КРЕЗЬГУР вашкала израиль калыклэн улоназ туж бадӟым инты басьтэ вал. Библиын ӵем вераське крезьгуро инструментъёс но кырӟанъёс сярысь. Зэмзэ вераса, Священной Гожтэмлэн ог дасэтӥ люкетэз — со кырӟанъёс. Соос пӧлысь самой тодмоосыз — псаломъёс, Кырӟанъёс пӧлысь кырӟан но Иеремиялэн бӧрдонэз. Соин ик одӥг книгаын гожтэмын: «Библия возьматэ, крезьгур израиль калыклэн вань улон удысъёсаз вал шуыса» a.

Крезьгур огшоры улонын. Израиль калык крезьгур пыр аслэсьтыз шӧдонъёссэ возьматэ вал (Ис. 30:29). Кинэ ке эксэе пуктыку, ожмаськонын вормон басьтыку но праздникъёсты пусйыку, кышномуртъёс бубенъёсын шудо, шумпотыса кырӟало но экто вал (Суд. 11:34; 1 Экс. 18:6, 7; 3 Экс. 1:39, 40). Нош кин ке кулыку, израиль калык куректэмзэ ӝож гуръёс пыр возьматэ вал (2 Пар. 35:25). Кызьы вераське Макклинтоклэн но Стронглэн энциклопедиязы, «израиль калык крезьгурез туж яратэ вал».

Крезьгур эксэй юртын. Израиль эксэйёс но крезьгурез яратӥзы. Саул ас дораз Давидэз ужаны басьтӥз, со солы крезен мед шудоз шуыса (1 Экс. 16:18, 23). Куке Давид ачиз эксэй луиз, со крезьгуро инструментъёс лэсьтылӥз, кырӟанъёс гожъяз но оркестр кылдытӥз, кудӥз берлогес Иеговалэн храмаз шудӥз (2 Пар. 7:6; Ам. 6:5). Нош Соломон эксэйлэн юртаз кырӟась нылъёс но пиос вал (Екк. 2:8).

Крезьгур Инмарлы йыбыртъянын. Крезьгур Иеговалы йыбыртъянын бадӟым инты басьтэ вал. Иерусалимысь храмын крезьгуро инструментъёсын 4000 шудӥсьёс вал (1 Пар. 23:5). Соос шудӥзы гумыосын, кимвалъёсын, крезьёсын но мукет инструментъёсын (2 Пар. 5:12). Но соос гинэ крезьгуръёсын Иеговаез ӧз данъялэ. Иерусалиме арлы быдэ ортчытӥськись праздникъёсы ветлыкузы, израиль калык пӧлысь тросэз Вылӥе тубыку кырӟанъёсты кырӟазы (Пс. 119—133). Озьы ик, иудейёслэн гожтэмзыя, Пасха сиёнэз сиыкуз, израиль калык куд-ог псаломъёсты кырӟаз b.

Крезьгур туннэ но Инмарлэн ужась-тыршисьёсызлэн улоназы бадӟым инты басьтэ (Иак. 5:13). Кырӟанъёс Иеговалы йыбыртъянмы пӧлы пыро (Еф. 5:19). Крезьгур милемыз вын-агайёсынымы но сузэр-апайёсынымы огазея (Кол. 3:16). Озьы ик со милемлы юрттэ шуг-секытъёс пыр потыны (Ап. уж. 16:25). Со сяна, крезьгур пыр ми быгатӥськомы Иеговалы оскеммес но сое яратэммес возьматыны.