1. Кыӵе кузьымъёс сётӥз милемлы Иисус?

 ИИСУС мында ӟеч ужъёс одӥг адями но ӧз лэсьты. Музъем вылын улыкуз, Иисус паймымон амалэн мукетъёсызлы юрттӥськиз (Лука 9:12—17). Самой бадӟым кузьым со кузьмаз, ми понна аслэсьтыз улонзэ сётыса (Иоанн 15:13). Улӟемез бере но Иисус шырыт сямо луэмысь ӧз дугды. Со Атайзэ куриз милемлы святой духсэ сётыны, со милемыз мед дышетоз но мед буйгатоз шуыса (Иоанн 14:16, 17; 16:13). Нош кенешлэн пумиськонъёсаз Иисус милемыз дася быдэс дунне вылын адямиосты дышетыны (Матф. 28:18—20).

 2. Кинъёс со «саламъёс-кузьымъёс», кудъёсыз сярысь вераське Ефесъёслы 4:8, ВД?

² Учкомы на, кыӵе эшшо кузьым сётӥз милемлы Иисус. Кызьы гожтӥз апостол Павел, инме ӝутскыса, Иисус «адямиосты сётӥз, кудъёсыз солэсь саламъёс-кузьымъёс луизы». (Лыдӟе Ефесъёслы 4:8 сноскаысь a.) Павеллэн верамезъя, саламъёс-кузьымъёс — со пиосмуртъёс, кудъёсыз кенеш сярысь сюлмасько (Еф. 1:22, 23; 4:11—13). Соос пӧлы пыро кенешлы юрттӥсьёс, тӧроос но ёросэз чакласьёс b. Ми валаськомы, соос сьӧлыкоесь шуыса, соин ик соос янгышало (Иак. 3:2). Но Иисус Христос соос пыр милемлы юрттэ. Соос — Иисуслэн кузьымъёсыз.

 3. Кызьы ваньмы ми юрттыны быгатӥськомы агайёслы кенешез юнматыны? Вералэ пример.

 ³ Иисус косӥз со пиосмуртъёсты кенешез юнматыны (Еф. 4:12). Но ваньмы ми соослы юрттыны быгатӥськомы. Ӵошатомы сое Эксэйлык юртэз пуктонэн. Кин ке но пуктӥськон бордын ужа, кылсярысь, бетон кисьтэ яке борддоръёсты ӝутэ. Нош кин ке но соослы юрттӥське, кылсярысь, сиён пӧраса яке кулэ луись материалъёсты вайыса. Ӵапак озьы ик кенешез юнматонын кенешлы юрттӥсьёс, тӧроос но ёросэз чакласьёс валтӥсь инты басьто. Нош ваньмы ми кылъёсынымы но ужъёсынымы соослы юрттыны быгатӥськомы. Ойдолэ эскеромы, кыӵе кулэ луись ужез соос нуо но кызьы ми соослы но Иисуслы тау кареммес возьматыны быгатӥськомы.

КЕНЕШЛЫ ЮРТТӤСЬЁС ЮРТТЭТ СЁТО

 4. Мар каризы кенешлы юрттӥсьёс нырысетӥ даурын?

⁴ Нырысетӥ даурын куд-ог агайёс кенешлы юрттӥсьёс луыса ужазы-тыршизы (1 Тим. 3:8). Павел ӵапак соос сярысь вераз, вылды, куке юрттэт сётон сярысь гожтӥз (1 Кор. 12:28). Соос кулэ луись ужъёсты быдэсъязы, луоз, тӧроос тросгес дырзэс но кужымзэс кенешез дышетонлы но юнматонлы висъяны мед быгатозы шуыса. Озьы ик кенешлы юрттӥсьёс Священной Гожтэмлэсь копиоссэ лэсьтӥзы яке со ужез быдэстон понна кулэ луись материалъёсты басьтылӥзы, вылды.

 5. Мар каро туннэ кенешлы юрттӥсьёс вын-агайёс но сузэр-апайёс понна?

⁵ Нош мар каро туннэ кенешлы юрттӥсьёс? Соос туж трос ужъёсты быдэсъяло (1 Пётр 4:10). Кылсярысь, соос тодытон понна участокъёс сярысь сюлмасько, публикациослы заказ лэсьто, аудио- но видеооборудованиез чаклало но Эксэйлык юртъёсты эскерыны-тупатъяны юртто. Солы луыса кенешлэн пумиськонъёсыз но тодытон уж, кызьы кулэ, радызъя ортче (1 Кор. 14:40). Со сяна, куд-ог кенешлы юрттӥсьёс ужан нуналъёсы ортчись пумиськонын пунктъёс дасяло но шутэтскон нуналъёсы речьёс верало. Куддыръя кенешлы юрттӥсьёсты куро юрттыны тӧроослы, кудъёсыз тодытон ужез нуись группа понна кыл куто. Нош куддыръя тӧроос со агайёсты ӧтё юрттыны вын-агайёсты но сузэр-апайёсты юнматыны.

 6. Вералэ, мар понна тӥ кенешлы юрттӥсьёсты дунъяськоды.

⁶ Ойдолэ тодомы, мар верало агайёс но сузэръёс кенешлы юрттӥсьёс сярысь. Боливиысь Бе́берли c сузэр вера: «Туж бадӟым тау соослы! Пумиськонъёс туж умой ортчо. Соослэн тыршемзылы луыса мон быгатӥсько кырӟаны, валэктонъёс сётъяны, речьёс кылзыны, суредъёсты но видеороликъёсты учкыны. Озьы ик ми быгатӥськомы пумиськонъёсын кышкатэк дышетскыны, нош лыктэммы уг луы ке, видеосвязь пыр пумиськонъёсты учкыны. Нош пумиськон бере кенешлы юрттӥсьёс ас мылкыд кареммыя сётэм коньдонэз лыдъяло, милемлы публикациосты сётъяло но шумпотыса утялскон ужъёсы пырисько. Кызьы соосты уд яраты?» Колумбиысь Ле́сли сузэр, кудӥзлэн картэз тӧро луыса ужа-тырше, вера: «Кенешын туж трос ужъёс! Кыӵе умой, куд-огъёссэ кенешлы юрттӥсьёс быдэсъяло шуыса. Соос ӧй юрттысалзы ке, мон аслэсьтым картэ воксё ӧй адӟысал. Мон туж тау карисько со агайёслы, соос котьку юрттыны дась шуыса!» Тӥ но та сузэръёслэн верамъёсынызы соглаш, дыр (1 Тим. 3:13).

 7. Кызьы кенешлы юрттӥсьёс понна тау кареммес возьматоно? (Озьы ик учке суредъёсты.)

 ⁷ Библия милемыз ӧте: «Тау карыса улэ» (Кол. 3:15). Кенешлы юрттӥсьёслы тау кареммес пушкамы возёно ӧвӧл, со сярысь верано. Тани кызьы сое лэсьтэ Кши́штоф нимо тӧро, кудӥз Финляндиын ужа-тырше: «Мон соослы открытка яке сообщение ыстӥсько, отчы Библиысь кыӵе ке кылбур гожтӥсько но верасько, мар понна соослы тау шуэме потэ». Нош тани мар каро Выль Каледониысь Паска́ль но Жаэ́ль кузпалъёс: «Берло дыре ми трос вӧсяськиськомы кенешлы юрттӥсьёс сярысь, соос понна тау карыса но соослы юрттэт курыса». Иегова сыӵе вӧсяськонъёсты кылэ, нош со быдэс кенешлы пайда вае (2 Кор. 1:11).

ТӦРООС — «ТӤ ДОРЫН ВАНЬ КУЖЫМЗЭ ПОНЫСА УЖАСЬЁС»

 8. Мар каризы тӧроос нырысетӥ даурын? (1 Фессалоникаослы 5:12, 13).

⁸ Нырысетӥ даурын тӧроос туж сюлмаськизы агайёс но сузэръёс сярысь (лыдӟе 1 Фессалоникаослы 5:12, 13; 1 Тим. 5:17). Соос ужпумъёс кутылӥзы, кудъёсыз быдэс кенешен герӟаськемын вал. Озьы ик соос пумиськонъёсты ортчытъязы но, агайёслэсь но сузэръёслэсь осконзэс юнматон понна, соослы яратыса визь-кенешъёс сётъязы (2 Тим. 4:2; 1 Фес. 2:11, 12). Со сяна, со пиосмуртъёс асьсэ семьяоссы сярысь сюлмаськизы. Соос соослы юрттӥзы Иеговаен умой кусыпъёс возьыны но тыршизы, соослэн ваньмыз кулэез мед луоз шуыса (1 Тим. 3:2, 4; Тит. 1:6—9).

 9. Мар каро тӧроос туннэ?

⁹ Туннэ но тӧроос туж трос ужъёсты быдэсъяло. Соос — ӟеч иворез тодытӥсьёс (2 Тим. 4:5). Соос кенешын тодытон ужез радъяло, милемыз тодытыны но дышетскисьёсты дасяны дышето, озьы ик асьсэос но ӟырдыт мылкыдын тодыто. Озьы ик тӧроос — гажась-жалясь судьяос, соос котькинэ шонер судить каро. Куке христианъёс бадӟым сьӧлык лэсьто, тӧроос соослы юртто Иеговаен кусыпъёссэс тупатыны. Со дыре ик тӧроос тыршо, кенеш чылкыт мед луоз шуыса (1 Кор. 5:12, 13; Гал. 6:1). Но нырысь ик тӧроос — возьмасьёс (1 Пётр 5:1—3). Соос речьёс верало, кенешысь котькинэн умойгес тодматскыны тыршо но вын-агайёс но сузэр-апайёс доры ветло, соосты юнматон понна. Со сяна, куд-ог тӧроос Эксэйлык юртъёсты пуктон но эскерон-тупатъян ужъёсы пырисько, конгрессъёсты радъяны юртто, эмъюртъёсын герӟаськонъя комитетъёсын ужало-тыршо но эмъюртъёсын кыллись агайёс но сузэръёс сярысь сюлмасько. Тӧроос ми понна туж трос лэсьто!

10. Мар понна тӥ дунъяськоды тӧроосты?

¹⁰ Иегова азьло ик вераз, тӧроос ми сярысь сюлмаськозы но ми ум ни кышкалэ шуыса (Иер. 23:4). Финляндиысь Йоха́нна сузэр сое ас вылаз шӧдӥз. Тани мар луиз, куке анаез секыт висьыны усиз: «Мон мукетъёсызлы сюлэмме усьтыны дышемын ӧвӧл ке но, одӥг тӧро, кудзэ мон туж ик умой уг тодӥськы вал, монэ сак кылзӥз, монэн ӵош вӧсяськиз но оскытӥз, Иегова монэ яратэ шуыса. Мон мар верамзэ вунэтӥ ини, но мон умой тодӥсько на, сюлмы каньыл луиз шуыса. Мон малпасько, со пыр Иегова мыным юрттӥз шуыса». Нош кызьы тӥляд тӧроосты тӥледлы юрттӥзы?

11. Кызьы тӧроослы тау кареммес возьматыны луэ? (Озьы ик учке суредъёсты.)

¹¹ Иегова возьма, ми тӧроослы ужамзы понна тау каромы шуыса (1 Фес. 5:12, 13). Финляндиысь Хенрие́тта сузэр вера: «Тӧроослэн  асьсэлэн но трос ужъёссы, сюлмаськонъёссы вань, куддыръя соослэн кужымзы но быре. Озьы ке но соос котьку юрттыны дась. Куддыръя мон соослы верасько: „Тон туж умой тӧро!“». Турциысь Сера́ сузэр вера: «Тӧроослэсь мылкыдзэс ӝутыны кулэ, соос азьланяз но ужаны-тыршыны мед быгатозы шуыса. Ми быгатӥськомы соослы открытка гожтыны, куное ӧтьыны яке соосын ӵош тодытыны». Потэ-а тынад кыӵе ке тӧролы тау каремед? Со сярысь солы вера яке кызьы ке мукет сямен тау каремдэ возьматы (1 Кор. 16:18).

ЁРОСЭЗ ЧАКЛАСЬЁС КЕНЕШЪЁСТЫ ЮНМАТО

12. Кин пыр нырысетӥ даурын Иисус кенешъёсты юнматылӥз? (1 Фессалоникаослы 2:7б, 8).

¹² Иисус Христос кивалтэм улсын Иерусалимысь тӧроос Павелэз, Варнаваез но мукет пиосмуртъёсты пӧртэм кенешъёсы ыстылӥзы (Ап. уж. 11:22). Со пиосмуртъёслэн ужпумзы вал кенешъёсты юнматыны (Ап. уж. 15:40, 41). Соос, асьсэды жалятэк, агайёссы но сузэръёссы сярысь сюлмаськизы, соос понна улонзэс но сётыны дась вал. (Лыдӟе 1 Фессалоникаослы 2:7б, 8.)

13. Мар каро ёросэз чакласьёс?

¹³ Ёросэз чакласьёслы туж трос ветлоно луэ. Куддыръя, кенеше вуон понна, соос трос иськемъёс ортчо. Котькуд арняе ёросэз чаклась пумиськонъёсын речьёс вера, вын-агайёсын но сузэр-апайёсын пумиськылэ но соосты юнматэ, пионеръёсын но тӧроосын пумиськонъёс ортчытэ, озьы ик тодытонлы сӥзем пумиськонъёсты ортчытэ. Со улосысь но ёросысь конгрессъёсты радъя но отын речьёс вера. Ёросэз  чаклась пионеръёсты дышетӥсь школаын дышетэ, быдэс ёросысь пионеръёсын нимысьтыз пумиськонэз радъя но филиалэн сётэм мукет ужъёсты быдэсъя — куд-огъёссэ туж ӝог быдэстоно луэ.

14. Мар понна тӥ дунъяськоды ёросэз чакласьёсты?

¹⁴ Кыӵе пайда вае ёросэз чакласьёслэн ужзы кенешъёслы? Тани мар вера Турциысь агай: «Ёросэз чакласьлэн ветлэмез бере мынам мылкыды ӝутске вын-агайёслы но сузэр-апайёслы эшшо но трос юрттӥськыны. Ми доры пӧртэм ёросэз чакласьёс ветлӥзы, но мон ноку ӧй шӧды, соос монэн вераськыны уг ик ваньмо шуыса». Нош тани мар вера Йоханна сузэр, кудӥз сярысь вераськиз ини. Огпол со ёросэз чакласен тодытӥз. Соос нокинэ ӧз шедьтэ, озьы ке но со вера: «Мон ноку уг вунэты со нуналэз. Кыкез ик апае мукет интые кошкемын, мон соослэсь туж мӧзмисько. Нош ёросэз чаклась мыным валаны юрттӥз, али ми нимаз улӥськомы ке но, выль дуннеын ми матысь адямиосынымы но эшъёсынымы люкиськытэк улыны быгатомы шуыса». Оло нош, тӥляд но та выллем учыръёсты вал (Ап. уж. 20:37—21:1).

15. а) Кызьы ёросэз чакласьёслы тау кареммес возьматыны луэ? (3 Иоанн 5—8). (Озьы ик учке суредъёсты.) б) Малы ми дунъяськомы кенешлы юрттӥсьёслэсь, тӧроослэсь но ёросэз чакласьёслэсь кышнооссэс но кызьы соослы тау кареммес возьматыны луэ? (Учке  «Эн вунэтэ кышнооссы сярысь» рамкаез.)

¹⁵ Апостол Иоанн Гаийез ӧтиз азьланяз но куно карыны пӧртэм кенешъёсы ветлӥсь агайёсты но солы вераз: «Кызьы кулэ Инмар понна, озьы соосты сюрес вылэ келяд ке, Тон умой лэсьтод». (Лыдӟе 3 Иоаннлэсь 5—8.) Нош кызьы милям куно кареммес возьматэммы луэ? Кылсярысь, ми быгатӥськомы ёросэз чакласез ас дорамы ӧтьыны нуназе карыны. Озьы ик ми быгатӥськомы  тодытонлы сӥзем пумиськонъёсы ветлыны, кудзэ со ортчытэ. Лесли сузэр, кудӥз сярысь 6-тӥ абзацын вераськиз, эшшо мар ке но каре на. Со вера: «Мон ёросэз чакласьёс понна вӧсяськисько но Иеговаез курисько соослы ваньзэ кулэзэ сётыны. Озьы ик ми картэным соослы гожтэтъёс гожъяськомы но вераськомы, ми соослэсь тыршемзэс туж дунъяськомы шуыса». Эн вунэтэ, ёросэз чакласьёс ми кадь ик висё, мар ке сярысь сюлмасько, куддыръя соослэн мылкыдзы но куашка. Оло нош, тӥляд ӟеч кылъёсты яке пичи кузьымды соосты туж юнматоз! (Мад. 12:25).

МИЛЕМЛЫ ТУЖ КУЛЭ КЕНЕШЛЫ ЮРТТӤСЬЁС, ТӦРООС НО ЁРОСЭЗ ЧАКЛАСЬЁС

16. Мар сярысь малпаськыны быгато агайёс? (Мадёнъёс 3:27).

¹⁶ Милемлы кулэ трос пиосмуртъёс, кудъёсыз кенешъёс сярысь сюлмаськозы. Тон пылатӥськем агай ке, быгатӥськод-а тон юрттыны? (Лыдӟе Мадёнъёсты 3:27.) Пуктӥд-а тон аслыд ужпум кенешлы юрттӥсь луыны? Тон кенешлы юрттӥсь ке ини, тыршиськод-а тон тӧро луыны? d Быгатӥськод-а тон аслад улонад мае ке воштыны, Эксэйлыкез тодытӥсьёслы школаын дышетскон понна? Отын тон дышетскод быдэсъяны ужъёсты, кудъёссэ тыныд Иисус сётыны быгатэ. Тон малпаськод ке, тынад уз пӧрмы шуыса, Иеговалы вӧсяськы. Солэсь святой духсэ кур, котькыӵе ужез быдэстыны мед быгатод шуыса (Лука 11:13; Ап. уж. 20:28).

17. Мар сярысь вера, милям кенешлы юрттӥсьёсмы но тӧроосмы вань шуыса?

¹⁷ Иисус кылзэ сётӥз, та дуннелэн пумозяз аслаз дышетскисьёсыныз огазьын луоз шуыса (Матф. 28:20). Соин ик со милемлы кенешлы юрттӥсьёсты, тӧроосты но ёросэз чакласьёсты сётӥз. Ми туж тау кариськомы яратӥсь но сюлмаськись Эксэймылы, кудӥз милемлы та агайёсты сётӥз! Ми туж дунъяськомы соослэсь тыршемзэс, соин ик милям соослы тау кареммес возьматэммы потэ. Иеговалы но тау карыны эн вунэтэ, малы ке шуоно «котькудӥз ик ӟеч, дун-шектэм кузьым» со дорысь потэ (Иак. 1:17).