Вефильысь агайёс арлэсь кемагес Нью-Йоркысь Ста́тен шормуӵын WBBR радиостанциез пуктӥзы. Соос писпуосты погыртӥзы, ужасьёслы улон понна бадӟым корка но студиялы юрт пуктӥзы. Та ужез йылпумъям бере агайёс радиооборудованиез пуктыны кутскизы. Но ваньмыз капчи ӧй вал.

Радиостанцилэсь валтӥсь антенназэ пуктыны туж секыт вал. Со 90 метрлэсь кузьгес вал. Сое ошоно вал кык пу мачтаос вискы, кудъёсыз 60 метрлэсь ӝужытгес вал. Нырысь номыр ӧз пӧрмы. Но агайёс кизэс ӧз лэзе. Иеговалэн юрттэменыз соос ваньзэ быгатӥзы. Ка́лвин Про́ссер агай, кудӥз отын ужаз, тодаз вае: «Милям ужмы соку ик пӧрмысал ке, ми ог-огмес ушъясалмы но данъяськыса шуысалмы: „Милям ваньмыз пӧрмиз!“». Но агайёс валало вал, соос Иеговалэн юрттэменыз гинэ та ужез быдэстыны быгатӥзы шуыса. Но таин шуг-секытъёссы ӧз быре.

Со вакытэ радио вӧлмемын ӧй вал на. Тупась тӥрлык шедьтыны туж секыт вал. Но агайёс быгатӥзы киысь передатчик басьтыны, кудӥзлэн кужымез 500 ватт вал. Нош микрофонэз соос огшоры телефонысь поттӥзы. Одӥг тулыспал ӝытэ агайёс малпазы ваньзэ тае эскерыны. Соослы эфире потоно но мае ке верано вал. Соос малпазы Эксэйлык кырӟанъёсты кырӟаны. Эрне́ст Ло́у агай пальпотыса тодаз вае, маин ваньмыз та йылпумъяськиз. Кырӟакузы  студие Рутерфорд судья b жингыртӥз. Со та передачаез кылзӥз Бруклинын, радиостанцилэсь 25 иськем кемын.

Рутерфорд агай шуиз: «Дугдэ! Тӥ урамысь коӵышъёс кадь кесяськиськоды!» Агайёс соку ик передатчикез кысӥзы. Сыӵе кылъёсты кылыны агайёслы умой ӧй вал ке но, соос валазы, тӥрлыксы ужа но станциез лэзьыны луэ шуыса.

1924-тӥ арын 24-тӥ тулыспалэ, нырысетӥ передача мыныку, Рутерфорд агай радиостанциез сӥзиз «Мессия Эксэйлыклэн ужезлы». Солэн верамезъя, радиостанцилэн ужпумез — «юрттыны вань адямиослы, кыӵе гинэ осконзы соослэн медам луы, Библиез умойгес тодыны но валаны, кыӵе дыре ми улӥськомы».

Нырысетӥ передача туж умой ортчиз. Вуоно 33 арзэ Иеговалэн ужась-тыршисьёсыз WBBR радиостанция пыр Инмарлэн Эксэйлыкез сярысь иворез вӧлмытӥзы.

1924-тӥ арын пӧсьтолэзе Библиез эскерисьёс люкаськизы конгрессэ, кудӥз ортчытӥськиз Колу́мбусын (Ога́йо штат). Соос отчы быдэс дунне вылысь лыктӥзы. Речьёс верамын вал англи, араб, венгер, грек, итальян, литов, немец, поляк, ӟуч, украин, француз кылъёсын, озьы ик скандинавской кылъёсын. Куд-ог речьёсты кылзыны луэ вал радио пыр. Агайёслэн куремзыя, со интыысь газетын конгресслэн котькуд нуналыз сярысь гожъязы.

24-тӥ пӧсьтолэзе, покчиарняе, 5000-лэсь тросгес вын-агайёс но сузэр-апайёс тодытыны мынӥзы. Соос ог 30 000 книгаос вӧлмытӥзы но кӧня ке сюрс адямиосын Библиез дышетыны кутскизы. «Возьмаськон башняын» со нунал нимамын вал «конгресслэн самой шумпотон люкетэз» шуыса.

25-тӥ пӧсьтолэзе, удмуртарняе, Рутерфорд агай, речьсэ веракуз, документ лыдӟиз, кудаз черклэн ужъёсыз шараясько вал. Отын гожтэмын вал, политика, религия но коммерция удысъёсысь кивалтӥсьёс адямиослы люкето шуыса тодыны бакель каронъёс сярысь, кудъёссэ Инмарлэн Эксэйлыкез ваёз. Со сяна,  документын вераське вал, со кивалтӥсьёс «Нациослэн Лигазы пала пыриськизы но веразы, „со пыр Инмар музъем вылын кивалтэ“ шуыса». Сыӵе иворез вӧлмытон понна, Библиез эскерисьёслы туж кышкасьтэмесь луоно вал.

Берлогес «Возьмаськон башняын» гожтэмын вал: «Колумбусын люкаськем Инмарлэн ожгарчиосыз трос ӧй вал ке но, соослэн осконзы юнмаз... ...Табере соос тушмонъёссылэсь уг кышкало вал». Ле́о Кла́ус агай, кудӥз со конгрессын вал, тодаз вае: «Конгрессысь кошкыкумы, милям туж потэ вал кылэммес ми палан улӥсь вань адямиослы вераммы».

Коньывуонэ Библиез эскерисьёс кӧня ке миллион буклетъёсты вӧлмытӥзы, кудъёсаз печатламын вал Рутерфорд агайлэн конгрессын черклы пумит верам кылъёсыз. Кли́вленд пичи карын (Оклахо́ма штат) Фрэнк Джо́нсон агай участоксэ ортчиз. Сое мукет ивортӥсьёс пумитаны кулэ вал. Но со дырозь 20 минут кылемын на вал. Урамын возьмаса сылыны кышкыт вал. Малы ке шуоно, иворзэ кылыса, адямиос солы лекъяськыны кутскизы, соин ик сое утчало вал. Джонсон агай малпаз черке ватскыны. Отын нокин ӧй вал бере, агай со буклетэз пасторлэн Библияз но котькуд пукон вылэ понӥз. Фрэнк сое туж ӝог лэсьтӥз. Солэн дырыз эшшо кылемын на вал бере, со эшшо кык черкъёсын ӵапак озьы ик буклетъёсты кельтӥз.

Собере Фрэнк бызьыса мынӥз отчы, кытын агайёсын пумиськыны кулэ вал, но автозаправка сьӧры ватскиз. Отысен со адӟиз, пиосмуртъёс, кудъёсыз сое кутыны туртто вал, сое адӟытэк, палэнтӥ ортчизы шуыса. Ӝоген агайёс вуизы. Фрэнк машинаязы пуксиз но, соос кошкизы.

Со агайёс пӧлысь одӥгез тодаз вае: «Карысь потыкумы, ми со куинь черкъёсты адӟимы. Котькудӥз азьын ог 50 адями сылэ вал. Кин ке но буклетэз лыдӟе вал, нош кин ке но сое пасторлы возьматэ вал. Макем умой, соос милемыз ӧз кутэ шуыса! Ми Иеговалы тау каримы, со милемлы тушмонъёсмылэн ныр улазы ик аслэсьтыз ужзэ быдэстыны юрттӥз шуыса».

Мукет шаеръёсын но Библиез эскерисьёс кышкасьтэмесь вал. Францилэн уйпалаз Ю́зеф Кретт агай тодытӥз отын улӥсь Польшаысь лыктэм шахтёръёслы. Со малпа вал «Кулэмъёс ӝоген улӟытэмын луозы» речь вераны. Агайёс но сузэръёс юрттӥзы солы ӧтёнъёсты вӧлмытыны. Куке со сярысь священник тодӥз, со адямиослы отчы мыныны ӧз лэзьы. Озьы ке но агаймес кылзыны 5000-лэсь тросгес адями лыктӥз, ачиз священник но. Юзеф священникез куриз, Библия вылэ пыкиськыса, валэктыны, малы со оске, но соиз пумит кариськиз. Речьсэ верамез бере Кретт агай сьӧраз басьтэм вань публикациосты адямиослы сётъяз, малы ке шуоно соослэн Библиез умойгес тодэмзы потэ вал (Ам. 8:11).

Клод Бра́ун агай тодытыны лыктӥз Африкаысь Гана шаере (азьвыл Зарни Ярдур шуыса нимаськиз). Со речьёс вералляз но публикациосты вӧлмытылӥз. Та юрттӥз трос адямиослы зэмлыкез шедьтыны. Джон Бла́нксон, кудӥз фармацевт луыса ужаны дышетске вал, Браун агайлэсь одӥг речьсэ кылзӥз. Со соку ик валаз, зэмлыкез шедьтӥз шуыса. Джон тодаз вае: «Зэмлыкез тодыса, мон туж шумпотӥ. Мон ялан со сярысь ӵош дышетскисьёсылы вералляй».

 Библиысь Джон тодӥз, Инмар, Пи но святой дух — одӥг ӧвӧл шуыса. Соин ик со Англикан черке мынӥз, та сярысь священникен вераськон понна. Но священник, со шоры кесяськыса, сое улляз. Со шуиз: «Тон христианъёс пӧлысь ӧвӧл, тон Шайтанлэн ляльчиез! Кошкы татысь!»

Дораз бертыса, Джон священниклы гожтэт гожтӥз но ӵектӥз солы пумиськыны но ваньмыз азьын эскерыны, вера-а Библия, Инмар, Пи но святой дух — одӥг шуыса. Нош священник Джонэз косӥз валтӥсь дышетӥсез доры мыныны. Дышетӥсь Джонлэсь юаз, зэм-а со священниклы гожтэт гожтӥз.

— Зэм,— шуиз Джон.

Дышетӥсь Джонэз косӥз со священниклы гожтэт гожтыны, сое простить карыны курыса. Соин ик Джон гожтӥз:

«Сэр, дышетӥсе монэ косӥз тӥледыз курыны монэ простить карыны. Мон дась сое лэсьтыны, тӥ соглаш кариськиды ке, тӥ зэмос луисьтэм дышетонъёслы дышетӥськоды шуыса».

— Бланксон, тон зэм-а сое гожтыны малпаськод? — паймыса юаз дышетӥсь.

— Зэм. Мынам шонерзэ гожтэме потэ.

— Тонэ соку ик дышетскон интыысьтыд поттозы. Тон уд валаськы-а, священниклы пумит вераны но со дыре ик дышетскондэ азьланьтыны уд быгатӥськы шуыса?

— Но, сэр, куке тӥ милемыз дышетӥськоды, нош ми мае ке ум валаське, ми быгатӥськомы ук тӥледлы юанъёс сётъяны?

— Быгатӥськоды.

— Мон сое ик лэсьтӥ. Священник милемыз Библилы дышетӥз. Нош мон солы юан сётӥ. Со уг быгаты ке мыным валэктон сётыны, малы мон сое курыны кулэ монэ простить карыны?

Бланксон сое простить карыны курыса гожтэт ӧз гожты. Озьы ке но со дышетскон интыысьтыз поттэмын ӧй вал.

Толсур понна поттэм «Возьмаськон башняын» гожтэмын вал: «Ми быдэсак соглаш Давидлэн кылъёсыныз: „Ожмаськон понна уго Тон, мыным кужым сётыса, кусме думид“ (Псалтирь 17:40). Макем паймымон ар со вал! Ми адӟимы, Инмар милемлы аслэсьтыз ужзэ быдэсъяны юрттӥз шуыса... Солэн оскымон ужась-тыршисьёсыз шумпотыса тодытӥзы».

Ар пумын агайёс малпазы Чикаго пала эшшо одӥг радиостанциез пуктыны. Сое нимазы WORD, кудӥз «кыл» шуэм луэ. Со туж тупась ним вал, малы ке шуоно со радиостанция пыр эшшо но трос адямиос Инмарлэсь Кылзэ кылыны быгатӥзы. Передатчик, кудӥзлэн кужымез 5000 ватт вал, сигнал лэзьыны быгатэ вал кӧня ке сю иськем кеме, Канадае но.

1925-тӥ арын Иегова валаны юрттӥз азьпалзэ ивортонэз, кудӥз гожтэмын Усьтӥськонын, 12-тӥ люкетын. Куд-огъёсызлы со валэктон ӧз кельшы. Соос Иеговалы ужамысь-тыршемысь но дугдӥзы. Но тросэз вын-агайёс шумпотӥзы. Соос эшшо но умой валазы, мар луиз инмын но кызьы со герӟаськемын музъем вылысь Инмарлэн калыкеныз.