ЭСКЕРОН ПОННА 41-ТӤ СТАТЬЯ
13-ТӤ КЫРӞАН Христослэсь адӟем кариськомы
Малы дышетэ милемыз Иисуслэн берпум 40 нунал ӵоже музъем вылын улэмез
«Ньыльдон нунал ӵоже соослы возьматъяськылӥз но Инмар Эксэйлык сярысь вераса-тодытыса улӥз» (АП. УЖ. 1:3).
МИ ТОДОМЫ
Мар кариз Иисус, берпум 40 нунал ӵоже музъем вылын улыкуз, но кызьы ми солэсь адӟем карыны быгатӥськомы.
1, 2. Мар луиз Иисуслэн кык дышетскисьёсыныз, Еммаусэ мыныкузы?
АСЬМЕ ВАКЫТЫСЬ 33-тӥ ар, 16-тӥ нисан. Иисуслэн дышетскисьёсыз туж ӝожомемын. Соос туж куректо но кышкало. Дышетскисьёс пӧлысь кыкез Иерусалимысь Еммаусэ мыныны пото, со гуртозь ог 11 иськем. Дышетскисьёслэн мылкыдзы туж усемын, малы ке шуоно соос оскизы, Иисус — со Мессия шуыса, кудӥз еврейёслэсь улонзэс умой пала воштоз. Нош Иисусэз виемзы бере соослэн вань осконзы куашказ. Но ӝоген соосты шумпотон возьма.
2 Еммаусэ мыныкузы, дышетскисьёс тодмотэм муртэ пумитало. Соос солы верало, малы соос ӝожомемын но мар луиз Иисусэн. Тодмотэм мурт соосты сак кылзэ но вера соослы сое, мае соос ноку но уз вунэтэ. Со «Моисей бордысен кутскыса, вань пророкъёслэсь... верамзэс валэктэ». Озьы солэн верамез потэ вал, малы Мессия курадӟыны но кулыны кулэ вал. Куке соос куиньназы ик Еммаусэ вуо, дышетскисьёс валало, тодмотэм мурт — со улӟем Иисус шуыса! Малпалэ гинэ, макем дышетскисьёс шумпотӥзы тодыны, Мессия улэп шуыса! (Лука 24:13—35).
3, 4. Кызьы дышетскисьёслэн мылкыдзы воштӥськиз но мае ми эскеромы та статьяын? (Апостолъёслэн ужъёссы 1:3).
3 Берпум 40 нунал ӵоже музъем вылын улыкуз, Иисус трос пол адӟиськылӥз дышетскисьёсыныз. (Лыдӟе Апостолъёслэсь ужъёссэс 1:3.) Нырысь дышетскисьёсыз кышкам, йыромем ыжъёс кадь вал, нош собере соос кышкасьтэм ожгарчиос кадь луизы. Табере соослэн юн мылкыдзы вань Эксэйлык сярысь ӟеч иворез вераны но юрттыны мукетъёсызлы но Христослэн дышетскисьёсыз луыны a.
4 Со, мар кариз Иисус, берпум 40 нунал ӵоже музъем вылын улыкуз, асьмемыз тросэзлы дышетэ. Ойдолэ тодомы, кызьы со нуналъёсы Иисус: 1) дышетскисьёссэ юнматӥз, 2) юрттӥз соослы Гожтэмъёсты умойгес валаны но 3) дышетӥз соосты быдэсъяны ужъёсты, кудъёсыз соослы азьланяз сётэмын луозы. Асьмеос тодомы, кызьы быгатомы Иисуслэсь адӟем карыны.
ЮНМАТЭ МУКЕТЪЁССЭ
5. Малы Иисуслэсь дышетскисьёссэ юнматоно вал?
5 Иисуслэсь дышетскисьёссэ юнматыны кулэ вал. Малы? Тросэз соос пӧлысь, Иисуслэн дышетскисьёсыз луон понна, кельтӥзы коркаоссэс, ӵыжы-выжыоссэс но ужзэс (Матф. 19:27). Нош кинэ ке но со понна адӟемпотостэм карыны кутскизы (Иоанн 9:22). Адямиос дась вал ваньзэ сое чиданы, малы ке шуоно оскизы, Иисус — со Мессия шуыса, кудзэ соос туж возьмазы (Матф. 16:16). Нош куке Иисусэз виизы, соос ӝоже усизы, малы ке шуоно уг тодо вал, мар луоз азьланяз. Тӥни малы соосты юнматыны кулэ вал.
6. Мар кариз Иисус улӟемез бере?
6 Иисус вала вал, дышетскисьёсызлэн усем мылкыдзы уг возьматы, соослэн осконзы ляб шуыса. Озьы соос яратоно кулэм эшсы понна куректӥзы. Соин улӟем нуналаз ик Иисус дыртӥз соосты буйгатыны. Кылсярысь, со возьматскиз Магдалина Мариялы, куке со Иисуслэн шайгуэз дорын бӧрдыса сылӥз (Иоанн 20:11, 16). Иисус вераськиз Еммаусэ мынӥсь кык дышетскисьёсыныз. Озьы ик вераськиз апостол Пётрен (Лука 24:34). Малы со милемыз дышетэ? Ойдолэ тодомы, мар луиз, куке Иисус вераськиз Магдалина Марияен.
7. Мае адӟиз Иисус, Мария шоры учкыса, но мар кариз Иисус Мария понна? (Иоанн 20:11—16). (Озьы ик учке суредэз.)
7 Лыдӟе Иоаннлэсь 20:11—16. 16-тӥ нисанэ, ӵукна вазь ик, кӧня ке кышномуртъёс Иисуслэн шайгуэз доры мынӥзы (Лука 24:1, 10). Иисуслэсь мугорзэ шедьтытэк, Магдалина Мария дыртӥз со сярысь Пётрлы но Иоаннлы вераны. Соосыз соку ик Марияен ӵош шайгу доры мынӥзы. Куке апостолъёс адӟизы, Иисуслэн мугорыз зэмзэ ик ӧвӧл шуыса, соос доразы бертӥзы. Нош Мария шайгу дорын бӧрдыса кылиз. Солэн малпанэз но ӧй вал, Иисус сое адӟе шуыса. Мариялэсь бӧрдэмзэ адӟыса, Иисус ӧз чида, возьматскиз солы. Иисус солы кӧня ке огшоры кылъёс вераз, кудъёсыз сое туж буйгатӥзы. Озьы ик со Марияез улӟемез сярысь дышетскисьёсызлы ивортыны косӥз (Иоанн 20:17, 18).
Иисус сямен, адӟе, маин пумиськоно луо агайёс но сузэръёс, но соослэсь шӧдонъёссэс валаны тырше. (Учке 7-тӥ абзацез.)
8. Кызьы асьмеос Иисуслэсь адӟем карыны быгатомы?
8 Кызьы ми Иисуслэсь адӟем карыны быгатомы? Агайёслэсь но сузэръёслэсь шуг-секытъёссэс адӟимы ке но соосты валаны тыршимы ке, ми соосты юнматомы но соослы юрттомы азьланяз но Иеговалы ужаны-тыршыны. Тани мар вера Джо́селин сузэр, кудӥзлэн сузэрез бырыны шедиз: «Со шудтэм учыр бере, сюлэм вӧсь луэмме сяна, мон номыре ӧй шӧды ни. Озьы толэзь бӧрсьы толэзь кыстӥськиз». Одӥг кузпалъёс сое куное ӧтизы, сак кылзӥзы но веразы солы, Иегова сое туж яратэ шуыса. Джоселин вера на: «Куректонэ пӧлы мон выйисько вал ини. Но Иегова со кузпалъёс пыр ӧз сёты мыным выйыны. Соос юрттэмен мыным выльысь кужым пыриз но мылкыды кылдӥз Иеговалы ужаны-тыршыны». Асьмеос но агайёсты но сузэръёсты сак кылзӥмы ке, соосты валаны тыршимы ке, со юрттоз соослы азьланяз но Иеговалы ужаны-тыршыны (Рим. 12:15).
ЮРТТЭ МУКЕТЪЁСЫЗЛЫ ИНМАРЛЭСЬ КЫЛЗЭ УМОЙГЕС ВАЛАНЫ
9. Кыӵе шуг-секытэн пумиськизы Иисуслэн дышетскисьёсыз но кызьы соослы Иисус юрттӥз?
9 Иисуслэн дышетскисьёсыз Инмарлэн Кылызлы оскизы но соя улыны тыршизы (Иоанн 17:6). Но соос ӧз валалэ, малы Дышетӥсьсэс йыруж лэсьтӥсь шуизы но виизы. Иисус тодӥз, дышетскисьёсыз Иеговалы оско но сое ярато шуыса, нош Гожтэмъёсты пумозяз уг валало на шуыса (Лука 9:44, 45; Иоанн 20:9). Соин ик со дышетӥз соосты Инмарлэн Кылыз вылын малпаськыны. Кызьы со сое лэсьтӥз, умой адӟиське Еммаусэ мынӥсь кык дышетскисьёсыныз вераськемысьтыз.
10. Кызьы Иисус юрттӥз дышетскисьёсызлы валаны, со Мессия шуыса? (Лука 24:18—27).
10 Лыдӟе Лукалэсь 24:18—27. Иисус аслэсьтыз кин луэмзэ Еммаусэ мынӥсь кык дышетскисьёсызлы соку ик ӧз вера. Со интые со соослы юанъёс сётъяз. Малы? Солэн тодэмез потӥз, дыр, мар соос малпало. Дышетскисьёсыз веразы, соос возьмазы, Иисус рим кивалтӥсьёс интые кивалтоз шуыса. Дышетскисьёссэ сак кылзэмез бере Иисус Гожтэмъёс пыр валэктӥз, со вылын азьпалзэ ивортонъёс быдэсмизы шуыса b. Со ӝытэ ик Иисус тае мукет дышетскисьёсызлы но валэктӥз (Лука 24:33—48). Малы со асьмемыз дышетэ?
11, 12. а) Кызьы Иисуслэсь адӟем карыны луоз, адямиосын Библиез дышетыкумы? (Озьы ик учке суредъёсты.) б) Кызьы одӥг агай дышетскисезлы юрттӥз?
11 Кызьы ми Иисуслэсь адӟем карыны быгатомы? Адямиосын Библиез дышетыкуды, соослы юанъёс сётъялэ. Озьы тӥ быгатоды тодыны, мар адями малпа но мар сое сюлмаськытэ (Мад. 20:5). Собере юрттэ дышетскисьлы Библиысь кылбуръёс шедьтыны, кудъёсыз солы юрттозы. Куддыръя дышетскисьлы верам потэ, мар солы кароно. Но со интые, умойгес луоз соин ӵош Библиысь кылбуръёс вылын малпаськыны. Милям потэ, дышетскись ачиз мед валалоз шуыса, кызьы Библиысь визь-кенешез улонэ пыртоно. Учкомы Ганаысь Но́рти агайлэсь учырзэ.
12 Норти агай Библиез дышетыны кутскиз 16 арес дыръяз. Солы семьяез туж люкетыны выриз. Но Нортиез со ӧз дугдыты. Мар солы юрттӥз? Со тодаз вайиз, кызьы агай, кудӥз соин Библиез дышетӥз, соин ӵош малпаськиз Матфейлэсь ӟеч иворысь 10-тӥ люкет вылын. Отын верамын, зэмос христианъёсты уйылозы-уллялозы шуыса. «Куке мон адӟи, кызьы та кылъёс мон вылын быдэсмыны кутскизы,— шуэ Норти,— мон валай, зэмлыкез шедьтӥ шуыса». Озьы ик со агай Нортиен ӵош малпаськиз кылъёс вылын, кудъёсыз гожтэмын Матфейлэсь 10:16. Отын гожтэмын, чакласькись луоно шуыса. Норти валаз, семьяезлы зэмлыкез веракуз, солы лякытэн но гажаса вераськоно шуыса. Пылатӥськемез бере Норти агай пионер луыны малпаз. Нош атаезлэн потэ вал, со вылӥ образование мед басьтоз шуыса. Таяз учыре но агай ӧз дышеты Нортиез, мар кароно. Со интые, со шедьтӥз Библиысь тупась возетъёсты но Нортиен ӵош малпаськиз соос вылын. Мар кариз Норти? Со пионер луиз. Со понна атаез сое дорысьтыз улляз. Жаля-а Норти агай, пионер луиз шуыса? Тани мар со вера: «Мон тодӥсько, шонер лэсьтӥ шуыса». Ойдолэ асьмеос но, дырмес жалятэк, дышетомы адямиосты Библиысь возетъёсъя улыны. Соку соослэн осконзы юн луоз (Еф. 3:16—19).
Иисус сямен, юрттэ мукетъёсызлы Инмарлэсь Кылзэ умойгес валаны. (Учке 11-тӥ абзацез.) e
ЮРТТЭ АГАЙЁСЛЫ «САЛАМЪЁС-КУЗЬЫМЪЁС» ЛУЫНЫ
13. Мар кариз Иисус, инме кошкемез бере тодытон уж медаз дугды шуыса? (Ефесъёслы 4:8, 11).
13 Музъем вылын улыкуз, Иисус Атаезлэсь сётэм ужзэ быдэстӥз (Иоанн 17:4). Но со ӧз малпа, со гинэ Иеговалэсь сётэм ужзэ быдэстыны быгатэ шуыса. Куинь но ӝыны ар ӵоже Инмарлы ужакуз-тыршыкуз, со дышетӥз дышетскисьёссэ солы, мае ачиз быгатӥз но тодӥз. Со соослы возьматӥз, кызьы тодытоно, кызьы умой дышетӥсь луоно но кызьы Иеговалэн ыжъёсыз сярысь сюлмаськоно. Нош куке со инме ӝутскиз, та пиосмуртъёс быгатӥзы ини тодытон но дышетон ужен кивалтыны. Куд-огъёсызлы соос пӧлысь 30 арес но ӧй вал на, дыр. (Лыдӟе Ефесъёслы 4:8, 11.) Ойдолэ тодомы, кызьы Иисус, музъем вылын берпум 40 нуналъёссэ улыкуз, юрттӥз со пиосмуртъёслы «саламъёс-кузьымъёс» луыны.
14. Малы дышетӥз Иисус дышетскисьёссэ, музъем вылын берпум 40 нуналъёссэ улыкуз? (Озьы ик учке суредэз.)
14 Кулэ дыръяз Иисус дышетскисьёсызлы шонерак визь-кенеш сётэ вал. Кылсярысь, со адӟиз, куд-огъёсыз уг оско, со улӟиз шуыса. Соин ик со соосты тупатӥз но соослы визь-кенеш сётӥз (Лука 24:25—27; Иоанн 20:27). Озьы ик Иисус дышетскисьёсызлэн тодазы вайытӥз, мар валтӥсез луэ. Со вераз, соослы малпано ӧвӧл шуыса, кызьы тросгес коньдон поттоно, нош нырысь ик малпано шуыса, кызьы агайёс но сузэръёс сярысь умойгес сюлмаськоно (Иоанн 21:15). Со сяна, Иисус валэктӥз, котькудӥзлы аслэсьтыз ужъёссэ быдэстоно но малпано ӧвӧл шуыса, кыӵе ужъёс мукетъёсызлы сётэмын (Иоанн 21:20—22). Нош эшшо Иисус юрттӥз дышетскисьёсызлы Эксэйлык сярысь зэмлыкез шонер валаны но тодытон ужез нырысетӥ интые пуктыны (Ап. уж. 1:6—8).
Иисус сямен, дышетэ агайёсты кенеш сярысь сюлмаськыны. ( Учке 14-тӥ абзацез.)
15, 16. а) Мар карыны кулэ тӧроос, Христослэсь адӟем карыса? б) Кызьы юрттӥз Патриклы дырыз дыръя сётэм визь-кенеш?
15 Кызьы тӧроос Иисуслэсь адӟем карыны быгатозы? Соослы дышетоно агайёсты, туж егитъёссэ но, соос кенешын пӧртэм ужъёсты быдэстыны мед быгатозы шуыса c. Тӧроос дышетыны кулэ егит агайёсты зӥбыт-востэмесь, оскиськымонэсь луыны но дась луыны мукетъёсызлы юрттыны (1 Пётр 5:5; 1 Тим. 3:1; 2 Тим. 2:2).
16 Учкомы, кызьы дырыз дыръя сётэм визь-кенеш Па́трик агайлы юрттӥз. Егитгес дыръяз со ассэ мукетъёсыныз лякыт ӧз возьы, сузэръёсын но. Одӥг тӧро солы визь-кенеш сётӥз. «Мон шумпотӥсько, мыным визь-кенеш сётӥзы шуыса,— вера Патрик. — Куке мон адӟисько вал, мукетъёсызлы уж сёто, нош мыным — уг шуыса, мыным туж ӝож луэ вал. Но тӧролэн визь-кенешез юрттӥз мыным валаны, со сярысь сюлмаськем интые, мыным нырысь ик тыршоно шуыса зӥбыт-востэм луыны но агайёсыз но сузэръёсыз юнгес яратыны». Озьы тӧролэн визь-кенешез юрттӥз Патриклы 23 арескын ик тӧро луыны (Мад. 27:9).
17. Кызьы Иисус возьматӥз, дышетскисьёсызлы оске шуыса?
17 Иисус дышетскисьёссэ ӟеч иворез вераны гинэ ӧз косы. Озьы ик со адямиосты дышетыны но косӥз. Дышетскисьёсыз, оло, малпало вал, Иисуслэсь сётэм ужзэ быдэстыны уз быгатэ шуыса. Но Иисус оскиз, соослэн ваньмыз пӧрмоз шуыса. Соин ик со вераз: «Кызьы Монэ Атае ыстӥз, Мон но тӥледыз ыстӥсько» (Иоанн 20:21).
18. Кызьы тӧроос Иисуслэсь адӟем карыны быгато?
18 Кызьы тӧроос Иисуслэсь адӟем карыны быгатозы? Тӧроос визьмо лэсьто, асьсэлэсь ужъёссэс мукет агайёсты но быдэсъяны дышето ке (Флп. 2:19—22). Кылсярысь, соос быгато курыны егит агайёсты Эксэйлык юртэз утялтыны яке эскерыны-тупатъяны. Агайлы уж сётыкуз, тӧро валэктӥз ке, кызьы сое быдэстоно, но агайлэсь котькуд вамышсэ ӧз чакла ке, со возьматоз, агайлы оске шуыса. Мэ́тью агай, кудӥз али тӧро луыса ужа-тырше, шумпотэ, тӧроос сое ӵапак озьы дышетӥзы шуыса. Тани мар со вера: «Дышетскыку янгышъёстэк уг луы. Но мон шумпотӥсько, тӧроос мыным янгышъёсы вылын дышетскыны юрттӥзы шуыса» d.
19. Мар карыны мылкыддэс ӝутӥз та статья?
19 Мар кариз Иисус, музъем вылын берпум 40 нуналъёссэ улыкуз? Со дышетскисьёссэ юнматӥз, дышетӥз но дасяз быдэсъяны ужъёсты, кудъёсыз соослы азьланяз сётэмын луозы. Ойдолэ асьмеос но озьы ик лэсьтомы (1 Пётр 2:21). Ми оскыны быгатӥськомы, Иисус милемлы юрттоз шуыса, малы ке шуоно со кылзэ сётӥз: «Вань нуналъёсы, дунне бырытозь, Мон тӥледын огазьын» (Матф. 28:20).
15-ТӤ КЫРӞАН Данъя Иеговалэсь Пизэ!
a Евангелиосын но Библиысь мукет книгаосын гожтэмын учыръёс, ку улӟем Иисус дышетскисьёсызлы возьматскиз. Сое адӟизы: Магдалина Мария (Иоанн 20:11—18); мукет кышномуртъёс (Матф. 28:8—10; Лука 24:8—11); кык дышетскисьёс (Лука 24:13—15); Пётр (Лука 24:34); апостолъёс, куке Фома соосын ӧй вал (Иоанн 20:19—24); апостолъёс, куке Фома соосын вал (Иоанн 20:26); сизьым дышетскисьёс (Иоанн 21:1, 2); 500-лэсь тросгес дышетскисьёс (Матф. 28:16; 1 Кор. 15:6); Иаков выныз (1 Кор. 15:7); вань апостолъёс (Ап. уж. 1:4) но апостолъёс, куке соос Вифания дорын вал (Лука 24:50—52). Та сяна мукет учыръёс но вал на, дыр, но Библиын соос сярысь гожтэмын ӧвӧл (Иоанн 21:25).
b Мессия сярысь азьпалзэ ивортонъёсты шедьтыны луоз jw.org сайтысь «Исполнились ли пророчества о Мессии на Иисусе Христе?» статьяысь.
c Куд-ог агайёс 25 арескысен ик ини ёросэз чаклась луыны быгато. Но нырысь соослы кӧня ке дыр ӵоже тӧро луыса ужаны-тыршыны кулэ.
d Тросгес тодон понна, кызьы эшшо тӧроос дышетыны быгато егит агайёсты кенеш сярысь сюлмаськыны, учке 2018-тӥ арын гудырикошкон понна поттэм «Возьмаськон башняез», 11-тӥ но 12-тӥ бамъёсты, 15—17-тӥ абзацъёсты, озьы ик 2015-тӥ арын 15-тӥ оштолэзь понна поттэм «Возьмаськон башняез», 3—13-тӥ бамъёсты.
e СУРЕДЫН. Библиез дышетыкузы, агай пиосмуртэн ӵош Библиысь кылбуръёсты эскере но солы валаны юрттэ, мар Иеговалы кельше. Собере дышетскись ёлка шудонъёссэ жаг пӧлы куштэ.
