Со арын лэсьтэмын вал куд-ог воштӥськонъёс, кудъёсыз Библиез Эскерисьёсты туж огазеязы. «Возьмаськон башняын» печатланы кутскизы валэктонъёсты Библиысь кылбуръёслы, кудъёссэ котькуд арняе ортчись пумиськонын эскеризы (соку со «Вӧсяськон но Инмарез данъян пумиськон» шуыса нимаське вал). Озьы ик Библиез Эскерисьёс печатлазы календарь, кудаз гожтэмын вал арнялы кылбур но котькуд нуналлы кырӟанлэн номерез. Со кырӟанъёсты кырӟаны соос быгато вал ас понназы Библиез эскерыкузы яке семьяен йыбырттонзы дыръя.

Асьсэлэн пумиськонъёсазы Библиез Эскерисьёс тодытон ужын луэм учыръёссэс вераллязы, Инмарез тау каризы, кырӟанъёс кырӟазы но вӧсяськизы. Э́ва Ба́рни сузэр, кудӥз 1923-тӥ арын 15 арес дыръяз пылатӥськиз, вера: «Мае ке но веран понна, султоно но тазьы шуоно вал: „Мынам Инмарез тау кареме потэ ваньмыз умоез понна, мар со мыным лэсьтӥз“». Куд-ог агайёслы Инмарез тау карыны туж кельше вал. Барни сузэр азьланьтэ: «Куке Го́дуин агаймы Инмарез тау карыны кутске вал, сое дугдытыны уг луы вал ини. Кышноез адӟе вал ке, пумиськонэз нуись агайлэн сое дугдытэмез потэ ини шуыса, со картэзлэсь пиджаксэ каллен кыска вал. Соку Годуин агай верамысь дугдэ но пуксе вал».

Толэзьлы быдэ котькуд кружок (кенеш) нимысьтыз пумиськон ортчытылӥз. Тани мар со сярысь вераськиз 1923-тӥ арын 1-тӥ оштолэзь понна поттэм «Возьмаськон башняын»: «Та пумиськонын тодытон ужын луэм учыръёсты верано но ужасьёслэсь мылкыдзэс ӝутоно. Талы ӝыны пумиськонэз сӥзьыны кулэ. [...] Ми оскиськомы, та пумиськонъёс вын-агайёсты но сузэр-апайёсты эшшо но огазеялозы шуыса».

Ванкуверысь (Канада) 19 аресъем Чарлз Ма́ртин агайлы, кудӥз кенешын ивортӥсь луыса ужаз-тыршиз, та пумиськонъёс бадӟым пайда вайизы. Берлогес со тодаз вайиз: «Со пумиськонъёсын мон тодӥ, кызьы но мар сярысь адямиосын вераськоно, коркась корка тодытыкумы. Ӵем дыръя кин ке но вера вал тодытон ужын луэм учырзэ. Озьы мон валай, кызьы адямиосын вераськонэз кутсконо но мар верано пумит верамзылы».

Со сяна, организациез огазеязы «тодытон ужлы сӥзем нуналъёс». 1923-тӥ арын 1-тӥ оштолэзь  понна поттэм «Возьмаськон башняын» вераськиз: «Кусыпъёсмы эшшо но юнгес мед луозы шуыса, 1923-тӥ арын 1-тӥ куартолэзь, пуксён нунал, тодытон ужлы сӥземын луоз. Собере котькуд толэзьлэн нырысетӥ пуксён нуналыз та ужлы сӥземын луоз... Со нуналэ котькин, кин кружоке пыре, тодытон ужлы кӧня ке дырзэ висъяны кулэ».

Тодытон уже егитъёс но пыриськизы. Хе́йзел Бе́рфорд сузэрлы соку 16 арес гинэ вал. Со тодаз вае: «„Бюллетеньын“ a огшоры вераськон амалъёс печатласькизы, кудъёссэ ми дышетӥськомы вал. Ми песятаеным вань сюлмысьтымы тодытӥмы». Но берлогес Берфорд сузэрез туж паймытӥз одӥг учыр. Со вера: «Одӥг арлыдо агайлы туж уг кельшы вал, мон адямиосын вераськыса ветлӥсько шуыса». Со дыре куд-огъёсыз уг валало вал, котькудӥз Библиез Эскерись Кылдытӥсьмес данъяны кулэ шуыса, озьы ик «егит пиос но нылъёс» (Пс. 148:12, 13). Номыр шоры учкытэк, Берфорд сузэр кизэ ӧз лэзьы. Берлогес со Галаад школалэн кыкетӥ классаз дышетскиз но Панамаын миссионер луыса ужаз-тыршиз. Дыр ортчыса, егитъёслэн тодытэмзы шоры мукет сямен учкыны кутскизы.

Конгрессъёс но вын-агайёслэсь кусыпъёссэс юнматӥзы. Тросэз конгрессъёс дыръя тодытон ужлы сӥзем нуналъёс висъямын вал. Кылсярысь, ваньмыз, кинъёс лыктӥзы Ви́ннипегын (Канада) ортчытӥськись конгрессэ, 31-тӥ южтолэзе ӧтемын вал тодытон уже пыриськыны. Талы луыса тросгес но тросгес адямиос ӟеч иворез кылӥзы. Конгрессэ, кудӥз ортчытӥськиз Виннипегын 5-тӥ гудырикошконэ, ог 7000 адямиос лыктӥзы. Азьвыл тамында адями Канадаын ортчытӥськись конгрессъёсы ноку ӧз ветлы.

1923-тӥ арын 18—26-тӥ гудырикошконэ Лос-Анджелесын (Огазеяськем штатъёс, Калифорния штат) Иеговалэн калыкез понна туж кулэ луись конгресс ортчиз. Кӧня ке арня солэсь азьло газетъёсын конгресс сярысь ялонъёс печатласькизы. Библиез Эскерисьёс 500000 ӧтёнъёсты вӧлмытӥзы. Конгресс сярысь ивортон понна, трамвайёс но машинаос вылын плакатъёс ошемын вал.

 25-тӥ гудырикошконэ, кӧснуналэ, Рутерфорд агай «Ыжъёс но кечъёс» шуыса нимаськись речь вераз. Отын со валэктӥз, «ыжъёс» — со шонерлыко адямиос шуыса. Соослэн зэмлыкез кылзэмзы потэ. Озьы ик соос рай музъем вылын улозы. Собере со «Алон» нимаськись резолюциез лыдӟиз. Та резолюция христиан черкъёслэсь лек ужъёссэс шараяз но Инмарез яратӥсь адямиосты «Быдӟым Вавилонысь» потыны ӧтиз (Усьт. 18:2, 4). Берлогес ӟырдыт мылкыдын тодытӥсь Библиез Эскерисьёс быдэс дунне вылын трос миллион сыӵе резолюциосты вӧлмытӥзы.

Конгресслэн берпуметӥ нуналаз Рутерфорд агай вераз речь, кудӥз нимаськиз «Вань калыкъёс Армагеддонэ мыно, но трос миллион али улӥсьёс ноку уз кулэ». Сое 30000-лэсь тросгес адямиос кылзӥзы. Библиез Эскерисьёс возьмазы, трос адямиос лыктозы шуыса. Соин ик соос арендовать каризы али гинэ пуктэм «Колизей Лос-Анджелеса» стадионэз. Ваньмызлы умой мед кылӥськоз шуыса, агайёс стадионлэсь куараез бадӟыматон системазэ уже кутӥзы. Озьы ик трос адямиос конгрессэз радио пыр кылзӥзы.

1923-тӥ арын тодытон уж паськытгес нуиськыны кутскиз Африкаын, Европаын, Индиын но Лымшор Америкаын. Кылсярысь, Индиын ужаз-тыршиз Адавиманна́тху Джо́зеф агай. Со но кышноез куать нылпиоссэс будэтӥзы. Озьы ке но та агай публикациосмес поттон уже пыриськиз, кудъёсыз печатласькизы малая́лам, тами́л, те́лугу, урду́ но хи́нди кылъёсын.

Сье́рра-Лео́нэ шаерын ужась-тыршись А́льфред Джо́зеф но Ле́нард Бла́кман агайёс Бруклинысь валтӥсь кивалтонние гожтэт гожтӥзы но юрттӥсьёсты ыстыны куризы. 1923-тӥ арын 14-тӥ оштолэзе соос ответ басьтӥзы. Альфред тодаз вае: «Кӧснуналэ бер ӝыт телефонмы жингыртӥз. Телефонмес кутыса, ми кылӥмы, кызьы кин ке но бадӟым куараен юаз: „Тӥ-а Возьмаськон Башнялэн обществояз гожтэт гожъяды но тодытӥсьёсты ыстыны куриды?“» — «Ми»,— шуиз Альфред. Нош со адями вераз: «Соос монэ ыстӥзы». Со вал Уи́льям Бра́ун. Со Анто́ния кышноеныз, озьы ик Луи́з но Лу́си нылъёсынызы ӵош али гинэ Кариб шормуӵъёсысь вуизы. Агайёслы Браун семьяез кема возьмано ӧз луы.

Альфред азьланьтэ: «Ӵукнаяз ми Ленардэн Библиез эскериськомы вал. Озьы ми арнялы быдэ лэсьтылӥмы. Со куспын ми доры бадӟым пиосмурт пыриз. Со вал Уильям Браун. Со туж  ӟырдыт мылкыдо вал, соин ик ӵуказеяз ик сцена вылысен речь вераны дась вал». Толэзь но ӧз ортчы, кызьы Браун агай сьӧраз ваем вань публикациосты сётъяса быдтӥз. Ӝоген солы эшшо 5000 книгаос сётӥзы. Но соос но ӝоген быризы. Озьы ке но Браун агай книгаосын вузкарись кадь тодмо ӧй вал. Со трос аръёс ӵоже Иеговалы оскымон ужаз-тыршиз но аслэсьтыз речьёссэ котьку но Библия вылэ пыкиськыса вералляз. Соин ик сое Библейской Браун шуыса ниманы кутскизы.

Со вакытэ Германиысь агайёс филиаллы выль инты утчаны кутскизы. Ба́рмен карысь юртъёсын инты уг тырмы ни вал. Со сяна, агайёс кылӥзы, француз ожгарчиос та каре лыктыны малпало шуыса. Магдебу́рг карын шедьтӥзы юртъёсты, кудъёсыз туж умой тупало вал печатлан цехлы. 19-тӥ инвожое кылем тӥрлык люкамын но выль Вефиле нуэмын вал. Ӵапак со нуналэ, куке агайёс та сярысь валтӥсь кивалтоннилы веразы, газетъёсын гожтэмын вал, Франция Бармен карез киултӥз шуыса. Агайёс Иеговаез туж тау каризы, дырыз дыръя отысь кошкизы шуыса.

Нош тани кызьы ужъёс мынӥзы Бразилиын. Отчы лыктӥз Джордж Янг агай. Со трос шаеръёсын ӟырдыт мылкыдын ӟеч иворез вӧлмытӥз. Со юрттӥз Бразилиын выль филиал усьтыны. Озьы ик со португал кылын «Возьмаськон Башняез» поттылыны кутскиз. Кӧня ке толэзьёс куспын Янг агай 7000-лэсь тросгес журналъёсты но буклетъёсты вӧлмытӥз. Солэн лыктэмезлы туж шумпотӥз Са́ра Фе́ргусон кышномурт. Со «Возьмаськон башняез» 1899-тӥ арысен лыдӟе вал ини но солэн туж пылатӥськемез потэ вал. Кӧня ке толэзьёс ортчыса, кема витем малпанэз быдэсмиз. Со но ньыль нылпиосыз пылатӥськизы.

Кыӵе пайда вайизы Библиез Эскерисьёслы пумиськонъёс, конгрессъёс но тодытон уж пумысен воштӥськонъёс, кудъёсыз организациын лэсьтэмын вал? Тани мар со сярысь вераськиз 1923-тӥ арын 15-тӥ толсур понна поттэм «Возьмаськон башняын»: «Адӟиське, агайёслэн но сузэръёслэн... юн осконзы шуыса... [...] Ойдолэ уже кутомы ваньзэ, мармы милям вань, но вань кужмысьтымы азьлань мыномы! Вуоно арын милемыз возьма трос уж, озьы ик трос шумпотон но».

1924-тӥ ар но Библиез Эскерисьёс понна туж паймымон вал. Ста́тен шормуӵын, Бруклинысь Вефильлэсь кыдёкын ӧвӧл, агайёс кӧня ке толэзьёс ӵоже пуктӥськон уже пыриськизы, кудӥз 1924-тӥ арлэн кутсконаз йылпумъяськиз. Пуктэм юртъёс агайёсты эшшо но зол огазеязы но ӟеч иворез эшшо но паськыт вӧлмытыны юрттӥзы.