1. Малы милемлы кылзӥськыны капчи ӧвӧл?

 СЕКЫТ-А тӥледлы кылзӥськыны? Секыт ке, тӥ огнады ӧвӧл. Кылсярысь, Давид эксэй Иеговаез туж яратӥз ке но, солы но куддыръя кылзӥськыны секыт вал. Соин ик со Инмарез куриз сое юнматыны (Пс. 50:14). Малы адямиослы сокем секыт кылзӥськыны? Нырысетӥез, милемлы Адамлэсь но Евалэсь кылзӥськисьтэм сям выжиз. Кыкетӥез, Шайтан, кудӥз Иеговалы пумит султӥз, милесьтым но мылкыдмес ӝутэ ачиз кадь улыны (2 Кор. 11:3). Куинетӥез, ми улӥськомы адямиос пӧлын, кудъёсызлэн кылзӥськемзы уг поты (Еф. 2:2). Милемлы сьӧлыко мылпотонъёсмылы, Шайтанлы но та дуннелы сётсконо ӧвӧл. Милемлы вань кужмысьтымы тыршоно кылзӥськыны Иеговалэсь но соослэсь, кинъёслы со кивалтэт сётӥз.

2. Кызьы ассэ возе адями, кудӥз кылзӥськыны дась? (Иаков 3:17).

² Лыдӟе Иаковлэсь 3:17. Святой духлэн валтэмез улсын Иаков гожтӥз, визьлыко адями кылзӥськись шуыса, яке кылзӥськыны дась, кызьы со сярысь гожтэмын 2007-тӥ арын поттэм «Выль дунне» берыктэмын (ӟуч). Малпаське, мае та возьматэ. Милемлы дась луыса кылзӥськоно соослэсь, кинъёслы Иегова кивалтэт сётӥз. Но Инмар уг возьма, ми кылзӥськомы шуыса соослэсь но, кинъёс куро Инмарлэсь катъёссэ тӥяны (Ап. уж. 4:18—20).

3. Малы Иегова возьма, ми кылзӥськомы шуыса соослэсь, кинъёслы со кивалтэт сётӥз?

³ Зэм, адямиослэсь сярысь, Иеговалэсь кылзӥськыны капчигес. Малы ке шуоно со тырбыдэс, нош адямиос сьӧлыкоесь (Пс. 18:8). Озьы ке но инмысь Атаймы анай-атайёслы, кивалтӥсьёслы но тӧроослы кивалтэт сётӥз (Мад.  6:20; 1 Фес. 5:12; 1 Пётр 2:13, 14). Соослэсь кылзӥськыса, ми Иеговалэсь кылзӥськиськомы. Ойдолэ эскеромы, мар милемлы юрттоз кылзӥськыны соку но, куке милям кылзӥськеммы уг поты яке ми соосын соглаш ӧвӧл.

4. Малы тросэз нылпиос анай-атайзылэсь уг кылзӥсько?

⁴ Тросэз нылпиос анай-атайзылэсь уг кылзӥсько (2 Тим. 3:1, 2). Малы? Куд-огъёсыз малпало, анай-атайзы соослы куронъёс пукто, нош асьсэос соосъя уг уло шуыса. Мукетъёсыз малпало, атайзы но анайзы туэ улонэз уг валало яке соослэн куронъёссы укыр чурытэсь шуыса. Егит агайёс но сузэръёс, тӥляд но таӵе ик малпанъёсты кылдыло-а? Туннэ тросэзлы секыт кылзӥськыны Иеговалэн таӵе косонэзлэсь: «Кузё-Инмарлы ярамон мед луоды шуыса, анай-атайёстылы тэрытске, уго тазьы улон — со шонер улон» (Еф. 6:1). Нош мар юрттоз тӥледлы кылзӥськыны?

5. Малы Иисус егит агайёслы но сузэръёслы самой умой адӟем карон луэ? (Лука 2:46—52).

⁵ Тӥ быгатӥськоды дышетскыны Иисуслэсь, кудӥз кылзӥськон пумысен самой умой адӟем карон возьматӥз (1 Пётр 2:21—24). Со тырбыдэс адями вал, кудзэ тырбыдэстэмесь анай но атай будэтӥзы. Соку но, куке соос янгышазы яке сое ӧз валалэ, Иисус соосты гажаз (Пот. 20:12). Тодады вае, мар луиз, куке Иисуслы 12 арес вал. (Лыдӟе Лукалэсь 2:46—52.) Иерусалимысь бертыкузы, Иосиф но Мария ӧз адӟе, Иисус соосын ӵош ӧвӧл шуыса. Соос анай но атай вал бере, соослы чаклано вал, вань нылпиоссы соосын шуыса. Нош куке соос Иисусэз шедьтӥзы, Мария Иисусэз пыкылыны кутскиз, со понна сюлмаськоно луизы шуыса. Озьы ке но Иисус соин зӥбыт-востэмен но лякытэн вераськиз. Иосиф но Мария Иисуслэсь «верам кылзэ ӧз валалэ» ке но, со азьланяз но «соослэсь кылзӥськыса улӥз».

6, 7. Мар юрттоз нылпиослы анай-атайзылэсь кылзӥськыны?

⁶ Дуно нылпиос, луэ-а тӥледлы секыт анай-атайдылэсь кылзӥськыны, тужгес но соку, куке соос янгышало яке тӥ ог-огдэс уд валаське? Мар тӥледлы юрттоз? Нырысетӥез, малпаське Иеговалэн шӧдонъёсыз сярысь. Библиын вераське, тӥ анай-атайдылэсь кылзӥськиды ке, «со Инмарлы ярамон» луоз шуыса (Кол. 3:20). Иегова адӟе, куке атайды но анайды тӥледыз уг валало яке соослэн куронъёссы туж ик шонересь ӧвӧл. Но, та шоры учкытэк, тӥ соослэсь кылзӥськиды ке, Иегова туж шумпотоз.

⁷ Кыкетӥез, малпаське анай-атайдылэн шӧдонъёссы сярысь. Соослэсь кылзӥськыса, тӥ соосты шумпоттоды но соос тӥледлы оскозы (Мад. 23:22—25). Со сяна, тӥляд кусыпъёсты умойгес луозы, вылды. Тани мар вера Бельгиысь Александр агай: «Куке мон анай-атаелэсь ӵемгес кылзӥськыны кутски, милям кусыпъёсмы юнмазы но ми шудогес луимы» b. Куинетӥез, малпаське, кызьы кылзӥськемды тӥледыз вуоноезлы дасялоз. Бразилиысь Па́улу агай вера: «Анай-атаелэсь кылзӥськеме дышетӥз монэ кылзӥськыны Иеговалэсь но соослэсь, кинъёслэн кыӵе ке кивалтэтсы вань». Инмарлэн Кылаз вераське, атайлэсь но анайлэсь кылзӥськыны кулэ шуыса. Отын гожтэмын: «Атайдэ но анайдэ сӥлы кар — тазьы вера сӥзиськонэз ванё нырысетӥез курон-косон,—  тыныд умой мед луоз, музъем вылын кема мед улод» (Еф. 6:2, 3).

8. Малы тросэз егитъёс ужпум кутӥзы анай-атайзылэсь кылзӥськыны?

⁸ Тросэз егитъёс ас вылазы шӧдӥзы, кылзӥськон котьку пайда вае шуыса. Бразилиысь Луи́за сузэр нырысь уг вала вал, малы солы телефон уг басьто. Огъёзъёсыз пӧлысь солэн гинэ кадь телефонэз ӧй вал. Но берлогес со валаз, озьы анай-атаезлэн сое утемзы потэ вал шуыса. Со вера: «Анай-атае, куронъёс пуктыса, мынэсьтым номыр умойзэ ватыны уг тыршо. Соослэн визь-кенешъёссы — ӵапак со, мар мыным кулэ». Огазеяськем Штатъёсысь Эли́забет егит сузэр куддыръя анай-атаеныз соглаш ӧвӧл. Со валэктэ, мар солы соку юрттэ: «Куке мон уг валаськы, малы соос мыным мае ке лэсьтыны уг лэзё, мон тыршисько тодам вайыны учыръёсты, куке соослэн куронъёссы мыным пайда вайизы». Нош Армениысь Мо́ника сузэр адӟиз: аслаз валамезъя лэсьтэм интые, анай-атаезлэсь кылзӥськон котьку но тросгес пайда вае.

9. Кызьы тросэз адямиос шаерзылэн катъёсыз шоры учко?

⁹ Куке Библиын вераське «вылӥ властьёс-кивалтӥсьёс» сярысь, соос возьмато шаерысь кивалтӥсьёсты (Рим. 13:1). Тросэз валало, кивалтӥсьёстэк улыны уг луы но шаерлэн катъёсызлэсь кылзӥськыны кулэ шуыса. Но со ик адямиос малпало ке, катъёс шонертэмесь яке туж секытэсь шуыса, соослэн кылзӥськемзы уг поты ини. Кылсярысь, малпаськомы вытъёсты тырон сярысь. Европаысь одӥг шаерысь трос адямиос малпало, выт тырон пумысен кыӵе ке кат тӥледлы шонертэм потэ ке, сое тырытэк но луоз шуыса. Тӥни малы та шаерын улӥсьёс вань вытъёсты шаерзылы уг тыро.

10. Малы ми кылзӥськиськомы со катъёслэсь но, кудъёсыз милемлы уг кельшо?

¹⁰ Библиын вераське, адями кивалтэтъёс курадӟонъёс ваё, Шайтанлэн киулаз возисько но ӝоген быдтэмын луозы шуыса (Пс. 109:5, 6; Екк. 8:9; Лука 4:5, 6). Но озьы ик отын вераське, «кин властьлы пумитъяське, со Инмарлэн пуктонэзлы-косонэзлы пумитъяське» шуыса. Али Иегова адями кивалтэтъёслы кивалтыны лэзе но возьма, ми соослэсь кылзӥськомы шуыса. Соин ик милемлы, кинлы мар сётонмы вань, сётоно — озьы ик вытъёсты тыроно, гажанмес возьматоно но кылзӥськоно (Рим. 13:1—7). Куддыръя милям малпанмы кылдыны быгатэ, кыӵе ке кат шонертэм яке сое быдэсъяны туж секыт шуыса. Но ми кивалтӥсьёслэсь кылзӥськиськомы, малы ке шуоно Иегова вера милемлы соослэсь кылзӥськыны, соослэн куронъёссы солэн катъёсызлы пумит уг мыно ке (Ап. уж. 5:29).

11, 12. Мар каризы Иосиф но Мария, катлэсь кылзӥськон понна, но кыӵе пайда со вайиз? (Лука 2:1—6). (Озьы ик учке суредэз.)

 ¹¹ Иосиф но Мария туж умой адӟем карон возьматӥзы, кызьы «вылӥ властьёслэсь-кивалтӥсьёслэсь» кылзӥськоно, со капчи ӧвӧл ке но. (Лыдӟе Лукалэсь 2:1—6.) Мария укмысэтӥ толэзьзэ ини секытэн вал. Ӵапак соку солы но Иосифлы секыт ужпум кутоно луиз. Август кивалтӥсь косон поттӥз, Рим империын вань улӥсьёс перепись ортчыны кулэ шуыса. Иосифлы но Мариялы Вифлееме мыноно луиз. Нош отчыозь вырйыло интыостӥ ог 150 иськем мыноно вал! Сыӵе сюрес капчи ӧй вал. Та кузпалъёс сюлмаськизы, вылды, мар соос карозы, Мария сюрес вылын ик пияны кутскиз ке. Соос нылпизы понна сюлмаськизы, малы ке шуоно со вал Мессия, кудӥз сярысь Иегова азьло ик вераз. Малпазы-а соос, та мугъёсын сэрен соос кивалтӥсьлэсь кылзӥськытэк но быгато шуыса?

¹² Иосиф но Мария сюлмаськизы ке но, соос катлэсь кылзӥськизы. Иегова кылзӥськемзэс бакель кариз. Иосиф но Мария Вифлееме умоен вуизы. Нунызы умой тазалыкен вордӥськиз. Озьы ик Мария юрттӥз Библиысь азьпалзэ ивортонэз быдэстыны (Мих. 5:2).

13. Кызьы милям кылзӥськеммы вын-агайёслы но сузэр-апайёслы юрттыны быгатэ?

¹³ Кивалтӥсьёслэсь кылзӥськон милемлы но, мукетъёсызлы но пайда вае. Ми катъёслэсь кылзӥськимы ке, соку кыл кутытэмын ум луэ (Рим. 13:4). Со сяна, ми пӧлысь котькудӥз кылзӥськиз ке, соку Иеговалэн Адӟись-Ивортӥсьёсыз шоры но кивалтӥсьёс умоен учкозы. Тани мар луиз Нигериын кӧня ке дасо аръёс талэсь азьло. Огпол пумиськон дыръя залэ солдатъёс пыризы. Соос утчазы соосты, кинъёс вытъёсты тыронлы пумит ӝутско. Куке офицер тодӥз, залын Иеговалэн Адӟись-Ивортӥсьёсыз люкаськемын шуыса, со солдатъёсты кошкыны косӥз. Со шуиз: «Иеговалэн Адӟись-Ивортӥсьёсыз выт тыронлы пумит уг  мыно». Тӥ катъёслэсь кылзӥськиды ке, Иеговалэн калыкезлэн ӟеч нимыз луоз. Нош та азьланяз но вын-агайёсты но сузэр-апайёсты утьыны быгатоз (Матф. 5:16).

14. Мар юрттӥз одӥг сузэрлы кивалтӥсьёслэсь кылзӥськыны?

¹⁴ Куддыръя ми валаськомы, кылзӥськыны кулэ шуыса, нош сюлэммы пумитъяське. Огазеяськем Штатъёсысь Джоа́нна сузэр вера: «Мыным туж секыт вал кивалтӥсьёслэсь кылзӥськыны. Куке но куд-ог ӵыжы-выжыосы кивалтӥсьёсын сэрен трос курадӟоно луизы». Но Джоанна туж тыршиз кивалтӥсьёс шоры шонер учкыны. Нырысетӥез, со учкемысь дугдӥз социальной сетьёсысь иворъёсты, кудъёсаз кивалтӥсьёс сярысь уродзэ веразы (Мад. 20:3). Кыкетӥез, валан понна, Инмар гинэ улонэз тупатоз шуыса, со Иеговалы вӧсяськиз но солэсь юрттэтсэ куриз (Пс. 9:10, 11). Куинетӥез, со публикациосысьтымы нейтралитет сярысь статьяосты лыдӟиз (Иоанн 17:16). Джоанна вера, куке со кивалтӥсьёсты гажаны дышиз, со каньыл сюлмын улыны кутскиз шуыса.

15. Малы куддыръя секыт кылзӥськыны Иеговалэн организациезлэсь?

¹⁵ Иегова милемыз куре: «Дышетӥсьёстылэсь кылзӥськелэ» (Евр. 13:17). Кенешлэн йырыз, Иисус Христос,— тырбыдэс. Нош соос, кинъёс пыр со кивалтэ,— огшоры, сьӧлыко адямиос. Куддыръя милемлы кылзӥськыны секыт луэ, тужгес но куро ке лэсьтыны сое, мар милемлы уг кельшы. Сыӵе учыре огпол сюриз апостол Пётр но. Кылчин вераз солы сиыны пудо-животъёсты, кудъёсыз Моисейлэн законэзъя чылкыттэмесь вал. Пётр соосты сиыны соглаш ӧз кариськы — одӥг пол гинэ ӧвӧл, куинь пол! (Ап. уж. 10:9—16). Малы? Та выль курон-косон солы валантэм потӥз. Со мукет курон-косонъёсъя улыны дышемын вал. Пётрлы секыт вал тырбыдэс кылчинлэсь кылзӥськыны. Соин ик сьӧлыко адямиослэсь кылзӥськыны эшшо но секыт луэ.

16. Кызьы ассэ возиз апостол Павел, куке сое куризы лэсьтыны сое, мае со лэсьтыны кулэ ӧй вал? (Апостолъёслэн ужъёссы 21:23, 24, 26).

¹⁶ Апостол Павел дась вал кылзӥськыны соку но, куке сое куризы лэсьтыны сое, мае со лэсьтыны кулэ ӧй вал. Еврей луись христианъёс кылӥзы, со «Моисей законлэсь куштӥськыны» дышетэ шуыса (Ап. уж. 21:21). Иерусалимысь тӧроос солы веразы ньыль пиосмуртъёсын ӵош храме мыныны но чылкытатӥськон сямез ортчыны. Соку ваньзы адӟысалзы, Павел Моисейлэн законэзъя улэ шуыса. Павел тодэ вал, христианъёс Законъя уг уло ини но со номыр шонертэмзэ уг лэсьты шуыса. Озьы ке но со ӧз споръяськы. «Павел та пиосмуртъёсты басьтӥз но мукетаз нуналэ соосын ӵош чылкытатӥськон сямез ортчытӥз». (Лыдӟе Апостолъёслэсь ужъёссэс 21:23, 24, 26.) Тӧроослэсь кылзӥськеменыз Павел вын-агайёслы юрттӥз огкылысь улыны.

17. Малы тӥ дышетскиськоды Стефани сузэрлэсь?

¹⁷ Сте́фани сузэрлы секыт вал соглаш кариськыны филиалэн кутэм ужпумен. Солы но картэзлы туж кельше вал мукет кылын тодытӥсь группаын ужаны-тыршыны. Но берлогес соослэсь группазэс ворсазы, нош Стефани сузэрез но картсэ анай кылынызы тодытӥсь кенеше ыстӥзы. Стефани вера: «Мынам кӧты туж ӝож луиз. Мон малпай, асьме кылын тодытӥсь кенешын уж туж ик трос ӧвӧл шуыса». Но сузэр кивалтэтлэсь кылзӥськиз. Со азьланьтэ: «Дыр ортчыса, мон валай, филиаллэн кутэм ужпумез туж визьмо вал шуыса. Милям кенешысьтымы куд-ог агайёслэн но сузэръёслэн ӵыжы-выжыоссы  пӧлын Адӟись-Ивортӥсьёс ӧвӧл. Соин ик ми соослы семья кадь луимы. Али мон Библиез дышетӥсько сузэрен, кудӥз алигес кенеше берытскиз. Со сяна, мынам тросгес дыры луиз ас поннам Библиез эскерыны». Стефани ватса: «Мон Иеговалы чылкыт возьытлыкен ужасько-тыршисько, малы ке шуоно мон туж тырши кылзӥськыны».

18. Малы туж кулэ кылзӥськыны?

¹⁸ Кылзӥськись луонлы дышетскыны луэ. Иисус шуг-секытъёстэк ӧз улы. Со дышетскиз кылзӥськись луыны, «курадӟонъёс пыр» потыса (Евр. 5:8). Ӵем дыръя ми но дышетскиськомы кылзӥськись луыны, куке секыт югдуръёсы сюриськомы. Кылсярысь, тодӥськоды на-а, кызьы COVID-19 пандемия кутскыку, милемлы ӧз лэзе ни Эксэйлык юртъёсы люкаськыны но коркась корка тодытыны? Капчи-а вал тӥледлы талэсь кылзӥськыны? Капчи ӧй вал ке но, тӥ кылзӥськиды. Та тӥледыз утиз, вын-агайёсын но сузэр-апайёсын кусыпъёстэс юнматӥз но Иеговаез шумпоттӥз. Со сяна, та юрттӥз милемлы вуоно шуг-секытъёслы дасяськыны. Солы луыса милемлы капчигес луоз кылзӥськыны кивалтэтлэсь, кудзэ ми бадӟым куректон дыръя басьтомы. Нош кылзӥськон милесьтым улонмес утёз! (Иов 36:11).

19. Кыӵе валтӥсез муг кылзӥськись луон понна?

¹⁹ Кызьы ми адӟимы, кылзӥськон пайда гинэ вае. Но валтӥсез муг, малы ми Иеговалэсь кылзӥськиськомы,— ми сое яратӥськомы но милям сое шумпоттэммы потэ (1 Иоанн 5:3). Ми ноку ум быгатэ Иеговаез тау карыны ваньмыз умоез понна, мае со милемлы сётэ (Пс. 115:3). Но ми быгатӥськомы кылзӥськыны солэсь но соослэсь, кинъёслы со милемын кивалтыны право сётӥз. Озьы ми визьлыко луэммес возьматӥськомы но Иеговалэсь сюлэмзэ шумпоттӥськомы (Мад. 27:11).