1. Сюлмаське-а Иегова аслаз ужась-тыршисьёсыз сярысь? Валэктэ.

 ИЕГОВА адӟе ваньзэ, маин пумисько солэн ужась-тыршисьёсыз. Со тодэ шумпотон вакытъёсмес но, куректон вакытъёсмес но (Пс. 36:18). Куке со адӟе, секыт дыръя но ми солы ужамысь-тыршемысь ум дугдӥське шуыса, со милемын туж данъяське. Инмар милемыз уг кельты — со милемлы юрттэ но милемыз буйгатэ.

 2. Кызьы Иегова юрттэ соослы, кинъёс куректыса уло, но мар кароно, Иегова милемлы мед юрттоз шуыса?

² Псалтирьын 146:3 вераське, Иегова сюлмынызы чигиськисьёслэсь «яраоссэс бине» шуыса. Татысь адӟиське, Иегова туж сюлмаське шуыса соос сярысь, кинъёс куректыса уло. Нош мар кароно, Иегова милемлы мед юрттоз шуыса? Малпаське таӵе пример вылын. Адями кизэ яке пыдзэ вӧсь кариз ке, со умой эмъясь доры мынэ. Но бурмон понна, солы эшшо мар ке но кароно на — солы эмъясьлэсь кылзӥськоно. Та статьяын ми эскеромы, мар карыны куре милемыз Иегова аслаз Кылыз пыр но мар милемлы кароно, каньыл сюлмын улон понна.

ИЕГОВА ОСКЫТЭ, МИЛЕМЫЗ ТУЖ ДУНЪЯ ШУЫСА

 3. Малы куд-огъёсызлы секыт оскыны, соосты кин ке но яратыны быгатэ шуыса?

³ Та дуннеын тросэз адямиос мукетъёсты уг ярато. Соин ик тросэз малпало, соос нокинлы кулэ ӧвӧл шуыса. Тани мар вера Хе́лен a сузэр: «Пичи дыръям анай-атае монэ нокӧня но ӧз яратэ. Атае туж лек вал. Со котькуд нунал мыным  вералляз, мон номырлы ярантэм адями шуыса». Оло нош, тӥледлы но адямиос сыӵе ик кылъёс веразы, асьсэды тӥледын урод возизы яке тӥледыз ялан тэргазы. Соку тӥледлы секыт, вылды, оскыны, кин ке но тӥледыз яратыны быгатэ шуыса.

 4. Мар карыны кылзэ сётэ Иегова куректыса улӥсьёслы, Псалтирез 33:19 лыдэ басьтыса?

⁴ Кызьы гинэ адямиос асьсэды тӥледын медам возе, Иегова тӥледыз яратэ но дунъя. Со «сюлмынызы чигиськыса улӥсьёслы... матын улэ». (Лыдӟе Псалтирез 33:19.) Эн вунэтэ: Иегова тӥлесьтыд трос умойзэ адӟе, соин ик со тӥледыз ас дораз вайиз (Иоанн 6:44). Инмар котьку тӥледлы юрттыны дась, малы ке шуоно тӥ солы туж дуно потӥськоды.

 5. Кызьы ассэ возиз Иисус соосын, кинъёсты адямиос адӟемпотостэм каро вал, но малы со милемыз дышетэ?

⁵ Ми трос тодыны быгатӥськомы Иеговалэн шӧдонъёсыз сярысь, Иисуслэсь улонзэ эскерыса. Музъем вылын ужакуз-тыршыкуз, Иисус ассэ лякытэн возиз соосын, кинъёсты адямиос адӟемпотостэм каро вал (Матф. 9:9—12). Куке одӥг кышномурт, кудӥзлэн секыт висёнэз вал, бурмон понна, солэн дӥськутэз борды йӧтӥськиз, Иисус сое буйгатӥз но ушъяз (Марк 5:25—34). Иисус Атаез сямен ассэ адямиосын возиз (Иоанн 14:9). Соин ик юн оске: Иегова тӥледыз туж дунъя но умой сямъёстэс адӟе. Кылсярысь, со адӟе, тӥ солы оскиськоды но сое яратӥськоды шуыса.

 6. Мар кароно соослы, кинъёс асьсэды номырлы ярантэм адямиосын лыдъяло?

⁶ Тӥ куке но малпады-а, тӥ номырлы ярантэм адями шуыса? Малпады ке, соку мар кароно? Лыдӟе Библиысь кылбуръёсты, кудъёсаз вераське, Иегова тӥледыз яратэ шуыса, но соос вылыны малпаське  (Пс. 93:19) b. Асьтэды мукетъёсыныз эн ӵошатэ но эн малпалэ со сярысь, мае тӥляд лэсьтэмды уг луы. Малы ке шуоно Иегова тӥлесьтыд быдэстыны луонтэмзэ уг возьма (Пс. 102:13, 14). Тӥледын кин ке но ассэ урод возиз ке, тодады возе: со понна тӥ янгыш ӧвӧл. Иегова судъялоз соосты, кинъёс асьсэды мукетъёсыныз урод возё, но юрттоз соослы, кинъёсты вӧсь каризы (1 Пётр 3:12). Са́ндра сузэр, кудзэ пичи дыръяз анай-атаез вӧсь карыса возизы, вера: «Мон ялан Иеговаез курисько, со мед юрттоз шуыса ачим шоры шонер учкыны но адӟыны сое, мае со мынэсьтым адӟе».

 7. Кыӵе пайда вайыны быгатэ шуг-секытъёс пыр потэммы?

⁷ Тӥ асьтэды номырлы ярантэм адямиен лыдъяськоды ке, со уг возьматы, Иегова но тӥ шоры озьы ик учке шуыса. Со тӥледлы дан сётӥз соин ӵош тодытон уже пыриськыны (1 Кор. 3:9). Тӥ пыр со мукетъёсызлы юрттыны быгатэ. Малы ке шуоно тӥ умойгес валаськоды, вылды, соосты, кинъёс али куректыса уло. Хелен сузэр, кудӥз сярысь вераськиз ини, Иеговалэсь но кенешлэсь юрттэт басьтӥз. Табере со ачиз мукетъёсызлы юрттыны быгатэ. Со вера: «Мон малпай вал, мон номырлы ярантэм адями шуыса. Но Иегова мыным валаны юрттӥз, мукетъёсыз монэ ярато но мон соослы юрттыны быгатӥсько шуыса». Али Хелен пионер луыса ужа-тырше.

ИЕГОВАЛЭН ПОТЭ, МИ МЕД ОСКОМЫ, СО МИЛЕМЫЗ ПРОСТИТЬ КАРИЗ ШУЫСА

 8. Мар карыны кылзэ сётэ Иегова? (Исаия 1:18).

⁸ Иеговалэн куд-ог ужась-тыршисьёсыз туж куректо пылатӥськемзылэсь азьвыл яке собере лэсьтэм сьӧлыкъёссы понна. Но Иегова милемыз туж яратэ. Со ми понна аслэсьтыз Пизэ сётӥз. Инмарлэн потэ, ми та кузьымез мед басьтомы шуыса. Иегова кылзэ сётэ, ми соин кусыпъёсмес c тупатӥмы ке, со милемыз быдэсак простить кароз шуыса. (Лыдӟе Исаиялэсь 1:18.) Ми туж тау кариськомы Иеговалы, со милесьтым сьӧлыкъёсмес вунэтэ, нош со понна лэсьтэм ӟеч ужъёсмес уг вунэты шуыса (Пс. 102:9, 12; Евр. 6:10).

 9. Малы янгышъёсмы понна сюлмаськем интые, умойгес луоз малпаны, мае ми али но азьланяз лэсьтыны быгатӥськомы?

⁹ Азьвыл лэсьтэм сьӧлыкъёсты понна сюлмаськем интые, малпаське со сярысь, мае тӥ али но азьланяз лэсьтыны быгатӥськоды. Ӵапак озьы лэсьтӥз апостол Павел. Куке но со христианъёсты уйылӥз-улляз. Со быгатэ вал ассэ со понна пыкылыса улыны. Но со тодэ вал, Иегова сое простить кариз шуыса (1 Тим. 1:12—15). Павел фарисей луэмез понна но ӧз данъяськы, янгышъёсыз понна но сюлмаськыса ӧз улы (Флп. 3:4—8, 13—15). Со, вань кужымзэ поныса, ужаз-тыршиз но азьпала учкиз. Павел сямен, тӥ но уд быгатӥське азьвылзэ тупатыны. Но тӥ быгатӥськоды али Иеговаез шумпоттыны но сое данъяны, озьы ик возьманы улонэз, кудзэ Иегова адямиослы сётыны малпа.

10. Мар кароно, тӥ кинэ ке вӧсь кариды ке?

¹⁰ Оло нош, тӥ сюлмаськиськоды, азьвыл кинэ ке вӧсь кариды шуыса. Соку мар кароно? Тырше югдурез тупатыны. Кылсярысь, вань сюлмысьтыды куре тӥледыз простить карыны (2 Кор. 7:11). Иеговалы  вӧсяське, со мед буйгатоз шуыса соосты, кинъёсты тӥ вӧсь кариды. Инмар юрттыны быгатэ соослы но, тӥледлы но каньыл сюлмын улыны но солы ужаны-тыршыны.

11. Малы ми дышетскыны быгатӥськомы Иона пророклэсь? (Озьы ик учке суредэз.)

¹¹ Дышетске янгышъёсты вылын но дась луэ Иеговалэсь кылзӥськыны. Тодады вае Иона пророкез. Инмар солы шуиз Ниневияе мыныны, нош со воксё мукет пала кошкиз. Иегова Ионалы юрттӥз янгышсэ валаны но со вылын дышетскыны (Иона 1:1—4, 15, 16; 2:1, 8—11). Иегова пророксэ номырлы ярантэм адямиен ӧз лыдъя. Со нош ик косӥз Ионаез Ниневияе мыныны. Иона аслаз янгышез сярысь жаляз ке но, табере со Иеговалэсь ужзэ быдэстӥз (Иона 3:1—3).

ИЕГОВА МИЛЕМЫЗ БУЙГАТЭ, СВЯТОЙ ДУХСЭ СЁТЫСА

12. Кызьы Иегова милемлы юрттыны быгатэ, ми кышкыт учырен пумиськимы ке? (Филиппыослы 4:6, 7).

¹² Куке ми кыӵе ке кышкыт учырен пумиськиськомы, милемыз буйгатон понна, Иегова милемлы святой духсэ сётэ. Тани мар пыр потоно луиз Ро́н но Кэ́рол кузпалъёслы. Быдэ вуэм пизы ассэ быдтӥз. Соос верало: «Ми пӧртэм шуг-секытъёсын пумиськылӥмы, но таиз самой секытэз вал. Трос уйёсты ми изьытэк потӥмы. Соку ми уйбыт вӧсяськимы. Ми ас выламы шӧдӥмы, Иегова сюлэммес каньыл каре шуыса, кызьы со сярысь гожтэмын Филиппыослы 4:6, 7» (лыдӟе). Тӥ но кышкыт учырен пумиськиды ке, сюлэмдэс Иеговалы усьтэ. Тӥ трос но ӵем вӧсяськиды ке но, со тӥледыз кылзоз (Пс. 85:3; 87:2). Иеговалэсь святой духсэ куре. Со тӥледлы одно ик сое сётоз (Лука 11:9—13).

13. Кызьы святой дух юрттэ милемлы Иеговалы ужаны-тыршыны? (Ефесъёслы 3:16).

¹³ Кышкыт учырен пумиськыса, ми воксё катьтэммыны быгатӥськомы. Сыӵе югдур тӥледлы тодмо-а? Святой дух тӥледлы юрттыны быгатэ азьланяз но Иеговалы ужаны-тыршыны. (Лыдӟе Ефесъёслы 3:16.) Тани мар луиз Фло́ра сузэрен. Соос картэныз миссионеръёс луыса ужазы-тыршизы. Куке со тодӥз, картэз азон-калгон сьӧлыке пыриз шуыса, соос люкиськизы. Флора вера: «Куке картэ сьӧлыказ, мыным туж секыт вал. Мон номыр сярысь малпаськыны но ӧй быгаты ни. Мыным потэ вал, мон уг чида шуыса. Мон Иеговалы вӧсяськи, святой духсэ курыса. Со мыным ваньзэ чиданы юрттӥз но куректӥсь сюлэмме бурмытӥз». Табере Флора эшшо но юн оске, Инмарен ӵош котькыӵе шуг-секыт пыр потыны быгатэ шуыса. Со ватса: «Мынам сыӵе ик шӧдонъёсы, кудъёсыз сярысь вераське Псалтирьын 118:32: „Сюлмылы эркын шокчон сётӥд ке, курон-косонъёсыдлэн сюрес вылтӥзы вамышто“».

14. Мар кароно, эшшо но трос святой духез басьтон понна?

¹⁴ Нош мар кароно святой духез курыса вӧсяськем бере? Лэсьтэ сыӵе ужъёсты, кудъёсыз тӥледлы юрттозы эшшо но трос святой духез басьтыны. Кылсярысь, кенешлэн пумиськонъёсаз ветлэ но ӟеч иворез тодытэ. Озьы ик котькуд нунал Библиез лыдӟе. Со тӥледлы юрттоз Инмарлэн малпанъёсыз вылын малпаськыны (Флп. 4:8, 9). Библиын гожтэмын трос адямиос сярысь, кудъёсыз пӧртэм шуг-секытъёсын пумиськылӥзы. Адӟыны тырше, кызьы Иегова соослы юрттӥз солы оскымон кыльыны. Сандра сузэр, кудӥз  сярысь 6-тӥ абзацын вераськиз ини, трос шуг-секытъёсты чидано луиз. Со вера: «Мыным котьку юрттэ вал Иосифлэн примерез. Со ӧз лэзьы шуг-секытъёслы Иеговаен кусыпъёссэ лябӟытыны» (Ул.-выл. 39:21—23).

ИЕГОВА МИЛЕМЫЗ БУЙГАТЭ АГАЙЁС НО СУЗЭРЪЁС ПЫР

15. Кызьы Иегова милемлы юрттэ но милемыз буйгатэ агайёс но сузэръёс пыр? (Озьы ик учке суредэз.)

¹⁵ Секыт дыръя агайёс но сузэръёс милемлы юрттыны но милемыз буйгатыны быгато (Кол. 4:11). Соос пыр Иегова милемлы яратэмзэ возьматэ. Кызьы соос милемыз буйгато? Соос милемын дырзэс ортчыто но милемыз сак кылзо. Озьы ик соос быгато Библиысь буйгатӥсь кылбур d возьматыны яке милемын ӵош вӧсяськыны (Рим. 15:4). Куддыръя агайёс но сузэръёс тодамы вайыто, кызьы югдурмы шоры учке Иегова. Со сяна, соос уж вылын юртто, кылсярысь, секыт дыръя сиён пӧрало.

16. Мар куддыръя кароно, кин ке милемлы мед юрттоз шуыса?

¹⁶ Куддыръя, кин ке милемлы мед юрттоз шуыса, со сярысь курыны кулэ. Агайёс но сузэръёс милемыз ярато но соослэн милемлы юрттэмзы потэ (Мад. 17:17). Но соос уг тодо, вылды, кызьы ми асьмеды  шӧдӥськомы но мар милемлы кулэ (Мад. 14:10). Тӥляд кыӵе ке сюлмаськонды вань ке, оскымон эшъёсыныды вераське. Вералэ соослы, кыӵе юрттэт тӥледлы кулэ. Луэ вераськыны одӥг-кык тӧроосын, кудъёсызлы тӥледлы вазиськыны капчи. Нош куд-ог сузэръёс визь-кенеш куро юн осконэн мукет сузэръёслэсь.

17. Мар куддыръя люкетэ буйгатскон басьтыны но мар кароно, сое басьтон понна?

¹⁷ Оло нош, тӥледлы сокем секыт, кинэн ке вераськыны кужымды ик ӧвӧл. Оло нош, агайёс но сузэръёс тӥледыз пумозяз уг валало яке кылъёсынызы вӧсь каро (Иак. 3:2). Сыӵе учырын но соослэсь эн палэнске. Соос пыр Иегова тӥледыз буйгатыны быгатэ. Гэ́вин тӧро депрессилэсь курадӟе. Со вера: «Ӵем дыръя мынам нокинэн вераськеме уг поты». Но Гэвин шӧдонъёсызлы уг сётскы. Со агайёсын но сузэръёсын дырзэ ортчытъя но ӵем дыръя собере ассэ умойгес шӧдэ. Нош Э́ми сузэр вера: «Мынам вал сыӵе учыръёсы, кудъёсыныз сэрен мыным секыт адямиослы оскыны. Но мон дышетскисько агайёсме но сузэръёсме яратыны но соослы оскыны, малы ке шуоно мынам Иеговалэсь адӟем кареме потэ. Мон тодӥсько, озьы мон Инмарез шумпоттӥсько шуыса. Нош соку мон ачим но шумпотӥсько».

ВУОНОЕЗЛЫ ОСКОН ТӤЛЕДЫЗ МЕД БУЙГАТОЗ

18. Кыӵе улон дася милемлы Иегова азьланяз но мар кароно милемлы али?

¹⁸ Ӝоген Иегова вань висёнъёсмес но сюлмаськонъёсмес быдтоз (Усьт. 21:3, 4). Соку секытэсь тодэ ваёнъёсмы сюлэммес вӧсь уз каре ни (Ис. 65:17). Ми тодӥмы, Иегова али ик ини туж трос лэсьтэ шуыса, милемыз буйгатон но милемлы юрттон понна. Солэсь юрттэтсэ эн палэнтэ. Котьку оске: «Со тӥ сярысь сюлмаське» (1 Пётр 5:7).