1, 2. а) Малы егит христианъёс Шайтанэз но периосты вормыны быгато? (Учке статья кутсконысь суредэз.) б) Мае ми эскеромы та статьяын?

 АПОСТОЛ Павел христианъёсты рим ожгарчиосын ӵошатӥз. Зэм, ми ожмаськонэ пыриськиськомы. Но ми адямиослы пумит ум нюръяськиське, асьмеос Шайтанлы но периослы пумит нюръяськиськомы. Соос туж быгатӥсь ожгарчиос. Нырысь учкыса, соос вормыны луонтэм кадь пото. Соос азьын тужгес но ляб адӟисько егит христианъёс. Быгато-а егитъёс вормыны кескич духовной кылдытэмъёсты, кудъёсыз адямиослэсь трослы кужмогес? Быгато! Малы ке шуоно Иегова соослы кужым сётыны быгатэ. Но со ваньмыз ӧвӧл на. Умой дышетэм ожгарчиос сямен, егитъёс «Инмарлэсь вань ожмаськон тӥрлыкъёссэ» вылазы дӥсяло. (Лыдӟе Ефесъёслы 6:10—12.)

² Та примерез вераса, Павел рим ожгарчиослэн ожмаськон тӥрлыкъёссы сярысь малпаз, луоз (Ап. уж.  28:16). Ойдолэ эскеромы та примерез но тодомы, малы куддыръя егитъёслы духовной ожмаськон тӥрлыкъёсты нуллыны секыт луэ но кызьы соос соослы юртто.

3, 4. Малы Инмарлэн Кылысьтыз зэмлыкез рим ожгарчилэн еэныз ӵошатыны луоз?

³ Лыдӟе Ефесъёслы 6:14. Рим ожгарчиослэн кус еосазы корт пластинкаос тупатэмын вал, кудъёсыз ожгарчиослэсь кусъёссэс утё вал. Еэз вань ожмаськон дӥськут вылэ керттылӥзы, кудӥз ожгарчилэсь мугорзэ уте вал. Солы луыса пельпумъёслы сокем секыт ӧз йӧты ни. Куддыръя е бордын юри тупатэмын вал инты, кытчы юнмато вал мечез но кинжалэз. Е юн керттэмын вал ке, ожгарчи кышкатэк оже мыныны быгатэ вал.

⁴ Со выллем ик Инмарлэн Кылысьтыз зэмлыкъёс утё милемыз изъянлэсь, кудзэ вайыны быгато зэмос луисьтэм дышетонъёс (Иоанн 8:31, 32; 1 Иоанн 4:1). Макем юнгес зэмлык кускамы думемын луоз, сокем капчигес луоз «шонер улонлэсь корт дӥсьсэ» нуллыны. Мукет кылъёсын вераса, макем юнгес ми Инмарлэсь зэмлыксэ яратӥмы, сокем капчигес луоз Инмарлэн шонерлыко эсэпъёсызъя улыны (Пс. 110:7, 8; 1 Иоанн 5:3). Со сяна, Инмарлэн Кылысьтыз зэмлыкъёсты умой валамы ке, ми осконмылэсь ум куштӥське но, кулэ луиз ке, кылмес юасьлы ответ сётыны но быгатомы (1 Пётр 3:15).

5. Малы милемлы ноку но пӧяськоно ӧвӧл?

⁵ Милям кусъёсамы Библиысь зэмлык думемын луиз ке, ми соя уломы но ноку но ум пӧяське. Малы милям пӧяськеммы уг поты? Малы ке шуоно пӧяськон — со Шайтанлэн одӥгез тужгес но азинлыко ожтӥрлыкез. Пӧяськон изъян вае кызьы пӧясьлы, озьы ик солы оскисьлы но (Иоанн 8:44). Соин ик, асьмеос тырбыдэстэмесь ке но, тыршоно пӧяськытэк улыны (Еф. 4:25). Но со капчи ӧвӧл. Тани мар вера 18 аресъем Абигейл: «Куддыръя, пӧяд ке, умойгес луоз кадь потэ, малы ке шуоно озьы шуг-секытъёслэсь палэнскыны луэ». Озьы ке но Абигейл ноку уг пӧяськы. Малы? Со валэктэ: «Пӧяськытэк улон юрттэ мыным Иегова азьын чылкыт возьытлыкен улыны. Нош анай-атае но эшъёсы тодо, мыным котьку оскыны луэ шуыса». 23 аресъем Виктория вера: «Ноку уд пӧяськиськы но осконэдлэсь уд куштӥськиськы ке, тонэ мыскыл карыны быгато. Но учконо ке, тон котьку вормисе потӥськод: тынад кышканэд быре, Иеговалы матэ кариськиськод но тонэ яратӥсьёс тонэ гажаны кутско». Соин ик ойдолэ ноку но кускысьтымы зэмлыкез ум куштэ.

6, 7. Малы Иеговалэсь шонерлыко эсэпъёссэ рим ожгарчиослэн корт дӥсенызы ӵошатыны луоз?

⁶ Нырысетӥ даурын рим ожгарчиослэн корт дӥсьёссы ӵемысь лэсьтэмын вал корт пластинкаослэсь, кудъёсыз одӥгез вылэ мукетыз юнматӥсько вал. Со пластинкаос мугоръя куасалтэмын но быдэс мугорез ворсало вал. Ог-огзы борды соос капыртонъёсын, е бычыосын но ку еосын юнматэмын  вал. Ожгарчилэн пельпумъёсыз но корт пластинкаосын ворсамын вал, кудъёсыз ку еос борды юнматэмын вал. Сыӵе дӥсен ожгарчилы секыт вал вырыны, но солы ялан чаклано вал, умой-а пластинкаос юнматэмын. Но со дыре ик сыӵе ожмаськон дӥськут уте вал ожгарчиез но солэсь сюлэмзэ тушмонлэн ньӧлъёсызлэсь но мечезлэсь.

⁷ Со туж умой возьматэ, кызьы Иеговалэн шонерлыко эсэпъёсыз утё символической сюлэммес (Мад. 4:23). Ожгарчи номыр понна но ӧй воштысал ожмаськон корт дӥсьсэ векчигес кортлэсь лэсьтэм дӥсьлы. Озьы ик ми но ноку но ум воштэ Инмарлэсь шонерлыко эсэпъёссэ асьме эсэпъёсынымы. Сюлэммес утён понна, ас визьмынымы гинэ визьмо ужпумъёс кутыны ми ум быгатӥське (Мад. 3:5, 6). Соин ик милемлы ялан чаклано, умой-а утё сюлэммес Иеговаен сётэм ожмаськон тӥрлыкъёс.

8. Малы туж кулэ Иеговалэн эсэпъёсызъя улыны?

⁸ Куддыръя тон малпаськод, луоз, Иеговалэн шонерлыко эсэпъёсызъя улыны туж секыт но соос тонэ эриктэм каро шуыса. 21 аресъем Дэниел нимо вын-агай вера: «Дышетӥсьёс но ӵош дышетскисьёсы монэ серекъяло вал, мон Библиысь возетъёсъя улӥсько шуыса. Огвакытэ мынам мылкыды туж куашказ». Мар солы юрттӥз? «Дыр ортчемъя,— шуэ Дэниел,— мон валай, маин Иеговалэн эсэпъёсыз умойгес луо. Куд-ог „эшъёсы“ наркоманъёс луизы, мукетъёсыз школаез куштӥзы. Туж жаль вал адӟыны, кызьы соослэн улонзы мыдлань кошкиз. Иегова зэмзэ но милемыз уте». Нош тани мар вера 15 аресъем Мадисон нимо сузэр: «Мыным капчи ӧвӧл Иеговалэн эсэпъёсызлэсь кылзӥськыны но лэсьтытэк улыны сое, мае мукет егитъёс умоен яке тумошоен лыдъяло,— мон понна со зэмос нюръяськон». Мар солы юрттэ? Мадисон вера: «Мон аслым тодам вайытӥсько, Иеговалэсь нимзэ нуллӥсько шуыса но визь сынаськонъёс — со Шайтанлэн лэзем ньӧлъёсыз шуыса. Со нюръяськонын мон вормисе потӥсько ке, со монэ туж шумпоттэ».

9—11. а) Кыӵе символической пыдкутчанзы луыны кулэ христианъёслэн? б) Мар кароно, ӟеч иворез вераны медам кышкалэ шуыса?

⁹ Лыдӟе Ефесъёслы 6:15. Рим ожгарчилэн пыдаз пыдкутчанэз ӧй вал ке, со дась ӧй вал оже мыныны. Ожгарчилэн пыдкутчанэз сандалилы кельше вал. Солэн пыдэсыз куинь полэс кулэсь вуремын вал, но солы луыса ожгарчилэн пыдыз юн сылэ вал. Сыӵе пыдкутчан кемалы тырме но пыдын умой пуке вал.

¹⁰ Символической пыдкутчан христианъёслы тупаса улон сярысь иворез вераны юрттэ (Ис. 52:7; Рим. 10:15). Озьы ке но, зэмлыкез вераны луонлык кылдыку, соослы кышкасьтэм сям кулэ. Тани мар вера 20 аресъем Бо нимо вын-агай: «Азьло мон ӵош дышетскисьёсылы ӟеч иворез вераны кышкасько вал. Мон возьдаськи, малпасько. Али мон валасько, возьдаськыны номырлэсь вал шуыса, но шумпотыса огъёзъёсыным Инмар сярысь вераськисько».

 ¹¹ Кызьы верало тросэз егит христианъёс, мукетъёсызлы ӟеч иворез вераны соос азьло ик умой-умой дасясько ке, со юрттэ соослы кышкатэк вераны. Мар юрттоз тыныд котьку дась луыны? Джулия, кудӥзлы 16 арес, вера: «Мон сумкаям котьку кыӵе ке но публикацимес нуллӥсько. Со сяна, мон туж сак кылзӥсько, куке ӵош дышетскисьёсы малпанъёссэс яке осконзы сярысь верало, нош собере малпасько, кызьы соослы юрттыны луоз. Азьло ик дасяськыса, мон вераны быгатӥсько сое, мар соослэн сюлмазы пырысал». Макензи, кудӥзлы 23 арес, вера: «Огъёзъёсыныд тон астэ лякыт возиськод ке но соосты кылзыны дась ке, тон валалод, маин соослы пумиськоно луэ. Мон тыршисько лыдӟыны ваньзэ, мае организацимы егитъёслы поттэ. Соин ик мон быгатӥсько огъёзъёсылы Библиысь тупась кылбурез возьматыны яке интернетысь материалъёсмес, кудъёсыз соослы пайда ваёзы». Кызьы адӟиське сузэръёслэн кылъёсысьтызы,  макем умойгес тон дасяськиськод осконэд сярысь вераськыны, сокем умойгес символической пыдкутчан пыдад пукоз.

12, 13. Кыӵе ӟырдатыса лэзьям ньӧлъёсты уже кутэ Шайтан?

¹² Лыдӟе Ефесъёслы 6:16. Рим ожгарчилэн бадӟым щитэз ньыль сэрго вал но ожгарчиез пельпумысеныз пыдесозяз ворса вал. Со уте вал ожгарчиез тушмонлэсь но солэн ньӧлъёсызлэсь.

¹³ Шайтанлэн ӟырдатыса лэзьям ньӧлъёсыз пӧлы пыре Иегова сярысь пӧяса верам, кылсярысь, со тон сярысь уг сюлмаськы но тонэ уг яраты шуыса пӧям. Тани 19 аресъем Идалэн примерез, кудӥзлэн малпанъёсыз кылдыло, со номырлы ярасьтэм адями шуыса. Со вера: «Ӵем дыръя мон малпасько, Иегова мон дорысь кыдёкын но солэн уг поты, мон солэн эшез мед луо шуыса». Мар юрттэ солы та выллем «ньӧлъёслэсь» утиськыны? «Пумиськонъёс туж юнмато мынэсьтым осконме,— шуэ Ида.— Азьло мон пумиськонын огшоры пукисько но эскеронэ уг пыриськиськы вал. Мон малпасько вал, мынам малпанъёсы нокинлы тунсыко ӧвӧл шуыса. Нош табере мон пумиськонъёслы дасяськисько но кык-куинь пол комментарий сётыны тыршисько. Со капчи ик ӧвӧл, но озьы мынам сюлмы каньыл луэ. Нош макем монэ юнмато вын-агайёс но сузэр-апайёс! Котькуд пумиськон бере мон шӧдӥсько, Иегова монэ яратэ шуыса».

14. Малы дышето милемыз Идалэн кылъёсыз?

¹⁴ Идалэн учырысьтыз адӟиське: рим ожгарчилэн щитэз одӥг быдӟа кыле, нош милям осконмылэн щитэз бадӟымгес яке пичигес луыны быгатэ. Нош кыӵе со луоз, ми асьмеос бырйиськомы (Матф. 14:31; 2 Фес. 1:3). Соин ик милемлы осконмес юнматоно.

15, 16. Малы оскиськонэз корт изьыен ӵошатыны луоз?

¹⁵ Лыдӟе Ефесъёслы 6:17. Корт изьы, кудзэ рим ожгарчиос йыразы поно вал, соослэсь йырзэс, чыртызэс но бамзэс уте вал. Куд-ог корт изьыос бордын кутон тупатэмын вал, ожгарчи сое кияз нуыны мед быгатоз шуыса.

¹⁶ Озьы ик, кызьы корт изьы ожгарчилэсь йырзэ уте вал, утиськон понна оскиськонмы милесьтым визьёсмес, малпанъёсмес, уте (1 Фес. 5:8; Мад. 3:21). Оскиськон юрттэ милемлы Инмарлэсь кыл сётонъёссэ тодамы возьыны но шуг-секытъёс шоры шонер учкыны (Пс. 26:1, 14; Ап. уж. 24:15). Нош «утиськонлэн корт изьыез» милемыз мед утёз шуыса, сое йырамы пононо, киямы гинэ нуллоно ӧвӧл.

17, 18. а) Кызьы Шайтан милемыз косыны тырше «утиськонлэсь корт изьызэ» куштыны? б) Кытысь адӟиське, Шайтанлэн пӧяны тыршемезлы ми ум сётскиське шуыса?

¹⁷ Кызьы Шайтан милемыз косыны тырше «утиськонлэсь корт изьызэ» куштыны? Тодамы ваёмы, кызьы со Иисуслэн учыраз вал. Шайтан тодэ вал, Иисуслы быдэс музъемен кивалтыны сӥземын шуыса. Но Иисуслы возьмано вал, ку вуоз Иеговаен тупатэм дыр. Нош нырысь солы курадӟонэз чидано но кулоно вал. Соин ик Шайтан Иисуслы вакчи но капчи сюрестӥ мыныны ӵектӥз: Иисус  Шайтанлы йыбырттысал ке, со соку ик ваньзэ басьтысал (Лука 4:5—7). Туннэ но Шайтан тодэ, выль дуннеын милям котьмармы луоз шуыса. Но милемлы сое возьмано но малэсь ке но куштӥськоно но луэ, вылды. Соин Шайтан ӵектэ милемлы али ик ини майбыр улыны. Солэн потэ, ми Эксэйлык сярысь медам малпаське, нош нырысь ик ваньбур сярысь мед малпаськомы шуыса, али ик ваньзэ басьтон сярысь (Матф. 6:31—33).

¹⁸ Тросэз егит христианъёс выллем, 20 аресъем Киана ассэ пӧяны уг сёты. Со вера: «Мон тодӥсько, вань шуг-секытъёсмес Инмарлэн Эксэйлыкез гинэ быдтыны быгатоз шуыса». Кызьы сыӵе юн оскиськон Кианалэн малпанъёсыз но ужъёсыз вылын шӧдӥське? Со валэктэ: «Музъем вылын рай луоз шуыса оскиськон юрттэ мыным та дуннеын усьтӥськись луонлыкъёс шоры шонер учкыны. Мон уг тыршиськы аслам быгатонлыкъёсыным тросгес коньдон поттыны яке та дуннеысь ужын азинлыко луыны. Со интые, вань кужымме но дырме духовной ужпумъёсме быдэстонлы сётӥсько».

19, 20. Кызьы дышетсконо Инмарлэсь Кылзэ усто уже кутыны?

¹⁹ Со вакытэ, куке Павел Ефесын улӥсьёслы гожтэтсэ гожъяз, рим ожгарчиослэн ожмаськон дӥсьсы пӧлы пырись мечлэн кузьдалаез ог 50 сантиметр вал, но сое пыдын ожмаськыку уже куто вал. Рим ожгарчиос мечен туж усто выро вал, малы ке шуоно солы котькуд нунал дышетскизы.

²⁰ Павел Инмарлэсь Кылзэ мечен ӵошатӥз, кудзэ милемлы сётӥз Иегова. Но милемлы дышетсконо сое уже кутыны, куке ми осконмы сярысь вераськомы яке шонертэм малпанъёсмес тупатӥськомы (2 Кор. 10:4, 5; 2 Тим. 2:15). Кызьы дышетсконо духлэсь мечсэ усто уже кутыны? Тани мар вера 21 аресъем Себастиан: «Библиез лыдӟыкум, мон котькуд люкетысь одӥг кылбурез гожтыса кельтӥсько. Озьы мынам яратоно кылбуръёсы люкасько. Солы луыса мон Иеговаен огмылкыдын улыны быгатӥсько». Нош тани Дэниеллэн кылъёсыз, кудӥз сярысь вылӥынгес верамын вал: «Куке мон Библиез лыдӟисько, мон пусйисько кылбуръёсты, кудъёсыз, мон малпамъя, юрттозы соослы, кинъёслы ӟеч иворез верасько. Мон шӧдӥ, адямиос умой кылзо шуыса, куке адӟо, тон Библия сярысь мылысь-кыдысь вераськод но соослы юрттыны тыршиськод шуыса».

21. Малы милемлы Шайтанлэсь но периослэсь кышкано ӧвӧл?

²¹ Егит пиослэн но нылъёслэн кылъёссы, кудъёсыз сярысь та статьяын вераськиз, возьмато, милемлы Шайтанлэсь но периослэсь кышкано ӧвӧл шуыса. Со кышкыт тушмонъёс, но соосты вормыны луэ. Со сяна, соос котьку уз улэ. Ӝоген, куке Христослэн сюрс ар ӵоже кивалтонэз кутскоз, соос пыдэстэм дуннее куштэмын луозы но адямиосты пӧяны уз быгатэ ни. Нош сюрс ар ортчыса, соос быдтэмын луозы (Усьт. 20:1—3, 7—10). Ми умой тодӥськомы тушмонмес, солэсь пӧян амалъёссэ но пуктэм ужпумъёссэ. Иегова одно ик юрттоз милемлы соин ожмаськонын вормыны!