёсме  дӥсясько но Эксэйлык кырӟанъёсты кылзӥсько. Куддыръя каллен сьӧразы кырӟасько. Та юрттэ мыным буйгатскыны, нош собере эскерон ортчытыны».

⁸ Со, мае Чжимин агай тодэ, ас понназ Библиез эскерыкуз, солы шуг-секытъёс дыръя юрттэ. Тани одӥг учыр. Огпол секыт операция бере эмъясь солы вераз, пичи гемоглобинэз сэрен солы вир лэзёно луоз шуыса. Солэсь азьвыл нуналаз Чжимин лыдӟиз сузэр сярысь, кудӥзлы ӵапак сыӵе ик операция лэсьтӥзы. Та сузэрлэн гемоглобинэз эшшо но пичи вал ке но, со вир лэзьыны соглаш ӧз кариськы. Озьы ке но со бурмиз. Та учыр Чжимин агайлы кужым сётӥз Инмарлы оскымон кыльыны.

9. Мар тӥ карыны быгатӥськоды, кыӵе ке шуг-секыт тӥледыз кужымтэк кельтэ ке? (Озьы ик учке суредэз.)

⁹ Вал-а тӥляд сыӵе учыръёсты, куке туж сюлмаськеменыды вӧсяськыны секыт вал яке эскерон ортчытыны чик но кужымды ӧй вал? Эн вунэтэ, Иегова тӥледыз котькинлэсь умой вала шуыса. Соин ик, вӧсяськонды туж вакчи луиз ке но, Иегова сётоз тӥледлы ӵапак сое, мар тӥледлы кулэ (Еф. 3:20). Куке тӥ жадемын, висиськоды яке мар ке понна сюлмаськиськоды, кылзэ Библилэсь яке публикациосмылэсь аудиогожтэмъёссэс. Озьы ик луэ кыӵе ке но кырӟанэз кылзыны яке jw.org сайтысь видео учкыны. Тӥ Иеговалы вӧсяськиды ке но уже кутӥды ке ваньзэ, мае сётэ солэн организациез, Иегова тӥледыз кужмо карыны быгатоз.

10. Кызьы милемыз юнматыны быгато вын-агайёс но сузэр-апайёс?

¹⁰ Иегова милемыз вын-агайёс но сузэр-апайёс пыр юнматэ. Куке ми шуг-секытъёсын пумиськиськомы яке милемлы секыт уж сёто, эшъёс милемлы юрттыны быгато (Кол. 4:10, 11). Эшъёс тужгес но кулэ, «шуге-леке сюрыку» (Мад. 17:17). Куке ми лябӟемын, вын-агайёс но сузэр-апайёс дась милемлы ваньзэ кулэзэ сётыны, милемыз буйгатыны но юрттыны азьланяз но Иеговалы оскымон ужаны-тыршыны. Ойдолэ учкомы, кызьы мукетъёсыз юрттӥзы Мариялы, Иисуслэн анаезлы.

11. Малы Мариялы Иеговалэсь кужым кулэ вал?

 ¹¹ Иеговалэсь эриксэ быдэстон понна, Мариялы солэсь кужым кулэ вал. Гавриил кылчин солы вераз, со быземын ӧвӧл на ке но, секытэн луоз шуыса. Малпалэ гинэ, мае шӧдӥз Мария, куке валаз, макем бадӟым уж сётӥз солы Иегова. Мариялэн нылпиосыз ӧй вал на ке но, солы будэтоно вал пияшез, кудӥз Мессия луыны кулэ вал! Со сяна, солы вераськоно вал Иосифен, кудӥзлы со бызьыны кулэ вал. Кызьы солы валэктоно, малы со секытэн, со пиосмуртэн кӧламын ӧй вал на ке но? (Лука 1:26—33).

12. Кытысь Мария кужым басьтӥз? (Лука 1:39—45).

¹² Кытысь Мария кужым басьтӥз, аспӧртэмлыко но секыт ужез быдэстон понна? Со мукетъёсызлэсь юрттэтсэс утчаз. Кылсярысь, Мария Гавриилэз тросгес вераны куриз солы сётэм уж сярысь (Лука 1:34). Собере ӝоген со мынӥз «гурезё шаере, Иудалэн городаз», Елисавета ӵыжы-выжыез доры. Макем умой, со отчы мынӥз шуыса! Елисавета Марияез ушъяз но святой духлэн валтэмез улсын вордӥськоно пиез сярысь азьпалзэ ивортон вераз. (Лыдӟе Лукалэсь 1:39—45.) Мария шуиз, Иегова солы «Ас киызлэсь кужымзэ возьматӥз» шуыса (Лука 1:46—51). Гавриил но Елисавета пыр Иегова Мариез юнматӥз.

13. Кызьы Боливиысь одӥг сузэрлы вын-агайёс но сузэр-апайёс юрттӥзы?

¹³ Мария сямен, тӥ но Инмарлэн мукет ужась-тыршисьёсызлэсь юрттэтсэс утчаны быгатӥськоды. Боливиысь Дасури́ сузэрлы сыӵе юрттэт кулэ вал. Атаезлэсь кулонэ вуттӥсь висёнзэ шедьтӥзы. Куке со эмъюртын кыллиз, сое утялтон понна, сузэрмылэн потэ вал лэсьтэмез ваньзэ, мае со быгатэ (1 Тим. 5:4). Куддыръя солы туж секыт вал. Дасури вера: «Ӵем дыръя мыным потэ вал, мон уг чида ни шуыса». Нырысь со мукетъёсызлэсь юрттэтсэс ӧз утча. Со валэктэ: «Мынам агайёсты но сузэръёсты акыльтэме уг поты вал. Мон малпай, Иегова мыным юрттоз шуыса. Но берло мон валай, мукетъёсызлэсь палэнскыса, мон огнам шуг-секытъёсме сэрттыны-пертчыны тыршисько шуыса» (Мад. 18:1). Соин ик Дасури малпаз куд-ог эшъёсызлы гожтыны но аслаз югдурез сярысь вераны. Со азьланьтэ: «Кылъёс ик уг шедё вераны, кызьы мыным юрттӥзы вын-агайёсы но сузэр-апайёсы. Соос эмъюртэ сиён вайылӥзы но Библиысь буйгатӥсь кылбуръёс вераллязы. Кыӵе умой тодыны, тон огнад ӧвӧл шуыса! Тон Иеговалэн бадӟым семьяяз, кудаз котьку дась тыныд уж вылын юрттыны, тонэн ӵош бӧрдыны но пумозяз нюръяськыны».

14. Малы милемлы тӧроослэсь юрттэтсэс палэнтоно ӧвӧл?

¹⁴ Озьы ик Иегова милемлы тӧроос пыр юрттыны быгатэ. Соос солэн кузьымез. Инмарлэн потэ, тӧроос солэсь калыксэ мед юнматозы шуыса (Ис. 32:1, 2). Соин ик, тӥляд кыӵе ке сюлмаськонды вань ке, тӧроосыныды вераське. Нош куке соос юрттэтсэс ӵекто, тау карыса соглаш кариське. Тӧроос пыр Иегова тӥледыз кужмо кароз.

15. Кыӵе осконэз вань христианъёс дуноен лыдъяло?

¹⁵ Библия вылэ пыкиськем вуоноезлы оскон милемлы кужым сётэ (Рим. 4:3, 18—20). Христианъёслэн пырак улыны туж умой осконзы вань: кин ке но рай музъем вылын улоз, нош кин ке но — инмысь Эксэйлыкын. Вуоноезлы оскон милемлы кужым сётэ шуг-секытъёсты чиданы, ӟеч иворез тодытыны но кенешын пӧртэм ужъёсты  быдэсъяны (1 Фес. 1:3). Пырак улыны оскон апостол Павеллы но кужым сётэ вал.

16. Малы Павеллы Инмарлэсь кужым кулэ вал?

¹⁶ Малы Павеллы Инмарлэсь кужым кулэ вал? Коринфъёслы гожтэтаз со ассэ ӵошатӥз горд сюйлэсь сосудэн, кудзэ пильыны туж капчи. Павел вераз, сое ӝикатыса, уйылыса-улляса возизы, озьы ик со кышкыт учыръёсы сюрылӥз шуыса. Куддыръя со кулон калэ но вуэмын вал (2 Кор. 4:8—10). Та кылъёсты Павел гожтӥз, куинетӥзэ пӧртэм шаеръёстӥ тодытыса ветлыкуз. Но со ӧз но малпа, азьланяз сое эшшо но бадӟым шуг-секытъёс возьмало шуыса: сое жугылӥзы, пытсэтэ пуктылӥзы, озьы ик со корабль куашкан-выёнэ учыралляз.

17. Мар юрттӥз Павеллы шуг-секытъёсты чиданы? (2 Коринфъёслы 4:16—18).

¹⁷ Павел быгатӥз шуг-секытъёссэ чиданы, малы ке шуоно со саклыксэ висъяз солы, мар сое азьланяз возьма. (Лыдӟе 2 Коринфъёслы 4:16—18.) Коринфын улӥсьёслы со гожтӥз, солэн мугорыз лябӟе ке но, со кизэ уг лэзьы шуыса. Павел вуоноез шоры учкиз. Инмын пырак улыны оскон солы туж дуно потэ вал. Соин ик со дась вал котькыӵе курадӟонъёсты чиданы. Вуоноезлы оскон сярысь малпаськон Павелэз юнматэ вал.

18. Кызьы вуоноезлы оскон Тихомирез но солэсь семьязэ юнматэ?

¹⁸ Болгариысь Тихоми́р агаез вуоноезлы оскон юнматэ. Кӧня ке аръёс талэсь азьло солэн Здра́вко выныз, аварие сюрыса, кулӥз. Тихомир туж куректыса улӥз. Тае чидан понна, соос кышноеныз но пиеныз ӵош улӟытон сярысь тросгес малпаськыны кутскизы. Тихомир валэктэ: «Кылсярысь, ми малпаськиськомы, кызьы Здравкоез пумиталомы, кӧня ческыт сиён солы пӧраломы, кинэ ӧтёмы, солэсь берытскемзэ пусйыкумы, но мар солы вераломы берпуметӥ нуналъёс сярысь». Тихомир вера, вуоноезлы оскон соослы юрттэ шуыса куректонлы сётскытэк улыны но возьманы дырез, куке Иегова солэсь вынзэ улӟытоз.

19. Мар карыны луэ, вуоноезлы осконмес юнматон понна? (Озьы ик учке суредэз.)

 ¹⁹ Мар карыны луэ, вуоноезлы осконмес юнматон понна? Кылсярысь, тӥ оскиськоды ке музъем вылын пырак улыны, лыдӟе Библиысь со сярысь, кыӵе улон луоз рай музъем вылын (Ис. 25:8; 32:16—18). Пуктэ син азяды, тӥ райын ини шуыса. Кинэ тӥ адӟиськоды? Мае кылӥськоды? Мае шӧдӥськоды? Тае син азяды яркытгес пуктон понна, учке публикациосысьтымы суредъёсты, кудъёсаз райын улон возьматэмын. Озьы ик учке крезьгуро видеороликъёсты, кылсярысь, «Мы ждём новый мир», «Этот день очень близко!» яке «Представь, будет так». Вуоноезлы оскондэс ялан тодады возиды ке, соку шуг-секытъёсты шоры «вакчи дырлы сётӥськись капчи курадӟонъёс» шоры кадь учкоды (2 Кор. 4:17). Иегова тӥледлы вуоноезлы оскон сётӥз, тӥ кужмоесь мед луоды шуыса.

20. Кытысь тӥ кужым басьтыны быгатӥськоды катьтэммем дыръяды?

²⁰ Куддыръя тӥ чылкак катьтэммемын ке, ӝоже эн усе. Иеговалэн юрттэменыз тӥ кужмо луоды (Пс. 107:14). Инмар трос лэсьтӥз ини, тӥ солэсь кужым басьтыны мед быгатоды шуыса. Соин ик, куке тӥледлы секыт уж быдэстоно, шуг-секытэз чидано яке, номыр шоры учкытэк, шумпотыса улоно, вань сюлмысьтыды Иеговалы вӧсяське но солэсь кивалтэтсэ утчалэ, ас поннады Библиез эскерыса. Вын-агайёслэсь но сузэр-апайёслэсь юрттэтсэс эн палэнтэ. Ялан син азяды пуктэ, кызьы тӥ выль дуннеын улоды. Соку Инмар «Аслаз данлыко кужыменыз тӥледыз... юнматоз, куасаськыны сётскисьтэмесь, ваньзэ чидасесь» кароз (Кол. 1:11).